1 Timoteo 4:1-16
4 Kɛ̃lɛ, wiemɔ ni jɛ mumɔŋ lɛ* kɛɔ faŋŋ akɛ, be ko baaba wɔsɛɛ ni mɛi komɛi baatsi amɛhe kɛje hemɔkɛyeli lɛ he, amɛkɛ amɛjwɛŋmɔ baaya lakamɔ wiemɔi ni jɛ mumɔŋ* kɛ daimonioi atsɔɔmɔi anɔ,
2 kɛtsɔ amalelɔi asatofeemɔ nɔ, mɛi ni ashã amɛhenilee lɛ tamɔ akɛ dade kɛ la shãa nɔ lɛ.
3 Amɛguɔ gbalashihilɛ, ni amɛfãa mɛi akɛ amɛtsi amɛhe kɛje niyenii ní Nyɔŋmɔ bɔ akɛ mɛi ni yɔɔ hemɔkɛyeli ní le anɔkwale lɛ jogbaŋŋ lɛ kɛ shidaa aye lɛ he.
4 Ejaakɛ nɔ fɛɛ nɔ ni Nyɔŋmɔ bɔ lɛ hi, ni esaaa akɛ akpoɔ nɔ ko nɔ ko kɛ́ ada shi yɛ he be ni nine shɛ nɔ lɛ,
5 ejaakɛ atsɔ Nyɔŋmɔ wiemɔ lɛ kɛ sɔlemɔ ní asɔle ashwie nɔ lɛ nɔ atsuu he.
6 Kɛ́ okɛ ŋaawoo nɛɛ hã nyɛmimɛi lɛ, obaatsɔ Kristo Yesu sɔɔlɔ kpakpa, mɔ ni kɛ hemɔkɛyeli kɛ tsɔɔmɔ kpakpa ní onyiɛɔ sɛɛ kpaakpa lɛ wiemɔi lɛ elɛ ehe.
7 Shi kpoomɔ adesãi ní wooo Nyɔŋmɔ hiɛ nyam, tamɔ nɔ ni yeimeji tãa lɛ. Moŋ lɛ, okɛma ohiɛ akɛ obaatsɔse ohe koni oná Nyɔŋmɔjamɔ su.
8 Ejaakɛ gbɔmɔtsoŋ tsɔsemɔ* he yɛ sɛɛnamɔ yɛ gbɛ bibioo ko nɔ, shi Nyɔŋmɔjamɔ su he yɛ sɛɛnamɔ yɛ nibii fɛɛ mli, ejaakɛ ehiɛ wala ni yɔɔ amrɔ nɛɛ kɛ wala ni baaba lɛ he shiwoo.
9 Enɛ ji anɔkwa wiemɔ ní sa akɛ akpɛlɛ nɔ kwraa.
10 Enɛ hewɔ ni wɔtsuɔ nii waa ni wɔmiaa wɔhiɛ lɛ, ejaakɛ wɔhiɛ kã Nyɔŋmɔ hiɛkãalɔ lɛ nɔ, mɔ ni ji gbɔmɛi srɔtoi fɛɛ a-Yiwalaherelɔ lɛ, titri lɛ anɔkwafoi lɛ.
11 Yaa nɔ okɛ famɔi nɛɛ ahã ní otsɔɔ amɛ nii.
12 Kaafee nɔ ko ni hãŋ abu bo yɛ oblanyo ní oji lɛ hewɔ. Moŋ lɛ, feemɔ nɔkwɛmɔnɔ ohã anɔkwafoi lɛ yɛ wiemɔ mli, yɛ jeŋba mli, yɛ suɔmɔ mli, yɛ hemɔkɛyeli mli, yɛ hetsemɔ* mli.
13 Yaa nɔ okɛ ojwɛŋmɔ ama nikanemɔ yɛ mɛi ahiɛ, wiemɔkɛtsɔɔmɔ,* kɛ nitsɔɔmɔ nɔ kɛyashi maba.
14 Kaaku ohiɛ ofɔ̃ nɔkeenɔ ni yɔɔ omli, ní atsɔ gbalɛ kɛ asafoŋ onukpai akuu lɛ aniji ní amɛkɛŋmɛlɛ onɔ lɛ nɔ akɛhã bo lɛ nɔ.
15 Jwɛŋmɔ nibii nɛɛ anɔ;* okɛ ohe awo mli kwraa, koni mɛi fɛɛ ana ohiɛyaa faŋŋ.
16 Ohiɛ ahi ohe nɔ kɛ onitsɔɔmɔ lɛ nɔ be fɛɛ be. Kã he ofee nibii nɛɛ, ejaakɛ kɛ́ ofee nakai lɛ, obaahere bo diɛŋtsɛ kɛ mɛi ni boɔ bo toi lɛ fɛɛ yiwala.
Shishigbɛ Niŋmaa
^ Sht. ŋm., “mumɔ lɛ.”
^ Sht. ŋm., “lakamɔ mumɔi.”
^ Aloo “kpɔiaŋgbɔlemɔ.”
^ Aloo “krɔŋŋfeemɔ.”
^ Aloo “hewalɛwoo.”
^ Aloo “Susumɔ nibii nɛɛ ahe.”
