1 Timoteo 5:1-25
5 Kaawie nuu onukpa ko hiɛ nyanyaanya. Moŋ lɛ, okɛ mlihilɛ awie otsɔɔ lɛ akɛ tsɛ, oblahii hu akɛ nyɛmimɛi hii,
2 yei onukpai hu akɛ nyɛmɛi, oblayei hu akɛ nyɛmimɛi yei, yɛ hetsemɔ fɛɛ mli.
3 Susumɔ* yei okulafoi ni ji okulafoi lɛɛlɛŋ* lɛ ahe.
4 Shi kɛ́ yoo okulafo ko yɛ bii loo nabii lɛ, amɛkase bɔ ni ajieɔ Nyɔŋmɔjamɔ su kpo yɛ amɛ diɛŋtsɛ amɛwe klɛŋklɛŋ, ní amɛto amɛfɔlɔi kɛ amɛniimɛi kɛ amɛnaamɛi anajiaŋ kɛ nɔ ni sa amɛ, ejaakɛ enɛ sa Nyɔŋmɔ hiɛ.
5 Agbɛnɛ, yoo ni ji yoo okulafo lɛɛlɛŋ ní bɛ mɔ ni baakwɛ etsiabo lɛ hiɛ kãa Nyɔŋmɔ nɔ, ni eyaa nɔ ekɛ hiɛdɔɔ kpaa Nyɔŋmɔ fai ni esɔleɔ nyɔɔŋ kɛ shwane.
6 Shi yoo ní ŋmɛɔ ehe ehãa heloo lɛ akɔnɔ lɛ, ehiɛ kã moŋ shi egbo.
7 No hewɔ lɛ, yaa nɔ okɛ gbɛtsɔɔmɔi* nɛɛ ahã, koni akaná amɛhe sane ko atã.
8 Ekã shi faŋŋ akɛ, kɛ́ mɔ ko kwɛɛɛ lɛ diɛŋtsɛ emɛi, kɛ titri lɛ, lɛ diɛŋtsɛ eshĩabii lɛ, ekwa hemɔkɛyeli lɛ, ni eji gbɔmɔ gbonyo fe mɔ ni bɛ hemɔkɛyeli.
9 Dani akɛ yoo okulafo ko baafata mɛi ni aŋmala amɛgbɛ́ii lɛ ahe lɛ, esa akɛ efee mɔ ni ená afii nyɔŋmai ekpaa kɛyaa, ŋa ni gbã wu kome,
10 mɔ ni awieɔ ehe ekpakpa akɛ etsu nitsumɔi kpakpai, no ji akɛ, etsɔse bii, efee mɛi agbɔ, efɔ mɛi krɔŋkrɔŋi anaji ahe, eye ebua mɛi ni naa amanehulu lɛ, ekɛ ehe hã kɛtsu nitsumɔ kpakpa fɛɛ nitsumɔ kpakpa.
11 Nɔ ni tamɔɔɔ nakai lɛ, okɛ yei okulafoi ní darako lɛ akafata mɛi ni aŋmala amɛgbɛ́ii lɛ ahe, ejaakɛ kɛ́ amɛbɔlɛnamɔ akɔnɔi lɛ bafee gbɛtsiinii yɛ amɛ kɛ Kristo lɛ teŋ lɛ, amɛsumɔɔ akɛ amɛbote gbãla mli.
12 Ni amɛbaaná fɔbuu kojomɔ ejaakɛ amɛŋmɛɛ amɛ-klɛŋklɛŋ hemɔkɛyeli ní amɛjaje lɛ* he.
13 Yɛ nakai be lɛ mli nɔŋŋ lɛ, amɛkaseɔ hejɔ̃feemɔ hu, ni amɛkpaa shi kɛjɛɔ shĩa kome kɛyaa shĩa kroko; hɛɛ, jeee hejɔ̃ kɛkɛ amɛfeɔ, shi moŋ, amɛwiewieɔ mɛi ahe, ni amɛkɛ amɛhe woɔ mɛi asaji amli hu, amɛwieɔ nibii ni esaaa akɛ amɛwieɔ.
14 No hewɔ lɛ, miisumɔ akɛ yei okulafoi ní darako lɛ abote gbãla mli, amɛfɔ bii, amɛkwɛ amɛwe, amɛkahã shiteekɛwolɔ lɛ miiná hegbɛ ko kwraa kɛmiiwie eeshi wɔ.
15 Anɔkwa, mɛi komɛi ekpale kɛyanyiɛ Satan sɛɛ momo.
16 Kɛ́ yoo héyelilɔ ko yɛ wekumɛi ni ji yei okulafoi lɛ, eye ebua amɛ, koni jatsu akakã asafo lɛ nɔ. Ni no baahã asafo lɛ anyɛ aye abua mɛi ni ji yei okulafoi lɛɛlɛŋ* lɛ.
17 Asafoŋ onukpai lɛ, mɛi ni kwɛɔ nii anɔ jogbaŋŋ lɛ, abu amɛ akɛ amɛsa woo toi enyɔ, titri lɛ, mɛi ni tsuɔ nii waa yɛ wiemɔ kɛ nitsɔɔmɔ mli lɛ.
18 Ejaakɛ ŋmalɛ lɛ kɛɔ akɛ, “Esaaa akɛ owoɔ tsinanuu naabu kotoku be ni eegbee ŋmaa,” kɛ agbɛnɛ hu, “Nitsulɔ lɛ, enyɔmɔwoo sa lɛ.”
19 Kɛ́ akɛ sane fɔ̃ asafoŋ onukpa ko nɔ lɛ, kaakpɛlɛ nɔ, ja odasefoi enyɔ loo etɛ eye he odase dã.
20 Mɛi ni yaa nɔ amɛfeɔ esha lɛ, kunemɔ* amɛ yɛ mɛi fɛɛ hiɛ, koni no afee kɔkɔbɔɔ kɛhã mɛi ni eshwɛ lɛ.*
21 Mikɛ hiɛdɔɔ miifã bo yɛ Nyɔŋmɔ kɛ Kristo Yesu kɛ ŋwɛibɔfoi ní ahala lɛ ahiɛ akɛ otsu gbɛtsɔɔmɔi nɛɛ ahe nii, ni okashá ohe okojo, ni asaŋ okafee nɔ ko kɛ hiɛiaŋkwɛmɔ.
22 Kaaŋɔ oniji oŋmɛlɛ mɔ ko nɔ oya;* asaŋ kaaná gbɛfaŋnɔ yɛ mɛi krokomɛi ahe eshai amli; yaa nɔ onyiɛ yɛ hetsemɔ mli.
23 Kaanu nu dɔŋŋ,* shi nuu wein fioo yɛ omusu kɛ ohe ní yeɔ kpitiokpitio lɛ hewɔ.
24 Mɛi komɛi ahe eshai jeɔ kpo faŋŋ, ni no kɛ amɛ yaa kojomɔ mli amrɔ nɔŋŋ, shi mɛi krokomɛi anɔ feɔ faŋŋ sɛɛ mli.
25 Nakai nɔŋŋ hu nitsumɔi kpakpai jeɔ kpo faŋŋ, ni nɔ ni ejeee kpo faŋŋ lɛ hu anyɛŋ aya nɔ aŋɔtee.
Shishigbɛ Niŋmaa
^ Sht. ŋm., “Okɛ woo ahã.”
^ Aloo “yei okulafoi ní ehia amɛ lɛɛlɛŋ”; ni tsɔɔ akɛ, amɛbɛ mɔ ko ní yeɔ buaa amɛ.
^ Aloo “famɔi.”
^ Aloo “amɛtsutsu shiwoo lɛ.”
^ Aloo “yei okulafoi ní ehia amɛ lɛɛlɛŋ”; ni tsɔɔ akɛ, amɛbɛ mɔ ko ní yeɔ buaa amɛ.
^ Aloo “jajemɔ.”
^ Sht. ŋm., “koni mɛi ni eshwɛ lɛ ashe gbeyei.”
^ Ni tsɔɔ akɛ, okɛ oyaiyeli akahala mɔ ko.
^ Aloo “Kaanu nu pɛ dɔŋŋ.”
