1 Yohane 1:1-10
1 Nɔ ni yɔɔ kɛjɛ shishijee lɛ, nɔ ni wɔnu, nɔ ni wɔna kɛ wɔhiŋmɛii, nɔ ni wɔkwɛ ní wɔniji etara he, ní kɔɔ wala wiemɔ lɛ he,
2 (hɛɛ, ajie wala lɛ kpo, ni wɔna ni wɔmiiye odase ni wɔmiibɔ nyɛ naanɔ wala ní no mli lɛ ekɛ Tsɛ lɛ yɔɔ, ní ajie lɛ kpo atsɔɔ wɔ lɛ he amaniɛ),
3 nɔ ni wɔna ni wɔnu lɛ, no he amaniɛ wɔbɔɔ nyɛ hu lɛ, koni nyɛ hu nyɛkɛ wɔ abɔ naanyo.* Ni Tsɛ lɛ kɛ e-Bi Yesu Kristo hu fata wɔnaanyobɔɔ nɛɛ he.
4 Ni wɔmiiŋma nibii nɛɛ koni miishɛɛ ní wɔ kɛ nyɛ fɛɛ yɔɔ lɛ ayi obɔ.
5 Sane ni wɔnu kɛjɛ eŋɔɔ ní wɔmiibɔ nyɛ he amaniɛ lɛ nɛ: Nyɔŋmɔ lɛ, la ji lɛ, ni duŋ ko kwraa bɛ emli.*
6 Kɛ́ wɔkɛɛ akɛ, “Wɔkɛ lɛ miibɔ naanyo,” ni kɛ̃lɛ wɔyaa nɔ wɔnyiɛɔ yɛ duŋ mli lɛ, no lɛ wɔmiimale ni wɔhiii shi yɛ anɔkwale lɛ naa.
7 Shi kɛ́ wɔnyiɛɔ yɛ la lɛ mli, tamɔ bɔ ni lɛ diɛŋtsɛ hu eyɔɔ la lɛ mli lɛ, no lɛ wɔkɛ wɔhe miibɔ naanyo, ni e-Bi Yesu lá lɛ tsuɔ wɔhe kɛjɛɔ esha fɛɛ esha mli.
8 Kɛ́ wɔkɛɛ akɛ, “Esha bɛ wɔhe” lɛ, no lɛ wɔmiilaka wɔ diɛŋtsɛ wɔhe, ni anɔkwale lɛ bɛ wɔmli.
9 Kɛ́ wɔjaje wɔhe eshai lɛ wɔtsɔɔ lɛ, anɔkwafo kɛ jalɔ ji lɛ, ni no hewɔ lɛ, ekɛ wɔhe eshai lɛ baafa wɔ ni ebaatsuu wɔhe kɛjɛ nii ni ejaaa fɛɛ mli.
10 Kɛ́ wɔkɛɛ akɛ, “Wɔfeko esha” lɛ, no lɛ wɔmiihã eetsɔ amalelɔ, ni ewiemɔ lɛ bɛ wɔmli.
