1 Yohane 2:1-29
2 Mibii bibii, miiŋma nyɛ nibii nɛɛ koni nyɛkafee esha. Ni kɛ̃lɛ, kɛ́ mɔ ko fee esha ko lɛ, wɔyɛ yelikɛbualɔ ko* yɛ Tsɛ lɛ ŋɔɔ, Yesu Kristo, jalɔ lɛ.
2 Ni lɛ ji kpatamɔ afɔle* kɛhã wɔhe eshai lɛ, shi jeee wɔnɔ lɛ kɛkɛ, shi moŋ jeŋ muu lɛ fɛɛ nɔ lɛ hu.
3 Ni enɛ wɔkɛyoɔ akɛ wɔná wɔle lɛ, kɛji wɔtee nɔ wɔye ekitãi lɛ anɔ.
4 Mɔ ni kɛɔ akɛ, “Miná mile lɛ,” ni kɛ̃lɛ eyeee ekitãi lɛ anɔ lɛ, amalelɔ ji lɛ, ni anɔkwale lɛ bɛ mɔ nɛɛ mli.
5 Shi mɔ fɛɛ mɔ ni yeɔ ewiemɔ lɛ nɔ lɛ, Nyɔŋmɔ suɔmɔ lɛ eye emuu yɛ mɔ nɛɛ mli lɛɛlɛŋ. Ni enɛ wɔkɛleɔ akɛ wɔ kɛ lɛ efee ekome.
6 Mɔ ni kɛɔ akɛ ekɛ lɛ efee ekome lɛ, sɔ̃ kã enɔ akɛ eya nɔ enyiɛ tamɔ bɔ ni mɔ nɛɛ nyiɛ lɛ nɔŋŋ.
7 Mɛi ni asumɔɔ, jeee kitã hee miŋmaa nyɛ nɛɛ, shi moŋ kitã momo ni nyɛyɔɔ kɛjɛ shishijee lɛ. Kitã momo nɛɛ ji wiemɔ ni nyɛnu lɛ.
8 Asaŋ miiŋma nyɛ kitã hee, nɔ ni ji anɔkwale yɛ egbɛfaŋ kɛ nyɛ hu nyɛgbɛfaŋ lɛ, ejaakɛ duŋ lɛ miiho kɛmiiya ni anɔkwa la lɛ miitso momo.
9 Mɔ ni kɛɔ akɛ eyɛ la lɛ mli ni kɛ̃lɛ enyɛɔ enyɛmi lɛ, eyɛ duŋ lɛ mli lolo.
10 Mɔ ni sumɔɔ enyɛmi lɛ, eyɛ la lɛ mli, ni nanetɔ̃tɔmɔnɔ ko bɛ emli.
11 Shi mɔ ni nyɛɔ enyɛmi lɛ, duŋ lɛ mli eyɔɔ, ni duŋ lɛ mli enyiɛɔ, ni eleee he ni eyaa, ejaakɛ duŋ lɛ eshwila ehiŋmɛii.
12 Bii bibii, miiŋma nyɛ, ejaakɛ aŋɔ nyɛhe eshai lɛ afa nyɛ yɛ egbɛ́i lɛ hewɔ.
13 Tsɛmɛi, miiŋma nyɛ, ejaakɛ nyɛná nyɛle mɔ ni yɔɔ kɛjɛ shishijee lɛ. Oblahii, miiŋma nyɛ ejaakɛ nyɛye mɔ fɔŋ lɛ nɔ kunim. Gbekɛbii bibii, miiŋma nyɛ, ejaakɛ nyɛná nyɛle Tsɛ lɛ.
14 Tsɛmɛi, miiŋma nyɛ, ejaakɛ nyɛná nyɛle mɔ ni yɔɔ kɛjɛ shishijee lɛ. Oblahii, miiŋma nyɛ, ejaakɛ nyɛhe wa ni Nyɔŋmɔ wiemɔ lɛ yɛ nyɛmli ni nyɛye mɔ fɔŋ lɛ nɔ kunim.
15 Nyɛkasumɔa je lɛ aloo nibii ni yɔɔ je lɛ mli lɛ. Kɛ́ mɔ ko sumɔɔ je lɛ, belɛ Tsɛ lɛ suɔmɔ lɛ bɛ emli;
16 ejaakɛ nɔ fɛɛ nɔ ni yɔɔ je lɛ mli lɛ—nɔ ni heloo lɛ shweɔ lɛ kɛ nɔ ni hiŋmɛii lɛ shweɔ lɛ kɛ nii ni mɔ yɔɔ ni ekɛshwãa* lɛ—ejɛɛɛ Tsɛ lɛ mli, shi moŋ je lɛ mli ejɛ.
17 Kɛfata he lɛ, je lɛ kɛ nɔ fɛɛ nɔ ni yɔɔ mli ni mɛi shweɔ lɛ miiho kɛmiiya, shi mɔ ni feɔ Nyɔŋmɔ suɔmɔnaa nii lɛ baahi shi kɛya naanɔ.
18 Gbekɛbii bibii, naagbee ŋmɛlɛtswaa lɛ nɛ, ni bɔ ni nyɛnu akɛ antikristo lɛ miiba lɛ, amrɔ nɛɛ po lɛ antikristoi pii eba, ni anɔkwa sane nɛɛ hewɔ lɛ, wɔle akɛ naagbee ŋmɛlɛtswaa lɛ nɛ.
19 Wɔteŋ amɛjɛ amɛtee, shi kɛ̃lɛ amɛjeee wɔteŋ mɛi komɛi; ejaakɛ wɔteŋ mɛi komɛi ji amɛ kulɛ amɛkɛ wɔ baaya nɔ ahi shi. Shi amɛtee koni eje kpo faŋŋ akɛ jeee mɛi fɛɛ fata wɔhe.
20 Ni nyɛ lɛ, mɔ krɔŋkrɔŋ lɛ efɔ nyɛ mu, ni nyɛ fɛɛ nyɛyɛ nilee.
21 Jeee akɛ nyɛleee anɔkwale lɛ hewɔ miŋmaa nyɛ nɛɛ, shi moŋ ejaakɛ nyɛle anɔkwale lɛ, agbɛnɛ hu, ejaakɛ amale kome folo jɛɛɛ anɔkwale lɛ mli.
22 Namɔ ji amalelɔ, kɛ́ jeee mɔ ni kpoɔ akɛ Yesu ji Kristo lɛ? Mɔ nɛ ji antikristo lɛ, mɔ ni kpoɔ Tsɛ lɛ kɛ Bi lɛ.
23 Mɔ fɛɛ mɔ ni kpoɔ Bi lɛ, ebɛ Tsɛ lɛ hu. Shi mɔ fɛɛ mɔ ni jajeɔ akɛ eheɔ Bi lɛ nɔ eyeɔ lɛ, eyɛ Tsɛ lɛ hu.
24 Nyɛ lɛ, nɔ ni nyɛnu kɛjɛ shishijee lɛ, esa akɛ nyɛhã no aya nɔ ahi nyɛmli. Kɛji nɔ ni nyɛnu kɛjɛ shishijee lɛ tee nɔ ehi nyɛmli lɛ, no lɛ, nyɛ hu nyɛbaaya nɔ nyɛ kɛ Bi lɛ kɛ Tsɛ lɛ afee ekome.
25 Kɛfata he lɛ, enɛ ji shi ni lɛ diɛŋtsɛ ewo wɔ lɛ—naanɔ wala lɛ.
26 Mɛi ni miitao alaka nyɛ lɛ ahewɔ miŋmaa nyɛ nibii nɛɛ.
27 Ni nyɛ lɛ, mu ni efɔ nyɛ lɛ yɛ nyɛmli lolo, ni ehiaaa nyɛ akɛ mɔ ko atsɔɔ nyɛ nii; shi moŋ mu ni efɔ nyɛ lɛ miitsɔɔ nyɛ nibii fɛɛ he nii, ni eji anɔkwale ni ejeee amale. Bɔ ni mu ni efɔ nyɛ lɛ etsɔɔ nyɛ lɛ, nyɛyaa nɔ nyɛ kɛ lɛ afea ekome.
28 No hewɔ lɛ, gbekɛbii bibii, nyɛyaa nɔ nyɛ kɛ lɛ afea ekome, koni kɛ́ ajie lɛ kpo lɛ, wɔwie kɛ nɔmimaa ní wɔhiɛ akagbo ní wɔgbala wɔhe shi kɛje ehe be ni eba lɛ.
29 Kɛji nyɛle akɛ jalɔ ji lɛ lɛ, belɛ nyɛle hu akɛ mɔ fɛɛ mɔ ni hiɔ shi yɛ jalɛ naa lɛ afɔ lɛ kɛjɛ emli.
Shishigbɛ Niŋmaa
^ Aloo “mlidamɔlɔ ko.”
^ Aloo “afɔle ni akɛsaa gbɔmɛi kɛ Nyɔŋmɔ teŋ.”
^ Aloo “mɔ he ní epupuɔ yɛ nii ni eyɔɔ hewɔ.”
