2 Korintobii 13:1-14
13 Enɛ ji shii etɛ nɔ ní misaa mihe akɛ miiba nyɛŋɔɔ. “Yɛ odasefoi enyɔ loo etɛ awiemɔ* naa lɛ, esa akɛ sane fɛɛ sane ama shi.”
2 Eyɛ mli akɛ amrɔ nɛɛ mibɛ nyɛŋɔɔ moŋ, shi etamɔ nɔ ni miyɛ nyɛŋɔɔ nɔ ni ji shii enyɔ nɔ, ni miitsɔ hiɛ miibɔ mɛi ni be ko ni eho lɛ amɛfee esha, kɛ mɛi krokomɛi lɛ fɛɛ kɔkɔ akɛ, kɛ́ miná miba ekoŋŋ lɛ, mikɛ amɛhe ekeŋ amɛ,
3 ejaakɛ nyɛmiitao odaseyeli ni tsɔɔ akɛ, Kristo, mɔ ni gbedeee yɛ nyɛgbɛfaŋ, shi moŋ ehe wa yɛ nyɛteŋ lɛ, miitsɔ minɔ eewie lɛɛlɛŋ.
4 Ejaakɛ agbe lɛ yɛ tso jaŋŋ lɛ nɔ yɛ gbedemɔ hewɔ lɛɛlɛŋ, shi ehiɛ kã yɛ Nyɔŋmɔ hewalɛ lɛ hewɔ. Eji anɔkwale akɛ, wɔ hu wɔgbede, tamɔ bɔ ni tsutsu ko lɛ egbede lɛ moŋ, shi wɔ kɛ lɛ fɛɛ hiɛ baakamɔ yɛ Nyɔŋmɔ hewalɛ ni yɔɔ nyɛnɔ lɛ hewɔ.
5 Nyɛyaa nɔ nyɛpɛia nyɛmli nyɛkwɛa akɛ nyɛyɛ hemɔkɛyeli lɛ mli lo; nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa. Aloo nyɛyɔseee akɛ Yesu Kristo kɛ nyɛ efee ekome? Ja akpɛlɛɛɛ nyɛnɔ.
6 Mihiɛ kã nɔ yɛ anɔkwale mli akɛ nyɛbaayɔse akɛ wɔjeee mɛi ni akpɛlɛɛɛ amɛnɔ.
7 Agbɛnɛ, wɔmiisɔle wɔmiibi Nyɔŋmɔ koni nyɛkafee nɔ fɔŋ ko kwraa, jeee koni wɔ lɛ wɔfee tamɔ mɛi ni akpɛlɛ amɛnɔ, shi moŋ koni nyɛ lɛ nyɛfee nɔ ni hi, kɛ́ wɔ lɛ wɔfee tamɔ mɛi ni akpɛlɛɛɛ amɛnɔ po.
8 Ejaakɛ wɔnyɛŋ wɔfee nɔ ko wɔshi anɔkwale lɛ, shi moŋ kɛ́ wɔɔfee nɔ ko lɛ, wɔɔfee wɔhã anɔkwale lɛ.
9 Ekã shi faŋŋ akɛ, be fɛɛ be ni wɔbaafee gbedee, shi nyɛ lɛ nyɛyɛ hewalɛ lɛ, wɔnáa miishɛɛ babaoo. Ni enɛ ji nɔ ni wɔsɔleɔ wɔbiɔ, no ji ní aya nɔ ajaje nyɛ.
10 No hewɔ ni miŋma nibii nɛɛ be ni mibɛ nyɛŋɔɔ lɛ, koni kɛ́ miba nyɛŋɔɔ, ní mikɛ hegbɛ ni Nuŋtsɔ lɛ kɛhã mi akɛ mitswa nyɛ mima shi, shi jeee ní mikumɔ nyɛ mishwie shi lɛ miitsu nii lɛ, ehe akabahia ni mikɛ nyɛ aye kɛ joomɔ.
11 Naagbee lɛ, nyɛmimɛi, be fɛɛ be lɛ, nyɛnáa miishɛɛ, nyɛhãa ajajea nyɛ, nyɛhãa ashɛjea nyɛmii, nyɛhãa nyɛjwɛŋmɔ afea ekome, nyɛhia shi yɛ toiŋjɔlɛ mli; ni suɔmɔ kɛ toiŋjɔlɛ Nyɔŋmɔ lɛ kɛ nyɛ baahi shi.
12 Nyɛkɛ naashɔmɔ krɔŋkrɔŋ aŋaŋaa nyɛhe.
13 Mɛi krɔŋkrɔŋi lɛ fɛɛ miiŋa nyɛ.
14 Nuŋtsɔ Yesu Kristo duromɔ lɛ kɛ Nyɔŋmɔ suɔmɔ lɛ kɛ gbɛfaŋnɔ ni nyɛnáa yɛ mumɔ krɔŋkrɔŋ lɛ mli lɛ kɛ nyɛ fɛɛ ahi shi.
Shishigbɛ Niŋmaa
^ Sht. ŋm., “adaaŋ wiemɔ.”
