2 Korintobii 7:1-16
7 No hewɔ lɛ, nyɛ mɛi ni asumɔɔ, akɛni wɔná shiwoi nɛɛ hewɔ lɛ, nyɛhãa wɔtsua wɔhe kɛjea nɔ fɛɛ nɔ ni buleɔ mɔ yɛ heloŋ kɛ mumɔŋ lɛ he, ní wɔhã wɔkrɔŋkrɔŋfeemɔ lɛ aye emuu yɛ Nyɔŋmɔ gbeyeishemɔ mli.
2 Nyɛhãa wɔ gbɛ yɛ nyɛtsuii amli. Wɔtɔ̃ko mɔ ko nɔ, wɔhãko mɔ ko afite, wɔyeko mɔ ko amim.
3 Miwieee enɛ ní mikɛbu nyɛ fɔ. Ejaakɛ miwie momo akɛ nyɛyɛ wɔtsuii amli, koni yɛ gbele mli jio, wala mli jio, wɔkɛ nyɛ aya nɔ afee ekome.
4 Minyɛɔ mikɛ nyɛ wieɔ kɛ nɔmimaa babaoo. Mikɛ nyɛ shiɔ mitsitsi babaoo. Miyi obɔ kɛ miishɛjemɔ; ni miyi kɛteke nɔ kɛ miishɛɛ yɛ wɔmanehulu lɛ fɛɛ mli.
5 Anɔkwa, be ni wɔba Makedonia lɛ, wɔgbɔmɔtsei* lɛ náaa hejɔlɛ kwraa, shi wɔtee nɔ wɔna amanehulu yɛ gbɛ fɛɛ gbɛ nɔ—kponɔgbɛ lɛ, nɔmɔi, ni yɛ mligbɛ lɛ, gbeyeishemɔi.
6 Shi Nyɔŋmɔ, mɔ ni shɛjeɔ mɛi ni tsui ekumɔ lɛ amii lɛ tsɔ wɔŋɔɔ ni Tito ba lɛ nɔ eshɛje wɔmii;
7 ni jeee kɛtsɔ wɔŋɔɔ ni eba lɛ nɔ kɛkɛ, shi moŋ kɛtsɔ miishɛjemɔ ni ená yɛ nyɛhewɔ lɛ hu nɔ, ejaakɛ ebabɔ wɔ amaniɛ akɛ, nyɛmiishwe waa ni nyɛna mi, nyɛmiiye awerɛho waa, ni nyɛmiisusu mihe waa;* ni no hewɔ lɛ, miná miishɛɛ babaoo fe tsutsu lɛ.
8 Ejaakɛ kɛ́ wolo ni miŋma nyɛ lɛ hã nyɛwerɛ ho nyɛhe po lɛ, mishwaaa mihe. Kɛ́ klɛŋklɛŋ lɛ mishwa mihe po lɛ (akɛni mina akɛ nakai wolo lɛ hã nyɛwerɛ ho nyɛhe, shi be kukuoo kɛkɛ hewɔ lɛ),
9 amrɔ nɛɛ mimii eshɛ mihe naakpa, jeee akɛni nyɛwerɛ ho nyɛhe lɛ kɛkɛ hewɔ, shi moŋ akɛni nyɛwerɛhoyeli lɛ hã nyɛtsake nyɛtsui lɛ hewɔ. Ejaakɛ nyɛwerɛ ho nyɛhe bɔ ni sa Nyɔŋmɔ hiɛ, ni no hewɔ lɛ, nɔ ko fɔŋ ko bako nyɛnɔ yɛ wɔhewɔ.
10 Ejaakɛ awerɛhoyeli ni sa Nyɔŋmɔ hiɛ lɛ tsɛɔ tsuitsakemɔ ni kɛ mɔ yaa yiwalaheremɔ mli kɛbaa, ni ashwaaa he yɛ no hewɔ; shi awerɛhoyeli ni sa je lɛ hiɛ lɛ tsɛɔ gbele kɛbaa.
11 Ejaakɛ nyɛkwɛa mɔdɛŋbɔɔ babaoo ni nyɛwerɛhoyeli ni sa Nyɔŋmɔ hiɛ lɛ etsɛ ehã nyɛ, hɛɛ, ehã nyɛmiitse nyɛgbɛ́i he, hɛɛ, ehã nyɛmli ewo la, hɛɛ, ehã nyɛmiishe gbeyei, hɛɛ, ehã nyɛmiishwe waa, hɛɛ, ehã nyɛhiɛ edɔ, hɛɛ, ehã nyɛmiijaje efɔŋ lɛ! Nyɛtsɔɔ yɛ nɔ fɛɛ nɔ mli akɛ nyɛhe tse* yɛ sane nɛɛ mli.
12 Miŋma nyɛ moŋ, shi jeee mɔ ni tɔ̃ lɛ hewɔ, asaŋ jeee mɔ ni atɔ̃ enɔ lɛ hu hewɔ, shi moŋ koni wɔhe mɔdɛŋ ni nyɛbɔɔ lɛ aje kpo faŋŋ yɛ nyɛteŋ yɛ Nyɔŋmɔ hiɛ.
13 No hewɔ ni ashɛje wɔmii lɛ.
Kɛ̃lɛ, kɛfata wɔmiishɛjemɔ lɛ he lɛ, wɔná miishɛɛ babaoo fe tsutsu lɛ yɛ Tito miishɛɛ lɛ hewɔ, ejaakɛ nyɛ fɛɛ nyɛhã emumɔ he jɔ lɛ.
14 Ejaakɛ kɛ́ mikɛ nyɛ shi mitsitsi mitsɔɔ lɛ lɛ, nyɛwoko mi hiɛgbele; shi taakɛ nibii fɛɛ ni wɔkɛɛ nyɛ lɛ ji anɔkwale lɛ, nakai nɔŋŋ wɔtsitsi ni wɔshi wɔtsɔɔ Tito lɛ hu efee anɔkwale.
15 Agbɛnɛ hu, edɔɔ nyɛhe babaoo fe tsutsu lɛ, ejaakɛ ekaiɔ nyɛ fɛɛ nyɛtoiboo lɛ, kɛ bɔ ni nyɛkɛ gbeyeishemɔ kɛ hekpokpomɔ here lɛ lɛ.
16 Miná miishɛɛ naakpa akɛ yɛ gbɛ fɛɛ gbɛ nɔ lɛ, manyɛ mamu mafɔ̃ nyɛnɔ.*
Shishigbɛ Niŋmaa
^ Sht. ŋm., “wɔheloo.”
^ Sht. ŋm., “nyɛhiɛdɔɔ kɛhã mi.”
^ Aloo “nyɛyɛ krɔŋŋ; efɔŋ ko bɛ nyɛhe.”
^ Aloo eeenyɛ efee akɛ, “mináa ekãa babaoo yɛ nyɛhewɔ.”
