2 Tesalonikabii 2:1-17
2 Shi nyɛmimɛi, nɔ ni kɔɔ be ni wɔ-Nuŋtsɔ Yesu Kristo eba kɛ wɔnaa ni abaabua kɛya eŋɔɔ lɛ he lɛ, wɔmiibi nyɛ
2 akɛ nyɛkahãa ahosoa nyɛ oya kɛjea nyɛsusumɔ lɛ he, ni asaŋ nyɛkahãa wiemɔ ni jɛ mumɔŋ* loo sane ko ni awie loo wolo ko ni akɛɛ ejɛ wɔŋɔɔ lɛ miihã nyɛtsuii miifã, akɛ Yehowa* gbi lɛ eshɛ etã.
3 Nyɛkahãa mɔ ko miihã nyɛmiidu gbɛ* yɛ gbɛ ko gbɛ ko nɔ, ejaakɛ ebaŋ ja jamɔkwamɔ lɛ eba dã ní ajie mlatɔmɔ gbɔmɔ, ni ji hiɛkpatamɔ bi lɛ kpo.
4 Eji shiteekɛwolɔ, ni ewóɔ ehe nɔ yɛ nɔ fɛɛ nɔ ni atsɛɔ lɛ nyɔŋmɔ loo nɔ ko ni ajáa* lɛ nɔ, ni no hewɔ lɛ, etaa Nyɔŋmɔ sɔlemɔwe lɛ ni ekɛ ehe tsɔɔ faŋŋ akɛ nyɔŋmɔ ji lɛ.
5 Ani nyɛkaiii akɛ be ni mikɛ nyɛ yɔɔ lɛ, no mli lɛ mikɛɔ nyɛ nibii nɛɛ?
6 Ni amrɔ nɛɛ, nyɛle nɔ ni tsuɔ nii akɛ gbɛtsiinɔ koni ajie lɛ kpo yɛ lɛ diɛŋtsɛ ebe lɛ mli lɛ.
7 Anɔkwa, nɛkɛ mlatɔmɔ nɛɛ he teemɔŋ sane lɛ miitsu nii momo, shi ja mɔ ni tsuɔ nii amrɔ nɛɛ akɛ gbɛtsiinɔ lɛ eje gbɛ lɛ nɔ dã.
8 No sɛɛ lɛ, anɔkwa, abaajie mlatɔlɔ lɛ kpo, mɔ ni Nuŋtsɔ Yesu baatsɔ edaaŋ mumɔ lɛ nɔ egbe lɛ ní etsɔ be ni eba ní eje kpo faŋŋ lɛ nɔ ekpãtã ehiɛ lɛ.
9 Shi be ni mlatɔlɔ lɛ eba lɛ, ebaatsɔ Satan hewalɛ nɔ etsu nii kɛ hewalɛ nitsumɔ fɛɛ hewalɛ nitsumɔ kɛ amale okadii kɛ naakpɛɛ nii*
10 kɛ nɔ fɛɛ nɔ ni ejaaa ni akɛlakaa mɛi. Enɛɛmɛi fɛɛ yɛ kɛhã mɛi ni hiɛ miikpãtã lɛ akɛ toigbalamɔ, ejaakɛ amɛnáaa suɔmɔ amɛhãaa anɔkwale lɛ ni amɛkpɛlɛɛɛ nɔ hu bɔ ni afee ni ahere amɛyiwala.
11 Enɛ hewɔ ni Nyɔŋmɔ hã lakamɔ hewalɛ ko ba amɛnɔ koni amɛhe amale lɛ amɛye lɛ,
12 bɔ ni afee ni akojo amɛ fɛɛ ejaakɛ amɛheee anɔkwale lɛ amɛyeee, shi moŋ amɛná nii ni ejaaa he miishɛɛ.
13 Shi, nyɛmimɛi ni Yehowa* sumɔɔ, sɔ̃ kã wɔnɔ akɛ wɔdaa Nyɔŋmɔ shi be fɛɛ be yɛ nyɛhewɔ, ejaakɛ kɛjɛ shishijee lɛ, Nyɔŋmɔ tsɔ nyɛhe ni etsuu kɛ emumɔ lɛ kɛ hemɔkɛyeli ni nyɛyɔɔ yɛ anɔkwale lɛ mli lɛ nɔ ehala nyɛ kɛhã yiwalaheremɔ.
14 Etsɔ sane kpakpa ní wɔjajeɔ lɛ nɔ etsɛ nyɛ kɛba enɛ he, koni nyɛná wɔ-Nuŋtsɔ Yesu Kristo anunyam lɛ.
15 No hewɔ lɛ, agbɛnɛ, nyɛmimɛi, nyɛdamɔa shi shiŋŋ ní nyɛyaa nɔ nyɛhiɛa kusumii* ní atsɔɔ nyɛ lɛ mli, kɛji atsɔ sane ni awie nɔ atsɔɔ nyɛ jio, atsɔ wolo ni jɛ wɔŋɔɔ nɔ atsɔɔ nyɛ jio.
16 Kɛfata he lɛ, wɔ-Nuŋtsɔ Yesu Kristo diɛŋtsɛ kɛ Nyɔŋmɔ ni ji wɔ-Tsɛ lɛ, mɔ ni sumɔ wɔ ni etsɔ duromɔ lɛ nɔ ehã wɔ naanɔ miishɛjemɔ kɛ hiɛnɔkamɔ kpakpa lɛ,
17 ashɛje nyɛtsuii amii ni ehã nyɛhe awa* yɛ nitsumɔ kpakpa kɛ wiemɔ kpakpa fɛɛ mli.
Shishigbɛ Niŋmaa
^ Aloo “mumɔ ko.” Kwɛmɔ Wiemɔi Titrii Amligbalamɔ lɛ, “Mumɔ.”
^ Kwɛmɔ Wiemɔi Titrii Amligbalamɔ lɛ.
^ Aloo “lakaa nyɛ.”
^ Aloo “akɛ woo hãa.”
^ Aloo “gbalɛ okadii.”
^ Kwɛmɔ Wiemɔi Titrii Amligbalamɔ lɛ.
^ Aloo “gbɛtsɔɔmɔi.”
^ Aloo “ewaje nyɛ.”
