2 Timoteo 3:1-17
3 Shi ná enɛ ole akɛ naagbee gbii lɛ amli lɛ, bei krɛdɛɛ ní jaraa baaba.
2 Ejaakɛ gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, musubɔlɔi, fɔlɔi anɔ toigbolɔi, trumui, mɛi ni yeee anɔkwa,
3 mɛi ni bɛ adebɔɔ naa hedɔɔ, mɛi ni anyɛɛɛ akɛ amɛ afee kpaŋmɔ, mɛi-aheguɔgbelɔi, mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa,
4 mɛi ni jieɔ mɛi amɛhãa, kuɛŋtilɔi, mɛi ni pupuɔ amɛhe, mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ,
5 mɛi ni yɛ kponɔgbɛ lɛ amɛhiɛ Nyɔŋmɔjamɔ su shi amɛkwa emli hewalɛ lɛ; tsi ohe kɛje nɛkɛ gbɔmɛi ahe.
6 Mɛi komɛi teɔ shi yɛ mɛnɛɛmɛi ateŋ, ni amɛjuɔ shi amɛboteɔ shĩai amli, ni amɛŋɔɔ yei ní egbede ní eshai edɔdɔo amɛ ní akɔnɔi srɔtoi kpalaa amɛ lɛ anom,
7 yei ní kaseɔ nii daa, ni kɛ̃lɛ amɛnyɛɛɛ amɛshɛ anɔkwale lɛ he nilee krɔŋŋ lɛ he lɛ.
8 Agbɛnɛ, tamɔ bɔ ni Yane kɛ Yambre te shi wo Mose lɛ, nakai nɔŋŋ mɛnɛɛmɛi hu yaa nɔ amɛteɔ shi amɛwoɔ anɔkwale lɛ. Mɛi nɛɛ ajwɛŋmɔ efite kwraa, ni yɛ hemɔkɛyeli lɛ gbɛfaŋ lɛ, akpɛlɛɛɛ amɛnɔ.
9 Kɛ̃lɛ, amɛyaŋ amɛhiɛ dɔŋŋ, ejaakɛ amɛbuulufeemɔ* lɛ baaje kpo faŋŋ yɛ mɛi fɛɛ hiɛ, tamɔ bɔ ni eba lɛ yɛ nakai hii enyɔ lɛ agbɛfaŋ lɛ.
10 Shi bo lɛ, onyiɛ mitsɔɔmɔ, mishihilɛ gbɛ, miyiŋtoo, mihemɔkɛyeli, mitsuishitoo, misuɔmɔ, mishifimɔ lɛ sɛɛ kpaakpa,
11 ni ole miyiwai kɛ mimanehului lɛ, tamɔ nɔ ni mikɛkpe yɛ Antiokia, yɛ Ikonium, yɛ Listra lɛ nɛkɛ. Mifi shi yɛ yiwai nɛɛ amli, ni Nuŋtsɔ lɛ jie mi kɛjɛ fɛɛ mli.
12 Anɔkwa, mɛi fɛɛ ni taoɔ akɛ amɛhi shi yɛ Nyɔŋmɔjamɔ su naa yɛ Kristo Yesu mli lɛ, abaawa amɛ hu yi.
13 Shi gbɔmɛi fɔji kɛ shishiulɔi baawo wu yɛ efɔŋ mli, ni amɛbaalaka mɛi ni amɛ hu abaalaka amɛ.
14 Shi bo lɛ, yaa nɔ ohi shi yɛ nibii ni okase ní hã oyiŋ tsɔ ní ohe oye lɛ amli, ejaakɛ ole mɛi aŋɔɔ ní okase yɛ,
15 ni akɛ, obifabiiaŋ ojɛ ole ŋmalɛi krɔŋkrɔŋi lɛ, ní baanyɛ ahã otsɔ hiɛshikalɔ ní ahere oyiwala akɛni oyɛ Kristo Yesu mli hemɔkɛyeli lɛ hewɔ.
16 Ŋmalɛ lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔkunemɔ,* kɛhã nibii ajajemɔ,* kɛhã tsɔsemɔ yɛ jalɛ mli,
17 koni Nyɔŋmɔ gbɔmɔ lɛ afee mɔ ni sa jogbaŋŋ, ní asaa lɛ jogbaŋŋ kɛhã nitsumɔ kpakpa fɛɛ nitsumɔ kpakpa.
