3 Yohane 1:1-14
1 Onukpa lɛ* ŋma kɛyahã Gaio, mɔ ni asumɔɔ, ní mi hu misumɔɔ lɛ yɛ anɔkwale mli lɛ.
2 Mɔ ni asumɔɔ, misɔlemɔ ji akɛ oya nɔ oshwere yɛ nibii fɛɛ mli, ní oná gbɔmɔtsoŋ hewalɛ kpakpa hu, tamɔ bɔ ni amrɔ nɛɛ oshwereɔ* lɛ.
3 Ejaakɛ miná miishɛɛ babaoo be ni nyɛmimɛi lɛ ba ni amɛbaye anɔkwale lɛ ni ohiɛ mli lɛ he odase lɛ, bɔ ni oyaa nɔ onyiɛɔ yɛ anɔkwale lɛ mli lɛ.
4 Mibɛ miishɛɛ* ni da fe enɛ: akɛ manu akɛ mibii lɛ miiya nɔ amɛmiinyiɛ yɛ anɔkwale lɛ mli.
5 Mɔ ni asumɔɔ, ohãa anaa akɛ oyeɔ anɔkwa yɛ nɔ ni ofeɔ ohãa nyɛmimɛi lɛ mli, eyɛ mli moŋ akɛ gbɔi ji* amɛ.
6 Amɛbaye osuɔmɔ lɛ he odase amɛtsɔɔ yɛ asafo lɛ hiɛ. Ofainɛ, wo amɛ gbɛ bɔ ni baasa Nyɔŋmɔ hiɛ.
7 Ejaakɛ egbɛ́i lɛ hewɔ amɛtee ni amɛheee nɔ ko nɔ ko yɛ jeŋmajiaŋbii lɛ adɛŋ lɛ.
8 No hewɔ lɛ, sɔ̃ kã wɔnɔ akɛ wɔfee mɛi ni tamɔ nɛkɛ lɛ gbɔ, koni wɔtsɔmɔ nanemɛi nitsulɔi yɛ anɔkwale lɛ mli.
9 Miŋma wolo ko mimaje asafo lɛ, shi Diotrefe, mɔ ni taoɔ klɛŋklɛŋ gbɛhe yɛ nyɛteŋ lɛ, ekpɛlɛɛɛ nɔ ko nɔ ko ni jɛ wɔŋɔɔ lɛ nɔ kɛ bulɛ.
10 No hewɔ ni kɛ́ miba lɛ, magbala jwɛŋmɔ kɛya enitsumɔi ni etsuɔ lɛ anɔ, bɔ ni ewieɔ wɔhe wiemɔi fɔji etsɔɔ mɛi lɛ.* Enɛ tete faaa hãaa lɛ, shi ehereee nyɛmimɛi lɛ kɛ bulɛ; ni mɛi hu ni sumɔɔ akɛ amɛhere amɛ lɛ, ebɔɔ mɔdɛŋ akɛ etsĩ amɛ gbɛ, ni eshwieɔ amɛ kɛjeɔ asafo lɛ mli.
11 Mɔ ni asumɔɔ, kaakase nɔ gbonyo, shi moŋ kasemɔ nɔ kpakpa. Mɔ ni feɔ nɔ kpakpa lɛ, ejɛ Nyɔŋmɔ mli. Mɔ ni feɔ nɔ gbonyo lɛ, enako Nyɔŋmɔ.
12 Demetrio lɛ, amɛ fɛɛ amɛwieɔ ehe ekpakpa ni anɔkwale lɛ diɛŋtsɛ hu wieɔ ehe ekpakpa. Anɔkwa, wɔ hu wɔyeɔ ehe odase, ni nyɛle akɛ odase ni wɔyeɔ lɛ, anɔkwale ni.
13 Kulɛ, miyɛ nibii pii ni maŋma bo, shi misumɔɔɔ akɛ miyaa nɔ mikɛ pɛn kɛ iŋki ŋmaa bo.
14 Shi mihiɛ kã nɔ akɛ etsɛŋ ni mana bo, ni wɔbaawie hiɛ kɛ hiɛ.
Toiŋjɔlɛ ahã bo.
Nanemɛi lɛ* miiŋa bo. Tsĩ nanemɛi lɛ agbɛíi atã ekomekome oŋa amɛ ohã mi.
Shishigbɛ Niŋmaa
^ Aloo “Asafoŋ onukpa lɛ.”
^ Aloo “osusuma shwereɔ.”
^ Aloo eeenyɛ efee akɛ, “mibɛ nɔ ko ni hãa midaa shi.”
^ Aloo “oleee.”
^ Sht. ŋm., “ewieɔ wɔhe kɛ wiemɔi fɔji.”
^ “Nanemɛi lɛ” ni akɛtsu nii yɛ biɛ lɛ kɔɔ nyɛmimɛi hii kɛ yei ni ji Kristofoi lɛ he.
