Bɔfoi 10:1-48
10 Agbɛnɛ, nuu ko yɛ Kaisarea ni atsɛɔ lɛ Kornelio, eji asraafoiatsɛ* yɛ asraafoi akuu ko ni atsɛɔ lɛ Italia kuu* lɛ mli.
2 Nyɔŋmɔ jálɔ ji lɛ ni ekɛ eshĩabii lɛ fɛɛ sheɔ Nyɔŋmɔ gbeyei, ni efeɔ ohiafoi ejuji babaoo ni eyaa nɔ ekɛ hiɛdɔɔ kpaa Nyɔŋmɔ fai.
3 Aaafee ŋmɛlɛtswaa ni ji nɛɛhu lɛ nɔ* lɛ, ena yɛ ninaa mli faŋŋ akɛ Nyɔŋmɔ bɔfo* ko ba eŋɔɔ bakɛɛ lɛ akɛ: “Kornelio!”
4 Kornelio kwɛ lɛ gãa, ní gbeyei emɔ lɛ, ni ebi akɛ: “Mɛni sane, Onukpa?” Ekɛɛ lɛ akɛ: “Osɔlemɔi kɛ ejuji ni ofeɔ ohiafoi lɛ ekwɔ kɛtee ŋwɛi akɛ kaimɔnɔ yɛ Nyɔŋmɔ hiɛ.
5 No hewɔ lɛ, agbɛnɛ tsu hii kɛya Yopa ni amɛyatsɛ Simon ni atsɛɔ lɛ Petro hu lɛ kɛba.
6 Nuu nɛɛ eyato Simon kroko, ni ji kooloo hewolo kpoolɔ, ní shĩa yɔɔ ŋshɔ lɛ naa lɛ ŋɔɔ akɛ gbɔ.”*
7 Be ni ŋwɛibɔfo ni kɛ lɛ wie lɛ shi etee nɔŋŋ lɛ, etsɛ etsuji lɛ ateŋ mɛi enyɔ kɛ asraafonyo Nyɔŋmɔ jálɔ ko ni ji esɔɔlɔi lɛ ateŋ mɔ kome,
8 ni egba amɛ nɔ fɛɛ nɔ, ni etsu amɛ Yopa.
9 Enɔ jetsɛremɔ be ni amɛnyiɛ gbɛ lɛ nɔ ni amɛmiibɛŋkɛ maŋ lɛ, Petro kwɔ kɛtee tsũ lɛ yiteŋ aaafee ŋmɛlɛtswaa ni ji ekpaa lɛ nɔ* koni eyasɔle.
10 Shi hɔmɔ ye lɛ naakpa ni eetao nii eye. Be ni amɛfeɔ niyenii lɛ, efee tamɔ nɔ enyɔ enɔ,
11 ni ena akɛ ŋwɛi egbele ni ena nɔ ko miikpeleke shi tamɔ klala agbo ni ahiɛ ekoji ejwɛ lɛ mli aashiu kɛmiiba shikpɔŋ;
12 ni shikpɔŋ nɔ kooloi naji-ejwɛɛjwɛtsɛmɛi kɛ kooloi ni wamɔɔ kɛ ŋwɛi loofɔji srɔtoi lɛ fɛɛ eko yɛ mli.
13 Kɛkɛ ni gbee ko kɛɛ lɛ akɛ: “Petro, tee shi, gbee ni oye!”
14 Shi Petro kɛɛ akɛ: “Dabida, Nuŋtsɔ, ejaakɛ miyeko nɔ ko ni abule ni he tseee dã.”
15 Ni gbee lɛ saa kɛɛ lɛ nɔ ni ji shii enyɔ nɔ akɛ: “Kpa nibii ni Nyɔŋmɔ etsuu amɛhe lɛ tsɛmɔ akɛ nibii ni abule.”
16 Enɛ tee nɔ nɔ ni ji shii etɛ nɔ, ni amrɔ lɛ awó nakai nɔ lɛ kɛtee ŋwɛi.
17 Be ni Petro hiɛ miifee lɛ yaa lolo yɛ nɔ ni nii ni ena lɛ tsɔɔ lɛ he lɛ, amrɔ lɛ, hii ni Kornelio tsu amɛ lɛ bi he ni Simon we lɛ yɔɔ, ni amɛbadamɔ agbó lɛ naa.
18 Amɛtsɛ ni amɛbi kɛji Simon ní atsɛɔ lɛ Petro hu lɛ ebato gbɔ yɛ jɛmɛ.
19 Be ni Petro kã he ejwɛŋɔ ninaa lɛ nɔ lɛ, mumɔ lɛ kɛɛ: “Naa! Hii etɛ miibi oshi.
20 No hewɔ lɛ, tee shi, kpelekemɔ shi ni okɛ amɛ aya, ni oyiŋ akafee bo kɔshikɔshi kwraa, ejaakɛ mi mitsu amɛ.”
21 Kɛkɛ ni Petro kpeleke shi kɛtee hii lɛ aŋɔɔ ni ekɛɛ: “Naa mi, miji mɔ ni nyɛtaoɔ lɛ. Mɛni hewɔ nyɛba biɛ?”
22 Amɛkɛɛ: “Kornelio, asraafoiatsɛ ko ni ji jalɔ kɛ Nyɔŋmɔ gbeyeishelɔ ní Yudafoi amaŋ muu lɛ fɛɛ wieɔ ehe ekpakpa lɛ, lɛ ŋwɛibɔfo krɔŋkrɔŋ ko kɛ Nyɔŋmɔ gbɛtsɔɔmɔi hã akɛ etsu ni abatsɛ bo kɛba eshĩa ni ebo nɔ ni oyɔɔ kɛɛmɔ lɛ toi.”
23 No hewɔ lɛ, ekpee amɛ kɛba mli, ni eto amɛ akɛ egbɔi.
Enɔ jetsɛremɔ lɛ, ete shi ni ekɛ amɛ tee, ni nyɛmimɛi hii ni yɔɔ Yopa lɛ ateŋ mɛi komɛi fata ehe kɛtee.
24 Enɔ jetsɛremɔ lɛ, eyashɛ Kaisarea. Anɔkwa, Kornelio miikpa amɛ gbɛ, ni etsɛ ewekumɛi kɛ enanemɛi juji kɛkpe.
25 Be ni Petro bote mli lɛ, Kornelio kɛ lɛ bakpe, ni eho egbee shi yɛ enaji anaa ni ekɛ woo hã lɛ.*
26 Shi Petro wó enɔ ni ekɛɛ: “Tee shi, mi hu gbɔmɔ kɛkɛ ji mi.”
27 Be ni ekɛ lɛ hiɛ sanegbaa lɛ, ebote mli ni eyana mɛi babaoo ní ebabua amɛhe naa.
28 Ekɛɛ amɛ akɛ: “Nyɛ diɛŋtsɛ nyɛle jogbaŋŋ akɛ mla eŋmɛɛɛ gbɛ ni Yudafonyo kɛ maŋ kroko nɔ nyo bɔɔ loo etsiɔ ebɛŋkɛɔ lɛ, ni kɛ̃lɛ Nyɔŋmɔ etsɔɔ mi akɛ mikatsɛ mɔ ko, mɔ ni abule loo mɔ ni he tseee.
29 No hewɔ ni be ni atsu ni abatsɛ mi lɛ, mijieee naa ni miba nɛɛ. Belɛ, miibi nyɛ nɔ hewɔ ni nyɛtsu ni abatsɛ mi lɛ.”
30 Ni Kornelio kɛɛ: “Kɛ́ miibu kɛmiijɛ ŋmɛlɛtswaa nɛɛ nɔ lɛ, gbii ejwɛ nɛ ní miisɔle yɛ mishĩa lɛ yɛ ŋmɛlɛtswaa ni ji nɛɛhu lɛ nɔ;* ni amrɔ lɛ, nuu ko ni wo atade ni kpɛlɛɔ kaŋkaŋ badamɔ mihiɛ
31 ni ekɛɛ: ‘Kornelio, abo osɔlemɔ lɛ toi jogbaŋŋ, ni ejuji ni ofeɔ ohiafoi lɛ hu akai yɛ Nyɔŋmɔ hiɛ.
32 No hewɔ lɛ, tsu kɛya Yopa ni ayatsɛ Simon ni atsɛɔ lɛ Petro hu lɛ kɛba. Nuu nɛɛ eyato gbɔ yɛ Simon, kooloo hewolo kpoolɔ ní shĩa yɔɔ ŋshɔ lɛ naa lɛ shĩa lɛ.’
33 Kɛkɛ ni amrɔ nɔŋŋ lɛ mitsu ni abatsɛ bo, ni ofee jogbaŋŋ akɛ oba biɛ. No hewɔ lɛ, agbɛnɛ wɔ fɛɛ wɔbua wɔhe naa yɛ biɛ yɛ Nyɔŋmɔ hiɛ koni wɔbo nibii fɛɛ ni Yehowa* efã bo akɛ owie lɛ toi.”
34 Kɛkɛ ni Petro bɔi wiemɔ, ni ekɛɛ: “Agbɛnɛ minu shishi lɛɛlɛŋ akɛ Nyɔŋmɔ kwɛɛɛ mɛi ahiɛiaŋ,
35 moŋ lɛ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni ekpɛlɛɔ enɔ.
36 Etsu akɛ wiemɔ yahã Israelbii lɛ koni ajaje toiŋjɔlɛ ni baa kɛtsɔɔ Yesu Kristo nɔ lɛ he sane kpakpa lɛ atsɔɔ amɛ—mɔ nɛ ji mɛi fɛɛ a-Nuŋtsɔ lɛ.
37 Nyɛle sane ni awie he yɛ Yudea fɛɛ ní eje shishi kɛjɛ Galilea yɛ baptisimɔ ni Yohane shiɛ lɛ sɛɛ lɛ:
38 ekɔɔ Yesu, mɔ ni jɛ Nazaret lɛ he, bɔ ni Nyɔŋmɔ kɛ mumɔ krɔŋkrɔŋ kɛ hewalɛ fɔ lɛ mu, ni eyakpa shikpɔŋ lɛ nɔ efee ekpakpa ni etsa mɛi fɛɛ ni Abonsam haoɔ amɛ lɛ, ejaakɛ Nyɔŋmɔ kɛ lɛ yɛ.
39 Ni wɔji nibii fɛɛ ni efee yɛ Yudafoi lɛ akoiasɛɛ kɛ Yerusalem fɛɛ lɛ he odasefoi; shi amɛsɛŋ lɛ yɛ tso jaŋŋ nɔ kɛgbe lɛ.
40 Nyɔŋmɔ tee mɔ nɛ shi yɛ gbi ni ji gbi etɛ lɛ nɔ, ni eŋmɛ lɛ gbɛ ní ejie ehe kpo etsɔɔ faŋŋ,*
41 jeee mɛi fɛɛ ejie ehe kpo etsɔɔ lɛ, shi moŋ, ejie ehe kpo etsɔɔ odasefoi ni Nyɔŋmɔ tsɔ hiɛ ehala amɛ eto lɛ, ni ji wɔ, mɛi ni wɔkɛ lɛ ye nii ni wɔkɛ lɛ nu nii, be ni ete shi kɛjɛ gbohii ateŋ lɛ sɛɛ lɛ.
42 Agbɛnɛ hu, efã wɔ akɛ wɔshiɛ wɔtsɔɔ mɛi lɛ ní wɔye odase fitsofitso akɛ mɔ nɛ ji mɔ ni Nyɔŋmɔ ewo akpɔ akɛ etsɔ hiɛkãalɔi kɛ gbohii akojolɔ lɛ.
43 Lɛ gbalɔi lɛ fɛɛ ye ehe odase akɛ, mɔ fɛɛ mɔ ni náa hemɔkɛyeli yɛ emli lɛ nine baashɛ eshaifaa nɔ kɛtsɔ egbɛ́i lɛ nɔ lɛ.”
44 Be ni Petro wieɔ saji nɛɛ ahe lolo lɛ, mumɔ krɔŋkrɔŋ lɛ ba mɛi fɛɛ ni boɔ wiemɔ lɛ toi lɛ anɔ.
45 Ni héyelilɔi* ni jɛ mɛi ni afolɔ amɛ ketia lɛ ateŋ ni kɛ Petro ba lɛ anaa kpɛ amɛhe, ejaakɛ afɔse mumɔ krɔŋkrɔŋ duromɔ keenɔ lɛ ashwie jeŋmajiaŋbii lɛ hu anɔ.
46 Ejaakɛ amɛnu akɛ amɛmiiwie maŋsɛɛ wiemɔi* ni amɛmiijaje Nyɔŋmɔ agbojee lɛ. Kɛkɛ ni Petro here nɔ ekɛɛ:
47 “Ani mɔ ko baanyɛ nu naa atsĩ koni akabaptisi mɛnɛɛmɛi ní amɛná mumɔ krɔŋkrɔŋ lɛ tamɔ wɔ nɔŋŋ lɛ?”
48 Kɛkɛ ni efã akɛ abaptisi amɛ yɛ Yesu Kristo gbɛ́i mli. No sɛɛ lɛ, amɛkpa lɛ fai akɛ ekɛ amɛ ahi shi gbii fioo ko.
Shishigbɛ Niŋmaa
^ Aloo “sɛnturiɔn,” mɔ ni kwɛɔ asraafoi 100 nɔ.
^ Roma asraafoi akuu ko ní asraafoi 600 yɔɔ mli.
^ Ni tsɔɔ akɛ, aaafee shwane ŋmɛji 3.
^ Aloo “ŋwɛibɔfo.”
^ Aloo “Simon kroko . . . miifee nuu nɛɛ gbɔ.”
^ Ni tsɔɔ akɛ, aaafee shwane ŋmɛlɛ 12.
^ Aloo “ekoto lɛ.”
^ Ni tsɔɔ akɛ, aaafee shwane ŋmɛji 3.
^ Kwɛmɔ Wiemɔi Titrii Amligbalamɔ lɛ.
^ Aloo “ní ehã ana lɛ.”
^ Aloo “anɔkwafoi.”
^ Sht. ŋm., “amɛmiiwie lilɛii.”
