Bɔfoi 12:1-25
12 Nakai be lɛ mli nɔŋŋ lɛ, Maŋtsɛ Herode bɔi asafo lɛ mli bii lɛ ateŋ mɛi komɛi ayiwaa.
2 Ekɛ klante gbe Yohane nyɛmi Yakobo.
3 Be ni ena akɛ enɛ ŋɔɔ Yudafoi lɛ anaa lɛ, etee nɔ ni emɔ Petro hu. (Enɛ tee nɔ yɛ Aboloo ni Akɛ Ma ni Eshako Feɔ lɛ gbii lɛ amli.)
4 Emɔ lɛ, ni ewo lɛ tsuŋ, ni etu lɛ ewo asraafoi akui ejwɛ ní mɛi ejwɛ yɔɔ eko fɛɛ eko mli lɛ adɛŋ koni amɛto naa kɛbu ehe, ni eto eyiŋ akɛ Hehoo lɛ sɛɛ lɛ, ebaajie lɛ kɛba* mɛi lɛ ahiɛ.
5 No hewɔ lɛ, atsĩ Petro naa yɛ tsuŋwoohe lɛ moŋ nɛ, shi asafo lɛ tee nɔ esɔle waa diɛŋtsɛ ehã Nyɔŋmɔ yɛ ehewɔ.
6 Yɛ nyɔɔŋ ní enɔ jetsɛremɔ lɛ Herode baajie Petro ehã mɛi lɛ mli lɛ, no mli lɛ Petro kã asraafoi enyɔ teŋ eewɔ ni awo lɛ kɔsɔŋkɔsɔi enyɔ, ni bulɔi hu damɔ shinaa lɛ naa amɛmiibu tsuŋwoohe lɛ he.
7 Shi naa! Yehowa* bɔfo* ko badamɔ jɛmɛ, ni la kpɛ yɛ tsuŋwoohe lɛ. Ni egba Petro koŋ ma, ni etsĩɛ lɛ ekɛɛ: “Tee shi mramra!” Ni ekɔsɔŋkɔsɔi lɛ kpɔlɔ yɛ eniji ahe.
8 Ŋwɛibɔfo lɛ kɛɛ lɛ akɛ: “Saamɔ ohe* ni owo otokotai lɛ.” Ni efee nakai. Naagbee lɛ, ekɛɛ lɛ akɛ: “Wo otade nɔhaanɔ lɛ ni oya nɔ onyiɛ misɛɛ.”
9 Ni eje kpo ni etee nɔ enyiɛ esɛɛ, shi eleee akɛ nɔ ni ŋwɛibɔfo lɛ feɔ lɛ yɛ mli lɛɛlɛŋ. Anɔkwa, esusu akɛ ninaa ko enaa lɛ.
10 Be ni amɛho he ni klɛŋklɛŋ bulɔi lɛ damɔ lɛ kɛ he ni bulɔi ni ji enyɔ lɛ damɔ lɛ ahe lɛ, amɛyashɛ dade agbó ni kã kɛyaa maŋ lɛ mli lɛ he, ni no diɛŋtsɛ gbele ehe ehã amɛ. Be ni amɛje kpo lɛ, amɛnyiɛ gbɛjegbɛ kome ko nɔ fioo, ni amrɔ lɛ ŋwɛibɔfo lɛ shi lɛ.
11 Ni be ni Petro yɔse nɔ ni yaa nɔ lɛ, ekɛɛ: “Kpaako miná mile lɛɛlɛŋ akɛ, Yehowa* tsu ebɔfo kɛba ni ebajie mi yɛ Herode dɛŋ kɛ agbɛnɛ kɛjɛ nɔ fɛɛ nɔ ní Yudafoi lɛ kpaa gbɛ akɛ ebaaba lɛ mli.”
12 Be ni eyɔse enɛ lɛ, etee Yohane ni atsɛɔ lɛ Marko hu lɛ nyɛ Maria we lɛ, he ni mɛi pii ebua amɛhe naa yɛ ní amɛmiisɔle lɛ.
13 Be ni eshi agbó lɛ shinaa lɛ, tsulɔ yoo ko ni atsɛɔ lɛ Roda lɛ babo toi.
14 Be ni eyoo Petro gbee lɛ, ená miishɛɛ aahu akɛ egbeleee agbó lɛ, moŋ lɛ, ejo foi kɛtee mli ni eyabɔ amaniɛ akɛ Petro damɔ agbó lɛ sɛɛ.
15 Amɛkɛɛ lɛ akɛ: “Ojwɛŋmɔ tsuuu nii.” Shi etee nɔ ema nɔ mi veveeve akɛ eyɛ mli nakai. Amɛbɔi kɛɛmɔ akɛ: “Eŋwɛibɔfo ni mɔ.”
16 Shi Petro tee nɔ edamɔ jɛmɛ eeshi agbó lɛ. Be ni amɛgbele shinaa lɛ, amɛna lɛ, ni amɛnaa kpɛ amɛhe.
17 Shi ekɛ enine fee okadi etsɔɔ amɛ akɛ amɛfee diŋŋ, ni egba amɛ bɔ ni fee ni Yehowa* jie lɛ kɛjɛ tsuŋwoohe lɛ fitsofitso, ni ekɛɛ: “Nyɛbɔa Yakobo kɛ nyɛmimɛi lɛ nibii nɛɛ ahe amaniɛ.” Kɛkɛ ni eje kpo ni eyiŋ etee he kroko.
18 Agbɛnɛ, be ni je tsɛre lɛ, asraafoi lɛ hao waa yɛ nɔ ni eba Petro nɔ lɛ hewɔ.
19 Herode tao lɛ fitsofitso, ni be ni enaaa lɛ lɛ, ebibii bulɔi lɛ saji ni efã koni akpala amɛ kɛya ni ayagbala amɛtoi; ni ekpeleke shi kɛjɛ Yudea kɛtee Kaisarea, ni eye be ko yɛ jɛmɛ.
20 Agbɛnɛ, Herode mli efu Tirobii kɛ Sidonbii lɛ naakpa. No hewɔ lɛ, amɛkɛ jwɛŋmɔ kome ba eŋɔɔ, ni be ni amɛhã Blasto, ni ji mɔ ni kwɛɔ maŋtsɛ lɛ we* lɛ saji anɔ lɛ yiŋ tsɔ lɛ, amɛkpa fai kɛhã toiŋjɔlɛ, ejaakɛ maŋtsɛ lɛ shikpɔŋ lɛ nɔ amɛmaŋ lɛ náa niyenii kɛjɛɔ.
21 Yɛ gbi ní ato ko nɔ lɛ, Herode wo emaŋtsɛ atade lɛ ni eyata kojomɔ sɛi lɛ nɔ, ni ebɔi wiemɔ yɛ maŋ lɛ hiɛ.
22 Kɛkɛ ni mɛi ni ebabua amɛhe naa lɛ bɔi bolɔmɔ akɛ: “Enɛ lɛ, nyɔŋmɔ ko gbee ni, shi jeee gbɔmɔ gbee ni!”
23 Amrɔ lɛ, Yehowa* bɔfo* lɛ tswa lɛ nɔ, ejaakɛ ekɛ anunyam lɛ hãaa Nyɔŋmɔ, ni gɔgɔmii ye lɛ ni egbo.
24 Shi Yehowa* wiemɔ lɛ tee nɔ eshwere ni etee nɔ egbɛ eshwã.
25 Shi Barnaba kɛ Saul lɛ, be ni amɛkɛ yelikɛbuamɔ nibii lɛ eyasɔmɔ yɛ Yerusalem sɛɛ lɛ, amɛku amɛsɛɛ ni amɛŋɔ Yohane, mɔ ni atsɛɔ lɛ Marko hu lɛ amɛfata amɛhe.
Shishigbɛ Niŋmaa
^ Aloo “ebaajie lɛ koni aye esane yɛ.”
^ Kwɛmɔ Wiemɔi Titrii Amligbalamɔ lɛ.
^ Aloo “ŋwɛibɔfo.”
^ Aloo “Fii ohɛ mli.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “maŋtsɛ lɛ pia.”
^ Kwɛmɔ Wiemɔi Titrii Amligbalamɔ lɛ.
^ Aloo “ŋwɛibɔfo.”
^ Kwɛmɔ Wiemɔi Titrii Amligbalamɔ lɛ.
