Bɔfoi 17:1-34
17 Agbɛnɛ, amɛyatsɔ Amfipoli kɛ Apolonia, ni amɛba Tesalonika, he ni Yudafoi lɛ akpeehe ko yɔɔ lɛ.
2 No hewɔ lɛ, taakɛ Paulo fɔɔ feemɔ lɛ, etee amɛŋɔɔ yɛ kpeehe lɛ ni ejɛ Ŋmalɛi lɛ amli ekɛ amɛ susu nii ahe hejɔɔmɔ gbii etɛ,
3 ni etsɔɔ nibii amli ni etsɛ ŋmalɛi ayisɛɛ kɛtsɔɔ hu akɛ ehe miihia ni Kristo lɛ ana nɔ ní ete shi kɛjɛ gbohii ateŋ, ni ekɛɛ akɛ: “Yesu nɛɛ ni mijajeɔ ehe sane mitsɔɔ nyɛ nɛɛ, lɛ ji Kristo lɛ.”
4 Enɛ hewɔ lɛ, amɛteŋ mɛi komɛi batsɔmɔ héyelilɔi ni amɛkɛ amɛhe kpɛtɛ Paulo kɛ Sila he, ni Helabii Nyɔŋmɔ jálɔi lɛ ateŋ mɛi babaoo kɛ yei hiɛnaanɔbii saŋŋ hu fee nakai nɔŋŋ.
5 Shi Yudafoi lɛ ye awuŋa, ni amɛbua hii efɔŋfeelɔi komɛi ní foɔ shi kɛkɛ yɛ jara lɛ nɔ lɛ anaa ni amɛná asafo yuu, ni amɛtee amɛyawo maŋ lɛ mli hirihiri. Amɛyatutua Yason we lɛ ni amɛtao akɛ amɛjie Paulo kɛ Sila kɛje kpo kɛbahã asafo yuu nɛɛ.
6 Be ni amɛnaaa amɛ lɛ, amɛkpala Yason kɛ nyɛmimɛi lɛ ekomɛi kɛtee maŋ nɔyelɔi lɛ ahiɛ, ni amɛbolɔ amɛkɛɛ: “Hii nɛɛ ni etsɔ shikpɔŋ lɛ hiɛ ebu shi* lɛ eba biɛ hu,
7 ni Yason ehere amɛ ni efee amɛ gbɔ. Hii nɛɛ fɛɛ teɔ shi woɔ akpɔi ni Kaisare ewo lɛ, ni amɛkɛɔ akɛ maŋtsɛ kroko ko yɛ, ni ji Yesu ko.”
8 Be ni asafoku lɛ kɛ maŋ nɔyelɔi lɛ nu nibii nɛɛ, amɛjija;
9 ni be ni amɛhe sɛɛdaamɔnii* bɔ ni sa yɛ Yason kɛ mɛi krokomɛi lɛ adɛŋ lɛ, amɛŋmɛɛ amɛhe.
10 Ni be ni shɛ nyɔɔŋ nɔŋŋ lɛ, nyɛmimɛi lɛ yajie Paulo kɛ Sila fɛɛ gbɛ kɛtee Beroia. Be ni amɛshɛ jɛmɛ lɛ, amɛtee Yudafoi lɛ akpeehe lɛ.
11 Yudafoi ni yɔɔ Beroia lɛ yɛ su kpakpa fe mɛi ni yɔɔ Tesalonika lɛ, ejaakɛ amɛjie amɛyitsoŋ fɛɛ amɛkpɛlɛ wiemɔ lɛ nɔ, ni daa gbi lɛ, amɛpɛiɔ Ŋmalɛi lɛ amli jogbaŋŋ amɛkwɛɔ akɛ nibii nɛɛ yɛ mli nakai lo.
12 No hewɔ lɛ, amɛteŋ mɛi babaoo batsɔmɔ héyelilɔi, ni Hela yei ni abuɔ amɛ lɛ ateŋ mɛi saŋŋ kɛ hii komɛi hu fee nakai nɔŋŋ.
13 Shi be ni Yudafoi ni yɔɔ Tesalonika lɛ ná amɛle akɛ Paulo miijaje Nyɔŋmɔ wiemɔ lɛ yɛ Beroia hu lɛ, amɛba jɛmɛ amɛbawo mɛi lɛ ayiŋ ni amɛhã amɛjija.
14 Kɛkɛ ni amrɔ lɛ, nyɛmimɛi lɛ yajie Paulo gbɛ koni eya ŋshɔ lɛ naa, shi Sila kɛ Timoteo lɛ, amɛtee nɔ amɛhi jɛmɛ.
15 Shi mɛi ni yajie Paulo gbɛ lɛ kɛ lɛ yashɛ Atene tɔ̃ɔ, ni be ni ekɛ gbɛtsɔɔmɔi hã amɛ akɛ Sila kɛ Timoteo aba Paulo ŋɔɔ oya lɛ, amɛshi amɛtee.
16 Agbɛnɛ, be ni Paulo mɛɔ amɛ yɛ Atene lɛ, emumɔ mli wo la yɛ emli be ni ena akɛ amagai eyi maŋ lɛ mli obɔ lɛ.
17 No hewɔ lɛ, ekɛ Yudafoi lɛ kɛ mɛi ni jáa Nyɔŋmɔ lɛ bɔi niiahesusumɔ yɛ kpeehe lɛ, ni daa gbi lɛ ekɛ mɛi ni ekɛkpeɔ yɛ jara lɛ nɔ lɛ hu feɔ nakai.
18 Shi jeŋ hiɛshikalɔi ni ji Epikuromɛi* kɛ Stoamɛi* lɛ ateŋ mɛi komɛi kɛ lɛ bɔi naataamɔ, ni amɛteŋ mɛi komɛi kɛɔ akɛ: “Mɛni po naagɔbigɔbitsɛ nɛɛ taoɔ ekɛɛ?” Mɛi krokomɛi kɛɔ akɛ: “Etamɔ nɔ ni ejajeɔ maŋsɛɛ nyɔŋmɔi ahe sane etsɔɔ.” Amɛwie nakai ejaakɛ eejaje Yesu he sane kpakpa lɛ, kɛ gbohiiashitee lɛ eetsɔɔ.
19 No hewɔ lɛ, amɛŋɔ lɛ kɛtee Areopago lɛ, ni amɛkɛɛ: “Ani obaanyɛ ohã wɔle tsɔɔmɔ hee ni owieɔ he nɛɛ jogbaŋŋ?
20 Ejaakɛ oohã wɔtoii miinu nibii komɛi ni yɔɔ srɔto kwraa, ni wɔmiitao wɔle nɔ ni nibii nɛɛ tsɔɔ.”
21 Anɔkwa, Atenebii lɛ fɛɛ kɛ gbɔi ni yɔɔ jɛmɛ lɛ, kɛ́ amɛná be lɛ, nɔ ni eshwɛ amɛ pɛ ji amɛgba sane hee ko loo amɛbo sane hee ko toi.
22 Agbɛnɛ, Paulo yadamɔ Areopago lɛ teŋ ni ekɛɛ:
“Ataamɛi Atenebii, mina akɛ yɛ nibii fɛɛ mli lɛ nyɛsheɔ nyɔŋmɔi lɛ agbeyei waa* fe mɛi krokomɛi.
23 Akɛ nɔkwɛmɔnɔ lɛ, be ni miiho ni miikwɛ nibii ni nyɛjáa lɛ jogbaŋŋ lɛ, mina afɔleshaa latɛ ko po ni akpɛ́ yɛ nɔ akɛ ‘Nyɔŋmɔ ni Wɔleee Lɛ lɛ Nɔ Ni.’ No hewɔ lɛ, mɔ ni nyɛleee lɛ ni nyɛjáa lɛ lɛ, lɛ ehe sane mijajeɔ mitsɔɔ nyɛ nɛɛ.
24 Nyɔŋmɔ ní fee je lɛ kɛ nibii fɛɛ ni yɔɔ mli lɛ, akɛni lɛ ji ŋwɛi kɛ shikpɔŋ Nuŋtsɔ hewɔ lɛ, ehiii sɔlemɔwei ni akɛ niji mamɔ amli;
25 ni asaŋ, akɛ gbɔmɛi aniji sɔmɔɔɔ lɛ oookɛɛ nɔ ko he hiaa lɛ, ejaakɛ lɛ diɛŋtsɛ ehãa mɛi fɛɛ wala kɛ mumɔ kɛ nibii fɛɛ.
26 Ni gbɔmɔ kome mli ejɛ efee gbɔmɛi ajeŋmaji fɛɛ koni amɛhi shikpɔŋ muu lɛ fɛɛ nɔ, ni bei ni ato lɛ kɛ gbɔmɛi ashihilɛhei lɛ ahusui lɛ, ekpɛ mli eto momo,
27 koni amɛtao Nyɔŋmɔ sɛɛ gbɛ, ni amɛkɛ hiɛdɔɔ po afee nakai ní amɛna lɛ lɛɛlɛŋ, shi anɔkwa, ekɛ wɔteŋ mɔ fɛɛ mɔ teŋ jekɛɛɛ.
28 Ejaakɛ emli wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ, tamɔ bɔ ni nyɛ diɛŋtsɛ nyɛlalawiemɔfolɔi lɛ ateŋ mɛi komɛi po ekɛɛ lɛ akɛ, ‘Ebii* ji wɔ hu.’
29 “No hewɔ lɛ, akɛni wɔna akɛ Nyɔŋmɔ bii* ji wɔ hewɔ lɛ, esaaa akɛ wɔsusuɔ akɛ Mɔ ni ji Nyɔŋmɔ lɛ tamɔ shika tsuru loo jwiɛtɛi loo tɛ, tamɔ nɔ ko ni gbɔmɛi kɛ amɛŋaa kɛ amɛjwɛŋmɔ fee.
30 Anɔkwa, Nyɔŋmɔ ku ehiɛ efɔ̃ bei amli ni mɛi leee nɔ ko lɛ anɔ moŋ; shi amrɔ nɛɛ eekɛɛ gbɔmɛi ni yɔɔ he fɛɛ he lɛ akɛ amɛtsake amɛtsui.
31 Ejaakɛ eto gbi ko, ni eto eyiŋ akɛ nakai gbi lɛ mli lɛ, ebaatsɔ nuu ko ni ehala lɛ lɛ nɔ ekojo shikpɔŋ lɛ fɛɛ yɛ jalɛ naa, ni etee lɛ shi kɛjɛ gbohii ateŋ kɛma nɔ aduatsɔ ehã gbɔmɛi fɛɛ.”
32 Agbɛnɛ, be ni amɛnu gbohiiashitee lɛ he lɛ, amɛteŋ mɛi komɛi bɔi fɛoyeli, ni mɛi krokomɛi hu kɛɛ: “Wɔbaasaa wɔbo bo toi ekoŋŋ yɛ enɛ hewɔ.”
33 No hewɔ lɛ, Paulo shi amɛ,
34 shi hii komɛi kɛ amɛhe kpɛtɛ ehe ni amɛbatsɔmɔ héyelilɔi. Amɛteŋ mɛi komɛi ji Dionisio, ni ji kojolɔ yɛ Areopago saneyelihe lɛ, kɛ yoo ko ni atsɛɔ lɛ Damari, kɛ mɛi krokomɛi ni fata amɛhe.
Shishigbɛ Niŋmaa
^ Aloo “ehã basabasafeemɔ eba shikpɔŋ lɛ nɔ.”
^ Eji shika ni awoɔ loo nɔ ko ni akɛhãa koni akɛdamɔ mli ahã mɔ ko; awaba.
^ Epikuromɛi lɛ heee gbohiiashitee lɛ amɛyeee ni amɛtsɔɔ akɛ esa akɛ mɛi aná miishɛɛ jogbaŋŋ yɛ amɛwala be ni sɛɛ kɛɛɛ lɛ mli ejaakɛ shihilɛ ko bɛ sɛɛ dɔŋŋ.
^ Stoamɛi lɛ tsɔɔ akɛ esa akɛ mɛi ahi shi yɛ susumɔi ni nilee yɔɔ mli anaa, ni esaaa akɛ amɛhãa amɛhenumɔi náa amɛnɔ hewalɛ, miishɛɛ jio, hejaramɔ jio. Ni amɛheee gbohiiashitee lɛ amɛyeee.
^ Aloo “nyɛsumɔɔ Nyɔŋmɔjamɔ waa.”
^ Aloo “Eshwiei.”
^ Aloo “shwiei.”
