Bɔfoi 2:1-47
2 Agbɛnɛ, yɛ gbi ni ayeɔ Pentekoste* Gbi Jurɔ lɛ nɔ lɛ, amɛ fɛɛ amɛbua amɛhe naa yɛ he kome.
2 Trukaa lɛ, gbɛɛmɔ ko ni tamɔ kɔɔyɔɔ ni miitswa waa jɛ ŋwɛi ba, ni ejije yɛ shĩa ni amɛtara mli lɛ mli fɛɛ.
3 Ni amɛna lilɛii ni tamɔ la, ni lilɛii lɛ jiejiee ekomekomei, ni eko bama amɛteŋ mɔ fɛɛ mɔ nɔ,
4 ni mumɔ krɔŋkrɔŋ bayimɔ amɛ fɛɛ obɔbɔ, ni amɛbɔi wiemɔi* srɔtoisrɔtoi awiemɔ, tamɔ bɔ ni mumɔ lɛ ŋɔwo amɛnaa akɛ amɛwie lɛ.
5 Nakai be lɛ mli lɛ, Yudafoi ni sheɔ Nyɔŋmɔ gbeyei ni jɛ jeŋmaji fɛɛ ni yɔɔ ŋwɛi shishi lɛ anɔ lɛ yɛ Yerusalem.
6 No hewɔ lɛ, be ni gbɛɛmɔ nɛɛ jije lɛ, asafoku ko babua amɛhe naa, ni amɛhe jɔ̃ amɛhe, ejaakɛ amɛteŋ mɔ fɛɛ mɔ nu ni amɛmiiwie lɛ diɛŋtsɛ emaŋ wiemɔ.
7 Anɔkwa, amɛnaa kpɛ amɛhe naakpa ni amɛkɛɛ: “Naa, mɛi ni wieɔ nɛɛ fɛɛ lɛ, Galileabii ni, aloo jeee nakai?
8 Belɛ te fee tɛŋŋ ni wɔteŋ mɔ fɛɛ mɔ nuɔ lɛ diɛŋtsɛ emaŋ wiemɔ* nɛɛ?
9 Partiabii, Mediabii, kɛ Elambii; mɛi ni yɔɔ Mesopotamia, Yudea, kɛ Kapadokia, Ponto kɛ Asia kpokpaa lɛ nɔ,
10 Frigia kɛ Pamfilia, Ejipt kɛ Libia kpokpai ni bɛŋkɛ Kirene lɛ; gbɔi ni jɛ Roma, Yudafoi kɛ mɛi ni etsɔmɔ Yudafoi fɛɛ;
11 Kretabii; kɛ Arabiabii—wɔmiinu ni amɛmiiwie Nyɔŋmɔ nibii wuji lɛ ahe yɛ wɔwiemɔi amli.”
12 Hɛɛ, amɛ fɛɛ amɛnaa kpɛ amɛhe ni amɛhiɛ fee amɛ yaa ni amɛkɛɛkɛɛ amɛhe akɛ: “Te enɛ shishi lɛ?”
13 Shi mɛi krokomɛi ye amɛhe fɛo ni amɛbɔi kɛɛmɔ akɛ: “Wein dɔkɔdɔkɔ* ehã amɛtɔrɔ.”
14 Shi Petro kɛ Mɛi Nyɔŋma kɛ Ekome lɛ te shi damɔ shi ni ekɛ gbee ni wa wie etsɔɔ amɛ ekɛɛ: “Yudea hii kɛ nyɛ mɛi fɛɛ ni yɔɔ Yerusalem, nyɛnáa nyɛlea enɛ, ni nyɛboa miwiemɔi lɛ atoi jogbaŋŋ.
15 Anɔkwa, mɛi nɛɛ tɔrɔko dãa, taakɛ nyɛsusuɔ lɛ, ejaakɛ ŋmɛlɛtswaa ni ji etɛ yɛ gbi lɛ mli nɛ.*
16 Moŋ lɛ, enɛ ji nɔ ni atsɔ gbalɔ Yoel nɔ awie lɛ akɛ:
17 ‘Nyɔŋmɔ kɛɛ, “Ni yɛ naagbee gbii lɛ amli lɛ, mafɔse mimumɔ lɛ eko mashwie heloi srɔtoi fɛɛ nɔ, ni nyɛbihii kɛ nyɛbiyei lɛ baagba ni nyɛblahii lɛ baana ninai ni nyɛnukpai lɛ baala lamɔi,
18 ni mafɔse mimumɔ lɛ eko mashwie minyɔji hii kɛ minyɔji yei tete anɔ yɛ nakai gbii lɛ amli, ni amɛbaagba.
19 Ni mahã naakpɛɛ nii* aba ŋwɛi ní okadii hu aba shikpɔŋ lɛ nɔ—lá kɛ la kɛ lasu kpɔŋŋ.
20 Hulu lɛ baatsɔ duŋ ni nyɔɔŋtsere lɛ baatsɔ lá dani Yehowa* gbi wulu ni yɔɔ nyam lɛ baaba.
21 Ni mɔ fɛɛ mɔ ni boɔ tsɛɔ Yehowa* gbɛ́i lɛ, abaahere eyiwala.”’
22 “Israel hii, nyɛboa wiemɔi nɛɛ atoi: Yesu, Nazarenyo lɛ, eji nuu ni Nyɔŋmɔ jie lɛ kpo etsɔɔ nyɛ faŋŋ kɛtsɔ hewalɛ nitsumɔi kɛ naakpɛɛ nii,* kɛ okadii ni Nyɔŋmɔ tsɔ enɔ efee yɛ nyɛteŋ lɛ anɔ, tamɔ bɔ ni nyɛ diɛŋtsɛ nyɛle lɛ.
23 Nuu nɛɛ, ni aŋɔ lɛ ahã yɛ Nyɔŋmɔ suɔmɔnaa nii* kɛ enii ni ele eto lɛ naa lɛ, nyɛtsɔ mɛi ni ji mlatɔlɔi lɛ anɔ nyɛkala lɛ nyɛkpɛtɛ tso jaŋŋ he ni nyɛgbe lɛ.
24 Shi Nyɔŋmɔ tee lɛ shi kɛtsɔ fɛnemɔ ni efɛne gbele piŋmɔi* lɛ yɛ ehe lɛ nɔ, ejaakɛ no nyɛŋ enaa atsĩ.
25 Ejaakɛ David wie yɛ ehe akɛ: ‘Mihãa Yehowa* hiɔ mihiɛ daa, ejaakɛ eyɛ mininejurɔ nɔ koni mikahoso kɔkɔɔkɔ.
26 Enɛ hewɔ lɛ, mitsui mii shɛ ehe ni mililɛi ná miishɛɛ babaoo. Ni mahi shi* yɛ hiɛnɔkamɔ mli;
27 ejaakɛ oshiŋ mi* yɛ Gbonyo Bu* lɛ mli, asaŋ oŋmɛŋ gbɛ ni onɔkwafo lɛ ana fitemɔ.
28 Ohã mile wala gbɛi lɛ; obaahã miishɛɛ ayi mimli obɔ yɛ ohiɛ.’
29 “Ataamɛi, nyɛmimɛi, nyɛhãa mawiea weku yitso David he kɛ nɔmimaa matsɔa nyɛ, akɛ egbo ni afu lɛ, ni egbonyo bu lɛ yɛ wɔteŋ kɛbashi ŋmɛnɛ.
30 Akɛni eji gbalɔ ni ele akɛ Nyɔŋmɔ ekã lɛ kitã akɛ ebaahã eseshibii lɛ ateŋ mɔ kome* ata emaŋtsɛ sɛi lɛ nɔ hewɔ lɛ,
31 ena Kristo lɛ shitee lɛ eto ni ewie he, akɛ ashiŋ lɛ yɛ Gbonyo Bu* lɛ mli ni asaŋ eheloo enaŋ fitemɔ.
32 Nɛkɛ Yesu nɛɛ, Nyɔŋmɔ tee lɛ shi, ni wɔ fɛɛ wɔji enɛ he odasefoi.
33 No hewɔ lɛ, akɛni awó enɔ kɛtee Nyɔŋmɔ ninejurɔ nɔ ni ená mumɔ krɔŋkrɔŋ lɛ ni awo he shi lɛ kɛjɛ Tsɛ lɛ ŋɔɔ hewɔ lɛ, efɔse nɔ ni nyɛnaa ni nyɛnuɔ nɛɛ eshwie shi.
34 Ejaakɛ David ekwɔɔɔ kɛyaaa ŋwɛi, shi lɛ diɛŋtsɛ ekɛɛ akɛ, ‘Yehowa* kɛɛ mi-Nuŋtsɔ lɛ akɛ: “Ta mininejurɔ nɔ
35 kɛyashi be ni maŋɔ ohenyɛlɔi lɛ mafee onajiashi maaŋoo.”’
36 No hewɔ lɛ, hã Israel we lɛ fɛɛ aná ale lɛɛlɛŋ akɛ, nɛkɛ Yesu nɛɛ ni nyɛgbe lɛ yɛ tso jaŋŋ nɔ lɛ, Nyɔŋmɔ efee lɛ Nuŋtsɔ kɛ Kristo fɛɛ.”
37 Agbɛnɛ, be ni amɛnu enɛ lɛ, etsurɔ amɛtsuiiaŋ, ni amɛkɛɛ Petro kɛ bɔfoi ni eshwɛ lɛ akɛ: “Ataamɛi, nyɛmimɛi, mɛni esa akɛ wɔfee?”
38 Petro kɛɛ amɛ akɛ: “Nyɛtsakea nyɛtsui, ni nyɛhãa abaptisia nyɛteŋ mɔ fɛɛ mɔ yɛ Yesu Kristo gbɛ́i mli koni aŋɔ nyɛhe eshai lɛ afa nyɛ, ni nyɛbaaná duromɔ keenɔ ni ji mumɔ krɔŋkrɔŋ lɛ.
39 Ejaakɛ shiwoo lɛ yɛ kɛhã nyɛ kɛ nyɛbii, kɛ mɛi fɛɛ ni yɔɔ shɔŋŋ, mɛi fɛɛ ni Yehowa* wɔ-Nyɔŋmɔ lɛ aaatsɛ amɛ kɛba eŋɔɔ lɛ.”
40 Ni ewie wiemɔi krokomɛi babaoo kɛye odase fitsofitso ni etee nɔ ewo amɛ hewalɛ ekɛɛ: “Nyɛhãa aherea nyɛ kɛjɛa yinɔ kɔɔdɔŋ nɛɛ dɛŋ.”
41 No hewɔ lɛ, abaptisi mɛi ni kɛ miishɛɛ kpɛlɛ ewiemɔ lɛ nɔ lɛ, ni nakai gbi lɛ nɔ lɛ aná mɛi* aaafee akpei etɛ afata amɛhe.
42 Ni amɛtee nɔ amɛhiɛ bɔfoi lɛ atsɔɔmɔ lɛ mli, amɛkɛ amɛhe bɔ naanyo,* amɛye nii, ni amɛkã sɔlemɔ he.
43 Anɔkwa, gbeyei bɔi mɔ fɛɛ mɔ* mɔmɔ, ni bɔfoi lɛ bɔi naakpɛɛ nii* kɛ okadii babaoo feemɔ.
44 Mɛi ni he amɛye lɛ fɛɛ bua amɛhe naa kutuu ni amɛfee amɛnibii ni amɛyɔɔ lɛ fɛɛ ekome,
45 ni amɛhɔ̃ɔhɔ̃ɔ amɛshikpɔji kɛ amɛhe nibii, ni amɛjara nɔ ni amɛná kɛjɛ mli lɛ amɛhã mɛi lɛ fɛɛ, bɔ ni he hiaa mɔ fɛɛ mɔ.
46 Ni daa gbi lɛ amɛkɛ jwɛŋmɔ kome yaa sɔlemɔwe lɛ, ni amɛyeɔ amɛniyenii yɛ shĩai srɔtoi amli ni amɛkɛ miishɛɛ babaoo kɛ tsui krɔŋŋ jaa amɛniyenii,
47 ni amɛjieɔ Nyɔŋmɔ yi ni amɛhiɛ baa nyam yɛ mɛi fɛɛ hiɛ. Nakai be lɛ mli nɔŋŋ lɛ, Yehowa* tee nɔ ekɛ mɛi ni aahere amɛyiwala lɛ fata amɛhe daa gbi.
Shishigbɛ Niŋmaa
^ Yɛ Hela mli lɛ, Pentekoste shishi ji “Nyɔŋmai enumɔ nɔ.” Ayeɔ gbi jurɔ nɛɛ yɛ Nisan 16 sɛɛ gbi ni ji nyɔŋmai enumɔ lɛ nɔ.
^ Aloo “lilɛii.”
^ Aloo “emaŋ he ni afɔ lɛ yɛ lɛ wiemɔ.”
^ Aloo “Wein hee.”
^ Ni tsɔɔ akɛ, aaafee leebi ŋmɛlɛ 9.
^ Aloo “gbalɛ okadii.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “gbalɛ okadii.”
^ Aloo “yiŋtoo.”
^ Aloo eeenyɛ efee akɛ, “gbele kpãi.”
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “miheloo baahi shi.”
^ Aloo “misusuma.”
^ Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Sht. ŋm., “ehɛ mli yibii lɛ ateŋ mɔ kome.”
^ Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “susumai.”
^ Aloo “amɛná nibii ni amɛteŋ mɔ fɛɛ mɔ yɔɔ lɛ mli gbɛfaŋnɔ.”
^ Aloo “susuma fɛɛ susuma.”
^ Aloo “gbalɛ okadii.”
^ Kwɛmɔ Wiemɔi Titrii Amligbalamɔ lɛ.
