Bɔfoi 20:1-38
20 Be ni basabasafeemɔ lɛ sɛɛ fo lɛ, Paulo tsu ni ayatsɛ kaselɔi lɛ kɛba, ni be ni ewo amɛ hewalɛ sɛɛ lɛ, ekɛ amɛ ye shɛɛ, ni eje egbɛfãa kɛmiiya Makedonia lɛ shishi.
2 Be ni eyatsɔ nakai kpokpai lɛ anɔ ni ekɛ wiemɔi babaoo wo mɛi ni yɔɔ jɛmɛ lɛ hewalɛ lɛ, eba Hela.
3 Eye nyɔji etɛ yɛ jɛmɛ, shi be ni eeba ebakwɔ lɛlɛ kɛya Siria lɛ, akɛni Yudafoi lɛ etsɔ ŋaa yɛ ehe hewɔ lɛ, efee ejwɛŋmɔ akɛ ebaaku esɛɛ eyatsɔ Makedonia.
4 No mli lɛ, mɛi ni fata ehe kɛtee ji Sopatre, ni ji Pirho ni jɛ Beroia lɛ bi lɛ, Aristarko kɛ Sekundo ni ji Tesalonikabii lɛ, Gaio ni jɛ Derbe lɛ, Timoteo, kɛ Tihiko kɛ Trofimo ni jɛ Asia kpokpaa lɛ nɔ lɛ.
5 Hii nɛɛ tsɔ hiɛ ni amɛyamɛ wɔ yɛ Troia;
6 shi Aboloo ni Akɛ Ma ni Eshako Feɔ lɛ gbii lɛ asɛɛ lɛ, wɔkɛ lɛlɛ fã kɛjɛ Filipi, ni gbii enumɔ mli lɛ, wɔbashɛ amɛŋɔɔ yɛ Troia, ni wɔye gbii kpawo yɛ jɛmɛ.
7 Otsi lɛ klɛŋklɛŋ gbi lɛ nɔ lɛ, be ni wɔbua wɔhe naa koni wɔye nii* lɛ, Paulo bɔi amɛ wiemɔhãmɔ, ejaakɛ enɔ jetsɛremɔ lɛ ebaashi; ni ewie aahu kɛyashi nyɔɔŋteŋ.
8 Ni kanei saŋŋ yɛ ŋwɛi asa lɛ nɔ he ni wɔnaa ebakpe shi yɛ lɛ.
9 Ni oblanyo ko ni atsɛɔ lɛ Eutiko ta samfɛlɛ lɛ naa, ni wɔ ni tsii loo lɛ be ni Paulo kã he ewieɔ lɛ, ni wɔ ni ewɔ vii lɛ sɔŋŋ hã ekpa kɛjɛ nsɔɔdoi enyɔ lɛ nɔ ebagbee shi, ni ayawó lɛ ni egbo.
10 Shi Paulo kpeleke shi, ni eyabu enɔ ni efua lɛ ni ekɛɛ: “Nyɛkpaa hoofeemɔ lɛ, ejaakɛ ehiɛ kã.”*
11 Kɛkɛ ni ekwɔ kɛba ekoŋŋ ni ebaje niyeli lɛ shishi* ni eye nii. Etee nɔ egba sane aahu kɛyashi je tsɛre, kɛkɛ ni eshi etee.
12 No hewɔ lɛ, amɛkɛ gbekɛ nuu lɛ tee hiɛkãalɔ ni enɛ shɛje amɛmii naakpa.
13 Agbɛnɛ wɔtsɔ hiɛ kɛtee meele lɛ mli ni wɔfã kɛtee Aso, he ni wɔto wɔyiŋ akɛ wɔbaayawó Paulo yɛ lɛ, ejaakɛ ekɛ gbɛtsɔɔmɔi hã wɔ akɛ wɔfee nakai, shi lɛ lɛ, eto eyiŋ akɛ ebaatswa nantu kɛya jɛmɛ.
14 No hewɔ lɛ, be ni ebanina wɔ yɛ Aso lɛ, wɔwó lɛ, ni wɔyi mli kɛtee Mitilene.
15 Ni enɔ jetsɛremɔ lɛ, wɔkɛ meele fã kɛjɛ jɛmɛ, ni wɔyashɛ Kio ŋɛlɛ nɔ, shi enɔ jetsɛremɔ ekoŋŋ lɛ, wɔyawa fioo yɛ Samo, ni enɔ jetsɛremɔ lɛ wɔyashɛ Mileto.
16 No mli lɛ Paulo eto eyiŋ akɛ ekɛ meele lɛ baaho Efeso he, koni ekaye be yɛ Asia kpokpaa lɛ nɔ, ejaakɛ eeye oyai ní kɛ́ eeenyɛ lɛ, eyashɛ Yerusalem yɛ Pentekoste Gbi Jurɔ lɛ nɔ.
17 Shi ejɛ Mileto etsu akɛ wiemɔ tee Efeso ni ayatsɛ asafo lɛ mli onukpai lɛ kɛba.
18 Be ni amɛba eŋɔɔ lɛ, ekɛɛ amɛ akɛ: “Nyɛle bɔ ni miba mijeŋ mihã yɛ nyɛteŋ kɛjɛ gbi klɛŋklɛŋ ni miba Asia kpokpaa lɛ nɔ lɛ jogbaŋŋ,
19 akɛ mikɛ heshibaa fɛɛ* kɛ yaafonui kɛ jaramɔ shihilɛi ni ba minɔ yɛ Yudafoi lɛ aŋaatsɔi lɛ ahewɔ lɛ sɔmɔ Nuŋtsɔ lɛ akɛ nyɔŋ,
20 ni nakai be lɛ mli nɔŋŋ lɛ, mishashaooo shi akɛ makɛɛ nyɛ nibii ni he yɔɔ sɛɛnamɔ* lɛ ní agbɛnɛ hu matsɔɔ nyɛ nii yɛ maŋ kɛ shĩa fɛɛ shĩa.
21 Shi moŋ miye odase fitsofitso mitsɔɔ Yudafoi kɛ Helabii fɛɛ akɛ amɛtsake amɛtsui ni amɛkpale kɛba Nyɔŋmɔ ŋɔɔ ni amɛná hemɔkɛyeli yɛ wɔ-Nuŋtsɔ Yesu mli.
22 Ni agbɛnɛ, naa! akɛni afi mi yɛ mumɔ lɛ mli* hewɔ lɛ, miiya Yerusalem, kɛ̃lɛ mileee nɔ ni baaba minɔ yɛ jɛmɛ,
23 akɛ ja nɔ ni mumɔ krɔŋkrɔŋ lɛ yeɔ mi odase shii abɔ yɛ maŋ fɛɛ maŋ nɔ ekɛɔ akɛ tsuŋwoo kɛ amanehului miimɛ mi lɛ.
24 Kɛ̃lɛ, mibuuu mi diɛŋtsɛ miwala* akɛ nɔ ko ni he hiaa mi,* kɛ́ no baahã magbe mifoidamɔ kɛ sɔɔmɔ ni miná kɛjɛ Nuŋtsɔ Yesu dɛŋ, akɛ miye Nyɔŋmɔ duromɔ lɛ he sane kpakpa lɛ he odase fitsofitso lɛ naa.
25 “Ni agbɛnɛ, naa! mile akɛ nyɛ mɛi fɛɛ ni mibashiɛ Maŋtsɛyeli lɛ yɛ nyɛteŋ lɛ ateŋ mɔ ko mɔ ko enaŋ mihiɛ dɔŋŋ.
26 No hewɔ lɛ, ŋmɛnɛ gbi nɛɛ, miitsɛ nyɛ ni nyɛbaye mihe odase akɛ miyeee gbɔmɔ ko gbɔmɔ ko lá yi sɔ̃,
27 ejaakɛ mishashaooo shi akɛ makɛɛ nyɛ Nyɔŋmɔ yiŋtoi lɛ fɛɛ.
28 Nyɛhiɛ ahia nyɛ diɛŋtsɛ nyɛhe kɛ tooku lɛ fɛɛ nɔ, mɛi ateŋ ni mumɔ krɔŋkrɔŋ lɛ ehole nyɛ nɔkwɛlɔi yɛ lɛ, koni nyɛkwɛ Nyɔŋmɔ asafo lɛ ní ekɛ lɛ diɛŋtsɛ e-Bi lɛ lá hé lɛ tamɔ tookwɛlɔi feɔ lɛ.
29 Mile akɛ kɛ́ mishi mitee lɛ, klaji yiwalɔi baabote nyɛteŋ ni amɛhiɛŋ tooku lɛ dɔdɔɔdɔ,
30 ni hii baate shi yɛ nyɛ diɛŋtsɛ nyɛteŋ, ni amɛbaawie saji kɔɔdɔji ni amɛkɛkpala kaselɔi lɛ kɛnyiɛ amɛ diɛŋtsɛ amɛsɛɛ.
31 “No hewɔ lɛ, nyɛyaa nɔ nyɛshia kpe, ni nyɛhãa ehia nyɛjwɛŋmɔ mli akɛ, mitee nɔ mikɛ yaafonui wie tsɔɔ nyɛteŋ mɔ fɛɛ mɔ nyɔɔŋ kɛ shwane afii etɛ sɔŋŋ, ni mifɔ̃ɔɔ.
32 Ni amrɔ nɛɛ, miitu nyɛ miiwo Nyɔŋmɔ kɛ eduromɔ lɛ he wiemɔ lɛ dɛŋ, wiemɔ ní baanyɛ atswa nyɛ ama shi ní ehã nyɛná gboshinii lɛ yɛ mɛi krɔŋkrɔŋi* lɛ fɛɛ ateŋ lɛ.
33 Mishweko mɔ ko jwiɛtɛi loo shika tsuru loo atade.
34 Nyɛ diɛŋtsɛ nyɛle akɛ nibii ni he hiaa mi diɛŋtsɛ kɛ mɛi ni kɛ mi yɔɔ lɛ, nɛkɛ niji nɛɛ nɔŋŋ tsu he nii.
35 Mihã nyɛna yɛ nibii fɛɛ mli akɛ nakai esa akɛ nyɛtsu nii waa ni nyɛkɛye nyɛbua mɛi ni egbede lɛ, ni esa akɛ nyɛhã Nuŋtsɔ Yesu wiemɔi, ni lɛ diɛŋtsɛ ewie lɛ ahi nyɛjwɛŋmɔ mli akɛ: ‘Nɔhãmɔ hãa mɔ náa miishɛɛ fe nɔhemɔ.’”
36 Ni be ni ewie nibii nɛɛ, ekɛ amɛ fɛɛ kula shi ni esɔle.
37 Anɔkwa, amɛ fɛɛ amɛfo naakpa, ni amɛfuafua Paulo,* ni amɛkɛ suɔmɔ shɔ enaa,
38 ejaakɛ nɔ ni dɔ amɛ titri ji wiemɔ ni ewie akɛ amɛnaŋ ehiɛ dɔŋŋ lɛ. Ni amɛyajie lɛ gbɛ kɛtee meele lɛ mli.
Shishigbɛ Niŋmaa
^ Sht. ŋm., “koni wɔkumɔ aboloo.”
^ Aloo “esusuma yɛ emli.”
^ Sht. ŋm., “ebakumɔ aboloo lɛ.”
^ Aloo “heshibaa jwɛŋmɔ.”
^ Aloo “nibii ni hi hã nyɛ.”
^ Aloo “mumɔ lɛ eŋɔfi minɔ.”
^ Aloo “misusuma.”
^ Aloo “akɛ nɔ ko ni jara wa kɛhã mi.”
^ Aloo “mɛi ni asaa amɛ ato ahã Nyɔŋmɔ.”
^ Sht. ŋm., “amɛgbeegbee Paulo kuɛ nɔ.”
