Bɔfoi 21:1-40
21 Be ni wɔnyɛ wɔkɛ amɛ gbala mli lɛ, wɔkɛ meele fã kɛnyiɛ ŋshɔ lɛ hiɛ tɛ̃ɛ kɛba Kos, enɔ jetsɛremɔ lɛ wɔtee Rodo, ni wɔjɛ jɛmɛ wɔtee Patara.
2 Be ni wɔna meele ko ni miifo mli kɛya Foinike lɛ, wɔbote mli ni wɔkɛshwie nɔ.
3 Be ni wɔshɛ he ko ni Kipro ŋshɔkpɔ lɛ tua wɔhiɛ lɛ, wɔtswa lɛ wɔfɔ̃ abɛku ni wɔtsa nɔ kɛbashɛ Siria, ni wɔyakpeleke yɛ Tiro, he ni abaajie meele lɛ mli jatsui lɛ yɛ lɛ.
4 Wɔtao kaselɔi lɛ ni wɔna amɛ ni wɔhi jɛmɛ gbii kpawo. Shi amɛtsɔ mumɔ lɛ nɔ amɛkɛɛ Paulo shii abɔ akɛ enane akayi Yerusalem.
5 No hewɔ lɛ, be ni wɔye wɔgbii lɛ wɔtã lɛ, wɔshi jɛmɛ ni wɔyi mli, shi amɛ fɛɛ, ní yei kɛ gbekɛbii fata he lɛ bajie wɔ gbɛ kɛyashɛ maŋ lɛ klotia. Ni wɔkula shi yɛ ŋshɔ lɛ naa ni wɔsɔle
6 ni wɔkɛ wɔhe yeyee shɛɛ. Kɛkɛ ni wɔbote meele lɛ mli, ni amɛ hu amɛku amɛsɛɛ kɛtee amɛshĩai.
7 Agbɛnɛ, gbɛ ni wɔfã kɛjɛ Tiro kɛnyiɛ ŋshɔ lɛ hiɛ lɛ kɛ wɔ bashɛ Ptolemai, ni wɔyaŋa nyɛmimɛi lɛ ni wɔkɛ amɛ hi shi gbi kome.
8 Enɔ jetsɛremɔ lɛ, wɔyi mli ni wɔyashɛ Kaisarea, ni wɔyabote sane kpakpa shiɛlɔ Filipo, ni ji hii kpawo lɛ ateŋ mɔ kome lɛ, shĩa lɛ mli ni wɔkɛ lɛ hi shi.
9 Nuu nɛɛ yɛ biyei ejwɛ ni boteko gbãla mli* ní gbaa.
10 Shi be ni wɔhi jɛmɛ gbii saŋŋ lɛ, gbalɔ ko ni atsɛɔ lɛ Agabo lɛ kpeleke shi kɛjɛ Yudea kɛba.
11 Ni eba wɔŋɔɔ ni eŋɔ Paulo hɛfiinɔ lɛ ni ekɛfi lɛ diɛŋtsɛ enaji kɛ eniji ni ekɛɛ: “Bɔ ni mumɔ krɔŋkrɔŋ lɛ kɛɛ nɛ, ‘Nuu ni hɛfiinɔ nɛɛ ji enɔ lɛ, nɛkɛ Yudafoi lɛ baafi lɛ yɛ Yerusalem ni amɛbaaŋɔ lɛ amɛwo jeŋmajiaŋbii lɛ adɛŋ.’”
12 Agbɛnɛ be ni wɔnu enɛ lɛ, wɔ kɛ mɛi ni yɔɔ jɛmɛ lɛ fɛɛ bɔi lɛ faikpamɔ akɛ ekaya Yerusalem.
13 Kɛkɛ ni Paulo hã hetoo akɛ: “Mɛni nyɛfeɔ nɛɛ, nyɛmiifo ni nyɛmiitao ni minijiaŋ aje wui lo?* Nyɛnáa nyɛlea akɛ, jeee fi ni abaafi mi lɛ kɛkɛ mifee klalo mito, shi moŋ kɛhã gbele hu yɛ Yerusalem yɛ Nuŋtsɔ Yesu gbɛ́i lɛ hewɔ.”
14 Be ni etsakeee ejwɛŋmɔ lɛ, wɔkpa enaatsĩi* ni wɔkɛɛ: “Afee nɔ ni Yehowa* sumɔɔ.”
15 Agbɛnɛ, gbii nɛɛ asɛɛ lɛ, wɔsaa wɔhe kɛhã gbɛfãa lɛ ni wɔbɔi kwɔɔ kɛ Yerusalem yaa.
16 Kaselɔi ni jɛ Kaisarea lɛ ateŋ mɛi komɛi hu kɛ wɔ tee, ni amɛkɛ wɔ ba Mnason ni jɛ Kipro lɛ ŋɔɔ, eji mra mli kaselɔi lɛ ateŋ mɔ kome, ni eshĩa wɔbaato gbɔ yɛ.
17 Be ni wɔyashɛ Yerusalem lɛ, nyɛmimɛi lɛ here wɔ kɛ miishɛɛ.
18 Shi enɔ jetsɛremɔ lɛ, Paulo kɛ wɔ bote mli kɛtee Yakobo ŋɔɔ, ni onukpai lɛ fɛɛ yɛ jɛmɛ.
19 Ni eŋa amɛ, ni ebɔi amɛ nibii ni Nyɔŋmɔ tsɔ esɔɔmɔ lɛ nɔ efee yɛ jeŋmaji lɛ ateŋ lɛ gbaa fitsofitso.
20 Be ni amɛnu enɛ lɛ, amɛbɔi Nyɔŋmɔ hiɛnyamwoo, shi amɛkɛɛ lɛ akɛ: “Anyɛmi, kwɛmɔ mɛi akpei abɔ ni ehe eye yɛ Yudafoi lɛ ateŋ, ni amɛ fɛɛ amɛhiɛ dɔɔ Mla lɛ he.
21 Shi amɛnu sane ko ni abatã yɛ ohe akɛ otsɔɔ Yudafoi fɛɛ ni yɔɔ jeŋmaji lɛ ateŋ lɛ akɛ amɛkwa Mose Mla lɛ; okɛɔ amɛ akɛ amɛkafolɔ amɛbii aketia loo amɛkanyiɛ kusumii lɛ asɛɛ.
22 Belɛ, mɛni esa akɛ afee yɛ he? Bɔ fɛɛ bɔ ni fee lɛ, amɛbaanu akɛ oba.
23 No hewɔ lɛ, feemɔ nɔ ni wɔkɛɔ bo nɛɛ: Wɔyɛ hii ejwɛ ní ewo Nyɔŋmɔ shi.
24 Ŋɔɔ hii nɛɛ kɛya ni okɛ amɛ fɛɛ ayatsuu nyɛhe yɛ kusum naa ní owo nyɔji ni amɛbaabɔ lɛ ohã amɛ, koni ashɛ amɛyi. Ni no baahã mɔ fɛɛ mɔ aná ale akɛ saji ni abatã yɛ ohe lɛ bɛ mli, shi moŋ obaa ojeŋ jogbaŋŋ, ni oyeɔ Mla lɛ nɔ hu.
25 Shi mɛi ni ehe eye yɛ jeŋmaji lɛ ateŋ lɛ, wɔŋma wɔyiŋkpɛɛ lɛ wɔmaje amɛ akɛ, esa akɛ amɛya nɔ amɛtsi amɛhe kɛje nibii ni akɛshã afɔle ahã amagai ahe, kɛje lá he, kɛje kooloi ni ashɔ̃tɔ* ahe, kɛ agbɛnɛ hu kɛje bɔlɛnamɔ jeŋba sha* he.”
26 Kɛkɛ ni enɔ jetsɛremɔ lɛ, Paulo ŋɔ hii lɛ kɛfata ehe ni ekɛ amɛ fɛɛ tee amɛyatsuu amɛhe yɛ kusum naa, ni eyiŋ etee sɔlemɔwe lɛ koni eyatsɔɔ be ni kusum naa hetsuumɔ gbii lɛ baaba naagbee, kɛ be ni esa akɛ ashã afɔle ahã amɛteŋ mɔ fɛɛ mɔ.
27 Agbɛnɛ, be ni gbii kpawo lɛ miihe aba naagbee lɛ, Yudafoi ni jɛ Asia lɛ na lɛ yɛ sɔlemɔwe lɛ, ni amɛwo asafoku muu lɛ fɛɛ yiŋ, ni amɛmɔ lɛ,
28 ni amɛbolɔ akɛ: “Israel hii, nyɛbayea nyɛbuaa wɔ! Nuu nɛɛ ji mɔ ni wieɔ nibii ni gbeɔ wɔmaŋ lɛ kɛ wɔ-Mla lɛ kɛ biɛ nɛɛ he guɔ lɛ etsɔɔ mɛi fɛɛ yɛ he fɛɛ he lɛ. Ni nɔ ni ehiii fe fɛɛ lɛ, ekɛ Helabii po ba sɔlemɔwe lɛ, ni ebule he krɔŋkrɔŋ nɛɛ.”
29 Ejaakɛ no mli lɛ amɛna lɛ kɛ Trofimo ni jɛ Efeso lɛ yɛ maŋ lɛ mli momo, ni amɛsusu akɛ Paulo kɛ lɛ eba sɔlemɔwe lɛ.
30 Maŋ lɛ mli fɛɛ fee basabasa, ni mɛi lɛ fɛɛ sha foi kɛba, ni amɛmɔ Paulo ni amɛgbala lɛ kɛjɛ sɔlemɔwe lɛ kɛje kpo, ni amrɔ lɛ aŋamɔ shinai lɛ.
31 Be ni amɛmiitao akɛ amɛgbe lɛ lɛ, ayatswa asraafoi akuu lɛ nɔ tatsɛ lɛ adafi akɛ basabasafeemɔ miiya nɔ yɛ Yerusalem fɛɛ;
32 ni amrɔ lɛ, eŋɔ asraafoi kɛ asraafoiatsɛmɛi ni ekɛ foi kpeleke shi kɛba amɛŋɔɔ. Be ni amɛhiŋmɛi gba tatsɛ lɛ kɛ asraafoi lɛ anɔ lɛ, amɛkpa Paulo yii.
33 Kɛkɛ ni tatsɛ lɛ tsi ebɛŋkɛ ni emɔ lɛ, ni efã akɛ awo lɛ kɔsɔŋkɔsɔi enyɔ; no sɛɛ lɛ, ebi mɔ ni eji kɛ nɔ ni efee.
34 Shi asafoku lɛ mli bii komɛi bɔi bolɔmɔ nɛkɛ, ni mɛi krokomɛi hu bolɔ ekroko. No hewɔ lɛ, akɛni enyɛɛɛ ele sane lɛ mli anɔkwale lɛ yɛ hoofeemɔ lɛ hewɔ lɛ, efã koni akɛ lɛ aba asraafoi ashihilɛhe lɛ.
35 Shi be ni eshɛ atrakpoi lɛ anaa lɛ, asraafoi lɛ wó lɛ yɛ asafoku lɛ gidigidifeemɔ lɛ hewɔ,
36 ejaakɛ asafoku lɛ kã he amɛnyiɛ sɛɛ ni amɛmiibolɔ akɛ: “Agbe lɛ!”
37 Be ni eshwɛ fioo ni abaakpala Paulo kɛbote asraafoi ashihilɛhe lɛ, ekɛɛ tatsɛ lɛ akɛ: “Ani miyɛ hegbɛ akɛ mikɛɔ bo nɔ ko?” Ekɛɛ akɛ: “Onyɛɔ owieɔ Hela?
38 Belɛ, ani jeee bo ji Ejiptnyo ni be ko ni eho lɛ, ewo mɛi ayiŋ ní amɛtse atua, ní ekpala hii akpei ejwɛ ní gbalaa kakla lɛ kɛnyiɛ esɛɛ kɛtee ŋa lɛ nɔ* lɛ?”
39 Kɛkɛ ni Paulo kɛɛ: “Anɔkwa, Yudafonyo ji mi, ni mijɛ Tarso, Kilikia maŋ ko ni ehe gbɛ́i lɛ mli. No hewɔ lɛ, miikpa bo fai, ŋmɛɛ mi gbɛ ni mikɛ mɛi lɛ awie.”
40 Be ni ehã lɛ hegbɛ lɛ, Paulo damɔ atrakpoi lɛ anɔ, ni ekɛ enine fee okadi etsɔɔ mɛi lɛ. Be ni jɛmɛ jɔ tiŋkoŋŋ lɛ, ekɛ mɛi lɛ wie yɛ Hebri wiemɔ mli ekɛɛ:
Shishigbɛ Niŋmaa
^ Sht. ŋm., “ni ji oblayei froi.”
^ Aloo “nyɛmiifo ni nyɛkɛkumɔ mitsui?”
^ Sht. ŋm., “wɔfee diŋŋ.”
^ Kwɛmɔ Wiemɔi Titrii Amligbalamɔ lɛ.
^ Aloo “kooloi ni agbe shi afɔseko amɛlá ashwieko shi.”
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
