Bɔfoi 23:1-35
23 Paulo kwɛ Sanhedrin* lɛ gãa ni ekɛɛ: “Ataamɛi, nyɛmimɛi, mikɛ henilee ni he tse kɛmɔ shi eba mijeŋ yɛ Nyɔŋmɔ hiɛ kɛbashi ŋmɛnɛ gbi nɛɛ.”
2 Kɛkɛ ni osɔfonukpa Anania fã mɛi ni damɔ emasɛi lɛ akɛ amɛgba enaabu ma.
3 Kɛkɛ ni Paulo kɛɛ lɛ akɛ: “Nyɔŋmɔ baagba bo ma, bo gbogbo ni asha he futafuta. Ota shi ookojo mi yɛ Mla lɛ naa ni yɛ nakai be lɛ mli nɔŋŋ lɛ, okuɔ Mla lɛ mli ofãa akɛ agba mi ma?”
4 Mɛi ni damɔ emasɛi lɛ kɛɛ: “Nyɔŋmɔ osɔfonukpa lɛ ojɛɔ nɛɛ?”
5 Ni Paulo kɛɛ: “Nyɛmimɛi, mileee akɛ osɔfonukpa ni. Ejaakɛ aŋma akɛ, ‘Esaaa akɛ owieɔ omaŋbii lɛ anɔyelɔ ko he efɔŋ.’”
6 Agbɛnɛ, akɛni Paulo le akɛ amɛfã kome lɛ Sadukifoi ni, shi fã kroko lɛ Farisifoi ni hewɔ lɛ, ebo yɛ Sanhedrin lɛ mli akɛ: “Ataamɛi, nyɛmimɛi, Farisifonyo ji mi, Farisifoi abi. Gbohiiashitee he hiɛnɔkamɔ lɛ hewɔ akojoɔ mi nɛɛ.”
7 Enɛ ni ewie lɛ hã naataamɔ te shi yɛ Farisifoi lɛ kɛ Sadukifoi lɛ ateŋ, ni gwabɔɔ lɛ mli gba enyɔ.
8 Ejaakɛ Sadukifoi lɛ kɛɔ akɛ gbohiiashitee ko bɛ ni asaŋ ŋwɛibɔfo loo mumɔ ko hu bɛ, shi Farisifoi lɛ kpɛlɛɔ nɔ* akɛ nibii nɛɛ fɛɛ yɛ.
9 No hewɔ lɛ, bolɔmɔ ni naa wa bate shi, ni woloŋmalɔi lɛ ni yɔɔ Farisifoi akuu lɛ mli lɛ ateŋ mɛi komɛi te shi ni amɛbɔi ŋwanejee shɛii akɛ: “Wɔnaaa nɔ fɔŋ ko yɛ gbɔmɔ nɛɛ mli, shi kɛ́ mumɔ ko loo ŋwɛibɔfo ko kɛ lɛ ewie lɛ—.”
10 Agbɛnɛ, be ni naataamɔ lɛ mli wa lɛ, tatsɛ lɛ she gbeyei akɛ amɛbaatserɛ Paulo mli, ni efã asraafoi lɛ akɛ amɛkpeleke shi kɛya ni amɛyashɔ̃ lɛ kɛje amɛteŋ ni amɛkɛ lɛ aba asraafoi ashihilɛhe lɛ.
11 Shi enɔ nyɔɔŋ lɛ, Nuŋtsɔ lɛ badamɔ emasɛi ni ekɛɛ lɛ akɛ: “Ná ekãa! Ejaakɛ bɔ ni oyeɔ mihe odase fitsofitso yɛ Yerusalem lɛ, nakai nɔŋŋ esa akɛ oyaye odase yɛ Roma.”
12 Be ni je tsɛre lɛ, Yudafoi lɛ tsɔ ŋaa ni amɛkamɔ amɛhe loomɔ kitã akɛ, amɛyeŋ nii ni amɛnuŋ nɔ ko kɛyashi amɛbaagbe Paulo.
13 Hii ni tsɔ ŋaa ni amɛkamɔ amɛhe kitã lɛ ayi fa fe nyɔŋmai ejwɛ.
14 Hii nɛɛ tee osɔfoi tsiifoi lɛ kɛ maŋ lɛ mli onukpai lɛ aŋɔɔ amɛyakɛɛ akɛ: “Wɔkamɔ wɔhe loomɔ kitã akɛ wɔyeŋ nɔ ko nɔ ko kwraa kɛyashi wɔbaagbe Paulo.
15 No hewɔ lɛ, agbɛnɛ, nyɛ kɛ Sanhedrin lɛ fɛɛ ayakɛa tatsɛ lɛ akɛ ekɛ lɛ akpeleke shi kɛba nyɛŋɔɔ, tamɔ nɔ ni nyɛmiitao nyɛpɛi esane lɛ mli fitsofitso fe tsutsu lɛ. Shi dani ebaabɛŋkɛ lɛ, no mli lɛ wɔfee klalo akɛ wɔbaagbe lɛ.”
16 Shi Paulo nyɛmi yoo ko binuu nu antɛo ni amɛmiikpaŋ akɛ amɛbaawo nɛɛ he, ni etee asraafoi ashihilɛhe lɛ ni eyabɔ Paulo amaniɛ.
17 Kɛkɛ ni Paulo tsɛ asraafoiatsɛmɛi lɛ ateŋ mɔ kome kɛba eŋɔɔ ni ekɛɛ lɛ akɛ: “Ŋɔɔ oblanyo nɛɛ kɛya tatsɛ lɛ ŋɔɔ, ejaakɛ eyɛ amaniɛ ko kɛhã lɛ.”
18 No hewɔ lɛ, eŋɔ lɛ ni enyiɛ ehiɛ kɛtee tatsɛ lɛ ŋɔɔ ni ekɛɛ: “Gboklɛfonyo Paulo lɛ tsɛ mi ni ekɛɛ mi koni mikɛ oblanyo nɛɛ aba oŋɔɔ, ejaakɛ eyɛ nɔ ko ni ebaakɛɛ bo.”
19 Tatsɛ lɛ mɔ enine mli ni ekɛ lɛ pɛ tee afã ni ebi lɛ akɛ: “Mɛɛ amaniɛ oyɔɔ kɛhã mi lɛ?”
20 Ekɛɛ akɛ: “Yudafoi lɛ ekpaŋ akɛ amɛbaabi bo koni wɔ́ lɛ, okɛ Paulo akpeleke shi kɛba Sanhedrin lɛ hiɛ, tamɔ nɔ ni amɛmiitao amɛle esane lɛ mli fitsofitso fe tsutsu lɛ.
21 Shi kaahã amɛkɔne oyiŋ, ejaakɛ amɛhii lɛ ateŋ mɛi ni fa fe nyɔŋmai ejwɛ miimɛ koni amɛwo lɛ antɛo, ni amɛkamɔ amɛhe loomɔ kitã akɛ amɛyeŋ nii ni asaŋ amɛnuŋ nɔ ko kɛyashi amɛbaagbe lɛ; ni amrɔ nɛɛ amɛfee klalo, amɛmiimɛ onaa shiwoo.”
22 No hewɔ lɛ, be ni tatsɛ lɛ fã oblanyo lɛ akɛ: “Kaakɛɛ mɔ ko mɔ ko akɛ otsĩ sane nɛɛ tã otsɔɔ mi” lɛ, ewo lɛ gbɛ.
23 Ni etsɛ asraafoiatsɛmɛi lɛ ateŋ mɛi enyɔ ni ekɛɛ: “Nyɛsaa asraafoi ohai enyɔ kɛ okpɔŋɔiatsɛmɛi nyɔŋmai kpawo kɛ akplɔiatsɛmɛi ohai enyɔ nyɛtoa koni amɛshi akoŋ kɛya Kaisarea yɛ nyɔɔŋ ŋmɛlɛtswaa ni ji etɛ lɛ nɔ.*
24 Kɛfata he lɛ, nyɛhãa Paulo okpɔŋɔi ní eta nɔ koni nyɛkɛ lɛ ayahã amralo Felike shweshweeshwe.”
25 Ni eŋma wolo, ni emli wiemɔi nɛ:
26 “Klaudio Lisia kɛyahã Anunyamtsɛ Amralo Felike: Miiŋa bo!
27 Yudafoi lɛ mɔ nuu nɛɛ ní amɛmiiba amɛbagbe lɛ, shi mikɛ misraafoi lɛ tee amrɔ nɔŋŋ ni miyahere lɛ, ejaakɛ miná mile akɛ Romanyo ji lɛ.
28 Ni akɛni miitao male nɔ hewɔ ni amɛkɛ sane fɔ̃ɔ enɔ lɛ hewɔ lɛ, mikɛ lɛ kpeleke shi kɛtee amɛ-Sanhedrin lɛ hiɛ.
29 Mina akɛ amɛ-Mla lɛ he ŋwanejee saji komɛi ahewɔ akɛ sane efɔ̃ enɔ lɛ, shi saji ni akɛshwie enɔ lɛ ekome folo bɛ ni hãa efeɔ mɔ ni sa gbele loo tsuŋwoo.
30 Shi akɛni ahã mile ŋaa ni atsɔ yɛ nuu nɛɛ he lɛ hewɔ lɛ, miitsu ni akɛ lɛ aba oŋɔɔ amrɔ nɔŋŋ, ni miifã mɛi ni kɛ sane fɔ̃ɔ enɔ lɛ koni amɛbawie saji ni amɛyɔɔ kɛshi lɛ lɛ yɛ ohiɛ.”
31 No hewɔ lɛ, asraafoi nɛɛ ŋɔ Paulo yɛ famɔi ni akɛhã amɛ lɛ naa ni amɛkɛ lɛ yi mli nyɔɔŋ kɛba Antipatri.
32 Enɔ jetsɛremɔ lɛ, amɛhã okpɔŋɔiatsɛmɛi lɛ kɛ lɛ tee, shi amɛ lɛ, amɛku amɛsɛɛ kɛba asraafoi ashihilɛhe lɛ.
33 Okpɔŋɔiatsɛmɛi lɛ tee Kaisarea ni amɛkɛ wolo lɛ yahã amralo lɛ, ni amɛkɛ Paulo hu yawo edɛŋ.
34 Ni ekane wolo lɛ, ni ebi kpokpaa nɔ ni Paulo jɛ, ni ená ele akɛ ejɛ Kilikia.
35 Ekɛɛ: “Mabo osane lɛ toi jogbaŋŋ, kɛ́ mɛi ni kɛ sane fɔ̃ɔ onɔ lɛ bashɛ shi.” Ni efã ni bulɔi abu ehe yɛ Herode maŋtsɛwe* lɛ.
