Bɔfoi 8:1-40
8 Saul hu kpɛlɛ gbee ni agbeɔ Stefano lɛ nɔ.
Nakai gbi lɛ nɔ lɛ yiwaa kpele te shi wo asafo ni yɔɔ Yerusalem lɛ; amɛ fɛɛ amɛgbɛ amɛshwã Yudea kɛ Samaria kpokpai lɛ anɔ ja bɔfoi lɛ kɛkɛ.
2 Shi hii Nyɔŋmɔ gbeyeishelɔi komɛi wó Stefano kɛtee ni amɛyafu lɛ, ni amɛye awerɛho babaoo yɛ ehewɔ.
3 Shi Saul lɛ, ebɔi asafo lɛ tutuamɔ waa. Ejɛɔ shĩa kome kɛyaa shĩa kroko ni eyagbalaa hii kɛ yei fɛɛ ni eŋɔɔ amɛ ehãa koni awo amɛ tsuŋ.
4 Shi mɛi ni egbɛ eshwã lɛ yakpa shikpɔŋ lɛ nɔ fɛɛ ni amɛjaje wiemɔ lɛ he sane kpakpa lɛ amɛtsɔɔ.
5 Agbɛnɛ, Filipo kpeleke shi kɛtee Samaria maŋ lɛ* mli ni eyabɔi Kristo lɛ shiɛmɔ kɛ amɛ hãmɔ.
6 Be ni asafoku lɛ boɔ Filipo toi ni amɛkwɛɔ okadii ni efeɔ lɛ, amɛkɛ jwɛŋmɔ kome bo wiemɔ ni ewieɔ lɛ toi jogbaŋŋ.
7 Ejaakɛ amɛteŋ mɛi babaoo yɛ mumɔi ni he tseee, ni mumɔi nɛɛ boɔ kɛ gbee ni wa ni amɛjeɔ kpo. Atsa mɛi ni ekumɔ kɛ akpakei babaoo hu.
8 Ni aná miishɛɛ naakpa yɛ nakai maŋ lɛ mli.
9 Agbɛnɛ, nuu ko ni atsɛɔ lɛ Simon yɛ maŋ lɛ mli ni efeɔ ashwãi, ni ehãa Samaria maŋ lɛ mli bii lɛ anaa kpɛɔ amɛhe, ni ekɛɔ akɛ gbɔmɔ agbo ji lɛ.
10 Ni mɛi bibii kɛ mɛi wuji fɛɛ boɔ lɛ toi jogbaŋŋ ni amɛkɛɔ akɛ: “Mɔ nɛ ji Nyɔŋmɔ Hewalɛ lɛ ní atsɛɔ lɛ Kpeteŋkpele lɛ.”
11 Ni akɛni ejɛ jeeŋmɔ beebe ekɛ ashwãifeemɔ ehã amɛnaa ekpɛ amɛhe hewɔ lɛ, amɛboɔ lɛ toi jogbaŋŋ.
12 Shi be ni amɛhe Filipo, mɔ ni jaje Nyɔŋmɔ Maŋtsɛyeli lɛ kɛ Yesu Kristo gbɛ́i lɛ he sane kpakpa lɛ etsɔɔ amɛ lɛ, amɛye lɛ, amɛhã abaptisi amɛ, hii kɛ yei fɛɛ.
13 Simon diɛŋtsɛ hu he eye, ni be ni abaptisi lɛ sɛɛ lɛ, etee nɔ ehi Filipo masɛi; ni okadii kɛ hewalɛ nitsumɔi kpelei ni ena akɛ aafee lɛ hã enaa kpɛ ehe.
14 Be ni bɔfoi ni yɔɔ Yerusalem lɛ nu akɛ Samariabii lɛ ekpɛlɛ Nyɔŋmɔ wiemɔ lɛ nɔ lɛ, amɛtsu Petro kɛ Yohane kɛtee amɛŋɔɔ;
15 ni amɛkpeleke shi kɛtee ni amɛyasɔle amɛhã amɛ koni amɛná mumɔ krɔŋkrɔŋ.
16 Ejaakɛ no mli lɛ ebako amɛteŋ mɔ ko mɔ ko nɔ, shi baptisimɔ kɛkɛ abaptisi amɛ yɛ Nuŋtsɔ Yesu gbɛ́i lɛ mli.
17 Ni amɛkɛ amɛniji ŋmɛlɛ amɛnɔ, ni amɛbɔi mumɔ krɔŋkrɔŋ námɔ.
18 Agbɛnɛ, be ni Simon na akɛ bɔfoi lɛ aniji kɛ mɛi anɔŋmɛlɛmɔ hãa anáa mumɔ lɛ, eka akɛ ebaahã amɛ shika,
19 ni ekɛɛ: “Nyɛhãa mi hu nɛkɛ hegbɛ nɛɛ koni mɔ fɛɛ mɔ ni mikɛ miniji baaŋmɛlɛ enɔ lɛ aná mumɔ krɔŋkrɔŋ.”
20 Shi Petro kɛɛ lɛ akɛ: “Bo kɛ ojwiɛtɛi lɛ fɛɛ hiɛ akpãtã, ejaakɛ osusuɔ akɛ obaanyɛ okɛ shika ahé Nyɔŋmɔ duromɔ keenɔ lɛ.
21 Obɛ gbɛnaa loo gbɛfaŋnɔ ko yɛ sane nɛɛ mli ejaakɛ otsui ejaaa yɛ Nyɔŋmɔ hiɛ.
22 No hewɔ lɛ, tsakemɔ otsui yɛ onɔfɔŋfeemɔ nɛɛ hewɔ, ni okɛ hiɛdɔɔ akpa Yehowa* fai akɛ aleenɔ abaaŋɔ otsuiŋ susumɔ gbonyo nɛɛ afa bo lo;
23 ejaakɛ mina akɛ oji ebɔɔ ni joɔ* kɛ nii ni ejaaa nyɔŋ.”
24 Ni Simon hã amɛ hetoo akɛ: “Nyɛkɛ hiɛdɔɔ akpaa Yehowa* fai yɛ mihewɔ koni nibii ni nyɛwie lɛ eko akaba minɔ.”
25 Agbɛnɛ, be ni amɛye odase fitsofitso ni amɛwie Yehowa* wiemɔ lɛ, amɛbɔi amɛsɛɛkuu kɛmiiba Yerusalem, ni amɛjaje sane kpakpa lɛ amɛtsɔɔ yɛ Samariabii lɛ akrowai babaoo amli.
26 Shi Yehowa* bɔfo* lɛ kɛ Filipo wie ekɛɛ: “Tee shi ni oya wuoyigbɛ yɛ gbɛ ni kpelekeɔ shi kɛjɛɔ Yerusalem kɛyaa Gaza lɛ nɔ.” (Eji gbɛ ni kã shia ŋa nɔ.)
27 Ni ete shi etee, ni naa! Etiopia piafonyo ko,* nuu ni yɔɔ hegbɛ kpele yɛ Etiopia maŋnyɛ Kandake shishi, ni lɛ ekwɛɔ maŋnyɛ lɛ jwetrii fɛɛ nɔ. Etee Yerusalem eyajá Nyɔŋmɔ,
28 shi eeku esɛɛ ni eta eshwiili mli ni eekane gbalɔ Yesaia wolo lɛ.
29 No hewɔ lɛ, mumɔ lɛ kɛɛ Filipo akɛ: “Yaa ni oyanina shwiili nɛɛ, ni ohi he.”
30 Be ni Filipo joɔ foi yɛ shwiili lɛ he lɛ, enu ni piafonyo lɛ miikane gbalɔ Yesaia wolo lɛ, ni ekɛɛ: “Ani oonu nɔ ni okaneɔ lɛ shishi?”
31 Ni ekɛɛ: “Anɔkwa, te mafee tɛŋŋ manyɛ manu shishi akɛ ja mɔ ko tsɔɔ mi?” No hewɔ lɛ, ekpa Filipo fai ní ekwɔ ní ebata emasɛi.
32 Ni Ŋmalɛ ni ekaneɔ lɛ nɛ: “Akpala lɛ kɛtee tamɔ gwantɛŋ ní ayaagbe lɛ, ni bɔ ni gwantɛŋbi feɔ dioo yɛ ehetsɔikulɔ hiɛ lɛ, nakai nɔŋŋ lɛ hu egbeleee enaa.
33 Be ni ashwieɔ ehiɛ shi lɛ, ayeee lɛ jalɛ sane. Namɔ baagba eyinɔ he sane fitsofitso? Ejaakɛ aŋɔ ewala kɛje shikpɔŋ lɛ nɔ.”
34 Kɛkɛ ni piafonyo lɛ kɛɛ Filipo akɛ: “Miikpa bo fai, namɔ he gbalɔ lɛ wieɔ lɛ? Lɛ diɛŋtsɛ ehe aloo nuu kroko?”
35 Filipo bɔi wiemɔ, ni eje shishi kɛjɛ nɛkɛ ŋmalɛ nɛɛ nɔ, ni ejaje Yesu he sane kpakpa lɛ etsɔɔ lɛ.
36 Agbɛnɛ, be ni amɛnyiɛ gbɛ lɛ nɔ kɛyaa lɛ, amɛyashɛ nu ko he, ni piafonyo lɛ kɛɛ: “Naa! Nu nɛ; mɛni tsĩɔ mibaptisimɔ gbɛ?”
37 ——
38 Ni efã akɛ shwiili lɛ awa, ni Filipo kɛ piafonyo lɛ fɛɛ yimɔ shi kɛtee nu lɛ mli, ni ebaptisi lɛ.
39 Be ni amɛje nu lɛ mli lɛ, Yehowa* mumɔ lɛ kpala Filipo kɛtee oya, ni piafonyo lɛ enaaa lɛ dɔŋŋ, shi piafonyo lɛ tsa egbɛfãa lɛ nɔ kɛ miishɛɛ babaoo.
40 Shi Filipo yaje Ashdod, ni eyakpa shikpɔŋkuku lɛ mli fɛɛ ni etee nɔ ejaje sane kpakpa lɛ etsɔɔ yɛ maji lɛ fɛɛ mli kɛyashi eyashɛ Kaisarea.
Shishigbɛ Niŋmaa
^ Aloo eeenyɛ efee akɛ, “Samaria maŋ ko.”
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “kɔlikɔ joomɔ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “ŋwɛibɔfo.”
^ Aloo “Etiopia maŋtsɛwe lɛ mli onukpai lɛ ateŋ mɔ kome.”
^ Kwɛmɔ Wiemɔi Titrii Amligbalamɔ lɛ.
