Kpojiemɔ 13:1-18
13 Ni eyadamɔ shi* yɛ ŋshɔnaa shia lɛ nɔ ni etsiii ehe.
Ni mina kooloo awuiyelɔ ko miije kpo kɛmiijɛ ŋshɔ lɛ mli kɛmiiba, ni eyɛ akolontoi nyɔŋma kɛ yitsei kpawo, ni maŋtsɛ faii* nyɔŋma bumɔ ekolontoi lɛ anɔ, shi musubɔɔ gbɛ́ii yɛ eyitsei lɛ anɔ.
2 Agbɛnɛ kooloo awuiyelɔ ni mina lɛ tamɔ kootsɛ,* shi enaji tamɔ oshishibrishi naji, ni enaabu tamɔ jata naabu. Ni drako lɛ ŋɔ lɛ diɛŋtsɛ ehewalɛ lɛ kɛ emaŋtsɛ sɛi lɛ kɛ hegbɛ kpele ehã lɛ.
3 Mina eyitsei lɛ ateŋ ekome tamɔ nɔ ni epila gbele pilamɔ, shi atsa egbele pilamɔ lɛ, ni shikpɔŋ muu lɛ fɛɛ nyiɛ kooloo awuiyelɔ lɛ sɛɛ ní amɛnaa ekpɛ amɛhe.
4 Ni amɛjá drako lɛ ejaakɛ eŋɔ hegbɛ lɛ ehã kooloo awuiyelɔ lɛ, ni amɛjá kooloo awuiyelɔ lɛ kɛ wiemɔ nɛɛ amɛkɛɛ: “Namɔ tamɔ kooloo awuiyelɔ lɛ, ni namɔ baanyɛ ekɛ lɛ awu?”
5 Ahã lɛ naabu ni wieɔ nii wuji kɛ musubɔɔ wiemɔi, ni ahã lɛ hegbɛ ní ekɛtsu nii nyɔji nyɔŋmai ejwɛ kɛ enyɔ.
6 Ni egbele enaa ewie musubɔɔ wiemɔi eshi Nyɔŋmɔ, ewie egbɛ́i lɛ kɛ eshihilɛhe lɛ, mɛi ni hiɔ ŋwɛi lɛ tete ahe musubɔɔ wiemɔi.
7 Aŋmɛ lɛ gbɛ koni ekɛ mɛi krɔŋkrɔŋi lɛ awu ta ní eye amɛnɔ kunim, ni ahã lɛ hegbɛ yɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ kɛ jeŋmaŋ fɛɛ jeŋmaŋ nɔ.
8 Ni mɛi fɛɛ ni yɔɔ shikpɔŋ lɛ nɔ lɛ baajá lɛ. Kɛjɛ be ni ato je lɛ shishi* lɛ, aŋmako amɛteŋ mɔ ko mɔ ko gbɛ́i yɛ Gwantɛŋbi ní agbe lɛ lɛ wala wolokpo* lɛ mli.
9 Kɛji mɔ ko yɛ toi lɛ, hã enu.
10 Kɛji ato akɛ aŋɔ mɔ ko nom lɛ, abaaŋɔ lɛ nom. Kɛ́ mɔ ko kɛ klante gbe mɔ ko lɛ,* esa akɛ akɛ klante agbe lɛ. Biɛ shifimɔ kɛ hemɔkɛyeli yɛ mɛi krɔŋkrɔŋi lɛ agbɛfaŋ he ehia yɛ.
11 Kɛkɛ ni mina kooloo awuiyelɔ kroko ni miije kpo kɛmiijɛ shikpɔŋ lɛ mli, ni eyɛ akolontoi enyɔ tamɔ gwantɛŋbi, shi ebɔi wiemɔ tamɔ drako.
12 Etsuɔ klɛŋklɛŋ kooloo awuiyelɔ lɛ hegbɛ lɛ fɛɛ he nii yɛ ehiɛ. Ni ehãa shikpɔŋ lɛ kɛ mɛi ni yɔɔ enɔ lɛ jáa klɛŋklɛŋ kooloo awuiyelɔ ní atsa egbele pilamɔ lɛ.
13 Ni efeɔ okadii wuji, ni ehãa la po jɛɔ ŋwɛi baa shikpɔŋ lɛ nɔ yɛ gbɔmɛi ahiɛ.
14 Elakaa mɛi ni yɔɔ shikpɔŋ lɛ nɔ lɛ, yɛ okadii ni aŋmɛ lɛ gbɛ ni efee yɛ kooloo awuiyelɔ lɛ hiɛ lɛ hewɔ, ni yɛ nakai be lɛ mli nɔŋŋ lɛ, ekɛɔ mɛi ni yɔɔ shikpɔŋ lɛ nɔ lɛ akɛ amɛfee amaga amɛhã kooloo awuiyelɔ lɛ ní klante naa pilamɔ lɛ yɔɔ ehe ni kɛ̃lɛ ená hewalɛ ekoŋŋ lɛ.
15 Ni aŋmɛ lɛ gbɛ ní ekɛ mumɔ ni amuɔ* ahã kooloo awuiyelɔ lɛ amaga lɛ, koni kooloo awuiyelɔ lɛ amaga lɛ awie, ni agbɛnɛ hu ehã agbe mɛi fɛɛ ni kpoɔ akɛ amɛbaajá kooloo awuiyelɔ lɛ amaga lɛ.
16 Enyɛɔ gbɔmɛi fɛɛ—mɛi bibii kɛ mɛi wuji, niiatsɛmɛi kɛ ohiafoi, odehei kɛ nyɔji—anɔ akɛ amɛkpɛlɛ ni akadi amɛ yɛ amɛninejurɔ nɔ loo yɛ amɛhiɛŋtsei anɔ,
17 ni akɛ, mɔ ko mɔ ko nyɛŋ ahé nii loo ehɔ̃ɔ nii, akɛ ja mɔ ni yɔɔ okadi lɛ, kooloo awuiyelɔ lɛ gbɛ́i loo egbɛ́i yibɔ lɛ kɛkɛ.
18 Biɛ hiɛshikamɔ he ehia yɛ: Mɔ ni yɔɔ sɛɛyoomɔ lɛ abu kooloo awuiyelɔ lɛ yibɔ lɛ he akɔntaa, ejaakɛ gbɔmɔ yibɔ ni, ni eyibɔ lɛ ji ohai ekpaa kɛ nyɔŋmai ekpaa kɛ ekpaa.
Shishigbɛ Niŋmaa
^ Ni tsɔɔ akɛ, drako lɛ yadamɔ shi.
^ Aloo “akekerei.”
^ Aloo “mlaŋtswi.”
^ Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
^ Wolo kakadaŋŋ ni akotaa awoɔ tso he.
^ Aloo eeenyɛ efee akɛ, “Kɛ́ ato akɛ akɛ klante agbe mɔ ko lɛ.”
^ Aloo “mumɔ.”
