Kpojiemɔ 16:1-21
16 Ni minu gbee ko ni wa jɛ sɔlemɔtsu lɛ mli miikɛɛ ŋwɛibɔfoi kpawo lɛ akɛ: “Nyɛyaa ni nyɛyafɔsea Nyɔŋmɔ mlifu kãi kpawo lɛ amli nii lɛ nyɛshwiea shikpɔŋ lɛ nɔ.”
2 Klɛŋklɛŋ ŋwɛibɔfo lɛ yiŋ etee, ni eyafɔse ekã lɛ mli nii lɛ eshwie shikpɔŋ lɛ nɔ. Ni mɛi ni kooloo awuiyelɔ lɛ okadi yɔɔ amɛhe ní amɛjáa emaga lɛ famɔ faji fɔji ni waa mɔ he waa.
3 Ŋwɛibɔfo ni ji enyɔ lɛ fɔse ekã lɛ mli nii lɛ ewo ŋshɔ lɛ mli. Ni etsɔ lá tamɔ gbonyo nɔ, ni bɔɔ nɔ fɛɛ bɔɔ nɔ* ní hiɛ kã lɛ gbo, hɛɛ, nii ni yɔɔ ŋshɔ lɛ mli lɛ gboi.
4 Ŋwɛibɔfo ni ji etɛ lɛ fɔse ekã lɛ mli nii lɛ ewo fai kɛ nuhiŋmɛii lɛ amli. Ni amɛtsɔmɔ lá.
5 Minu akɛ nui lɛ anɔ ŋwɛibɔfo lɛ miikɛɛ: “Bo, mɔ ni oyɔɔ amrɔ nɛɛ kɛ mɔ ni yɛ momo, anɔkwafo lɛ, jalɔ ji bo, akɛni okɛ nɛkɛ kojomɔi nɛɛ ehã lɛ hewɔ,
6 ejaakɛ amɛshwie mɛi krɔŋkrɔŋi lɛ kɛ gbalɔi lɛ alá shi, ni ohã amɛ lá ní amɛnu; esa amɛ nakai.”
7 Ni minu akɛ afɔleshaa latɛ lɛ miikɛɛ: “Hɛɛ, Yehowa* Nyɔŋmɔ, Ofe lɛ, anɔkwa kɛ jalɛ ji okojomɔi lɛ.”*
8 Ŋwɛibɔfo ni ji ejwɛ lɛ fɔse ekã lɛ mli nii lɛ eshwie hulu lɛ nɔ, ni ahã hulu lɛ hegbɛ akɛ ekɛ la ashã gbɔmɛi lɛ.
9 Ni dɔlɛ kpele lɛ shã gbɔmɛi lɛ, shi amɛwie musubɔɔ wiemɔi amɛshi Nyɔŋmɔ, mɔ ni yɔɔ hegbɛ yɛ haomɔi nɛɛ anɔ lɛ gbɛ́i lɛ, ni amɛtsakeee amɛtsui ní amɛwo ehiɛ nyam.
10 Ŋwɛibɔfo ni ji enumɔ lɛ fɔse ekã lɛ mli nii lɛ eshwie kooloo awuiyelɔ lɛ maŋtsɛ sɛi lɛ nɔ. Ni emaŋtsɛyeli lɛ wo duŋ, ni amɛbɔi amɛlilɛii akɔmɔmɔ yɛ amɛhe ni jaraa amɛ lɛ hewɔ,
11 shi amɛwie musubɔɔ wiemɔi amɛshi ŋwɛi Nyɔŋmɔ lɛ yɛ amɛhe ni jaraa amɛ kɛ amɛfaji lɛ ahewɔ, ni amɛtsakeee amɛtsui kɛjeee amɛnitsumɔi lɛ ahe.
12 Ŋwɛibɔfo ni ji ekpaa lɛ fɔse ekã lɛ mli nii lɛ ewo Yufrate faa kpeteŋkpele lɛ mli, ni emli nu lɛ mii koni akɛsaa gbɛ ahã maŋtsɛmɛi ni jɛ hulushiteehe lɛ.*
13 Ni mina wiemɔi etɛ ni he tseee ni jɛ mumɔŋ* ni tamɔ kɔkɔdenei miije kpo kɛmiijɛ drako lɛ daaŋ kɛ kooloo awuiyelɔ lɛ daaŋ kɛ amale gbalɔ lɛ daaŋ.
14 Anɔkwa, amɛji wiemɔi ni jɛ mumɔŋ ni jɛ daimonioi aŋɔɔ, ni amɛfeɔ okadii, ni amɛyaa shikpɔŋ muu lɛ fɛɛ nɔ maŋtsɛmɛi lɛ aŋɔɔ, koni amɛyabua amɛnaa kɛya Nyɔŋmɔ Ofe lɛ gbi wulu lɛ nɔ ta lɛ.
15 “Naa! Miiba tamɔ julɔ. Mɔ ni yaa nɔ eshiɔ kpe ní hãaa etadei anɔhaanɔi lɛ aŋmɛɛ lɛ, koni ekanyiɛ yayai ní mɛi na ehiɛgbele lɛ yɛ miishɛɛ.”
16 Ni amɛbua maŋtsɛmɛi lɛ anaa kɛtee he ko ni atsɛɔ jɛmɛ yɛ Hebri mli akɛ Harmagedon.*
17 Ŋwɛibɔfo ni ji kpawo lɛ fɔse ekã lɛ mli nii lɛ ewo kɔɔyɔɔ lɛ mli. Kɛkɛ ni gbee ko ni wa jɛ sɔlemɔtsu lɛ mli kɛjɛ maŋtsɛ sɛi lɛ mli kɛɛ akɛ: “Agbe naa!”
18 Ni sarawagbalamɔi kɛ gbei kɛ nugbɔshiimɔi ba, ni shikpɔŋhosomɔ kpele ko ní kɛjɛ beyinɔ ni gbɔmɛi ba shikpɔŋ lɛ nɔ nɛɛ anako enɔ dã lɛ ba, eji shikpɔŋhosomɔ kpeteŋkpele, ni enaa wa waa.
19 Maŋ kpeteŋkpele lɛ mli gbala etɛ, ni jeŋmaji lɛ amaji lɛ wule; ni akai Babilon Kpeteŋkpele lɛ yɛ Nyɔŋmɔ hiɛ, koni aŋɔ kpulu ní Nyɔŋmɔ mlifu ni naa wa lɛ wein lɛ yɔɔ mli lɛ ahã lɛ.
20 Agbɛnɛ hu, ŋshɔkpɔ fɛɛ ŋshɔkpɔ jo foi, ni gɔji lɛ, anaaa amɛ dɔŋŋ.
21 Kɛkɛ ni nugbɔŋtɛi kpelei, ní eko fɛɛ eko tsiimɔ aaafee talɛnta kome,* jɛ ŋwɛi bashwie gbɔmɛi lɛ anɔ, ni gbɔmɛi lɛ wie musubɔɔ wiemɔi amɛshi Nyɔŋmɔ yɛ nugbɔŋtɛi lɛ ahaomɔ lɛ hewɔ, ejaakɛ haomɔ lɛ da fe nine.
Shishigbɛ Niŋmaa
^ Aloo “susuma fɛɛ susuma.”
^ Kwɛmɔ Wiemɔi Titrii Amligbalamɔ lɛ.
^ Aloo “osanebuamɔi lɛ.”
^ Aloo “ni jɛ boka lɛ.”
^ Sht. ŋm., “mumɔi etɛ ni he tseee.”
^ Hela mli lɛ, Har Ma·ge·donʹ, aná kɛjɛ Hebri wiemɔ ni shishi ji “Megido Gɔŋ” lɛ mli.
^ Hela talɛnta kome feɔ kg 20.4.
