Kpojiemɔ 17:1-18
17 Ŋwɛibɔfoi kpawo ni hiɛ kãi kpawo lɛ ateŋ mɔ kome ba ni ebakɛɛ mi akɛ: “Ba, ni matsɔɔ bo kojomɔ ní baaba ashawo kpeteŋkpele lɛ ní ta nui babaoo lɛ anɔ lɛ nɔ lɛ,
2 mɔ ni shikpɔŋ lɛ nɔ maŋtsɛmɛi lɛ kɛ lɛ bɔ ajwamaŋ,* ní ebɔlɛnamɔ jeŋba sha* lɛ he wein lɛ hã shikpɔŋ lɛ nɔ bii lɛ tɔrɔ dãa lɛ.”
3 Ni ekpala mi kɛtee ŋa nɔ* yɛ mumɔ lɛ hewalɛ lɛ mli. Ni mina yoo ko ta kooloo awuiyelɔ ko ni tsuɔ fɔɔ nɔ, ni kooloo lɛ he eyi obɔ kɛ musubɔɔ gbɛ́ii, ni eyɛ yitsei kpawo kɛ akolontoi nyɔŋma.
4 Yoo lɛ wo atade afaseo kɛ etsuru fɔɔ, ni akɛ shika tsuru kɛ tɛi ni jara wa kɛ adiagbai ewula lɛ, ni ehiɛ shika tsuru kpulu yɛ edɛŋ, ni kpulu lɛ eyi obɔ kɛ nihiinii kɛ ebɔlɛnamɔ jeŋba sha* lɛ mli muji nii.
5 Aŋma gbɛ́i ko ni ji teemɔŋ sane yɛ ehiɛŋtso nɔ: “Babilon Kpeteŋkpele lɛ, ashawo yei lɛ kɛ shikpɔŋ lɛ nɔ nihiinii lɛ anyɛ lɛ.”
6 Ni mina akɛ mɛi krɔŋkrɔŋi lɛ alá lɛ kɛ Yesu he odasefoi lɛ alá lɛ etɔ yoo lɛ dãa.
Anɔkwa, be ni mina lɛ lɛ, minaa kpɛ mihe naakpa.
7 No hewɔ lɛ, ŋwɛibɔfo lɛ kɛɛ mi akɛ: “Mɛni hewɔ onaa ekpɛ ohe lɛ? Magba bo yoo lɛ kɛ agbɛnɛ hu kooloo awuiyelɔ lɛ ní yɔɔ yitsei kpawo kɛ akolontoi nyɔŋma lɛ ní yoo lɛ ta enɔ lɛ ahe teemɔŋ sane lɛ:
8 Kooloo awuiyelɔ lɛ ní ona lɛ, no mli lɛ eyɛ, shi ebɛ, ni kɛ̃lɛ eeba ebajɛ bu kwɔŋkwɔŋ lɛ mli eje kpo, ni ebaaya hiɛkpatamɔ mli. Ni shikpɔŋ lɛ nɔ bii lɛ—mɛi ni aŋmako amɛgbɛ́ii yɛ wala wolokpo* lɛ mli kɛjɛ be ni ato je lɛ shishi lɛ*—anaa baakpɛ amɛhe kɛ́ amɛna bɔ ni no mli lɛ, kooloo awuiyelɔ lɛ yɛ, shi ebɛ, ni kɛ̃lɛ ebaaba lɛ.
9 “Biɛ jwɛŋmɔ kɛ hiɛshikamɔ* he ehia yɛ: Yitsei kpawo lɛ damɔ shi kɛhã gɔji kpawo ní yoo lɛ ta nɔ lɛ.
10 Ni maŋtsɛmɛi kpawo yɔɔ: Enumɔ egbee shi, ekome yɛ, ni ekroko lɛ náko aba; shi kɛ́ eba lɛ, esa akɛ ehi shi be fioo.
11 Ni kooloo awuiyelɔ ní no mli lɛ eyɛ, shi ebɛ lɛ, eji maŋtsɛ ni ji kpaanyɔ hu, shi ejɛ kpawo lɛ mli, ni ebaaya hiɛkpatamɔ mli.
12 “Akolontoi nyɔŋma lɛ ni ona lɛ damɔ shi kɛhã maŋtsɛmɛi nyɔŋma, mɛi ni nine shɛko maŋtsɛyeli ko nɔ, shi kɛ̃lɛ amɛbaaná hegbɛ amɛkɛ kooloo awuiyelɔ lɛ aye nɔ akɛ maŋtsɛmɛi ŋmɛlɛtswaa kome.
13 Mɛnɛɛmɛi hiɛ yiŋtoo kome, no hewɔ lɛ, amɛkɛ amɛhewalɛ kɛ amɛhegbɛ lɛ hãa kooloo awuiyelɔ lɛ.
14 Mɛnɛɛmɛi kɛ Gwantɛŋbi lɛ baawu, shi akɛni Gwantɛŋbi lɛ ji nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ hewɔ lɛ, ebaaye amɛnɔ kunim. Nakai nɔŋŋ mɛi ni fata ehe, ní atsɛ amɛ ní ahala amɛ ní yeɔ anɔkwa lɛ hu baafee.”
15 Ekɛɛ mi akɛ: “Nui lɛ ní ona lɛ, he ni ashawo yoo lɛ ta lɛ, damɔ shi kɛhã gbɔmɛi kɛ asafokui kɛ jeŋmaji kɛ wiemɔi.
16 Ni akolontoi nyɔŋma ni ona lɛ kɛ kooloo awuiyelɔ lɛ, amɛbaanyɛ ashawo yoo lɛ ni amɛbaafee lɛ butuu ni amɛbaaŋmɛ lɛ yayai, ni amɛbaaye eheloo ni amɛkɛ la baashã lɛ kwraa.
17 Ejaakɛ Nyɔŋmɔ kɛwo amɛtsuiiaŋ koni amɛtsu eyiŋtoo he nii, hɛɛ, koni amɛkɛ amɛmaŋtsɛyeli lɛ ahã kooloo awuiyelɔ lɛ kɛtsu amɛyiŋtoo kome lɛ he nii, kɛyashi beyinɔ ni abaagbe Nyɔŋmɔ wiemɔi lɛ anaa.
18 Ni yoo lɛ ni ona lɛ damɔ shi kɛhã maŋ kpeteŋkpele ni yeɔ* shikpɔŋ lɛ nɔ maŋtsɛmɛi lɛ anɔ lɛ.”
Shishigbɛ Niŋmaa
^ Ni tsɔɔ akɛ, amɛkɛ amɛhe wo bɔlɛnamɔ jeŋba sha mli. Kwɛmɔ Wiemɔi Titrii Amligbalamɔ lɛ.
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Wolo kakadaŋŋ ni akotaa awoɔ tso he.
^ Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
^ Aloo “jwɛŋmɔ ní hiɛ kã shi.”
^ Aloo “ni yɔɔ maŋtsɛyeli yɛ.”
