Kpojiemɔ 18:1-24
18 Enɛ sɛɛ lɛ, mina ŋwɛibɔfo kroko miikpeleke shi kɛmiijɛ ŋwɛi, ni eyɛ hegbɛ kpele, ni enunyam lɛ hã shikpɔŋ lɛ nɔ tse heŋŋ.
2 Ni ekɛ gbee ni wa bo ekɛɛ: “Egbee shi! Babilon Kpeteŋkpele lɛ egbee shi, ni etsɔ daimonioi ashihilɛhe kɛ he ko ni mumɔ fɛɛ mumɔ* ni he tseee kɛ loofɔlɔ fɛɛ loofɔlɔ ni he tseee ni anyɛɔ hu lɛ hiɔ!
3 Ejaakɛ ehã jeŋmaji lɛ fɛɛ etɔrɔ kɛ ebɔlɛnamɔ jeŋba sha* lɛ he akɔnɔ* wein lɛ, ni shikpɔŋ lɛ nɔ maŋtsɛmɛi lɛ kɛ lɛ ebɔ ajwamaŋ,* ni shikpɔŋ lɛ nɔ jarayelɔi* lɛ etsɔmɔ niiatsɛmɛi yɛ nibii babaoo ni jara wawai ní etĩaa naa ehãa ehe ní efeee lɛ hiɛgbele lɛ hewɔ.”
4 Ni minu gbee kroko kɛjɛ ŋwɛi miikɛɛ: “Nyɛjea emli, mimɛi, kɛ́ nyɛsumɔɔɔ akɛ nyɛkɛ lɛ náa gbɛfaŋnɔ yɛ ehe eshai lɛ amli, kɛ agbɛnɛ hu, kɛ́ nyɛsumɔɔɔ akɛ nyɛnáa ehaomɔi lɛ eko.
5 Ejaakɛ ehe eshai lɛ etĩa kɛshɛ ŋwɛi tɔ̃ɔ, ni Nyɔŋmɔ ekai enifeemɔi ní ejaaa* lɛ.
6 Nyɛtoa lɛ najiaŋ yɛ bɔ ni ekɛ mɛi ye hã lɛ naa, hɛɛ, nibii ní efee lɛ, nyɛwoa lɛ he nyɔmɔ toi enyɔ; kpulu lɛ ní efutu dãa lɛ yɛ mli lɛ, nyɛfutua lɛ toi enyɔ nyɛwoa mli nyɛhãa lɛ.
7 Bɔ ni ewo lɛ diɛŋtsɛ ehiɛ nyam ni etĩa nibii babaoo ni jara wawai naa ehã ehe ní efeee lɛ hiɛgbele lɛ, nakai nɔŋŋ nyɛhãa epiŋa ní eyea awerɛho. Ejaakɛ eyaa nɔ ekɛɔ yɛ etsui mli akɛ: ‘Mita shi akɛ maŋnyɛ, ni mijeee yoo okulafo, ni minaŋ awerɛho ko kɔkɔɔkɔ.’
8 No hewɔ ni ehaomɔi lɛ baaba yɛ gbi kome nɔ lɛ, gbele kɛ awerɛhoyeli kɛ hɔmɔ, ni akɛ la baashã lɛ kwraa, ejaakɛ Yehowa* Nyɔŋmɔ, mɔ ni kojo lɛ lɛ, he wa.
9 “Ni shikpɔŋ lɛ nɔ maŋtsɛmɛi ní kɛ lɛ bɔ ajwamaŋ,* ní kɛ lɛ ná nibii babaoo ni jara wawai ni etĩa naa ehã ehe ní efeee lɛ hiɛgbele lɛ mli gbɛfaŋnɔ lɛ baafo, ni amɛbaagbala amɛhe mai kɛtsɔɔ akɛ amɛmiiye awerɛho yɛ ehewɔ, kɛ́ amɛna eshãa lɛ lasu lɛ.
10 Amɛbaadamɔ sɛɛ flɛŋŋ yɛ epiŋmɔ lɛ gbeyeishemɔ hewɔ, ni amɛbaakɛɛ akɛ: ‘Kpoo, kpoo, bo maŋ kpeteŋkpele, Babilon, bo maŋ ni he wa lɛ, ejaakɛ ŋmɛlɛtswaa kome mli ni okojomɔ eba nɛɛ!’
11 “Agbɛnɛ hu, shikpɔŋ lɛ nɔ jarayelɔi lɛ miifo ni amɛmiiye awerɛho yɛ ehewɔ, ejaakɛ mɔ ko mɔ ko bɛ ni baahé amɛjarayeli nibii lɛ fɛɛ dɔŋŋ,
12 jarayeli nibii lɛ fɛɛ, shika tsuru, jwiɛtɛi, tɛi ni jara wa, adiagbai, klala kpakpa, mama afaseo, sliki, kɛ mama tsuru fɔɔ; kɛ nɔ fɛɛ nɔ ní akɛ tso ni jeɔ ŋma fee; kɛ nɔ fɛɛ nɔ ní akɛ shwuɔwu, loo tso ni jara wa, loo akɔɔble, loo dade, loo marmara tɛ fee;
13 kɛ sinamon, amomon,* tsofa-kɛ-ŋma, mu ni jeɔ ŋma, ohɛ́ ni jeɔ ŋma, wein, oliv mu, mamu* kpakpa, ŋmaa, tsinai, gwantɛŋi, okpɔŋɔi, shwiilii, nyɔji, kɛ gbɔmɛi awala.*
14 Hɛɛ, yibii kpakpai ní oshweɔ* lɛ eshi bo, ni nibii fɛɛ ni ŋɔɔŋɔi kɛ nibii fɛɛ ni yɔɔ fɛo lɛ eŋmɛɛ bo, ni onaŋ amɛ kwraa dɔŋŋ.
15 “Jarayelɔi ni hɔ̃ɔ nɛkɛ nibii nɛɛ, ní yoo lɛ ehã amɛtsɔmɔ niiatsɛmɛi lɛ, baadamɔ sɛɛ flɛŋŋ yɛ epiŋmɔ lɛ gbeyeishemɔ lɛ hewɔ, ni amɛbaafo ni amɛbaaye awerɛho,
16 ni amɛbaakɛɛ akɛ: ‘Kpoo, kpoo, maŋ kpeteŋkpele ní woɔ klala kpakpa, atade afaseo, kɛ atade tsuru fɔɔ, ní wulaa kɛ shika tsuru hewulamɔ nibii, tɛi ni jara wa, kɛ adiagbai lɛ,
17 ejaakɛ yɛ ŋmɛlɛtswaa kome mli lɛ, nɛkɛ ninámɔ kpele nɛɛ hiɛ ekpãtã!’
“Ni meele kudɔɔtsɛ fɛɛ kudɔɔtsɛ kɛ mɔ fɛɛ mɔ ni fãa gbɛ yɛ ŋshɔ hiɛ, kɛ amlakumɛi kɛ mɛi fɛɛ ni náa amɛdaaŋ ŋmaa yɛ ŋshɔ hiɛ lɛ damɔ sɛɛ flɛŋŋ,
18 ni be ni amɛkwɛɔ eshãa lɛ lasu lɛ, amɛbolɔ amɛkɛɛ: ‘Mɛɛ maŋ tamɔ maŋ kpeteŋkpele lɛ?’
19 Amɛkɛ mulu wo amɛyiteaŋ, ni amɛkɛ yaafo kɛ awerɛhoyeli bolɔ amɛkɛɛ: ‘Kpoo, kpoo, maŋ kpeteŋkpele lɛ, ní mɛi fɛɛ ni yɔɔ meelei yɛ ŋshɔ hiɛ lɛ tsɔmɔ niiatsɛmɛi yɛ eninámɔ lɛ hewɔ lɛ, ejaakɛ yɛ ŋmɛlɛtswaa kome mli lɛ, akpãtã ehiɛ!’
20 “Bo ŋwɛi, kɛ agbɛnɛ hu, nyɛ mɛi krɔŋkrɔŋi kɛ bɔfoi kɛ gbalɔi, nyɛnáa miishɛɛ yɛ ehewɔ, ejaakɛ Nyɔŋmɔ ekojo lɛ ehã nyɛ!”
21 Ni ŋwɛibɔfo hewalɔ ko wó tɛ ko ni tamɔ wiɛtɛ wulu, ni eshɛ efɔ̃ ŋshɔ lɛ mli ekɛɛ: “Nɛkɛ abaashɛ Babilon maŋ kpeteŋkpele lɛ afɔ̃ oya, ni anaŋ lɛ kwraa dɔŋŋ.
22 Ni anuŋ lálɔi ni miitswa saŋku, kɛ lalatsɛmɛi, kɛ bɛlɛkpãlɔi, kɛ tɛtɛrɛmantɛrɛkpãlɔi lɛ agbɛɛmɔ kwraa dɔŋŋ yɛ omli. Ni anaŋ ŋaalɔ ko ŋaalɔ ko ni tsuɔ ŋaa nitsumɔ ko kwraa dɔŋŋ yɛ omli, ni anuŋ wiɛtɛ gbɛɛmɔ ko hu kwraa dɔŋŋ yɛ omli.
23 Kane la ko etsoŋ kwraa dɔŋŋ yɛ omli, ni anuŋ ayemforo wu kɛ ayemforo gbee kwraa dɔŋŋ yɛ omli; ejaakɛ ojarayelɔi lɛ ji shikpɔŋ lɛ nɔ gbɔmɛi wuji, ni atsɔ mumɔi ni okɛshãraa lɛ nɔ alaka jeŋmaji lɛ fɛɛ.
24 Hɛɛ, emli ana gbalɔi kɛ mɛi krɔŋkrɔŋi lɛ kɛ mɛi fɛɛ ni agbe yɛ shikpɔŋ lɛ nɔ lɛ alá lɛ yɛ.”
Shishigbɛ Niŋmaa
^ Aloo eeenyɛ efee akɛ, “mumɔ fɛɛ mumɔ ní amuɔ; wiemɔ fɛɛ wiemɔ ni jɛ mumɔŋ.”
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Aloo “he mlifu.”
^ Ni tsɔɔ akɛ, amɛkɛ amɛhe wo bɔlɛnamɔ jeŋba sha mli. Kwɛmɔ Wiemɔi Titrii Amligbalamɔ lɛ.
^ Aloo “jarayelɔi gbɛfãlɔi.”
^ Aloo “enifɔjianii.”
^ Kwɛmɔ Wiemɔi Titrii Amligbalamɔ lɛ.
^ Ni tsɔɔ akɛ, amɛkɛ amɛhe wo bɔlɛnamɔ jeŋba sha mli. Kwɛmɔ Wiemɔi Titrii Amligbalamɔ lɛ.
^ Kakaotsofa henɔ ko ní anáa kɛjɛɔ India.
^ Mamu ji nibii tamɔ abele gbiŋ, omɔ gbiŋ, ŋmaa gbiŋ, kɛ amɛhenɔi ni agbɛlɛ lɛ mɔnyɔmɔnyɔ.
^ Aloo “asusuma.”
^ Aloo “osusuma shweɔ.”
