Kpojiemɔ 19:1-21
19 Enɛ sɛɛ lɛ, minu gbee ko ni wa tamɔ asafoku kpele ko gbee yɛ ŋwɛi. Amɛkɛɛ: “Nyɛjiea Yah yi!* Yiwalaheremɔ lɛ kɛ anunyam lɛ kɛ hewalɛ lɛ ji wɔ-Nyɔŋmɔ lɛ nɔ,
2 ejaakɛ ekojomɔi lɛ, anɔkwale ni, ni amɛja. Ejaakɛ ekojo ashawo kpeteŋkpele lɛ, mɔ ni kɛ ebɔlɛnamɔ jeŋba sha* lɛ fite shikpɔŋ lɛ, ni etɔ enyɔji lɛ alá ni yɔɔ yoo lɛ niji ahe lɛ he owele.”*
3 Ni amrɔ lɛ, amɛkɛɛ nɔ ni ji shii enyɔ nɔ akɛ: “Nyɛjiea Yah yi!* Ni elasu lɛ teɔ shi kɛyaa naanɔi anaanɔ.”
4 Ni onukpai nyɔŋmai enyɔ kɛ ejwɛ lɛ kɛ bɔɔ nii ejwɛ ní hiɛ kamɔ lɛ ho gbee shi ni amɛjá Nyɔŋmɔ, mɔ ni ta maŋtsɛ sɛi lɛ nɔ lɛ, ni amɛkɛɛ: “Amen! Nyɛjiea Yah yi!”*
5 Agbɛnɛ hu, gbee ko jɛ maŋtsɛ sɛi lɛ mli kɛɛ: “Nyɛjiea wɔ-Nyɔŋmɔ lɛ yi, nyɛ mɛi fɛɛ ni ji enyɔji, ní nyɛsheɔ lɛ gbeyei lɛ, mɛi bibii kɛ mɛi wuji.”
6 Ni minu gbɛɛmɔ ko ni tamɔ asafoku kpele ko gbee, ni etamɔ nui babaoo agbɛɛmɔ, ni etamɔ nugbɔshiimɔi ni naa wa agbɛɛmɔ. Amɛkɛɛ: “Nyɛjiea Yah yi,* ejaakɛ Yehowa* wɔ-Nyɔŋmɔ lɛ, Ofe lɛ, ebɔi nɔyeli akɛ maŋtsɛ!
7 Nyɛhãa wɔmii ashɛa wɔhe ní wɔmli afilia wɔ ní wɔwoa ehiɛ nyam, ejaakɛ Gwantɛŋbi lɛ yookpeemɔ lɛ* eshɛ, ni eŋa lɛ esaa ehe eto.
8 Hɛɛ, ahã eŋa lɛ hegbɛ akɛ ewo klala kpakpa ni he tse ni kpɛlɛɔ kaŋkaŋ—ejaakɛ klala kpakpa lɛ damɔ shi kɛhã mɛi krɔŋkrɔŋi lɛ ajalɛ nifeemɔi lɛ.”
9 Ni ekɛɛ mi akɛ, “Ŋmaa: Mɛi ni afɔ̃ amɛ nine kɛhã Gwantɛŋbi lɛ yookpeemɔ lɛ* gbɛkɛ okpɔlɔŋmɛɛ lɛ yɛ miishɛɛ.” Esaa ekɛɛ mi akɛ: “Wiemɔi nɛɛ ji anɔkwa wiemɔi ni jɛ Nyɔŋmɔ ŋɔɔ.”
10 Kɛkɛ ni miho migbee enaji anaa koni majá lɛ. Shi ekɛɛ mi akɛ: “Kwɛmɔ jogbaŋŋ! Kaafee nakai! Bo kɛ onyɛmimɛi lɛ ni akɛ nitsumɔ ewo amɛdɛŋ akɛ amɛye Yesu he odase lɛ anaanyo nyɔŋ kɛkɛ ji mi. Já Nyɔŋmɔ! Ejaakɛ Yesu he odase lɛ ji yiŋtoo ni yɔɔ gbalɛi asɛɛ.”*
11 Mina ni agbele ŋwɛi naa, ni naa! okpɔŋɔ yɛŋ ko. Ni mɔ ni ta nɔ lɛ, atsɛɔ lɛ Anɔkwayelɔ kɛ Anɔkwafo, ni jalɛ naa ekojoɔ ni ewuɔ ta.
12 Ehiŋmɛii lɛ, lalilɛii ni, ni maŋtsɛ faii* pii bumɔ eyitso. Eyɛ gbɛ́i ko ní aŋma ní mɔ ko mɔ ko leee akɛ ja lɛ diɛŋtsɛ,
13 ni ewo atade nɔhaanɔ ko ní lá eka mli,* ni atsɛɔ egbɛ́i akɛ, Nyɔŋmɔ Wiemɔ Lɛ.
14 Ni ŋwɛi tai lɛ hu tara okpɔŋɔi yɛji anɔ kɛnyiɛ esɛɛ, ni amɛwo klala kpakpa ni yɛɔ ni he tse.
15 Ni klante kakadaŋŋ ni naa ba jɛɔ edaaŋ koni ekɛbãmɔ jeŋmaji lɛ, ni ekɛ dadetso baakpala amɛ tamɔ tookwɛlɔ feɔ lɛ. Kɛfata he lɛ, enaanaa wein tso yibii ni yɔɔ Nyɔŋmɔ Ofe lɛ mlifu ni naa wa lɛ weinŋaa bu lɛ mli lɛ nɔ.
16 Ni aŋma gbɛ́i ko yɛ etade nɔhaanɔ lɛ nɔ, hɛɛ, yɛ eshuɔ he, no ji, maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.
17 Mina ŋwɛibɔfo ko hu ni damɔ hulu lɛ mli, ni ebo kɛ gbee ni wa ni ekɛɛ loofɔji ni filikiɔ yɛ ŋwɛi teŋ* lɛ fɛɛ akɛ: “Nyɛbaa biɛ, nyɛbuaa nyɛhe naa kɛyaa Nyɔŋmɔ gbɛkɛ okpɔlɔŋmɛɛ kpeteŋkpele lɛ shishi,
18 koni nyɛye maŋtsɛmɛi aloo kɛ tatsɛmɛi aloo kɛ hewalɔi aloo kɛ okpɔŋɔi kɛ mɛi ni tara amɛnɔ lɛ aloo, kɛ mɛi fɛɛ aloo, odehei kɛ nyɔji, kɛ mɛi bibii kɛ mɛi wuji fɛɛ.”
19 Ni mina kooloo awuiyelɔ lɛ kɛ shikpɔŋ lɛ nɔ maŋtsɛmɛi lɛ kɛ amɛtai lɛ ní abua amɛnaa ní amɛkɛ mɔ ni ta okpɔŋɔ lɛ nɔ lɛ kɛ eta lɛ yaawu.
20 Ni amɔ kooloo awuiyelɔ lɛ, ni amɔ amale gbalɔ lɛ, mɔ ni fee okadii yɛ kooloo awuiyelɔ lɛ hiɛ ní ekɛlaka mɛi ni ná kooloo awuiyelɔ lɛ okadi lɛ kɛ mɛi ni jáa emaga lɛ, afata ehe. Be ni mɛi enyɔ nɛɛ fɛɛ ahiɛ kamɔ lolo lɛ, ashɛrɛ amɛ awo la kpaakpo ní tsoɔ kɛ sɔlfa lɛ mli.
21 Shi mɛi ni eshwɛ lɛ, akɛ klante kakadaŋŋ ní jɛ mɔ ni ta okpɔŋɔ lɛ nɔ lɛ daaŋ lɛ gbe amɛ. Ni loofɔji lɛ fɛɛ tɔrɔ kɛ amɛloo lɛ.
Shishigbɛ Niŋmaa
^ Aloo “Haleluya!” “Yah” ji gbɛ́i Yehowa lɛ ní afo lɛ kuku.
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Sht. ŋm., “etɔ enyɔji lɛ alá lɛ he owele kɛjɛ yoo lɛ dɛŋ.”
^ Aloo “Haleluya!” “Yah” ji gbɛ́i Yehowa lɛ ní afo lɛ kuku.
^ Aloo “Haleluya!” “Yah” ji gbɛ́i Yehowa lɛ ní afo lɛ kuku.
^ Aloo “Haleluya!” “Yah” ji gbɛ́i Yehowa lɛ ní afo lɛ kuku.
^ Kwɛmɔ Wiemɔi Titrii Amligbalamɔ lɛ.
^ Aloo “gbalamlibotemɔ lɛ.”
^ Aloo “gbalamlibotemɔ lɛ.”
^ Sht. ŋm., “Yesu he odase lɛ ji gbalɛ mumɔ lɛ.”
^ Aloo “akekerei.”
^ Aloo eeenyɛ efee akɛ, “ní akɛ lá eshwã mli.”
^ Aloo “yɛ kɔɔyɔɔ lɛ mli; yɛ yiteŋ.”
