Kpojiemɔ 21:1-27
21 Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ lɛ bɛ dɔŋŋ.
2 Agbɛnɛ hu, mina maŋ krɔŋkrɔŋ lɛ, Yerusalem Hee lɛ, jɛ Nyɔŋmɔ ŋɔɔ yɛ ŋwɛi miikpeleke shi, ni asaa lɛ tamɔ ayemforo ní awula lɛ ahã ewu.
3 Kɛkɛ ni minu gbee ko ni wa jɛ maŋtsɛ sɛi lɛ mli kɛɛ: “Naa! Nyɔŋmɔ buu lɛ yɛ gbɔmɛi ateŋ, ni ekɛ amɛ baahi shi, ni amɛbaatsɔmɔ emɛi. Ni Nyɔŋmɔ diɛŋtsɛ kɛ amɛ baahi shi.
4 Ni ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ. Tsutsu nibii lɛ eho etee.”
5 Ni mɔ ni ta maŋtsɛ sɛi lɛ nɔ lɛ kɛɛ: “Naa! Miifee nibii fɛɛ ehee.” Esaa ekɛɛ: “Ŋmaa, ejaakɛ wiemɔi nɛɛ yɛ mli,* ni anɔkwale ni.”
6 Ni ekɛɛ mi akɛ: “Amɛba mli! Miji Alfa lɛ kɛ Omega lɛ,* shishijee lɛ kɛ naagbee lɛ. Mɔ fɛɛ mɔ ní kumai yeɔ lɛ lɛ, mahã lɛ wala nuhiŋmɛi lɛ mli nu lɛ eko yaka.*
7 Mɔ fɛɛ mɔ ni yeɔ kunim lɛ, enine baashɛ nibii nɛɛ anɔ,* ni matsɔ e-Nyɔŋmɔ ni lɛ hu ebaatsɔ mibi.
8 Shi gbeyeilɔi lɛ kɛ mɛi ni bɛ hemɔkɛyeli kɛ mɛi ni he tseee ni feɔ taŋ nii kɛ gbɔmɔgbelɔi kɛ mɛi ni kɛ amɛhe woɔ bɔlɛnamɔ jeŋba sha* mli kɛ mɛi ni kɛ mumɔi shãraa kɛ amagajalɔi kɛ amalelɔi fɛɛ lɛ, amɛbaaná amɛgbɛfaŋnɔ yɛ kpaakpo lɛ ni tsoɔ kɛ la kɛ sɔlfa lɛ mli. Enɛ damɔ shi kɛhã gbele ni ji enyɔ lɛ.”
9 Ŋwɛibɔfoi kpawo ni hiɛ kãi kpawo ní eyimɔ obɔbɔ kɛ naagbee haomɔi kpawo lɛ ateŋ mɔ kome ba ni ebakɛɛ mi akɛ: “Ba, ni matsɔɔ bo ayemforo lɛ, Gwantɛŋbi lɛ ŋa lɛ.”
10 No hewɔ lɛ, ekpala mi kɛtee gɔŋ kpeteŋkpele ni kwɔ ko nɔ yɛ mumɔ lɛ hewalɛ lɛ mli, ni etsɔɔ mi maŋ krɔŋkrɔŋ ni ji Yerusalem lɛ ní ejɛ Nyɔŋmɔ ŋɔɔ yɛ ŋwɛi eekpeleke shi,
11 ni eyɛ Nyɔŋmɔ anunyam lɛ. Ekpɛlɛɔ tamɔ tɛ ni jara wa fe fɛɛ, etamɔ yaspi tɛ ni mli tse tamɔ kristalo.
12 Eyɛ gbogbo kpeteŋkpele ni kwɔ kɛ agbói nyɔŋma kɛ enyɔ, ni ŋwɛibɔfoi nyɔŋma kɛ enyɔ damɔ agbói lɛ anaa, ni akpɛ́ Israelbii lɛ awekui nyɔŋma kɛ enyɔ lɛ agbɛ́ii lɛ awo agbói lɛ ahe.
13 Agbói etɛ yɛ bokagbɛ, ni agbói etɛ yɛ kooyigbɛ, ni agbói etɛ yɛ wuoyigbɛ, ni agbói etɛ yɛ anaigbɛ.
14 Maŋ lɛ gbogbo lɛ yɛ faneshi tɛi nyɔŋma kɛ enyɔ hu, ni Gwantɛŋbi lɛ bɔfoi nyɔŋma kɛ enyɔ lɛ agbɛ́ii nyɔŋma kɛ enyɔ lɛ yɛ amɛnɔ.
15 Agbɛnɛ, mɔ ni kɛ mi wieɔ lɛ hiɛ shika tsuru gãlã akɛ susumɔnɔ, bɔ ni afee ni ekɛsusu maŋ lɛ kɛ egbói lɛ kɛ egbogbo lɛ.
16 Ni maŋ lɛ kã shi koji ejwɛ, ni ekɛlɛ tamɔ elɛɛmɔ nɔŋŋ. Ni ekɛ gãlã lɛ susu maŋ lɛ, ni efee stadioi akpei nyɔŋma-kɛ-enyɔ;* ni ekɛlɛ kɛ elɛɛmɔ kɛ ekwɔlɛ yeɔ egbɔ.
17 Esusu maŋ lɛ gbogbo lɛ hu, ni efee ninetalɔi oha kɛ nyɔŋmai ejwɛ kɛ ejwɛ,* yɛ gbɔmɔ nisusumɔ naa, ni yɛ nakai be lɛ mli nɔŋŋ lɛ, eji ŋwɛibɔfo nisusumɔ.
18 Agbɛnɛ, nɔ ni akɛtswa gbogbo lɛ ji yaspi, ni maŋ lɛ, shika tsuru krɔŋŋ ni tamɔ glase ni mli tse ni.
19 Awula maŋ lɛ gbogbo lɛ faneshii lɛ kɛ tɛi ni jara wa srɔtoi fɛɛ: klɛŋklɛŋ faneshi lɛ yaspi, nɔ ni ji enyɔ lɛ safiro, nɔ ni ji etɛ lɛ kalkedon, nɔ ni ji ejwɛ lɛ smaragdo,
20 nɔ ni ji enumɔ lɛ sardoniki, nɔ ni ji ekpaa lɛ sardio, nɔ ni ji kpawo lɛ krisolito, nɔ ni ji kpaanyɔ lɛ berilo, nɔ ni ji nɛɛhu lɛ topasion, nɔ ni ji nyɔŋma lɛ krisopraso, nɔ ni ji nyɔŋma kɛ ekome lɛ hiakinto, nɔ ni ji nyɔŋma kɛ enyɔ lɛ amɛtisto.*
21 Agbɛnɛ hu, agbói nyɔŋma kɛ enyɔ lɛ, adiagbai nyɔŋma kɛ enyɔ ni; agbói lɛ eko fɛɛ eko lɛ adiagba kome akɛfee. Ni maŋ lɛ gbɛjegbɛ titri lɛ, shika tsuru krɔŋŋ ni, ni etamɔ glase ní anaa mli.
22 Minaaa sɔlemɔwe yɛ maŋ lɛ mli, ejaakɛ Yehowa* Nyɔŋmɔ, Ofe lɛ, kɛ agbɛnɛ hu Gwantɛŋbi lɛ ji esɔlemɔwe.
23 Ni hulu loo nyɔɔŋtsere kpɛmɔ he ehiaaa maŋ lɛ, ejaakɛ Nyɔŋmɔ anunyam lɛ kpɛɔ yɛ mli, ni Gwantɛŋbi lɛ ji ekane.
24 Ni jeŋmaji lɛ baanyiɛ yɛ ela lɛ mli, ni shikpɔŋ lɛ nɔ maŋtsɛmɛi lɛ baaŋɔ amɛnunyam lɛ kɛba mli.
25 Egbói lɛ, aŋamɔŋ shwane kɔkɔɔkɔ, ejaakɛ je enaŋ yɛ jɛmɛ.
26 Ni amɛkɛ jeŋmaji lɛ anunyam lɛ kɛ woo lɛ baaba mli.
27 Shi nɔ fɛɛ nɔ ni abule kɛ mɔ fɛɛ mɔ ni feɔ nihiinii ní elakaa mɛi lɛ boteŋ mli kɔkɔɔkɔ; ja mɛi ni aŋmala amɛgbɛ́ii yɛ Gwantɛŋbi lɛ wala wolokpo* lɛ mli lɛ kɛkɛ baabote mli.
Shishigbɛ Niŋmaa
^ Aloo “abaanyɛ amu afɔ̃ wiemɔi nɛɛ anɔ.”
^ Aloo “A lɛ kɛ Z lɛ.” Alfa ji nɔ ni jeɔ Hela niŋmaa okadii lɛ ashishi, ni Omega ji nɔ ni gbeɔ naa.
^ Aloo “ní miheee lɛ nɔ ko.”
^ Sht. ŋm., “ebaaná nibii nɛɛ akɛ gboshinii.”
^ Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
^ Aaafee km 2,220 (mi 1,379). Stadio kome feɔ m 185 (nat 606.95).
^ Aaafee m 64 (nat 210).
^ Enɛɛmɛi fɛɛ ji tɛi ni jara wala, ni esoro eko fɛɛ eko kɔla, ni tɛi lɛ ekomɛi po hiɛ kɔlai srɔtoi.
^ Kwɛmɔ Wiemɔi Titrii Amligbalamɔ lɛ.
^ Wolo kakadaŋŋ ni akotaa awoɔ tso he.
