Kpojiemɔ 22:1-21
22 Ni etsɔɔ mi wala nu faa ko ni mli tse tamɔ kristalo, ní miijɛ Nyɔŋmɔ maŋtsɛ sɛi lɛ kɛ Gwantɛŋbi lɛ maŋtsɛ sɛi lɛ mli
2 miiho kɛmiitsɔ maŋ lɛ gbɛjegbɛ titri lɛ teŋ. Wala tsei ni woɔ yibii shii nyɔŋma kɛ enyɔ yɛ faa lɛ toi biɛ kɛ biɛ, nyɔɔŋ fɛɛ nyɔɔŋ nɔ lɛ, amɛwoɔ yibii. Ni tsei lɛ ayibai lɛ akɛtsaa jeŋmaji lɛ.
3 Ni loomɔ ko loomɔ ko bɛ dɔŋŋ. Shi Nyɔŋmɔ maŋtsɛ sɛi lɛ kɛ Gwantɛŋbi lɛ maŋtsɛ sɛi lɛ baahi maŋ lɛ mli, ni enyɔji lɛ baaŋɔ sɔɔmɔ krɔŋŋ amɛhã lɛ;
4 ni amɛbaana ehiɛ, ni egbɛ́i baahi amɛhiɛŋtsei anɔ.
5 Agbɛnɛ hu, je enaŋ yɛ jɛmɛ, ni kane la loo hulu la he ehiaŋ amɛ, ejaakɛ Yehowa* Nyɔŋmɔ baatso akɛ la ehã amɛ, ni amɛbaaye nɔ akɛ maŋtsɛmɛi kɛya naanɔi anaanɔ.
6 Ekɛɛ mi akɛ: “Wiemɔi nɛɛ yɛ mli* ni anɔkwale ni; hɛɛ, Yehowa,* Nyɔŋmɔ ní kɛ mumɔ tsirɛ gbalɔi lɛ, etsu eŋwɛibɔfo lɛ koni ebatsɔɔ enyɔji lɛ nibii ni sa akɛ aba mli oya nɔŋŋ.
7 Naa! miiba oya. Mɔ fɛɛ mɔ ni yeɔ wolokpo* nɛɛ mli gbalɛ wiemɔi lɛ anɔ lɛ yɛ miishɛɛ.”
8 Anɔkwa, mi Yohane, ji mɔ ni nu ni na nibii nɛɛ. Be ni minu ni mina lɛ, miho migbee shi koni majá yɛ ŋwɛibɔfo lɛ ni tsɔɔ mi nibii nɛɛ naji anaa.
9 Shi ekɛɛ mi akɛ: “Kwɛmɔ jogbaŋŋ! Kaafee nakai! Bo kɛ onyɛmimɛi lɛ, ni ji gbalɔi lɛ, kɛ mɛi ni yeɔ wolokpo nɛɛ mli wiemɔi lɛ anɔ lɛ anaanyo nyɔŋ kɛkɛ ji mi. Já Nyɔŋmɔ.”
10 Esaa ekɛɛ mi akɛ: “Kaasɔo wolokpo nɛɛ mli gbalɛ wiemɔi lɛ anaa, ejaakɛ be ni ato lɛ ebɛŋkɛ.
11 Mɔ ni ejaaa lɛ, eya nɔ efee nii ni ejaaa, ni mɔ ni ewo ehe muji lɛ, eya nɔ ewo ehe muji; shi mɔ ni ji jalɔ lɛ, eya nɔ efee jalɛ nii, ni mɔ ni ji mɔ krɔŋkrɔŋ lɛ, eya nɔ efee mɔ krɔŋkrɔŋ.
12 “‘Naa! miiba oya, ni mihiɛ juromɔnɔ ni mikɛhãa lɛ yɛ midɛŋ, koni mato mɔ fɛɛ mɔ najiaŋ yɛ enitsumɔ naa.
13 Miji Alfa lɛ kɛ Omega lɛ,* klɛŋklɛŋ mɔ lɛ kɛ naagbee mɔ lɛ, shishijee lɛ kɛ naagbee lɛ.
14 Mɛi ni fɔɔ amɛtadei yuuyui lɛ ahe, koni amɛná hegbɛ kɛya wala tsei lɛ ahe, ní amɛnyɛ amɛtsɔ maŋ lɛ agbói lɛ amli kɛbote maŋ lɛ mli lɛ yɛ miishɛɛ.
15 Maŋ lɛ sɛɛ lɛ, jɛmɛ gbei* lɛ kɛ mɛi ni kɛ mumɔi shãraa kɛ mɛi ni kɛ amɛhe woɔ bɔlɛnamɔ jeŋba sha* mli kɛ gbɔmɔgbelɔi lɛ kɛ amagajalɔi lɛ kɛ mɔ fɛɛ mɔ ni sumɔɔ amale ní emaleɔ hu lɛ yɔɔ.’
16 “‘Mi Yesu, mitsu mibɔfo* lɛ koni ebaye nibii nɛɛ ahe odase etsɔɔ nyɛ yɛ asafoi lɛ ahewɔ. Miji David shishifã lɛ kɛ eseshi lɛ kɛ leebi ŋulami ní kpɛɔ lɛ.’”
17 Ni mumɔ lɛ kɛ ayemforo lɛ yaa nɔ kɛɔ akɛ, “Ba!” ni mɔ fɛɛ mɔ ni nuɔ lɛ akɛɛ, “Ba!” ni mɔ fɛɛ mɔ ni kumai yeɔ lɛ lɛ eba; mɔ fɛɛ mɔ ni sumɔɔ lɛ, ebayɛ wala nu lɛ yaka.
18 “Miiye mɔ fɛɛ mɔ ni nuɔ wolokpo nɛɛ mli gbalɛ wiemɔi lɛ odase akɛ: Kɛ́ mɔ ko kɛ nɔ ko fata nibii nɛɛ ahe lɛ, Nyɔŋmɔ baaŋɔ haomɔi ni aŋmala yɛ wolokpo nɛɛ mli lɛ afata he ahã lɛ;
19 ni kɛ́ mɔ ko jie nɔ ko kɛjɛ wolokpo nɛɛ mli gbalɛ wiemɔi lɛ amli lɛ, Nyɔŋmɔ baajie egbɛfaŋnɔ kɛjɛ wala tsei lɛ amli kɛ agbɛnɛ hu kɛjɛ maŋ krɔŋkrɔŋ lɛ mli, nibii ni aŋmala amɛhe saji yɛ wolokpo nɛɛ mli lɛ.
20 “Mɔ ni yeɔ nibii nɛɛ ahe odase lɛ kɛɔ akɛ, ‘Hɛɛ, miiba oya.’”
“Amen! Ba, Nuŋtsɔ Yesu.”
21 Nuŋtsɔ Yesu duromɔ lɛ kɛ mɛi krɔŋkrɔŋi lɛ ahi shi.
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Aloo “Abaanyɛ amu afɔ̃ wiemɔi nɛɛ anɔ.”
^ Kwɛmɔ Wiemɔi Titrii Amligbalamɔ lɛ.
^ Wolo kakadaŋŋ ni akotaa awoɔ tso he.
^ Aloo “A lɛ kɛ Z lɛ.” Alfa ji nɔ ni jeɔ Hela niŋmaa okadii lɛ ashishi, ni Omega ji nɔ ni gbeɔ naa.
^ Ni tsɔɔ akɛ, mɛi ni kɛ amɛhe woɔ nifeemɔi ni ji nihiinii yɛ Nyɔŋmɔ hiɛ lɛ amli.
^ Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
^ Aloo “miŋwɛibɔfo.”
