Kpojiemɔ 4:1-11
4 Enɛ sɛɛ lɛ mikwɛ, ni naa! shinaa ko ni agbele yɛ ŋwɛi, ni klɛŋklɛŋ gbee ni minu ni kɛ mi wie lɛ tamɔ tɛtɛrɛmantɛrɛ, ni ekɛɛ: “Kwɔɔ kɛba biɛ nɛɛ, ni matsɔɔ bo nibii ni sa akɛ aba mli lɛ.”
2 Enɛ sɛɛ lɛ, amrɔ lɛ, miyaje mumɔ lɛ hewalɛ lɛ mli, ni naa! maŋtsɛ sɛi ko ma shi yɛ ŋwɛi, ni mɔ ko ta maŋtsɛ sɛi lɛ nɔ.
3 Ni mɔ ni ta nɔ lɛ, kɛ́ aakwɛ lɛ lɛ, etamɔ yaspi tɛ kɛ sardio tɛ,* ni kwaabuɛtɛ ni tamɔ smaragdo tɛ* bɔle maŋtsɛ sɛi lɛ he fɛɛ kɛkpe.
4 Maŋtsɛ sɛii nyɔŋmai enyɔ kɛ ejwɛ mamɔ shi yɛ maŋtsɛ sɛi lɛ he fɛɛ kɛkpe, ni mina onukpai nyɔŋmai enyɔ kɛ ejwɛ ní wo atadei yɛji tara maŋtsɛ sɛii nɛɛ anɔ, ni shika tsuru akekerei fimɔ amɛyitsei.
5 Sarawai kɛ gbei kɛ nugbɔshiimɔi miijɛ maŋtsɛ sɛi lɛ mli kɛmiiba; ni la kanei kpawo miitso yɛ maŋtsɛ sɛi lɛ hiɛ, ni enɛɛmɛi damɔ shi kɛhã Nyɔŋmɔ mumɔi kpawo lɛ.
6 Nɔ ko ni je ŋshɔ, ní etamɔ ashwishwɛ, tamɔ kristalo, yɛ maŋtsɛ sɛi lɛ hiɛ.
Bɔɔ nii ejwɛ ní hiɛ kamɔ ní hiŋmɛii eyimɔ amɛhiɛ kɛ amɛsɛɛ obɔbɔ yɛ maŋtsɛ sɛi lɛ teŋ* ni amɛbɔle maŋtsɛ sɛi lɛ he kɛkpe.
7 Klɛŋklɛŋ bɔɔ nɔ ní hiɛ kã lɛ tamɔ jata, ni bɔɔ nɔ ní hiɛ kã ni ji enyɔ lɛ tamɔ tsinanuu, ni bɔɔ nɔ ní hiɛ kã ni ji etɛ lɛ hiɛ tamɔ gbɔmɔ hiɛ, ni bɔɔ nɔ ní hiɛ kã ni ji ejwɛ lɛ tamɔ okropɔŋ ni miifiliki.
8 Ni bɔɔ nii ejwɛ ní hiɛ kamɔ lɛ ateŋ mɔ fɛɛ mɔ yɛ fiji ekpaa; ni amɛfiji lɛ ahewɔ kɛ amɛmli eyimɔ obɔbɔ kɛ hiŋmɛii sɔŋŋ. Ni shwane kɛ nyɔɔŋ fɛɛ lɛ, amɛyaa nɔ amɛkɛɔ akɛ: “Krɔŋkrɔŋ, krɔŋkrɔŋ, krɔŋkrɔŋ ji Yehowa* Nyɔŋmɔ, Ofe lɛ, mɔ ni yɛ momo, kɛ mɔ ni yɔɔ amrɔ nɛɛ, kɛ mɔ ni baaba lɛ.”
9 Be fɛɛ be ni bɔɔ nii ní hiɛ kamɔ lɛ baaŋɔ anunyam kɛ woo kɛ shidaa amɛhã mɔ ni ta maŋtsɛ sɛi lɛ nɔ ni hiɛ kã kɛmiiya naanɔi anaanɔ lɛ,
10 onukpai nyɔŋmai enyɔ kɛ ejwɛ lɛ hoɔ gbeɔ shi yɛ mɔ ni ta maŋtsɛ sɛi lɛ nɔ lɛ hiɛ, ni amɛjáa mɔ ni hiɛ kã kɛmiiya naanɔi anaanɔ lɛ, ni amɛshɛrɛɔ amɛkekerei lɛ amɛshwieɔ maŋtsɛ sɛi lɛ hiɛ, amɛkɛɔ akɛ:
11 “Yehowa* wɔ-Nyɔŋmɔ, bo ji mɔ ni sa akɛ oŋɔ anunyam lɛ kɛ woo lɛ kɛ hewalɛ lɛ, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.”
Shishigbɛ Niŋmaa
^ Aloo “ojarawatɛ tsuru ko.”
^ Ojarawatɛ ko ni hiɛ baa ŋmɔŋ su, ní atsɛɔ lɛ “emerald” yɛ Blɔfo mli.
^ Aloo “kɛ maŋtsɛ sɛi lɛ yɛ teŋ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
