Kpojiemɔ 5:1-14
5 Ni mina wolokpo* ko yɛ mɔ ni ta maŋtsɛ sɛi lɛ nɔ lɛ ninejurɔ nɔ, ni aŋma nii yɛ emli kɛ esɛɛ fɛɛ, ni asɔo naa kpɛŋŋ kɛ naasɔomɔ nii kpawo.
2 Ni mina ŋwɛibɔfo hewalɔ ko ní kɛ gbee ni wa miijaje akɛ: “Namɔ ji mɔ ni sa akɛ egbeleɔ wolokpo lɛ naa ní etserɛɔ enaasɔomɔ nii lɛ?”
3 Shi mɔ ko mɔ ko bɛ ŋwɛi loo shikpɔŋ lɛ nɔ loo shikpɔŋ lɛ shishi ni baanyɛ wolokpo lɛ naa agbele loo ekwɛ mli.
4 Mifo aahu ejaakɛ anáaa mɔ ko mɔ ko ni sa akɛ egbeleɔ wolokpo lɛ naa aloo ekwɛɔ mli.
5 Shi onukpai lɛ ateŋ mɔ kome kɛɛ mi akɛ: “Kpa yaafo. Naa! Jata lɛ ni jɛ Yuda weku lɛ mli lɛ, David shishifã lɛ, eye kunim, ni no hewɔ lɛ, esa mɔ ni gbeleɔ wolokpo lɛ naa, ní etserɛɔ enaasɔomɔ nii kpawo lɛ.”
6 Ni mina gwantɛŋbi ko ní tamɔ nɔ ni agbe lɛ, damɔ shi yɛ maŋtsɛ sɛi lɛ kɛ bɔɔ nii ejwɛ ní hiɛ kamɔ lɛ ateŋ kɛ onukpai lɛ ateŋ, ni eyɛ akolontoi kpawo kɛ hiŋmɛii kpawo, ni hiŋmɛii lɛ damɔ shi kɛhã Nyɔŋmɔ mumɔi kpawo ní atsu kɛtee shikpɔŋ lɛ fɛɛ nɔ lɛ.
7 Amrɔ lɛ, eba ni ebahe wolokpo lɛ yɛ mɔ ni ta maŋtsɛ sɛi lɛ nɔ lɛ ninejurɔ nɔ.
8 Be ni ehe wolokpo lɛ, bɔɔ nii ejwɛ ní hiɛ kamɔ lɛ kɛ onukpai nyɔŋmai enyɔ kɛ ejwɛ lɛ ho gbee shi yɛ Gwantɛŋbi lɛ hiɛ, ni amɛteŋ mɔ fɛɛ mɔ hiɛ saŋku kɛ shika tsuru kãi kɛ amɛmli tsofa-kɛ-ŋmai obɔbɔ. (Tsofa-kɛ-ŋmai lɛ damɔ shi kɛhã mɛi krɔŋkrɔŋi lɛ asɔlemɔi lɛ.)
9 Ni amɛlá lala hee ko amɛkɛɛ: “Osa akɛ oheɔ wolokpo lɛ ní otserɛɔ enaasɔomɔ nii lɛ, ejaakɛ agbe bo ni okɛ olá lɛ hé mɛi ohã Nyɔŋmɔ kɛjɛ weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli,
10 ni ohã amɛtsɔmɔ maŋtsɛmɛi* kɛ osɔfoi amɛhã wɔ-Nyɔŋmɔ lɛ, ni amɛbaaye shikpɔŋ lɛ nɔ akɛ maŋtsɛmɛi.”
11 Ni mikwɛ, ni minu ŋwɛibɔfoi babaoo ni ebɔle maŋtsɛ sɛi lɛ kɛ bɔɔ nii ní hiɛ kamɔ lɛ kɛ onukpai lɛ ahe kɛkpe lɛ agbee, ni amɛyibɔ ji akpei nyɔŋmai abɔ toi akpei nyɔŋmai abɔ kɛ akpei toi akpei abɔ,
12 ni amɛkɛ gbee ni wa miikɛɛ akɛ: “Gwantɛŋbi lɛ ni agbe lɛ lɛ sa akɛ eŋɔ hewalɛ kɛ ninámɔ kɛ hiɛshikamɔ kɛ nyɛmɔ kɛ woo kɛ anunyam kɛ jɔɔmɔ lɛ.”
13 Ni minu akɛ bɔɔ nii fɛɛ ni yɔɔ ŋwɛi kɛ shikpɔŋ lɛ nɔ kɛ shikpɔŋ lɛ shishi kɛ ŋshɔ hiɛ, kɛ nibii fɛɛ ni yɔɔ amɛmli lɛ miikɛɛ akɛ: “Aŋɔ jɔɔmɔ kɛ woo kɛ anunyam kɛ nyɛmɔ ahã mɔ ni ta maŋtsɛ sɛi lɛ nɔ lɛ kɛ Gwantɛŋbi lɛ kɛya naanɔi anaanɔ.”
14 Bɔɔ nii ejwɛ ní hiɛ kamɔ lɛ miikɛɛ akɛ: “Amen!” ni onukpai lɛ ho gbee shi ni amɛjá.
