Kpojiemɔ 6:1-17
-
Gwantɛŋbi lɛ tserɛ klɛŋklɛŋ naasɔomɔ nii ekpaa lɛ (1-17)
-
Kunimyelɔ ta okpɔŋɔ yɛŋ lɛ nɔ (1, 2)
-
Mɔ ni ta okpɔŋɔ ni tsuɔ tamɔ lalilɛi lɛ nɔ lɛ baajie toiŋjɔlɛ kɛje shikpɔŋ lɛ nɔ (3, 4)
-
Mɔ ni ta okpɔŋɔ diŋ lɛ nɔ lɛ kɛ hɔmɔ baaba (5, 6)
-
Mɔ ni ta okpɔŋɔ ni hiɛ su ni ekwá lɛ nɔ lɛ gbɛ́i ji Gbele (7, 8)
-
Mɛi ni agbe lɛ yɛ afɔleshaa latɛ lɛ shishi (9-11)
-
Shikpɔŋhosomɔ kpele ko (12-17)
-
6 Ni mina akɛ Gwantɛŋbi lɛ tse naasɔomɔ nii kpawo lɛ ateŋ ekome, ni minu akɛ bɔɔ nii ejwɛ ní hiɛ kamɔ lɛ ateŋ mɔ kome kɛ gbee ni tamɔ nugbɔshiimɔ kɛɛ: “Ba!”
2 Ni mikwɛ, ni naa! okpɔŋɔ yɛŋ, ni mɔ ni ta enɔ lɛ hiɛ gãi; ni ahã lɛ akekere, ni eje kpo, eeye kunim koni egbe ekunimyeli lɛ naa.
3 Be ni etse naasɔomɔ nɔ ni ji enyɔ lɛ, minu akɛ bɔɔ nɔ ní hiɛ kã ni ji enyɔ lɛ kɛɛ: “Ba!”
4 Okpɔŋɔ kroko ní tsuɔ tamɔ lalilɛi je kpo, ni ahã mɔ ni ta enɔ lɛ hegbɛ akɛ ejie toiŋjɔlɛ kɛje shikpɔŋ lɛ nɔ koni amɛgbegbee amɛhe, ni ahã lɛ klante kpeteŋkpele ko.
5 Be ni etse naasɔomɔ nɔ ni ji etɛ lɛ, minu akɛ bɔɔ nɔ ní hiɛ kã ni ji etɛ lɛ kɛɛ: “Ba!” Ni mikwɛ, ni naa! okpɔŋɔ diŋ, ni mɔ ni ta enɔ lɛ hiɛ nsɛnii yɛ edɛŋ.
6 Minu nɔ ko ni tamɔ gbee ko yɛ bɔɔ nii ejwɛ ní hiɛ kamɔ lɛ ateŋ miikɛɛ: “Ŋmaa susumɔnɔ kome* lɛ denario kome* kɛ akoko susumɔnii etɛ* lɛ denario kome; ni oliv mu lɛ kɛ wein lɛ, kaakpãtã hiɛ.”
7 Be ni etse naasɔomɔ nɔ ni ji ejwɛ lɛ, minu bɔɔ nɔ ní hiɛ kã ni ji ejwɛ lɛ gbee miikɛɛ: “Ba!”
8 Ni mikwɛ, ni naa! okpɔŋɔ ní hiɛ su ni ekwá, ni mɔ ni ta enɔ lɛ gbɛ́i ji Gbele. Ni Gbonyo Bu* lɛ nyiɛ esɛɛ kpaakpa. Ni ahã amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kakadaŋŋ kɛ hɔmɔ kɛ gbele hela kɛ shikpɔŋ lɛ nɔ kooloi awuiyelɔi lɛ agbegbee amɛ.
9 Be ni etse naasɔomɔ nɔ ni ji enumɔ lɛ, mina mɛi ni agbe yɛ Nyɔŋmɔ wiemɔ lɛ hewɔ kɛ agbɛnɛ hu yɛ odase ni amɛye lɛ hewɔ lɛ asusumai* yɛ afɔleshaa latɛ lɛ shishi.
10 Amɛbolɔ kɛ gbee ni wa akɛ: “Nuŋtsɔ Ofe, mɔ krɔŋkrɔŋ kɛ anɔkwafo, mɛɛ be po obaamɛ kɛyashi dani obaakojo ní otɔ wɔlá lɛ he owele yɛ mɛi ni yɔɔ shikpɔŋ lɛ nɔ lɛ anɔ?”
11 Ni ahã amɛteŋ mɔ fɛɛ mɔ atade yɛŋ yuu, ni akɛɛ amɛ akɛ amɛjɔɔ amɛhe be fioo ko lolo, kɛyashi amɛnanemɛi nyɔji lɛ kɛ amɛnyɛmimɛi ní aaba abagbe amɛ tamɔ bɔ ni agbe amɛ hu lɛ ayibɔ lɛ baashɛ.
12 Ni mina be ni etse naasɔomɔ nɔ ni ji ekpaa lɛ, ni shikpɔŋhosomɔ kpele ko ba; ni hulu lɛ tsɔ ediŋ tamɔ kpekpe ní akɛ tsɔi* fee, ni nyɔɔŋtsere muu lɛ fɛɛ tsɔ tamɔ lá,
13 ni ŋwɛi ŋulamii lɛ tserɛ shwie shikpɔŋ, tamɔ bɔ ni agbami tso yi agbamii ŋmilikitii tserɛɔ shwieɔ shi kɛ́ kɔɔyɔɔ kpeteŋkpele hoso agbami tso lɛ.
14 Ni ŋwɛi tsi ehe kɛtee tamɔ wolokpo* ní aakota, ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛje egbɛhe.
15 Ni shikpɔŋ lɛ nɔ maŋtsɛmɛi lɛ, abladei lɛ, tatsɛmɛi lɛ, niiatsɛmɛi lɛ, hewalɔi lɛ, nyɔŋ fɛɛ nyɔŋ, kɛ odehe fɛɛ odehe, yateetee amɛhe yɛ tɛkploi amli kɛ agbɛnɛ hu yɛ gɔji atɛsai amli.
16 Ni amɛtee nɔ amɛkɛɛ gɔji lɛ kɛ tɛsai lɛ akɛ: “Nyɛgbea wɔnɔ, ní nyɛkɛ wɔ atea kɛjea mɔ ni ta maŋtsɛ sɛi lɛ nɔ lɛ hiɛ, kɛ Gwantɛŋbi lɛ mlifu lɛ naa,
17 ejaakɛ amɛmlifu gbi wulu lɛ eshɛ, ni namɔ baanyɛ naa adamɔ?”
Shishigbɛ Niŋmaa
^ Aloo “Ŋmaa kwat kome.”
^ Roma jwiɛtɛi shika ko ni ji gbi kome nyɔmɔwoo.
^ Aloo “akoko kwatii etɛ.”
^ Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Ekã shi faŋŋ akɛ, ekɔɔ amɛlá ní damɔ shi kɛhã amɛwala ní afɔse ashwie afɔleshaa latɛ lɛ nɔ lɛ he. Kwɛmɔ Wiemɔi Titrii Amligbalamɔ lɛ.
^ Eeenyɛ efee akɛ abotia hetsɔi.
^ Wolo kakadaŋŋ ni akotaa awoɔ tso he.
