Kpojiemɔ 7:1-17
7 Enɛ sɛɛ lɛ, mina ŋwɛibɔfoi ejwɛ damɔ shikpɔŋ lɛ koji ejwɛ lɛ anɔ, ni amɛhiɛ shikpɔŋ lɛ kɔɔyɔi ejwɛ lɛ amli kpɛŋŋ, koni kɔɔyɔɔ ko akatswa yɛ shikpɔŋ lɛ nɔ loo ŋshɔ lɛ nɔ loo tso ko nɔ.
2 Ni mina ŋwɛibɔfo kroko miikwɔ kɛmiijɛ hulushiteehe* kɛmiiba, ni ehiɛ Nyɔŋmɔ hiɛkãalɔ lɛ naasɔomɔ nɔ; ni ebolɔ kɛ gbee ni wa ekɛɛ ŋwɛibɔfoi ejwɛ lɛ ní ahã amɛ hegbɛ akɛ amɛye shikpɔŋ lɛ kɛ ŋshɔ lɛ awui lɛ
3 akɛ: “Nyɛkayea shikpɔŋ lɛ loo ŋshɔ lɛ loo tsei lɛ awui, kɛyashi beyinɔ ni wɔkɛ naasɔomɔ nɔ baakadi wɔ-Nyɔŋmɔ lɛ nyɔji lɛ ahiɛŋtsei anɔ dã.”
4 Ni minu mɛi ni akɛ naasɔomɔ nɔ lɛ ekadi amɛ lɛ ayibɔ, mɛi akpei oha-kɛ-nyɔŋmai-ejwɛ-kɛ-ejwɛ, ní akɛ naasɔomɔ nɔ ekadi amɛ kɛjɛ Israelbii lɛ aweku fɛɛ weku mli:
5 Yuda weku lɛ mli lɛ akɛ naasɔomɔ nɔ lɛ kadi mɛi akpei nyɔŋma-kɛ-enyɔ;
Ruben weku lɛ mli lɛ mɛi akpei nyɔŋma-kɛ-enyɔ;
Gad weku lɛ mli lɛ mɛi akpei nyɔŋma-kɛ-enyɔ;
6 Asher weku lɛ mli lɛ mɛi akpei nyɔŋma-kɛ-enyɔ;
Naftali weku lɛ mli lɛ mɛi akpei nyɔŋma-kɛ-enyɔ;
Manase weku lɛ mli lɛ mɛi akpei nyɔŋma-kɛ-enyɔ;
7 Simeon weku lɛ mli lɛ mɛi akpei nyɔŋma-kɛ-enyɔ;
Levi weku lɛ mli lɛ mɛi akpei nyɔŋma-kɛ-enyɔ;
Isakar weku lɛ mli lɛ mɛi akpei nyɔŋma-kɛ-enyɔ;
8 Zebulon weku lɛ mli lɛ mɛi akpei nyɔŋma-kɛ-enyɔ;
Yosef weku lɛ mli lɛ mɛi akpei nyɔŋma-kɛ-enyɔ;
Benyamin weku lɛ mli lɛ, akɛ naasɔomɔ nɔ lɛ kadi mɛi akpei nyɔŋma-kɛ-enyɔ.
9 Enɛ sɛɛ lɛ mikwɛ, ni naa! asafoku kpele ko, ní gbɔmɔ ko gbɔmɔ ko nyɛŋ akane, ní jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli, damɔ maŋtsɛ sɛi lɛ hiɛ kɛ Gwantɛŋbi lɛ hiɛ, ni amɛwo atadei yɛji yuuyui; ni amɛhiɛ blɛoi yɛ amɛdɛŋ.
10 Ni amɛyaa nɔ amɛbolɔɔ kɛ gbee ni wa akɛ: “Wɔyiwalaheremɔ lɛ jɛ wɔ-Nyɔŋmɔ lɛ, mɔ ni ta maŋtsɛ sɛi lɛ nɔ lɛ, kɛ Gwantɛŋbi lɛ ŋɔɔ.”
11 Ŋwɛibɔfoi lɛ fɛɛ damɔ maŋtsɛ sɛi lɛ kɛ onukpai lɛ kɛ bɔɔ nii ejwɛ ní hiɛ kamɔ lɛ ahewɔ kɛkpe, ni amɛkɛ amɛhiɛ bumɔ shi yɛ maŋtsɛ sɛi lɛ hiɛ ni amɛjá Nyɔŋmɔ,
12 amɛkɛɛ: “Amen! Yijiemɔ lɛ kɛ anunyam lɛ kɛ hiɛshikamɔ lɛ kɛ shidaa lɛ kɛ woo lɛ kɛ hewalɛ lɛ kɛ nyɛmɔ lɛ ahã wɔ-Nyɔŋmɔ lɛ kɛya naanɔi anaanɔ. Amen.”
13 Onukpai lɛ ateŋ mɔ kome here nɔ ekɛɛ mi akɛ: “Mɛi ni wo atadei yɛji yuuyui nɛɛ, namɛi ni, ni nɛgbɛ amɛjɛ?”
14 Ni amrɔ lɛ, mikɛɛ lɛ akɛ: “Minuŋtsɔ, bo ole.” Ni ekɛɛ mi akɛ: “Mɛnɛɛmɛi ji mɛi ni je amanehulu kpeteŋkpele lɛ mli lɛ, ni amɛfɔ amɛtadei yuuyui lɛ ahe ni amɛhã eyɛ futaa yɛ Gwantɛŋbi lɛ lá lɛ mli.
15 No hewɔ ni amɛyɔɔ Nyɔŋmɔ maŋtsɛ sɛi lɛ hiɛ, ni amɛkɛ sɔɔmɔ krɔŋŋ hãa lɛ shwane kɛ nyɔɔŋ yɛ esɔlemɔwe lɛ; ni mɔ ni ta maŋtsɛ sɛi lɛ nɔ lɛ baashĩ ebuu lɛ eto amɛnɔ.
16 Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, asaŋ hulu eshaŋ amɛ ni amɛnuŋ dɔlɛ ni naa wa ko he dɔŋŋ,
17 ejaakɛ Gwantɛŋbi lɛ ni yɔɔ maŋtsɛ sɛi lɛ teŋ lɛ baakwɛ amɛ tamɔ tookwɛlɔ feɔ lɛ, ni ebaatsɔɔ amɛ gbɛ kɛya wala nuhiŋmɛii ahe. Ni Nyɔŋmɔ baatsumɔ amɛhiŋmɛiiaŋ yaafonui fɛɛ.”
Shishigbɛ Niŋmaa
^ Aloo “boka.”
