Filipibii 3:1-21
3 Naagbee lɛ, minyɛmimɛi, nyɛyaa nɔ nyɛnáa miishɛɛ waa yɛ Nuŋtsɔ lɛ mli. Egbaaa minaa akɛ maŋma nyɛ nɛkɛ nibii nɛɛ nɔŋŋ, ni ehãa nyɛfeɔ shweshweeshwe.
2 Nyɛkwɛa jogbaŋŋ yɛ gbei lɛ ahe; nyɛkwɛa jogbaŋŋ yɛ mɛi ni yeɔ awui lɛ ahe; nyɛkwɛa jogbaŋŋ yɛ mɛi ni folɔɔ heloo lɛ ahe.
3 Ejaakɛ wɔ moŋ ji mɛi ni afolɔ amɛ ketia lɛɛlɛŋ lɛ, wɔ mɛi ni wɔtsɔɔ Nyɔŋmɔ mumɔ lɛ nɔ wɔŋɔɔ sɔɔmɔ krɔŋŋ wɔhãa ní wɔshiɔ wɔtsitsi yɛ Kristo Yesu mli, ní wɔkɛ wɔhiɛ efɔ̃ɔɔ heloo lɛ nɔ lɛ,
4 tsɛbelɛ kɛ́ mɔ ko yɛ nɔ ko yɛ heloo gbɛfaŋ ní ekɛ ehiɛ baafɔ̃ nɔ lɛ, mi ni.
Kɛ́ mɔ kroko susuɔ akɛ eyɛ nɔ ko ni ekɛ ehiɛ fɔ̃ɔ nɔ yɛ heloo gbɛfaŋ lɛ, miyɛ nɔ ni fe no:
5 afo mi ketia yɛ gbi ni ji gbi kpaanyɔ lɛ nɔ, Israelnyo ji mi, mijɛ Benyamin weku lɛ mli, Hebrinyo ní Hebribii fɔ lɛ ji mi; yɛ mla gbɛfaŋ lɛ, Farisifonyo ji mi;
6 yɛ hiɛdɔɔ gbɛfaŋ lɛ, miwa asafo lɛ yi; yɛ jalɛ ni damɔ mla nɔ gbɛfaŋ lɛ, mitsɔɔ akɛ shwamɔ ko bɛ mihe.
7 Kɛ̃lɛ, nibii ni ji sɛɛnamɔ kɛhã mi tsutsu ko lɛ, mibu amɛ akɛ nibii ni eŋmɛɛ mi* yɛ Kristo lɛ hewɔ.
8 Asaŋ, yɛ anɔkwale mli lɛ, mibuɔ nibii fɛɛ hu akɛ nibii ni eŋmɛɛ mi yɛ Kristo Yesu, mi-Nuŋtsɔ lɛ, he nilee ni jara wa fe fɛɛ lɛ hewɔ. Lɛ ehewɔ lɛ, mishɛrɛ nibii fɛɛ mishwie, ni mibuɔ amɛ akɛ jwɛii* babaoo, koni minine ashɛ Kristo nɔ
9 ní ana mi akɛ mi kɛ lɛ efee ekome, jeee yɛ mi diɛŋtsɛ mijalɛ ni jɛ Mla lɛ nɔyeli mli lɛ hewɔ, shi moŋ yɛ jalɛ ní atsɔɔ hemɔkɛyeli yɛ Kristo mli lɛ nɔ anáa lɛ hewɔ, jalɛ ni jɛ Nyɔŋmɔ ŋɔɔ ní damɔ hemɔkɛyeli nɔ lɛ.
10 Oti ni ma mihiɛ ji ní male lɛ kɛ eshitee lɛ hewalɛ lɛ, ní maná enɔnai lɛ amli gbɛfaŋnɔ, ní maŋmɛɛ mihe mahã gbele ní tamɔ enɔ lɛ,
11 ní makwɛ akɛ kɛ́ eeehi lɛ, minine aaanyɛ ashɛ klɛŋklɛŋ shitee kɛmiijɛ gbohii ateŋ* lɛ nɔ lo.
12 Jeee akɛ minine eshɛ nɔ momo aloo ahã miye emuu momo, shi moŋ miipele mihiɛ gbɛ bɔ ni afee ni minine anyɛ ashɛ nɔ ni Kristo Yesu hala mi* yɛ no hewɔ lɛ nɔ.
13 Nyɛmimɛi, mibuuu mihe akɛ minine eshɛ nɔ momo; shi miyɛ nɔmimaa yɛ nɔ kome he: Nibii ni yɔɔ sɛɛ lɛ, miijie mihiɛ yɛ nɔ, ni nibii ni yɔɔ hiɛgbɛ lɛ moŋ mikpãa mimli ní mashɛ he,
14 miipele mihiɛ gbɛ kɛyashɛ oti lɛ he koni minine ashɛ juromɔnɔ ni ji ŋwɛi tsɛmɔ ní Nyɔŋmɔ tsɔɔ Kristo Yesu nɔ etsɛɔ wɔ lɛ nɔ.
15 No hewɔ lɛ, wɔ mɛi ní wɔdara yɛ mumɔŋ lɛ, nyɛhãa wɔjwɛŋa nakai nɔŋŋ, ni kɛ́ nyɛhiɛ jwɛŋmɔ kroko yɛ gbɛ ko nɔ lɛ, Nyɔŋmɔ baajie jwɛŋmɔ ni ja lɛ kpo etsɔɔ nyɛ.
16 Bɔ fɛɛ bɔ ni ji lɛ, he ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.
17 Nyɛmimɛi, nyɛ fɛɛ nyɛkasea mi, ni nyɛyaa nɔ nyɛkwɛa mɛi ni nyiɛɔ yɛ gbɛ ni kɛ nɔkwɛmɔnɔ ní wɔfee wɔhã nyɛ lɛ kpãa gbee lɛ naa.
18 Ejaakɛ mɛi pii yɛ—tsutsu ko lɛ, mifɔɔ amɛtã tsĩi, shi amrɔ nɛɛ miitsĩ amɛtã hu kɛ yaafo—ní miinyiɛ akɛ Kristo lɛ piŋmɔ tso* lɛ henyɛlɔi.
19 Amɛnaagbee ji hiɛkpatamɔ, ni amɛmusu ji amɛnyɔŋmɔ, ni yɛ anɔkwale mli lɛ, amɛhiɛgbejianii lɛ ji amɛnunyam, ni amɛkɛ amɛjwɛŋmɔ maa shikpɔŋ nɔ nibii anɔ.
20 Shi wɔ lɛ, wɔji ŋwɛi maŋbii, ni wɔkɛ miishɛɛ miimɛ yiwalaherelɔ ko ni jɛ jɛmɛ, ni ji Nuŋtsɔ Yesu Kristo lɛ,
21 mɔ ni baatsɔ ehewalɛ kpele ní hãa enyɛɔ eŋɔɔ nibii fɛɛ ewoɔ eshishi lɛ nɔ etsake wɔgbɔmɔtso ní egbede lɛ koni etamɔ enunyam gbɔmɔtso lɛ.
Shishigbɛ Niŋmaa
^ Aloo eeenyɛ efee akɛ, “mijɛ misuɔmɔ mli miŋmɛɛ amɛhe.”
^ Aloo “tumo nɔ nii; bɔɔla.”
^ Aloo “mra mli gbohiiashitee.”
^ Sht. ŋm., “nine shɛ minɔ.”
^ Kwɛmɔ Wiemɔi Titrii Amligbalamɔ lɛ.
