Galatiabii 5:1-26
5 Ejaakɛ nɛkɛ heyeli nɛɛ hewɔ Kristo hã wɔye wɔhe lɛ. No hewɔ lɛ, nyɛdamɔa shi shiŋŋ, ni nyɛkahãa akɛ nyɛ woa nyɔŋyeli kɔɔŋtso shishi dɔŋŋ.
2 Naa! Mi Paulo, mi diɛŋtsɛ miikɛɛ nyɛ akɛ kɛ́ nyɛhã afolɔ nyɛ ketia lɛ, Kristo he baŋ sɛɛnamɔ ko kɛhãŋ nyɛ.
3 Miisaa miiye gbɔmɔ fɛɛ gbɔmɔ ni hãa afoɔ lɛ ketia lɛ odase akɛ, sɔ̃ kã enɔ akɛ eya nɔ eye Mla muu lɛ fɛɛ nɔ.
4 Nyɛ mɛi ni nyɛtaoɔ akɛ atsɔ mla nɔ abu nyɛ jalɔi lɛ, ekɔɔɔ he eko mɛi ni nyɛji lɛ, atse nyɛ kɛje Kristo he; nyɛkpale kɛje eduromɔ lɛ he.
5 Ejaakɛ yɛ wɔgbɛfaŋ lɛ, wɔtsɔɔ mumɔ lɛ nɔ wɔkɛ miishɛɛ mɛɔ jalɛ ni wɔhiɛ kã nɔ yɛ hemɔkɛyeli hewɔ lɛ.
6 Ejaakɛ Kristo Yesu mli lɛ, ketiafoo loo foo he bɛ sɛɛnamɔ ko, shi hemɔkɛyeli ni tsɔɔ suɔmɔ nɔ etsuɔ nii lɛ ji nɔ ni he yɔɔ sɛɛnamɔ.
7 Kulɛ nyɛmiida foi lɛ jogbaŋŋ. Namɔ tsĩ nyɛ gbɛ koni nyɛkaya nɔ nyɛbo anɔkwale lɛ toi?
8 Nɛkɛ yiŋtsɔmɔ nɛɛ, jeee mɔ ni tsɛɔ nyɛ lɛ mli ejɛ.
9 Masha bibioo shaa ma* muu lɛ fɛɛ.
10 Miyɛ nɔmimaa akɛ nyɛ mɛi ni nyɛ kɛ Nuŋtsɔ lɛ efee ekome lɛ, nyɛnáŋ jwɛŋmɔ kroko; shi mɔ ni gbaa nyɛnaa lɛ, ekɔɔɔ he eko mɔ ni eji lɛ, ebaaná fɔbuu kojomɔ ni sa lɛ.
11 Nyɛmimɛi, mi lɛ, kɛ́ mikã he miishiɛ ketiafoo lɛ, mɛni hewɔ akã he awaa mi yi? Kɛ́ nakai ni lɛ, belɛ ajie piŋmɔ tso* lɛ he nanetɔ̃tɔmɔnɔ lɛ kɛje jɛmɛ.
12 Miná ni kulɛ mɛi ni miibɔ mɔdɛŋ ni amɛhã nyɛgbugbaa lɛ folɔ amɛhe nii amɛshwie.*
13 Nyɛmimɛi, heyeli mli atsɛ nyɛ kɛba; nyɛkɛ nɛkɛ heyeli nɛɛ akatsua nii akɛ hegbɛ ni nyɛná ni nyɛkɛaatiu nibii ni heloo lɛ shweɔ lɛ asɛɛ kɔkɔɔkɔ, shi moŋ nyɛtsɔa suɔmɔ nɔ nyɛsɔmɔsɔmɔa nyɛhe akɛ nyɔji.
14 Ejaakɛ awo Mla muu lɛ fɛɛ obɔ* yɛ kitã kome nɛɛ mli akɛ: “Esa akɛ osumɔ onaanyo gbɔmɔ tamɔ bo diɛŋtsɛ ohe.”
15 Shi kɛ́ nyɛtee nɔ nyɛkɔmɔkɔmɔɔ nyɛhe ni nyɛmimii nyɛhe lɛ, nyɛkwɛa jogbaŋŋ ní nyɛkayeyea nyɛhe awui.
16 Shi miikɛɛ akɛ, Nyɛyaa nɔ nyɛnyiɛa yɛ mumɔ naa, ni nyɛfeŋ nibii ni heloo lɛ shweɔ lɛ eko kwraa.
17 Ejaakɛ nibii ni heloo lɛ shweɔ lɛ teɔ shi woɔ mumɔ lɛ, ni mumɔ lɛ hu teɔ shi woɔ heloo lɛ; enɛɛmɛi kɛ amɛhe yeee, ni no hewɔ lɛ nyɛfeee nibii tuuntu ni nyɛsumɔɔ akɛ nyɛfee lɛ.
18 Kɛfata he lɛ, kɛ́ mumɔ lɛ kpalaa nyɛ lɛ, belɛ nyɛbɛ mla shishi.
19 Agbɛnɛ, anaa heloo lɛ nitsumɔi lɛ faŋŋ, ni nomɛi ji bɔlɛnamɔ jeŋba sha,* muji nii, efɔŋ ni akɛ kuɛŋtimɔ feɔ,*
20 amagajamɔ, mumɔi kɛshãramɔ,* hetsɛ̃, béi, awuŋayeli, girimɔi, naataamɔi, mligbalamɔi, jamɔ kui,
21 mɔnɔklɔmɔ, dãatɔɔ, hiɛtserɛjiemɔi ni yɔɔ hoo, kɛ nibii ni tamɔ enɛɛmɛi. Miitsɔ hiɛ miibɔ nyɛ kɔkɔ yɛ nibii nɛɛ ahe, tamɔ bɔ ni mibɔ nyɛ kɔkɔ momo lɛ, akɛ mɛi ni yaa nɔ amɛfeɔ nɛkɛ nibii nɛɛ anine shɛŋ Nyɔŋmɔ Maŋtsɛyeli lɛ nɔ.*
22 Nɔ ni tamɔɔɔ nakai lɛ, mumɔ lɛ yibiiwoo ji suɔmɔ, miishɛɛ, toiŋjɔlɛ, tsuishitoo,* mlihilɛ, ekpakpafeemɔ, hemɔkɛyeli,
23 mlijɔlɛ, henɔyeli. Mla ko bɛ ni teɔ shi woɔ nɛkɛ nibii nɛɛ.
24 Kɛfata he lɛ, mɛi ni ji Kristo Yesu nii lɛ, amɛkala heloo lɛ kɛ ekɔnɔi kɛ nibii ni eshweɔ lɛ fɛɛ amɛkpɛtɛ tso jaŋŋ lɛ he.
25 Kɛ́ wɔhiɔ shi yɛ mumɔ naa lɛ, nyɛhãa wɔyaa nɔ wɔnyiɛa jogbaŋŋ yɛ mumɔ naa hu.
26 Nyɛkahãa wɔnaa wɔhe tsɔ, ní wɔteetee akaŋshii ashi yɛ wɔteŋ, ní wɔklɔklɔɔ wɔhe nɔ.
Shishigbɛ Niŋmaa
^ Ma ji nibii tamɔ abele, omɔ, ŋmaa, kɛ amɛhenɔi ni agbɛlɛ ni akɛ nu efutu.
^ Kwɛmɔ Wiemɔi Titrii Amligbalamɔ lɛ.
^ Aloo “sa amɛhe; tsɔmɔ osaii,” ni no baatsɔɔ akɛ amɛsaaa mɛi ni kɛ mla lɛ nɔŋŋ ní amɛjieɔ yi amɛhãa mɛi lɛ tsuɔ nii.
^ Aloo eeenyɛ efee akɛ, “afoɔ Mla muu lɛ fɛɛ kuku.”
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Aloo “jeŋba gbonyo ni efeee mɔ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.
^ Aloo “ŋkunyaayeli; tsofai kɛnitsumɔ.”
^ Sht. ŋm., “náŋ Nyɔŋmɔ Maŋtsɛyeli lɛ akɛ gboshinii.”
^ Aloo “ŋɔɔ ni amiɔ.”
