Hebribii 1:1-14
1 Blema tɔ̃ɔ lɛ, Nyɔŋmɔ tsɔ gbalɔi lɛ anɔ ekɛ wɔtsɛmɛi lɛ wie yɛ bei srɔtoi amli kɛ agbɛnɛ hu, yɛ gbɛi srɔtoi anɔ.
2 Amrɔ nɛɛ, yɛ nɛkɛ gbii nɛɛ anaagbee mli lɛ, etsɔɔ Bi lɛ nɔ ekɛ wɔ wieɔ, mɔ ni ewó lɛ nibii fɛɛ yelɔ, ní etsɔ enɔ efee shihilɛi agbɛjianɔtoi lɛ.*
3 Lɛ ji mɔ ni hãa anaa Nyɔŋmɔ anunyam lɛ, ni eji esu lɛ henɔ pɛpɛɛpɛ, ni ekɛ ehewalɛ wiemɔ lɛ hãa nibii fɛɛ yaa nɔ hiɔ wala mli. Ni be ni etsuu wɔhe kɛjɛ wɔhe eshai lɛ amli egbe naa lɛ, eyata Anunyamtsɛ lɛ ninejurɔ nɔ yɛ ŋwɛi.
4 No hewɔ lɛ, etsɔ mɔ ni fe ŋwɛibɔfoi lɛ, aahu akɛ ená gbɛ́i ni fe amɛnɔ lɛ kwraa.*
5 Akɛ nɔkwɛmɔnɔ lɛ, ŋwɛibɔfoi lɛ ateŋ namɔ Nyɔŋmɔ ekɛɛ lɛ pɛŋ akɛ: “Mibi ji bo; ŋmɛnɛ lɛ, mitsɔ otsɛ”? Ni asaŋ: “Matsɔ etsɛ, ni ebaatsɔ mibi”?
6 Shi ekɛɛ yɛ be ni ebaahã e-Kromɔbi lɛ aba shikpɔŋ lɛ nɔ ekoŋŋ lɛ he akɛ: “Ni Nyɔŋmɔ ŋwɛibɔfoi lɛ fɛɛ akoto lɛ.”
7 Agbɛnɛ hu, ekɛɛ yɛ ŋwɛibɔfoi lɛ ahe akɛ: “Efeɔ eŋwɛibɔfoi lɛ mumɔi, kɛ esɔɔlɔi* lɛ hu lalilɛi.”
8 Shi Bi lɛ, ekɛɛ yɛ ehe akɛ: “Nyɔŋmɔ ji omaŋtsɛ sɛi kɛmiiya naanɔi anaanɔ, ni o-Maŋtsɛyeli tso lɛ, jalɛ* tso ni.
9 Osumɔ jalɛ, ni onyɛ mlatɔmɔ. No hewɔ ni Nyɔŋmɔ, o-Nyɔŋmɔ lɛ, kɛ mlifilimɔ mu fɔ bo fe ohefatalɔi lɛ.”
10 Ni: “Oo Nuŋtsɔ, shishijee lɛ mli lɛ, bo otswa shikpɔŋ lɛ faneshii lɛ, ni ŋwɛii lɛ, oninenaa nitsumɔi ni.
11 Amɛhiɛ baakpãtã, shi bo lɛ obaaya nɔ ohi shi; ni amɛ fɛɛ amɛbaasu tamɔ atade suɔ lɛ,
12 ni obaakota amɛ tamɔ akotaa hehaanɔ, tamɔ akotaa atade lɛ, ni abaatsake amɛ. Shi bo lɛ, oyɛ bɔ ni oyɔɔ lɛ nɔŋŋ, ni ofii lɛ etaŋ kɔkɔɔkɔ.”
13 Shi ŋwɛibɔfoi lɛ ateŋ namɔ ni ekɛɛ yɛ ehe pɛŋ akɛ: “Ta mininejurɔ nɔ kɛyashi be ni maŋɔ ohenyɛlɔi lɛ mafee onajiashi maaŋoo”?
14 Ani amɛ fɛɛ lɛ, jeee mumɔi ní kɛ sɔɔmɔ krɔŋkrɔŋ hãa* ji amɛ, mɛi ni atsu amɛ koni amɛyasɔmɔ mɛi ni baaná yiwalaheremɔ lɛ?
Shishigbɛ Niŋmaa
^ Aloo “yinɔi lɛ.” Kwɛmɔ Wiemɔi Titrii Amligbalamɔ lɛ.
^ Sht. ŋm., “ená gbɛ́i ni fe amɛnɔ lɛ kwraa akɛ gboshinii.”
^ Aloo “etsuji ní sɔmɔɔ yɛ mɛi krokomɛi ahilɛkɛhamɔ hewɔ.”
^ Aloo “jalɛsaneyeli.”
^ Aloo “ní sɔmɔɔ yɛ mɛi krokomɛi ahilɛkɛhamɔ hewɔ.”
