Hebribii 3:1-19
3 No hewɔ lɛ, nyɛmimɛi krɔŋkrɔŋi, mɛi ni ená ŋwɛi tsɛmɔ* lɛ mli gbɛfaŋnɔ, nyɛsusua mɔ ni wɔkpɛlɛɔ nɔ* akɛ eji bɔfo kɛ osɔfonukpa lɛ he—Yesu.
2 Eye mɔ ni wó lɛ eto nakai gbɛhe lɛ anɔkwa, tamɔ bɔ ni Mose hu ye anɔkwa yɛ nakai mɔ lɛ we lɛ fɛɛ lɛ.
3 Ejaakɛ abuɔ lɛ* akɛ esa anunyam fe Mose, akɛni mɔ ni maa shĩa lɛ woo fa fe shĩa lɛ diɛŋtsɛ nɔ lɛ hewɔ.
4 Yɛ anɔkwale mli lɛ, shĩa fɛɛ shĩa lɛ mɔ ko kɛ̃ ma, shi mɔ ni fee nibii fɛɛ ji Nyɔŋmɔ.
5 Agbɛnɛ, Mose ye anɔkwa akɛ sɔɔlɔ yɛ nakai mɔ lɛ we lɛ fɛɛ, ni no ye nibii ni abaawie yɛ sɛɛ mli lɛ ahe odase,
6 shi Kristo ye anɔkwa akɛ bi yɛ Nyɔŋmɔ we lɛ nɔ. Anɔkwa, kɛ́ wɔhiɛ wiemɔ ní wɔwieɔ kɛ nɔmimaa, kɛ hiɛnɔkamɔ ní wɔkɛshiɔ wɔtsitsi lɛ mli kpɛŋŋ kɛyashi naagbee lɛ, no lɛ E-we ji wɔ.
7 No hewɔ lɛ, tamɔ bɔ ni mumɔ krɔŋkrɔŋ lɛ kɛɔ lɛ, “Ŋmɛnɛ lɛ, kɛji nyɛbo egbee toi lɛ,
8 nyɛkakpiliŋa nyɛtsuii tamɔ bɔ ni afee yɛ mlilawoo be lɛ mli lɛ, tamɔ bɔ ni afee yɛ kaa gbi lɛ nɔ yɛ ŋa lɛ nɔ* lɛ,
9 he ni nyɛtsɛmɛi lɛ tswa mi mpoa ni amɛka mi yɛ lɛ, eyɛ mli moŋ akɛ amɛna minitsumɔi lɛ afii nyɔŋmai ejwɛ sɔŋŋ.
10 Enɛ hewɔ ni mimli wo yinɔ nɛɛ la ni mikɛɛ akɛ: ‘Daa nɛɛ amɛduɔ gbɛ yɛ amɛtsuii amli, ni amɛleko migbɛi lɛ.’
11 No hewɔ lɛ, mikã kitã yɛ mimlifu lɛ mli akɛ: ‘Amɛboteŋ mihejɔɔmɔ lɛ mli.’”
12 Nyɛmimɛi, nyɛkwɛa jogbaŋŋ koni nyɛteŋ mɔ ko akaná tsui fɔŋ ni bɛ hemɔkɛyeli akɛni ekpale kɛje Nyɔŋmɔ hiɛkãalɔ lɛ he lɛ hewɔ;
13 shi moŋ nyɛyaa nɔ nyɛwowoa nyɛhe hewalɛ gbi fɛɛ gbi, gbii abɔ ni atsɛɔ lɛ “Ŋmɛnɛ” lɛ, koni esha lakamɔ lɛ akahã nyɛteŋ mɔ ko kpiliŋ etsui.
14 Ejaakɛ ja wɔhiɛ nɔmimaa ni wɔná kɛjɛ shishijee lɛ mli kpɛŋŋ kɛyashi naagbee dani wɔbaaná Kristo lɛ mli gbɛfaŋnɔ* lɛɛlɛŋ.
15 Taakɛ akɛɛ lɛ, “Ŋmɛnɛ lɛ, kɛji nyɛbo egbee toi lɛ, nyɛkakpiliŋa nyɛtsuii tamɔ bɔ ni afee yɛ mlilawoo be lɛ mli lɛ.”
16 Ni namɛi nu ni kɛ̃lɛ amɛwo emli la lɛ? Anɔkwa, ani jeee mɛi ni je Ejipt yɛ Mose shishi lɛ fɛɛ ni?
17 Kɛfata he lɛ, namɛi Nyɔŋmɔ mli wo amɛ la afii nyɔŋmai ejwɛ lɛ? Ani jeee mɛi ni fee esha ní amɛgboi yɛ ŋa lɛ nɔ* lɛ ni?
18 Ni namɛi akitã ekã akɛ amɛboteŋ ehejɔɔmɔ lɛ mli lɛ? Ani jeee mɛi ni gbo toi lɛ ni?
19 No hewɔ lɛ, wɔnaa akɛ hemɔkɛyeli ni amɛbɛ lɛ hewɔ amɛnyɛɛɛ mli amɛbote lɛ.
Shishigbɛ Niŋmaa
^ Aloo “ninefɔɔ.”
^ Aloo “wɔjajeɔ wɔtsɔɔ.”
^ Ni tsɔɔ akɛ, Yesu.
^ Aloo “wɔ kɛ Kristo lɛ baaná mli gbɛfaŋnɔ.”
