Hebribii 6:1-20
6 No hewɔ lɛ, amrɔ nɛɛ ni wɔfo mli yɛ Kristo lɛ he shishijee tsɔɔmɔ lɛ he lɛ, nyɛhãa wɔyaa hiɛ kɛshɛa dalɛ he, ní wɔkatswa faneshi ekoŋŋ, ni nomɛi ji nitsumɔi ni egboi ahe tsuitsakemɔ kɛ Nyɔŋmɔ mli hemɔkɛyeli,
2 tsɔɔmɔi ni kɔɔ baptisimɔi kɛ niji-kɛ-mɛi-anɔŋmɛlɛmɔ, gbohiiashitee kɛ naanɔ kojomɔ he.
3 Ni wɔbaafee enɛ, kɛ́ Nyɔŋmɔ aaaŋmɛ gbɛ.
4 Ejaakɛ mɛi ni la etso amɛnɔ dã, ní amɛsa amɛnaa ŋwɛi duromɔ keenɔ lɛ, ní amɛná mumɔ krɔŋkrɔŋ lɛ mli gbɛfaŋnɔ,
5 ní amɛsa Nyɔŋmɔ wiemɔ kpakpa lɛ kɛ shihilɛ gbɛjianɔtoo ni baaba lɛ* mli hewalɛi lɛ anaa,
6 shi amɛkpale kɛtee lɛ, anyɛŋ amɛ atsĩɛ ekoŋŋ kɛhã tsuitsakemɔ, ejaakɛ amɛkala Nyɔŋmɔ Bi lɛ amɛkpɛtɛ tso jaŋŋ lɛ he ekoŋŋ amɛhã amɛ diɛŋtsɛ amɛhe, ni amɛshwie ehiɛ shi amɛtsɔɔ mɛi.
7 Ejaakɛ shikpɔŋ lɛ náa Nyɔŋmɔ jɔɔmɔ lɛ eko kɛ́ emi nu ni nɛɔ shwieɔ enɔ kpitiokpitio lɛ, ni ebaa nii ni he yɔɔ sɛɛnamɔ hãa mɛi ahewɔ ni ahuɔ nɔ lɛ.
8 Shi kɛ́ ŋmeii kɛ aŋlɛŋlɛi ekwɛ̃ɔ lɛ, no lɛ akpoɔ lɛ ni ebɛŋkɛɔ loomɔ, ni yɛ naagbee lɛ, ashãa.
9 Shi mɛi ni asumɔɔ, eyɛ mli akɛ wɔmiiwie yɛ nɛkɛ gbɛ nɔ moŋ, shi nyɛgbɛfaŋ lɛ, wɔyɛ nɔmimaa akɛ nyɛyɛ nibii ni fe nakai, nibii ni kɔɔ yiwalaheremɔ he.
10 Ejaakɛ Nyɔŋmɔ jeee mɔ ni ejaaa ni ehiɛ baakpa nyɛnitsumɔ lɛ kɛ suɔmɔ ni nyɛjie lɛ kpo yɛ egbɛ́i lɛ hewɔ lɛ nɔ, ni ji sɔɔmɔ ni nyɛsɔmɔ mɛi krɔŋkrɔŋi lɛ ní nyɛyaa nɔ nyɛsɔmɔɔ amɛ lolo lɛ.
11 Shi wɔmiitao akɛ nyɛteŋ mɔ fɛɛ mɔ aya nɔ ajie nɛkɛ mɔdɛŋbɔɔ nɛɛ nɔŋŋ kpo, koni ená nɔmimaa kwraa yɛ hiɛnɔkamɔ lɛ he kɛyashi naagbee,
12 koni nyɛkafee anihao, shi moŋ nyɛkase mɛi ni tsɔɔ hemɔkɛyeli kɛ tsuishitoo nɔ amɛnáa shiwoi lɛ.
13 Ejaakɛ be ni Nyɔŋmɔ wo Abraham shi lɛ, akɛni ebɛ mɔ ko ní fe lɛ diɛŋtsɛ ni eeetsɔ enɔ ekã kitã hewɔ lɛ, ekɛ lɛ diɛŋtsɛ ehe kã kitã
14 ekɛɛ: “Bɔ fɛɛ bɔ ni fee lɛ, majɔɔ bo, ni bɔ fɛɛ bɔ ni fee lɛ, mahã oshwere.”
15 Ni akɛni Abraham to etsui shi hewɔ lɛ, enine shɛ shiwoo nɛɛ nɔ.
16 Ejaakɛ gbɔmɛi yɔɔ nɛɛ, mɔ ni fe amɛ lɛ, lɛ amɛkɛkãa kitã, ni amɛkitãkamɔ lɛ kɛ naataamɔ fɛɛ naataamɔ baa naagbee, ejaakɛ amɛgbɛfaŋ lɛ, no akɛmaa sane nɔ aduatsɔ yɛ mla naa.
17 Yɛ nɛkɛ gbɛ nɔŋŋ nɔ lɛ, be ni Nyɔŋmɔ kpɛ mli akɛ ebaahã shiwoo lɛ he niyelɔi lɛ ana faŋŋ fe tsutsu lɛ akɛ eyiŋtoo* tsakeee lɛ, ekɛ kitãkamɔ ma nɔ aduatsɔ,*
18 koni wɔ mɛi ni wɔjo foi kɛyaba abo yɛ abobaahe lɛ, wɔtsɔ nibii enyɔ ni tsakeee ní Nyɔŋmɔ nyɛŋ amale yɛ mli lɛ anɔ wɔná hewalɛwoo ni mli wa kɛmɔ hiɛnɔkamɔ ni kã wɔhiɛ lɛ mli kpɛŋŋ.
19 Nɛkɛ hiɛnɔkamɔ ni wɔyɔɔ nɛɛ tamɔ sɛ́kɛ ní tseee ní tsɛkɛɔ shi shiŋŋ kɛhã susuma lɛ,* ni eboteɔ mli kɛyaa muhɔɔ* lɛ mli,
20 he ni hiɛtsɔlɔ ni ji Yesu, mɔ ni etsɔ osɔfonukpa kɛmiiya naanɔ yɛ Melkizedek gbɛ nɔ lɛ bote yɛ wɔhewɔ lɛ.
Shishigbɛ Niŋmaa
^ Aloo “yinɔ ni baaba lɛ.” Kwɛmɔ Wiemɔi Titrii Amligbalamɔ lɛ.
^ Aloo “esuɔmɔnaa nii.”
^ Aloo “ekɛ kitãkamɔ fata he.” Sht. ŋm., “ekɛ kitãkamɔ damɔ mli.”
^ Aloo “kɛhã wɔwala.”
