Hebribii 8:1-13
8 Agbɛnɛ, nii ni wɔwieɔ lɛ mli sane oti nɛ: Osɔfonukpa ni tamɔ nɛkɛ wɔyɔɔ, ni eyata Anunyamtsɛ lɛ maŋtsɛ sɛi lɛ ninejurɔ nɔ yɛ ŋwɛi,
2 eji sɔɔlɔ* yɛ he krɔŋkrɔŋ lɛ kɛ agbɛnɛ hu yɛ anɔkwa buu ní Yehowa* shĩ, shi jeee gbɔmɔ ko shĩ lɛ mli.
3 Ejaakɛ osɔfonukpa fɛɛ osɔfonukpa lɛ, awó lɛ koni eŋɔ nikeenii kɛ afɔlei ehã; no hewɔ lɛ, ehia ni mɔ nɛ hu aná nɔ ko ni ekɛbaahã.
4 Eji eyɛ shikpɔŋ lɛ nɔ kulɛ, eyeŋ osɔfo, ejaakɛ hii ni ŋɔɔ nikeenii lɛ amɛhãa yɛ Mla lɛ naa lɛ yɛ momo.
5 Hii nɛɛ miiŋɔ sɔɔmɔ krɔŋŋ amɛmiihã akɛ ŋwɛi nii lɛ ahenɔ kɛ amɛhɔɔŋ* kɛkɛ; tamɔ bɔ ni be ni Mose miiba ebafee buu lɛ Nyɔŋmɔ wo lɛ kitã lɛ: Ejaakɛ E-kɛɛ: “Kwɛmɔ ni ofee nibii fɛɛ yɛ amɛhenɔi ni akɛtsɔɔ bo yɛ gɔŋ lɛ nɔ lɛ naa.”
6 Shi amrɔ nɛɛ, Yesu ená sɔɔmɔ* ni hi kwraa fe klɛŋklɛŋ nɔ lɛ, ni nakai nɔŋŋ kpaŋmɔ ni eji eteŋdamɔlɔ ní adamɔ shiwoi ni hi fe klɛŋklɛŋ nɔ lɛ nɔ akpaŋ yɛ mla naa lɛ hi fe klɛŋklɛŋ nɔ lɛ.
7 Eji sane ko bɛ nakai klɛŋklɛŋ kpaŋmɔ lɛ he kulɛ, ehe ebahiaŋ ni aná nɔ ni ji enyɔ.
8 Ejaakɛ ena sane ko yɛ mɛi lɛ ahe be ni ekɛɛ akɛ: “‘Naa! Gbii miiba,’ Yehowa* kɛɛ, ‘be mli ni mikɛ Israel we lɛ kɛ Yuda we lɛ baakpaŋ kpaŋmɔ hee ko.
9 Etamɔŋ kpaŋmɔ ni mikɛ amɛtsɛmɛi lɛ kpaŋ yɛ gbi nɔ ni mimɔ amɛnineshi ni minyiɛ amɛhiɛ kɛje Ejipt shikpɔŋ lɛ nɔ lɛ, ejaakɛ amɛyaaa nɔ amɛhiii mikpaŋmɔ lɛ mli, no hewɔ lɛ, mikpa amɛ kwɛmɔ,’ Yehowa* kɛɛ.
10 “‘Ejaakɛ enɛ ji kpaŋmɔ ni mikɛ Israel we lɛ baakpaŋ yɛ nakai gbii lɛ asɛɛ lɛ,’ Yehowa* kɛɛ. ‘Mikɛ mimlai lɛ baawo amɛjwɛŋmɔ mli, ni maŋma mawo amɛtsuii amli. Ni matsɔ amɛ-Nyɔŋmɔ, ni amɛbaatsɔ mimaŋ.
11 “‘Ni amɛteŋ mɔ ko etsɔŋ emaŋnyo kɛ enyɛmi dɔŋŋ, akɛ: “Le Yehowa!”* Ejaakɛ amɛ fɛɛ amɛbaale mi, kɛjɛ amɛteŋ mɔ bibioo fe fɛɛ nɔ kɛyashi mɔ wulu fe fɛɛ nɔ.
12 Ejaakɛ mana amɛ mɔbɔ yɛ amɛnifeemɔi ni ejaaa lɛ agbɛfaŋ, ni mikaiŋ amɛhe eshai lɛ dɔŋŋ.’”
13 Kɛɛmɔ ni ekɛɛ akɛ “kpaŋmɔ hee ko” lɛ tsɔɔ akɛ ehã klɛŋklɛŋ nɔ lɛ etsɔ emomo. Amrɔ nɛɛ, nɔ ni etsɔ emomo ni eegbɔ lɛ, etsɛŋ ni ebaalaaje.
Shishigbɛ Niŋmaa
^ Aloo “tsulɔ ní sɔmɔɔ yɛ mɛi krokomɛi ahilɛkɛhamɔ hewɔ.”
^ Kwɛmɔ Wiemɔi Titrii Amligbalamɔ lɛ.
^ Aloo “amɛhe mfoniri.”
^ Aloo “sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
