Kolosebii 1:1-29
1 Paulo, Kristo Yesu bɔfo yɛ Nyɔŋmɔ suɔmɔ naa, kɛ wɔnyɛmi Timoteo,
2 kɛyahã mɛi krɔŋkrɔŋi kɛ nyɛmimɛi anɔkwafoi ní kɛ Kristo efee ekome yɛ Kolose lɛ:
Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ dɛŋ ahã nyɛ.
3 Be fɛɛ be ní wɔsɔleɔ wɔhãa nyɛ lɛ, wɔdaa Nyɔŋmɔ, wɔ-Nuŋtsɔ Yesu Kristo Tsɛ lɛ shi,
4 ejaakɛ wɔnu hemɔkɛyeli ní nyɛyɔɔ yɛ Kristo Yesu mli, kɛ suɔmɔ ní nyɛyɔɔ kɛhã mɛi krɔŋkrɔŋi lɛ fɛɛ
5 yɛ hiɛnɔkamɔ ni aŋɔto ahã nyɛ yɛ ŋwɛi lɛ hewɔ lɛ he. Be ko ni eho lɛ, nyɛnu hiɛnɔkamɔ nɛɛ he kɛtsɔ sane kpakpa lɛ he anɔkwale sane lɛ
6 ní eba nyɛŋɔɔ lɛ nɔ. Bɔ ni sane kpakpa lɛ miiwo yibii ní eeshwere yɛ je lɛ mli fɛɛ lɛ, nakai nɔŋŋ efeɔ yɛ nyɛ hu nyɛteŋ, kɛjɛ gbi nɔ ní nyɛnu, ní nyɛná Nyɔŋmɔ duromɔ lɛ he nilee krɔŋŋ yɛ anɔkwale mli lɛ.
7 No ji nɔ ni nyɛkase kɛjɛ Epafra, ni ji wɔnaanyo nyɔŋ ni wɔsumɔɔ lɛ, ní eji Kristo lɛ anɔkwa sɔɔlɔ yɛ wɔnajiaŋ lɛ naa lɛ.
8 Ehã wɔle nyɛsuɔmɔ yɛ mumɔŋ gbɛ nɔ* lɛ hu.
9 No hewɔ hu ni kɛjɛ gbi nɔ ni wɔnu lɛ, wɔfɔ̃ko sɔlemɔ kɛ nyɛ hãmɔ, ni wɔbiɔ koni ahã nyɛyimɔ obɔbɔ kɛ esuɔmɔnaa nii lɛ he nilee krɔŋŋ, yɛ hiɛshikamɔ kɛ mumɔŋ niiashishinumɔ fɛɛ mli,
10 koni nyɛnyiɛ bɔ ni sa Yehowa,* bɔ ni afee ni nyɛsa ehiɛ kɛwula shi, be mli ni nyɛyaa nɔ nyɛwoɔ yibii yɛ nitsumɔ kpakpa fɛɛ nitsumɔ kpakpa mli, ní Nyɔŋmɔ he nilee krɔŋŋ ní nyɛyɔɔ lɛ faa lɛ;
11 ní akɛ hewalɛ fɛɛ awaje nyɛ yɛ enyɛmɔ ni yɔɔ nyam lɛ naa koni nyɛnyɛ nyɛkɛ tsuishitoo kɛ miishɛɛ afi shi kɛwula shi,
12 be mli ni nyɛdaa Tsɛ lɛ ní hã nyɛsa mɛi ni náa mɛi krɔŋkrɔŋi lɛ agboshinii lɛ mli gbɛfaŋnɔ yɛ la lɛ mli lɛ shi lɛ.
13 Ejie wɔ kɛjɛ duŋ hewalɛ lɛ mli kɛtee e-Bi ni esumɔɔ lɛ lɛ maŋtsɛyeli lɛ mli,
14 mɔ nɔ ní atsɔ akɛ kpɔmɔnɔ lɛ jie wɔ, no ji akɛ, akɛ wɔhe eshai fa wɔ lɛ.
15 Lɛ ji Nyɔŋmɔ ní anaaa lɛ lɛ henɔ, bɔɔ nii fɛɛ ateŋ kromɔbi lɛ;
16 ejaakɛ lɛ enɔ atsɔ abɔ nibii krokomɛi fɛɛ ní yɔɔ ŋwɛi kɛ nibii ni yɔɔ shikpɔŋ lɛ nɔ lɛ, nibii ní anaa kɛ nibii ní anaaa, maŋtsɛ sɛii jio, nuŋtsɔyelii jio, nɔyelii jio, hegbɛi jio. Lɛ enɔ atsɔ abɔ nibii krokomɛi fɛɛ, ni lɛ abɔ ahã.
17 Agbɛnɛ hu, eyɛ dani nibii krokomɛi fɛɛ yɔɔ, ni lɛ enɔ atsɔ ahã nibii krokomɛi fɛɛ ba shihilɛ mli,
18 ni lɛ ji gbɔmɔtso lɛ, ni ji asafo lɛ, yitso. Lɛ ji shishijee lɛ, kromɔbi kɛjɛ gbohii ateŋ lɛ, koni efee klɛŋklɛŋ mɔ yɛ nibii fɛɛ mli;
19 ejaakɛ esa Nyɔŋmɔ hiɛ akɛ eeehã obɔyimɔ fɛɛ ahi emli,
20 ní etsɔ enɔ ekpãtã ekɛ nibii krokomɛi fɛɛ teŋ, nibii ni yɔɔ shikpɔŋ lɛ nɔ jio, nibii ni yɔɔ ŋwɛi lɛ jio; etsɔ lá ní Kristo fɔse yɛ piŋmɔ tso* lɛ nɔ lɛ nɔ ehã toiŋjɔlɛ nɛɛ ba.
21 Anɔkwa, nyɛ ni tsutsu ko lɛ, nyɛtse nyɛhe ni nyɛji henyɛlɔi akɛni nyɛjwɛŋmɔi yɛ nitsumɔi fɔji anɔ hewɔ lɛ,
22 amrɔ nɛɛ etsɔ nakai mɔ lɛ heloo gbɔmɔtso lɛ gbele lɛ nɔ ekpãtã ekɛ nyɛ teŋ, bɔ ni afee ni eŋɔ nyɛ ehã akɛ mɛi krɔŋkrɔŋi ni kpa ko bɛ amɛhe ni anyɛŋ akɛ sane ko afɔ̃ amɛnɔ yɛ ehiɛ—
23 shi ja nyɛtee nɔ nyɛhi hemɔkɛyeli lɛ mli, ní atswa nyɛ ama efaneshi lɛ nɔ, ní nyɛdamɔ shi shiŋŋ, ní nyɛtsiii nyɛhe kɛjeee nakai sane kpakpa lɛ he hiɛnɔkamɔ lɛ he, sane kpakpa ní nyɛnu ní ashiɛ yɛ bɔɔ nii ní yɔɔ ŋwɛi shishi lɛ fɛɛ ateŋ lɛ. Mi Paulo, mibatsɔ sane kpakpa nɛɛ he sɔɔlɔ.
24 Amrɔ nɛɛ, mimii shɛɔ mihe babaoo yɛ mimanehului ni minaa yɛ nyɛhewɔ lɛ amli, ni miigbe Kristo lɛ amanehului ní eshwɛ yɛ miheloo lɛ mli lɛ naa miihã egbɔmɔtso lɛ, ni ji asafo lɛ.
25 Mibatsɔ asafo nɛɛ sɔɔlɔ yɛ shĩakwɛmɔ nitsumɔ ní jɛ Nyɔŋmɔ ŋɔɔ ní aŋɔhã mi yɛ nyɛhewɔ lɛ naa, akɛ mishiɛ Nyɔŋmɔ wiemɔ lɛ kɛwula shi,
26 teemɔŋ sane krɔŋkrɔŋ ní aŋɔtee kɛjɛ shihilɛi agbɛjianɔtoi ni eho* lɛ kɛ yinɔi ni eho lɛ anɔ beebe lɛ. Shi amrɔ nɛɛ, ajie kpo atsɔɔ emɛi krɔŋkrɔŋi lɛ,
27 mɛi ni esa Nyɔŋmɔ hiɛ akɛ ehã amɛle teemɔŋ sane nɛɛ he anunyam babaoo lɛ yɛ jeŋmaji lɛ ateŋ lɛ. Teemɔŋ sane nɛɛ ji Kristo ní kɛ nyɛ efee ekome lɛ, enunyam lɛ hiɛnɔkamɔ lɛ.
28 Lɛ ji mɔ ni wɔjajeɔ lɛ wɔtsɔɔ lɛ, ni wɔbɔɔ mɔ fɛɛ mɔ kɔkɔ ni wɔtsɔɔ mɔ fɛɛ mɔ nii yɛ hiɛshikamɔ fɛɛ mli, koni wɔnyɛ wɔŋɔ mɔ fɛɛ mɔ wɔhã akɛ mɔ ni eye emuu yɛ ekɛ Kristo ekomefeemɔ lɛ mli.
29 No hewɔ lɛ, miitsu nii waa lɛɛlɛŋ, ni mikɛ ehewalɛ ní tsuɔ nii waa yɛ mimli lɛ miimia mihiɛ.
Shishigbɛ Niŋmaa
^ Sht. ŋm., “yɛ mumɔ mli.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “bei ni eho.” KwɛmɔWiemɔi Titrii Amligbalamɔ lɛ.
