Kolosebii 2:1-23
2 Ejaakɛ miitao ní nyɛyɔse bɔ ni mipeleɔ babaoo mihãa nyɛ, kɛ mɛi ní yɔɔ Laodikea lɛ, kɛ mɛi fɛɛ ní amɛ diɛŋtsɛ amɛnako mi* lɛ hu.
2 Miifee enɛ koni no ashɛje amɛtsuii amii, ní amɛfee ekome jogbaŋŋ yɛ suɔmɔ mli, ní amɛná nii fɛɛ ní anáa kɛjɛɔ niiashishinumɔ ní ama nɔ mi kɛmɔ shi lɛ mli lɛ, bɔ ni afee ni amɛná Nyɔŋmɔ teemɔŋ sane krɔŋkrɔŋ lɛ, ni ji Kristo lɛ, he nilee krɔŋŋ.
3 Aŋɔ hiɛshikamɔ kɛ nilee jwetrii lɛ fɛɛ atee jogbaŋŋ yɛ emli.
4 Miiwie enɛ koni mɔ ko kɛ saji ní hãa mɔ yiŋ tsɔɔ akalaka nyɛ.
5 Mibɛ nyɛŋɔɔ yɛ gbɔmɔtso mli moŋ, shi mikɛ nyɛ yɛ yɛ mumɔ mli, ni mináa miishɛɛ jogbaŋŋ kɛ́ mina bɔ ni nyɛfeɔ nyɛnii yɛ gbɛjianɔtoo kpakpa naa, kɛ bɔ ni hemɔkɛyeli ní nyɛyɔɔ yɛ Kristo mli lɛ yɔɔ shiŋŋ lɛ.
6 No hewɔ lɛ, bɔ ni nyɛkpɛlɛ Kristo Yesu ni ji Nuŋtsɔ lɛ nɔ lɛ, nakai nɔŋŋ nyɛyaa nɔ nyɛ kɛ lɛ afea ekome kɛnyiɛa,
7 ní nyɛshishifã amɔmɔ shi, ní atswa nyɛ amamɔ enɔ ní nyɛmamɔ shi shiŋŋ yɛ hemɔkɛyeli lɛ mli, tamɔ bɔ nɔŋŋ ni atsɔɔ nyɛ lɛ, ní nyɛteke nɔ kɛ shidaa.
8 Nyɛkwɛa jogbaŋŋ ní mɔ ko kɛ jeŋ hiɛshikamɔ kɛ yaka lakamɔ akaŋɔ nyɛ nom,* yɛ gbɔmɛi akusum naa, yɛ je lɛ shishijee nibii anaa, ní jeee yɛ Kristo naa;
9 ejaakɛ lɛ emli Nyɔŋmɔ subaŋ lɛ obɔyimɔ lɛ fɛɛ hiɔ yɛ gbɔmɔtso su mli.
10 No hewɔ lɛ, nyɛtsɔ lɛ mɔ ní eji nɔyelii kɛ hegbɛi fɛɛ yitso lɛ nɔ nyɛná obɔyimɔ.
11 Wekukpaa ni kã nyɛ kɛ lɛ teŋ lɛ hewɔ lɛ, afolɔ nyɛ ketia hu kɛ ketiafoo ko ní jeee niji akɛfolɔ, no ji heloo lɛ gbɔmɔtso lɛ ní ajieɔ kɛjeɔ jɛmɛ lɛ, no ji Kristo lɛ ketiafoo lɛ.
12 Ejaakɛ afu nyɛ kɛ lɛ yɛ ebaptisimɔ lɛ mli, ni wekukpaa ni kã nyɛ kɛ lɛ teŋ lɛ hewɔ lɛ, atee nyɛ hu shi afata ehe, yɛ Nyɔŋmɔ, mɔ ni tee lɛ shi kɛjɛ gbohii ateŋ lɛ hewalɛ nitsumɔ lɛ mli hemɔkɛyeli ni nyɛyɔɔ lɛ hewɔ.
13 Kɛfata he lɛ, eyɛ mli akɛ no mli lɛ nyɛgboi yɛ nyɛtɔmɔi lɛ amli, kɛ agbɛnɛ hu, yɛ nyɛheloo lɛ ní afoko lɛ ketia lɛ mli moŋ, shi Nyɔŋmɔ hã nyɛ kɛ lɛ fɛɛ hiɛ kamɔ. Ejɛ mlihilɛ mli ekɛ wɔtɔmɔi lɛ fɛɛ fa wɔ
14 ni egbe* wolo ni akɛ nine ŋma ní akpɔi ni teɔ shi woɔ wɔ yɔɔ mli lɛ mli niŋmai lɛ. Ekala wolo nɛɛ ekpɛtɛ piŋmɔ tso* lɛ, ni ekɛjie kɛje jɛmɛ.
15 Ni etsɔ no nɔ* ekpɔlɔ nɔyelii kɛ hegbɛi lɛ ahe nii kwraa, ni ekɛ amɛ etsɔɔ faŋŋ akɛ eye amɛnɔ kunim, ni enyiɛ amɛhiɛ yɛ kunimyeli akoŋshimɔ mli.
16 No hewɔ lɛ, nyɛkahãa mɔ ko kojoa nyɛ yɛ nɔ ni nyɛyeɔ loo nɔ ni nyɛnuɔ loo gbi jurɔ ko loo nyɔɔŋ hee loo hejɔɔmɔ gbi ko yeli he.
17 Nakai nibii lɛ ji nibii ni baaba lɛ ahɔɔŋ* kɛkɛ, shi nii* lɛ diɛŋtsɛ ji Kristo lɛ.
18 Nyɛkahãa mɔ ko ní náa amale heshibaa kɛ ŋwɛibɔfoi ajamɔ he miishɛɛ ní “kɔɔ eshidaamɔ yɛ”* nibii ni ena lɛ ahe lɛ, miishɔ̃a juromɔnɔ lɛ yɛ nyɛdɛŋ. Yɛ anɔkwale mli lɛ, eheloo jwɛŋmɔ lɛ hãa ewóɔ ehe nɔ yakatswaa,
19 ni ehiɛɛɛ yitso lɛ mli kpɛŋŋ, ehiɛɛɛ mɔ ni hãa gbɔmɔtso muu lɛ fɛɛ náa nii ni he hiaa lɛ ni etsaratsaraa ehe jogbaŋŋ kɛtsɔ etalɔi kɛ talɔi-amli-loi anɔ, ni ehãa edaa hu kɛ dalɛ ni jɛ Nyɔŋmɔ ŋɔɔ lɛ mli kpɛŋŋ.
20 Kɛ́ nyɛ kɛ Kristo fɛɛ gboi yɛ je lɛ mli shishijee nibii lɛ agbɛfaŋ lɛ, mɛni hewɔ nyɛhiɔ shi oookɛɛ nyɛfata je lɛ he lolo, ni nyɛyeɔ akpɔi nɛɛ hu anɔ, akɛ:
21 “Nyɛkamɔa mli, ni nyɛkasaa nyɛnaa, ni asaŋ nyɛkataa he” lɛ?
22 Ejaakɛ nibii nɛɛ fɛɛ hiɛ kpãtãa yɛ amɛhe nitsumɔ mli, ni amɛji akpɔi ni awo yɛ gbɔmɛi akitãi kɛ amɛtsɔɔmɔi anaa.
23 Eyɛ mli akɛ mɔ diɛŋtsɛ suɔmɔ naa jamɔ kɛ amale heshibaa, ni ji gbɔmɔtso lɛ yiwaa lɛ, hãa nakai nibii lɛ feɔ tamɔ nɔ ni amɛji hiɛshikamɔ nibii yɛ kponɔgbɛ moŋ, shi yɛ nibii ni heloo lɛ shweɔ ní awuɔ ashiɔ lɛ agbɛfaŋ lɛ, amɛhe bɛ sɛɛnamɔ ko kwraa.
Shishigbɛ Niŋmaa
^ Sht. ŋm., “mɛi ní amɛnako mihiɛ yɛ heloo lɛ mli.”
^ Aloo “akaŋɔ nyɛ akɛ emilɛloo.”
^ Aloo “etsumɔ.”
^ Kwɛmɔ Wiemɔi Titrii Amligbalamɔ lɛ.
^ Aloo eeenyɛ efee akɛ, “enɔ.”
^ Aloo “ahe mfoniri.”
^ Sht. ŋm., “gbɔmɔtso.”
^ Atsɛ yisɛɛ kɛjɛ wɔŋjalɔi ateemɔŋ kusum nifeemɔi (ní akɛkpɛlɛɔ mɔ ko nɔ awoɔ nɔ ko mli lɛ) amli.
