Luka 16:1-31
16 Kɛkɛ ni ekɛɛ kaselɔi lɛ hu akɛ: “Nuu niiatsɛ ko hi shi, ni eyɛ shĩa nɔkwɛlɔ, ni awie ehe sane atsɔɔ lɛ akɛ eekpãtã enibii ahiɛ.
2 No hewɔ lɛ, etsɛ lɛ ni ekɛɛ, ‘Mɛni ji nɔ ni minuɔ yɛ ohe nɛɛ? Okɛ oshĩa nɔkwɛmɔ nitsumɔ lɛ he akɔntaabuu lɛ aba, ejaakɛ onyɛŋ okwɛ shĩa lɛ nɔ dɔŋŋ.’
3 Ni shĩa nɔkwɛlɔ lɛ kɛ ehe wie akɛ, ‘Mɛni mafee, akɛni minuŋtsɔ miihe shĩa nɔkwɛmɔ nitsumɔ lɛ yɛ midɛŋ nɛɛ? Mihe waaa bɔ ni manyɛ shi matsa, ni eefee mi hiɛgbele akɛ maba nii.
4 Ɛhɛ̃ɛ! Mile nɔ ni mafee, koni kɛ́ ahe shĩa nɔkwɛmɔ nitsumɔ lɛ yɛ midɛŋ lɛ, mɛi ahere mi yɛ amɛshĩai.’
5 Ni etsɛ mɛi ni hiɛ enuŋtsɔ lɛ nyɔji lɛ kɛba eŋɔɔ ekomekome, ni ekɛɛ klɛŋklɛŋ mɔ lɛ akɛ, ‘Nyɔmɔ enyiɛ ohiɛ minuŋtsɔ lɛ?’
6 Ehere nɔ akɛ, ‘Oliv mu ni falɛ shɛɔ susumɔnii* oha.’ Ekɛɛ lɛ akɛ, ‘Hemɔ ogbeekpamɔ wolo lɛ, ta shi ni oŋma nyɔŋmai enumɔ mramra.’
7 No sɛɛ lɛ, ekɛɛ mɔ kroko akɛ, ‘Bo hu, nyɔmɔ enyiɛ ohiɛ?’ Ekɛɛ, ‘Ŋmaa ni falɛ shɛɔ susumɔnii agboi oha.’* Ekɛɛ lɛ akɛ, ‘Hemɔ ogbeekpamɔ wolo lɛ ni oŋma nyɔŋmai kpaanyɔ.’
8 Eyɛ mli akɛ shĩa nɔkwɛlɔ lɛ efeee nɔ ni ja moŋ, shi akɛni ekɛ hiɛshikamɔ ni sa tsu nii* hewɔ lɛ, enuŋtsɔ lɛ jie eyi; ejaakɛ shihilɛ gbɛjianɔtoo nɛɛ* bii lɛ kɛ hiɛshikamɔ ni sa tsuɔ nii yɛ bɔ ni amɛkɛ amɛ diɛŋtsɛ amɛyinɔbii lɛ yeɔ hãa lɛ mli fe la bii lɛ.
9 “Agbɛnɛ hu, miikɛɛ nyɛ akɛ: Nyɛkɛ ninámɔ ni ejaaa lɛ atsua nii kɛfea nanemɛi nyɛhãa nyɛhe koni kɛ́ etã lɛ, nanemɛi nɛɛ ahere nyɛ kɛya naanɔ shihilɛhei lɛ.
10 Mɔ ni yeɔ nɔ ko bibioo kwraa mli anɔkwa lɛ yeɔ babaoo hu mli anɔkwa, ni mɔ ni yeee anɔkwa yɛ nɔ ko bibioo kwraa mli lɛ, eyeee anɔkwa yɛ babaoo hu mli.
11 No hewɔ lɛ, kɛ́ nyɛhãko ana akɛ anɔkwafoi ji nyɛ yɛ ninámɔ ni ejaaa lɛ gbɛfaŋ lɛ, namɔ baatu nɔ ni ji anɔkwa ninámɔ lɛ ewo nyɛdɛŋ?
12 Ni kɛ́ nyɛhãko ana akɛ anɔkwafoi ji nyɛ yɛ mɔ kroko nii gbɛfaŋ lɛ, namɔ baahã nyɛ nyɛ diɛŋtsɛ nyɛnɔ lɛ?
13 Tsulɔ ko nyɛŋ atsɔ nyɔŋ ehã nuŋtsɔmɛi enyɔ, ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.”
14 No mli lɛ, Farisifoi ni ji shikasuɔlɔi lɛ miibo nibii nɛɛ fɛɛ toi, ni amɛbɔi ehe fɛoyeli.
15 No hewɔ lɛ, ekɛɛ amɛ akɛ: “Nyɛji mɛi ni buɔ nyɛhe jalɔi yɛ gbɔmɛi ahiɛ, shi Nyɔŋmɔ le nyɛtsuiiaŋ. Ejaakɛ nɔ ni ji gojoo yɛ gbɔmɛi ahiɛ lɛ, nihiinii ni yɛ Nyɔŋmɔ hiɛ.
16 “Mla lɛ kɛ Gbalɔi lɛ* yɛ kɛbashi Yohane nɔ. Kɛjɛ no nɔ kɛbaa nɛɛ, aajaje Nyɔŋmɔ Maŋtsɛyeli lɛ akɛ sane kpakpa, ni gbɔmɛi srɔtoi fɛɛ miimia amɛhiɛ koni amɛshɛ he.
17 Anɔkwa, ewaaa hãaa ŋwɛi kɛ shikpɔŋ akɛ amɛbaaho amɛya fe nɔ ni Mla lɛ mli niŋmaa okadi ko he kuli kome baaho ni ebaŋ mli.
18 “Mɔ fɛɛ mɔ ni shwieɔ eŋa* ni ekɛ mɔ kroko boteɔ gbalashihilɛ mli lɛ efite gbãla,* ni mɔ ni kɛ yoo ni ewu eshwie lɛ boteɔ gbalashihilɛ mli lɛ efite gbãla.
19 “Nuu niiatsɛ ko hi shi, ni ewoɔ atade afaseo kɛ klala, ni eshwɛɔ ehiɛ waa daa gbi, ni ehiɔ shi ogbɔjɔ mli.
20 Shi akɛ nibalɔ ko ni he eyi obɔ kɛ faji ni atsɛɔ lɛ Lazaro lɛ fɔɔ egbó lɛ naa ŋmɛɛ
21 ni eshweɔ ni ená nibii ni shwieɔ shi kɛjɛɔ nuu niiatsɛ lɛ okpɔlɔ lɛ nɔ lɛ eko eye ni etɔ. Hɛɛ, gbei tete baa amɛbalɛmɔɔ efaji lɛ anɔ.
22 Ni be ni be shwie mli lɛ, nibalɔ lɛ gbo, ni ŋwɛibɔfoi bawó lɛ kɛtee Abraham masɛi.*
“Nuu niiatsɛ lɛ hu gbo ni afu lɛ.
23 Ni be ni eyɔɔ Gbonyo Bu* lɛ mli ni epiŋɔ lɛ, ehole ehiŋmɛii anɔ ni ena Abraham yɛ shɔŋŋ kɛ Lazaro ni kã emasɛi.*
24 No hewɔ lɛ, ebo ekɛɛ, ‘Ataa Abraham, naa mi mɔbɔ, ni otsu Lazaro ni ekɛ ewao naa atsɔ nu mli ni ekɛbajɔɔ mililɛi he, ejaakɛ mihe miijara mi yɛ la ni naa wa nɛɛ mli.’
25 Shi Abraham kɛɛ, ‘Bi, kaimɔ akɛ be ni oyɔɔ wala mli lɛ, oye nibii kpakpai babaoo amli ŋɔɔmɔ, shi Lazaro lɛ, ená nibii gbohii. Shi agbɛnɛ aashɛje emii yɛ biɛ, shi bo lɛ, oyɛ hejaramɔ mli.
26 Ni enɛɛmɛi fɛɛ sɛɛ lɛ, akɛ jɔɔ voo ko efo wɔ kɛ nyɛ teŋ, koni mɛi ni miitao amɛjɛ biɛ amɛba nyɛŋɔɔ lɛ akanyɛ, asaŋ koni mɛi akanyɛ amɛjɛ jɛmɛ kɛba wɔŋɔɔ.’
27 Ni ekɛɛ, ‘Kɛ́ nakai ni lɛ, miikpa bo fai, ataa, ni otsu lɛ mitsɛ we lɛ,
28 ejaakɛ miyɛ nyɛmimɛi hii enumɔ, bɔ ni afee ni eyaye amɛ odase fitsofitso, koni amɛ hu amɛkaba piŋmɔhe nɛɛ.’
29 Shi Abraham kɛɛ, ‘Amɛyɛ Mose kɛ Gbalɔi lɛ; hã amɛbo nomɛi atoi.’
30 Ni ekɛɛ, ‘Dabi, ataa Abraham, anɔkwa kɛ́ mɔ ko jɛ gbohii lɛ ateŋ etee amɛŋɔɔ lɛ, amɛbaatsake amɛtsui.’
31 Shi ekɛɛ lɛ akɛ, ‘Kɛ́ amɛbooo Mose kɛ Gbalɔi lɛ atoi lɛ, no lɛ kɛ́ mɔ ko te shi kɛjɛ gbohii ateŋ po lɛ, amɛyiŋ tsɔŋ.’”
Shishigbɛ Niŋmaa
^ Aloo “bati susumɔnii.” Bati kome feɔ L 22 (gal 5.81).
^ Aloo “kori susumɔnii oha.” Kori kome feɔ L 220 (aaafee kg 170).
^ Aloo “etsɔɔ akɛ hiɛtɛlɔ ji lɛ.”
^ Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
^ Hela wiemɔ ni akɛtsu nii lɛ tsɔɔ gbalatsemɔ yɛ mla naa.
^ Sht. ŋm., “kɛtee Abraham miinaa.”
^ Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Sht. ŋm., “ni kã emiinaa.”
