Luka 20:1-47
20 Gbii lɛ eko nɔ, be ni eetsɔɔ mɛi lɛ nii yɛ sɔlemɔwe lɛ, ni eejaje sane kpakpa lɛ, osɔfoi tsiifoi lɛ kɛ woloŋmalɔi lɛ kɛ onukpai lɛ ba eŋɔɔ
2 ni amɛkɛɛ lɛ akɛ: “Kɛɛmɔ wɔ, mɛɛ hegbɛ okɛfeɔ nibii nɛɛ? Aloo namɔ hã bo nɛkɛ hegbɛ nɛɛ?”
3 Ehere nɔ ekɛɛ amɛ akɛ: “Mi hu mabi nyɛ sane ko ni nyɛkɛɛ mi:
4 Yohane baptisimɔ lɛ, ŋwɛi ejɛ aloo gbɔmɛi adɛŋ ejɛ?”
5 Ni amɛmu saji anaa yɛ amɛteŋ amɛkɛɛ: “Kɛ́ wɔkɛɛ, ‘Ejɛ ŋwɛi’ lɛ, ebaakɛɛ akɛ, ‘Mɛni hewɔ mɔ ni nyɛheee lɛ nyɛyeee lɛ?’
6 Shi kɛ́ wɔkɛɛ, ‘Ejɛ gbɔmɛi adɛŋ’ lɛ, mɛi lɛ fɛɛ baatswia wɔ tɛi, ejaakɛ amɛyiŋ etsɔ akɛ gbalɔ ji Yohane.”
7 No hewɔ lɛ, amɛhã lɛ hetoo akɛ amɛleee he ni ejɛ.
8 Yesu kɛɛ amɛ akɛ: “Belɛ, mi hu mikɛɛɛ nyɛ nɔ hegbɛ ni mikɛfeɔ nibii nɛɛ.”
9 Kɛkɛ ni ebɔi mɛi lɛ nɔkwɛmɔnɔ* nɛɛ gbaa akɛ: “Nuu ko fee wein ŋmɔ ni ekɛhã okwaafoi apaayeli, ni efã gbɛ eyaye be kplaŋŋ.
10 Be ni shɛ weinkpamɔ be lɛ, etsu nyɔŋ ko kɛtee okwaafoi lɛ aŋɔɔ koni amɛhã lɛ wein ŋmɔ lɛ mli yibii lɛ eko. Shi okwaafoi lɛ yi lɛ, ni amɛshwie lɛ kɛ edɛ̃ folo.
11 Shi esaa etsu nyɔŋ kroko. Lɛ hu amɛyi lɛ, amɛshwie ehiɛ shi,* ni amɛshwie lɛ kɛ edɛ̃ folo.
12 Asaŋ, esaa etsu mɔ ni ji etɛ nɔ; mɔ nɛ hu amɛpila lɛ ni amɛtsirɛ eyisɛɛ kɛje kpo.
13 No hewɔ lɛ, wein ŋmɔtsɛ lɛ kɛɛ akɛ, ‘Mɛni esa akɛ mafee? Matsu mibinuu, mɔ ni misumɔɔ lɛ lɛ. Ekolɛ lɛ lɛ, amɛbaabu lɛ.’
14 Be ni okwaafoi lɛ ahiŋmɛi gba enɔ lɛ, amɛsusu nii ahe yɛ amɛteŋ amɛkɛɛ, ‘Niyelɔ lɛ nɛ. Nyɛhãa wɔgbea lɛ koni gboshinii lɛ atsɔ wɔnɔ.’
15 No hewɔ lɛ, amɛtsirɛ eyisɛɛ kɛje wein ŋmɔ lɛ mli, ni amɛyagbe lɛ. Belɛ, mɛni wein ŋmɔtsɛ lɛ baafee amɛ?
16 Ebaaba ebagbe okwaafoi nɛɛ, ni ekɛ wein ŋmɔ lɛ baahã mɛi krokomɛi.”
Be ni amɛnu enɛ lɛ, amɛkɛɛ: “Ekaba lɛ nakai kɔkɔɔkɔ!”
17 Shi ekwɛ amɛhiɛ tɛ̃ɛ ni ekɛɛ: “Belɛ, mɛni ji nɔ ni aŋma nɛɛ shishi: ‘Tɛ lɛ ni tsũtswalɔi lɛ kpoo lɛ, no nɔŋŋ ebatsɔ koŋtɛ titri* lɛ’?
18 Mɔ fɛɛ mɔ ni gbeɔ nakai tɛ lɛ nɔ lɛ, emli baatserɛ. Shi mɔ fɛɛ mɔ ni tɛ lɛ gbeɔ enɔ lɛ, ebaagbɛlɛ lɛ mɔnyɔmɔnyɔ.”
19 Kɛkɛ ni woloŋmalɔi lɛ kɛ osɔfoi tsiifoi lɛ tao akɛ amɛnine ashɛ enɔ yɛ nakai ŋmɛlɛtswaa lɛ nɔ nɔŋŋ, shi amɛmiishe mɛi lɛ gbeyei, ejaakɛ amɛyɔse akɛ amɛ hewɔ egba nɔkwɛmɔnɔ* nɛɛ.
20 Ni be ni amɛkwɛ lɛ gãa sɛɛ lɛ, amɛbɔ hii apaa yɛ teemɔŋ ni amɛtsu amɛ ni amɛyakwa amɛfee amɛnii tamɔ jalɔi, bɔ ni afee ni amɛtsɔ nɔ ni ebaawie lɛ nɔ amɛdũ lɛ koni amɛŋɔ lɛ amɛwo nɔyeli lɛ kɛ amralo lɛ hegbɛ lɛ dɛŋ.
21 Ni amɛbi lɛ akɛ: “Tsɔɔlɔ, wɔle akɛ owieɔ ni otsɔɔ nii ni ja, ni okwɛɛɛ hiɛiaŋ, shi moŋ otsɔɔ Nyɔŋmɔ gbɛ lɛ yɛ anɔkwale mli:
22 Ani mla ŋmɛɔ gbɛ* akɛ wɔwo yi too wɔhã Kaisare aloo mla eŋmɛɛɛ gbɛ?”
23 Shi ekpa amɛŋaatsɔɔ lɛ shi ni ekɛɛ amɛ akɛ:
24 “Nyɛkɛ denario abatsɔa mi. Namɔ mfoniri kɛ niŋmaa yɔɔ nɔ lɛ?” Amɛkɛɛ akɛ: “Kaisare nɔ ni.”
25 Ekɛɛ amɛ akɛ: “Belɛ, bɔ fɛɛ bɔ ni fee lɛ, nyɛŋɔa Kaisare nibii nyɛhãa Kaisare, shi nyɛkɛ Nyɔŋmɔ nibii ahãa Nyɔŋmɔ.”
26 Anɔkwa, amɛnyɛɛɛ amɛtsɔ ewiemɔ nɔ amɛdũ lɛ yɛ mɛi lɛ ahiɛ, shi ehetoo lɛ hã amɛnaa kpɛ amɛhe, ni amɛfee diŋŋ.
27 Shi Sadukifoi lɛ ateŋ mɛi komɛi, mɛi ni kɛɔ akɛ gbohiiashitee ko bɛ lɛ, ba eŋɔɔ ni amɛbabi lɛ akɛ:
28 “Tsɔɔlɔ, Mose ŋma hã wɔ akɛ, ‘Kɛ́ nuu ko nyɛmi nuu gbo eshi eŋa, shi eshiii bi ko lɛ, esa akɛ enyɛmi nuu lɛ aŋɔ eŋa lɛ ni ekɛ lɛ awo shwiei ehã enyɛmi nuu lɛ.’
29 Agbɛnɛ, nyɛmimɛi hii kpawo hi shi. Klɛŋklɛŋ mɔ lɛ kpee yoo, shi egbo ni eshiii bi ko.
30 No hewɔ lɛ, mɔ ni ji enyɔ nɔ
31 kɛ mɔ ni ji etɛ nɔ lɛ kɛ yoo lɛ bote gbalashihilɛ mli. Nakai nɔŋŋ mɛi kpawo lɛ fɛɛ po fee; amɛ fɛɛ amɛgboi ni amɛshiii bii yɛ amɛsɛɛ.
32 Naagbee lɛ, yoo lɛ hu gbo.
33 No hewɔ lɛ, yɛ gbohiiashitee lɛ mli lɛ, namɔ ŋa yoo lɛ baatsɔ? Ejaakɛ mɛi kpawo lɛ fɛɛ kɛ yoo lɛ bote gbalashihilɛ mli.”
34 Yesu kɛɛ amɛ akɛ: “Shihilɛ gbɛjianɔtoo nɛɛ* bii lɛ boteɔ gbalashihilɛ mli ni akɛ amɛ hãa gbãla,
35 shi mɛi ni abu amɛ akɛ amɛji mɛi ni sa akɛ amɛnine shɛɔ nakai shihilɛ gbɛjianɔtoo lɛ* kɛ shitee kɛmiijɛ gbohii ateŋ lɛ nɔ lɛ boteŋ gbalashihilɛ mli, asaŋ akɛ amɛ hãŋ gbãla.
36 Anɔkwa, amɛnyɛŋ amɛgboi dɔŋŋ, ejaakɛ amɛbaatamɔ ŋwɛibɔfoi lɛ, ni akɛni amɛji gbohiiashitee lɛ bii hewɔ lɛ, amɛji Nyɔŋmɔ bii.
37 Shi akɛ abaatee gbohii ashi lɛ, Mose po hã ana, yɛ ŋmei tso lɛ he sane lɛ mli, be ni etsɛ Yehowa* akɛ ‘Abraham Nyɔŋmɔ, kɛ Isak Nyɔŋmɔ, kɛ Yakob Nyɔŋmɔ lɛ.’
38 Jeee gbohii a-Nyɔŋmɔ ni, shi moŋ, hiɛkãalɔi a-Nyɔŋmɔ ni, ejaakɛ yɛ ehiɛ lɛ, amɛ fɛɛ amɛhiɛ kamɔ.”
39 Ni woloŋmalɔi lɛ ateŋ mɛi komɛi here nɔ amɛkɛɛ: “Tsɔɔlɔ, owie jogbaŋŋ.”
40 Ni amɛnáaa ekãa kɛbi lɛ sane ko dɔŋŋ.
41 Ni lɛ hu ebi amɛ akɛ: “Te feɔ tɛŋŋ ni akɛɔ akɛ Kristo lɛ, David bi ni lɛ?
42 Ejaakɛ David diɛŋtsɛ kɛɛ yɛ Lalai awolo lɛ mli akɛ, ‘Yehowa* kɛɛ mi-Nuŋtsɔ lɛ akɛ: “Ta mininejurɔ nɔ
43 kɛyashi be ni maŋɔ ohenyɛlɔi lɛ mafee onajiashi maaŋoo.”’
44 No hewɔ lɛ, David tsɛɔ lɛ Nuŋtsɔ; belɛ, te feɔ tɛŋŋ ni efeɔ ebi lɛ?”
45 Ni be ni mɛi lɛ fɛɛ miibo toi lɛ, ekɛɛ ekaselɔi lɛ akɛ:
46 “Nyɛkwɛa jogbaŋŋ yɛ woloŋmalɔi lɛ ahe, mɛi ni sumɔɔ akɛ amɛwo atadei yuuyui kɛnyiɛ, ni amɛsumɔɔ jaji anɔ ŋamɔi kɛ hiɛgbɛ sɛii* ni yɔɔ kpeehei lɛ anɔ taramɔ kɛ hiɛnaanɔbii agbɛhei ataramɔ yɛ gbɛkɛ okpɔlɔŋmɛi ashishi lɛ,
47 ni amɛmiɔ yei okulafoi ashĩai,* ni bɔ ni afee ni mɛi ana amɛ lɛ,* amɛsɔleɔ sɔlemɔi kakadaji lɛ. Mɛnɛɛmɛi baaná fɔbuu kojomɔ ni naa wa.”*
Shishigbɛ Niŋmaa
^ Aloo “abɛbua.”
^ Aloo “amɛgbe ehe guɔ.”
^ Sht. ŋm., “koŋ lɛ yitso.”
^ Aloo “abɛbua.”
^ Aloo “eja.”
^ Aloo “Yinɔ nɛɛ.” Wiemɔi Titrii Amligbalamɔ lɛ.
^ Aloo “yinɔ lɛ.” Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “sɛii ni hi fe fɛɛ.”
^ Aloo “anibii.”
^ Aloo “amɛkwaa.”
^ Aloo “ni tsii waa.”
