Luka 4:1-44
4 Kɛkɛ ni Yesu ni mumɔ krɔŋkrɔŋ eyi lɛ obɔ lɛ ku esɛɛ kɛjɛ Yordan he, ni mumɔ lɛ kpala lɛ kɛjɛ he kome kɛtee he kroko yɛ ŋa lɛ nɔ*
2 gbii nyɔŋmai ejwɛ, ni Abonsam ka lɛ. Ni nakai gbii lɛ amli lɛ, eyeee nɔ ko nɔ ko, no hewɔ lɛ, be ni gbii lɛ ba naagbee lɛ, hɔmɔ ye lɛ.
3 Ni Abonsam kɛɛ lɛ akɛ: “Kɛ́ Nyɔŋmɔ bi ji bo lɛ, kɛɛmɔ tɛ nɛɛ koni etsɔ aboloo.”*
4 Shi Yesu hã lɛ hetoo akɛ: “Aŋma akɛ, ‘Esaaa akɛ gbɔmɔ hiɔ wala mli yɛ aboloo pɛ naa.’”
5 No hewɔ lɛ, ekɛ lɛ kwɔ kɛtee gɔŋ ko nɔ, ni yɛ be kukuoo mli lɛ, ekɛ shikpɔŋ lɛ nɔ maŋtsɛyelii lɛ fɛɛ tsɔɔ lɛ.
6 Ni Abonsam kɛɛ lɛ akɛ: “Maŋɔ hegbɛ nɛɛ fɛɛ kɛ amɛnunyam lɛ mahã bo ejaakɛ akɛhã mi, ni mɔ fɛɛ mɔ ni misumɔɔ ni mikɛhã lɛ, lɛ miŋɔhãa.
7 No hewɔ lɛ, bo lɛ, kɛ́ ojá mi shi kome pɛ yɛ mihiɛ lɛ, fɛɛ baatsɔ onɔ.”
8 Ni Yesu here nɔ ekɛɛ lɛ akɛ: “Aŋma akɛ, ‘Yehowa* o-Nyɔŋmɔ lɛ esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.’”
9 Kɛkɛ ni ekpala lɛ kɛtee Yerusalem, ni ekɛ lɛ yadamɔ sɔlemɔwe lɛ yiteŋ afabaŋ* lɛ nɔ, ni ekɛɛ lɛ akɛ: “Kɛ́ Nyɔŋmɔ bi ji bo lɛ, jɛɛ biɛ otu kɛya shikpɔŋ,
10 ejaakɛ aŋma akɛ, ‘Ebaafã ebɔfoi lɛ yɛ ohewɔ, koni amɛbaa oyi,’
11 ni, ‘Amɛbaahiɛ bo yɛ amɛdɛŋ koni okaŋɔ onane oshi tɛ ko.’”
12 Ni Yesu hã lɛ hetoo akɛ: “Akɛɛ akɛ, ‘Esaaa akɛ okaa Yehowa* o-Nyɔŋmɔ lɛ.’”
13 No hewɔ lɛ, be ni Abonsam gbe kaa* lɛ fɛɛ naa lɛ, eshi lɛ kɛyashi be kroko ni sa.
14 Agbɛnɛ, Yesu ku esɛɛ yɛ mumɔ lɛ hewalɛ lɛ mli kɛtee Galilea. Ni ehe amaniɛbɔi kpakpai gbɛ shwã nakai kpokpaa lɛ nɔ fɛɛ.
15 Kɛfata he lɛ, ebɔi nitsɔɔmɔ yɛ amɛkpeehei* lɛ ni mɛi fɛɛ wo ehiɛ nyam.
16 Kɛkɛ ni etee Nazaret, he ni atsɔse lɛ yɛ lɛ, ni taakɛ efɔɔ feemɔ yɛ Hejɔɔmɔ Gbi lɛ nɔ lɛ, ebote kpeehe lɛ ni ete shi koni ekane nii.
17 No hewɔ lɛ, akɛ gbalɔ Yesaia wolokpo* lɛ hã lɛ, ni egbele wolokpo lɛ mli ni ena he ni aŋma yɛ akɛ:
18 “Yehowa* mumɔ lɛ yɛ minɔ ejaakɛ efɔ mi mu koni mijaje sane kpakpa mitsɔɔ ohiafoi. Etsu mi koni mijaje mitsɔɔ nomii akɛ amɛbaaye amɛhe, kɛ shwilafoi akɛ amɛbaana nii, ní mihã mɛi ni ekumɔ lɛ aye amɛhe,
19 koni mishiɛ afi ni sa Yehowa* hiɛ” lɛ.
20 Kɛkɛ ni ekota wolokpo lɛ, eku sɛɛ ekɛhã sɔɔlɔ lɛ, ni eho eta shi; ni mɛi fɛɛ ni yɔɔ kpeehe lɛ kɛ amɛhiŋmɛi kwɛ lɛ diŋŋ.
21 Kɛkɛ ni ebɔi amɛ kɛɛmɔ akɛ: “Ŋmɛnɛ lɛ, ŋmalɛ nɛɛ ni nyɛnu bianɛ lɛ eba mli.”
22 Ni amɛ fɛɛ amɛye ehe odase kpakpa ni amɛnaa kpɛ amɛhe yɛ wiemɔi ni ŋɔɔ ni jɛɔ edaaŋ lɛ ahewɔ, ni amɛkɛɛkɛɛ akɛ: “Yosef bi nɛ, aloo jeee nakai?”
23 Kɛkɛ ni ekɛɛ amɛ akɛ: “Ŋwanejee ko bɛ he akɛ nyɛbaabu mi abɛ nɛɛ: ‘Helatsalɔ, tsa bo diɛŋtsɛ ohe. Feemɔ nibii ni wɔnu akɛ ofee yɛ Kapernaum lɛ yɛ biɛ ni ji bo diɛŋtsɛ omaŋ lɛ hu.’”
24 No hewɔ lɛ, ekɛɛ: “Lɛɛlɛŋ, miikɛɛ nyɛ akɛ akpɛlɛɛɛ gbalɔ ko nɔ yɛ lɛ diɛŋtsɛ emaŋ.
25 Akɛ nɔkwɛmɔnɔ lɛ, miikɛɛ nyɛ anɔkwale akɛ: Yei okulafoi babaoo yɛ Israel yɛ Elia gbii lɛ amli be ni aŋa ŋwɛi naa afii etɛ kɛ nyɔji ekpaa ni hɔmɔ kpele ko ba shikpɔŋ lɛ fɛɛ nɔ lɛ.
26 Kɛ̃lɛ, atsuuu Elia kɛyaaa yei nɛɛ ateŋ mɔ ko mɔ ko ŋɔɔ akɛ ja yoo okulafo ko ni yɔɔ Zarefat yɛ Sidon shikpɔŋ lɛ nɔ lɛ.
27 Agbɛnɛ hu, kpitiyelɔi babaoo yɛ Israel yɛ gbalɔ Elisha beiaŋ; kɛ̃lɛ, ahãaa amɛteŋ mɔ ko mɔ ko he atse,* akɛ ja Naaman, Sirianyo lɛ.”
28 Agbɛnɛ, mɛi fɛɛ ni boɔ nibii nɛɛ atoi yɛ kpeehe lɛ amli fu waa,
29 ni amɛte shi ni amɛtsirɛ lɛ oyayaayai kɛshi maŋ lɛ mli, ni amɛkpala lɛ kɛtee gɔŋ ni amɛmaŋ lɛ ma nɔ lɛ toi bɔ ni afee ni amɛyatsi eyisɛɛ amɛwo jɔɔ lɛ mli.
30 Shi etsɔ amɛteŋ kɛho ni eyiŋ etee.
31 Kɛkɛ ni ekpeleke shi kɛtee Kapernaum, maŋ ko ni yɔɔ Galilea lɛ mli. Ni etsɔɔ amɛ nii yɛ Hejɔɔmɔ Gbii lɛ anɔ,
32 ni amɛhe jɔ̃ amɛhe yɛ gbɛ ni etsɔɔ nɔ etsɔɔ nii lɛ hewɔ, ejaakɛ ewieɔ akɛ mɔ ni yɔɔ hegbɛ.
33 Agbɛnɛ, nuu ko yɛ kpeehe lɛ ni yɔɔ mumɔ ko, daimonio ni he tseee, ni ebo kɛ gbee ni wa akɛ:
34 “Mɛɛba! Mɛni wɔkɛ bo yɔɔ feemɔ, Yesu, Nazarenyo? Oba wɔhiɛkpatamɔ? Mile mɔ tuuntu ni ji bo, Mɔ Krɔŋkrɔŋ ni jɛ Nyɔŋmɔ ŋɔɔ lɛ.”
35 Shi Yesu kã mumɔ lɛ hiɛ ekɛɛ: “Feemɔ diŋŋ, ni oje emli.” Ni daimonio lɛ tsi nuu lɛ etswa shi yɛ amɛteŋ, ni eje emli ni eyeee lɛ awui ko.
36 Ni enɛ hã amɛ fɛɛ amɛhe jɔ̃ amɛhe, ni amɛkɛɛkɛɛ amɛhe akɛ: “Mɛɛ wiemɔ nɛ? Ejaakɛ ekɛ hegbɛ kɛ hewalɛ fãa mumɔi ni he tseee ayi, ni amɛjeɔ kpo!”
37 Ni ehe saji tee nɔ gbɛ shwã he fɛɛ he yɛ jɛmɛ kpokpaa lɛ nɔ.
38 Be ni eshi kpeehe lɛ, eyabote Simon we lɛ. No mli lɛ, atridii ni naa wa emɔ Simon shaayoo, ni amɛbi lɛ koni eye ebua lɛ.
39 Ni eyadamɔ yoo lɛ masɛi ni ema eyi shi ni ekã atridii lɛ hiɛ, ni atridii lɛ tse yɛ enɔ. Ni amrɔ lɛ, yoo lɛ te shi ni ebɔi amɛ sɔɔmɔ.
40 Shi be ni hulu lɛ nyɔɔ shi lɛ, mɛi fɛɛ ni yɔɔ mɛi ni miiye helai srɔtoi lɛ kɛ amɛ ba eŋɔɔ. Ni ekɛ eniji ŋmɛlɛ amɛteŋ mɔ fɛɛ mɔ nɔ, ni etsa amɛ.
41 Daimonioi hu je mɛi babaoo amli, ni amɛbolɔ amɛkɛɛ: “Bo ji Nyɔŋmɔ Bi lɛ.” Shi ekã amɛhiɛ ni eŋmɛɛɛ amɛ gbɛ ni amɛwie, ejaakɛ amɛle akɛ lɛ ji Kristo lɛ.
42 Shi be ni je tsɛre lɛ, eyiŋ etee he ko banee. Shi asafoku lɛ bɔi lɛ taomɔ,* ni amɛba he ni eyɔɔ lɛ, ni amɛka akɛ amɛbaatsĩ enaa ni ekashi amɛ etee.
43 Shi ekɛɛ amɛ akɛ: “Esa akɛ mayajaje Nyɔŋmɔ Maŋtsɛyeli lɛ he sane kpakpa lɛ matsɔɔ maji krokomɛi hu, ejaakɛ enɛ hewɔ atsu mi.”
44 No hewɔ lɛ, eyatsa eshiɛmɔ lɛ nɔ yɛ Yudea kpeehei lɛ.
Shishigbɛ Niŋmaa
^ Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
^ Kwɛmɔ Wiemɔi Titrii Amligbalamɔ lɛ.
^ Aloo “yiteŋ he ni kwɔ fe fɛɛ.”
^ Kwɛmɔ Wiemɔi Titrii Amligbalamɔ lɛ.
^ Ni ji, efɔŋ he kaa.
^ Wolo kakadaŋŋ ni akotaa awoɔ tso he.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “atsaaa amɛteŋ mɔ ko mɔ ko.”
^ Aloo “bɔi lɛ gbɔbimɔ.”
