Luka 5:1-39
5 Be ko be ni asafoku lɛ miififia lɛ ni amɛmiibo Nyɔŋmɔ wiemɔ lɛ toi lɛ, no mli lɛ edamɔ Genesaret kpaakpo* lɛ naa.
2 Ni ena lɛji enyɔ ŋmɔ shi yɛ kpaakpo lɛ naa, shi wolɛi lɛ eje lɛji lɛ amli ni amɛmiifɔ amɛyai lɛ ahe.
3 Eyakwɔ lɛji lɛ ekome ni ji Simon nɔ lɛ, ni ebi lɛ koni etsi lɛlɛ lɛ kɛya nu lɛ hiɛ fioo. Kɛkɛ ni eho eta shi, ni ebɔi asafoku lɛ nitsɔɔmɔ kɛjɛ lɛlɛ lɛ mli.
4 Be ni egbe ewiemɔ lɛ naa lɛ, ekɛɛ Simon akɛ: “Nyɛtsia lɛlɛ lɛ kɛyaa he ni mli kwɔ, ni nyɛyaŋmɛa nyɛyai lɛ koni nyɛgbe loo.”
5 Shi Simon here nɔ ekɛɛ: “Tsɔɔlɔ, wɔgbo deŋme nyɔɔŋ nɛɛ mli fɛɛ ni wɔnáaa nɔ ko, shi yɛ owiemɔ lɛ naa lɛ, maŋmɛ yai lɛ.”
6 Ni be ni amɛfee nakai lɛ, amɛgbe loi babaoo.* Anɔkwa, amɛyai lɛ bɔi gbalamɔ.
7 No hewɔ lɛ, amɛfee okadi ko kɛtsɛ amɛhefatalɔi ni yɔɔ lɛlɛ kroko lɛ mli lɛ akɛ amɛbaye amɛbua amɛ, ni amɛba, ni amɛwo lɛji enyɔ lɛ fɛɛ obɔbɔ, ni no hã lɛji nɛɛ bɔi shiumɔ.
8 Be ni Simon Petro na enɛ lɛ, eho egbee Yesu nakutsei anaa ekɛɛ: “Nuŋtsɔ, jee mimasɛi ni oya, ejaakɛ nuu eshafeelɔ ji mi.”
9 Ejaakɛ loi ni amɛgbe lɛ hã lɛ kɛ mɛi ni fata ehe lɛ ahe jɔ̃ amɛhe naakpa,
10 ni nakai nɔŋŋ Yakobo kɛ Yohane, Zebedeo bihii lɛ, ni ji Simon hefatalɔi lɛ hu ahe jɔ̃ amɛhe naakpa. Shi Yesu kɛɛ Simon akɛ: “Kpa gbeyeishemɔ lɛ. Kɛjɛ be nɛɛ nɔ kɛyaa lɛ, obaahɛ gbɔmɛi ni hiɛ kamɔ.”
11 No hewɔ lɛ, amɛkɛ lɛji lɛ bakpeleke, ni amɛshi nɔ fɛɛ nɔ, ni amɛnyiɛ esɛɛ.
12 Be kroko be ni eyɔɔ maji lɛ ekome mli lɛ, naa! nuu ko ni kpiti eshwie ehe fɛɛ yɛ jɛmɛ. Be ni ehiŋmɛi gba Yesu nɔ lɛ, ekɛ ehiɛ bu shi ni ekpa lɛ fai ekɛɛ: “Nuŋtsɔ, kɛ́ oosumɔ lɛ, obaanyɛ ohã mihe atse.”
13 No hewɔ lɛ, ekpã enine mli eta ehe ni ekɛɛ: “Miisumɔ! Ohe atse.” Amrɔ lɛ kpiti lɛ tã yɛ ehe.
14 Kɛkɛ ni efã nuu lɛ akɛ ekakɛɛ mɔ ko: “Shi moŋ yaa ni okɛ ohe ayatsɔɔ osɔfo lɛ, ní okɛ afɔle ayahã yɛ ohe ni atsuu lɛ hewɔ, taakɛ Mose fã lɛ, koni no afee odase kɛhã amɛ.”
15 Shi ehe sane lɛ tee nɔ gbɛ shwã, ni asafoku babaoo baa amɛbabuaa amɛhe naa koni amɛbo lɛ toi ní atsa amɛhelai lɛ.
16 Shi lɛ lɛ, eyaa ŋa nɔ he ko banee eyasɔleɔ.
17 Gbii lɛ eko nɔ be ni etsɔɔ nii lɛ, Farisifoi lɛ kɛ Mla lɛ tsɔɔlɔi ni ejɛ akrowai fɛɛ ni yɔɔ Galilea kɛ Yudea kɛ Yerusalem eba lɛ tara jɛmɛ; ni Yehowa* hewalɛ yɛ enɔ bɔ ni afee ni ekɛtsa helai.
18 Ni naa! hii komɛi tere nuu ko ni ekumɔ yɛ saa nɔ, ni amɛmiitao akɛ amɛkɛ lɛ aba mli ni amɛkɛ lɛ abaŋmɛ Yesu hiɛ.
19 Be ni amɛnáaa gbɛ ni amɛkɛ lɛ aba mli yɛ asafoku lɛ hewɔ lɛ, amɛkwɔ kɛtee tsũ lɛ yiteŋ, ni amɛshiu lɛ kɛ esaa lɛ kɛtsɔ ntayai lɛ amli kɛyaŋmɛ mɛi ni yɔɔ Yesu hiɛ lɛ ateŋ.
20 Be ni ena amɛhemɔkɛyeli lɛ, ekɛɛ akɛ: “Nuu, aŋɔ ohe eshai lɛ afa bo.”
21 Kɛkɛ ni woloŋmalɔi lɛ kɛ Farisifoi lɛ bɔi susumɔ amɛkɛɛ: “Namɔ ji mɔ nɛɛ ni wieɔ musubɔɔ wiemɔi nɛɛ? Namɔ baanyɛ ekɛ eshai afa akɛ ja Nyɔŋmɔ pɛ?”
22 Shi akɛni Yesu yoo amɛsusumɔ lɛ hewɔ lɛ, ehã amɛ hetoo akɛ: “Mɛni nyɛsusuɔ yɛ nyɛtsuii amli lɛ?
23 Te enɛɛmɛi amli nɔ ni waaa, ni aaakɛɛ akɛ, ‘Aŋɔ ohe eshai lɛ afa bo,’ aloo ni aaakɛɛ akɛ, ‘Tee shi ni onyiɛ’?
24 Shi bɔ ni afee ni nyɛle akɛ gbɔmɔ Bi lɛ yɛ hegbɛ yɛ shikpɔŋ lɛ nɔ akɛ eŋɔɔ eshai efaa lɛ—” ekɛɛ mɔ ni ekumɔ lɛ akɛ: “Miikɛɛ bo akɛ, Tee shi, wó osaa lɛ, ni oya oshĩa.”
25 Kɛkɛ ni ete shi yɛ amɛhiɛ, ewó nɔ ni ekã nɔ lɛ, ni eyiŋ etee eshĩa, ni ehiɛ Nyɔŋmɔ hiɛnyamwoo.
26 Kɛkɛ ni amɛ fɛɛ amɛnaa kpɛ amɛhe, ni amɛbɔi Nyɔŋmɔ hiɛnyamwoo, ni gbeyei mɔmɔ amɛ, ni amɛkɛɛ: “Wɔna naakpɛɛ nii ŋmɛnɛ!”
27 Agbɛnɛ, enɛ sɛɛ lɛ, eje kpo ni ena toohelɔ ko ni atsɛɔ lɛ Levi ni eta toohemɔhe lɛ, ni ekɛɛ lɛ akɛ: “Baatsɔ misɛɛnyiɛlɔ.”
28 Ni eshi nɔ fɛɛ nɔ yɛ esɛɛ, ni ete shi ebɔi esɛɛnyiɛmɔ.
29 Kɛkɛ ni Levi ŋmɛ lɛ okpɔlɔ wulu ko yɛ ewe lɛ, ni toohelɔi babaoo kɛ mɛi krokomɛi hu kɛ amɛ tara niyenii lɛ ashi.*
30 Kɛkɛ ni Farisifoi lɛ kɛ amɛwoloŋmalɔi lɛ bɔi huhuuhuwiemɔ kɛ ekaselɔi lɛ woo amɛkɛɛ: “Mɛni hewɔ nyɛkɛ toohelɔi kɛ eshafeelɔi yeɔ nii ni nyɛkɛ amɛ nuɔ nii lɛ?”
31 Ni Yesu here nɔ ekɛɛ amɛ akɛ: “Mɛi ni yɔɔ hewalɛ lɛ, helatsalɔ he ehiaaa amɛ, shi mɛi ni he yeɔ lɛ moŋ ehe hiaa.
32 Mibaaa jalɔi atsɛmɔ, shi moŋ eshafeelɔi kɛhã tsuitsakemɔ.”
33 Amɛkɛɛ lɛ akɛ: “Yohane kaselɔi lɛ fɔɔ ŋmaahilɛ kɛ fai ni akɛ hiɛdɔɔ kpaa, ni nakai nɔŋŋ Farisifoi lɛ feɔ, shi okaselɔi lɛ yeɔ nii ni amɛnuɔ nii.”
34 Yesu kɛɛ amɛ akɛ: “Nyɛnyɛŋ nyɛhã ayemforo wu lɛ nanemɛi lɛ ahi ŋmaa be mli ni ayemforo wu lɛ kɛ amɛ yɔɔ lɛ, aloo jeee nakai?
35 Shi gbii baaba ni abaaŋɔ ayemforo wu lɛ kɛaaje amɛteŋ kɛya; ni nakai gbii lɛ amli lɛ amɛbaahi ŋmaa.”
36 Egba amɛ nɔkwɛmɔnɔ* ko hu akɛ: “Mɔ ko mɔ ko efooo atade hee naa ekɛtaaa atade momo. Kɛ́ efee nakai lɛ, atade hee naa lɛ gbaa atade momo lɛ ni atade hee naa lɛ kɛ atade momo lɛ yeee egbɔ.
37 Agbɛnɛ hu, mɔ ko mɔ ko kɛ wein hee wooo wein kotokui* memeji amli. Kɛ́ efee nakai lɛ, wein hee lɛ baahã wein kotokui lɛ afɛlɛ, ni wein lɛ baashwie shi ni wein kotokui lɛ baafite.
38 Shi esa akɛ akɛ wein hee awo wein kotokui* hei amli.
39 Mɔ ko mɔ ko bɛ ni kɛ́ enu wein momo egbe naa lɛ, etaoɔ ehee, ejaakɛ ekɛɔ akɛ, ‘Emomo lɛ hi.’”
Shishigbɛ Niŋmaa
^ Ni tsɔɔ akɛ, Galilea Ŋshɔ.
^ Sht. ŋm., “amɛsa loi babaoo anaa.”
^ Kwɛmɔ Wiemɔi Titrii Amligbalamɔ lɛ.
^ Aloo “tara okpɔlɔ lɛ he.”
^ Aloo “abɛbua.”
^ Kotokui ni akɛ kooloo hewolo fee.
^ Kotokui ni akɛ kooloo hewolo fee.
