Marko 7:1-37
7 Agbɛnɛ, Farisifoi lɛ kɛ woloŋmalɔi lɛ ateŋ mɛi komɛi ni jɛ Yerusalem lɛ bua amɛhe naa kɛbɔle lɛ.
2 Ni amɛna akɛ ekaselɔi lɛ ateŋ mɛi komɛi yeɔ nii kɛ niji ni abule, ni tsɔɔ akɛ, niji ni afɔko he.*
3 (Ejaakɛ Farisifoi lɛ kɛ Yudafoi lɛ fɛɛ lɛ, akɛni amɛhiɛ blematsɛmɛi lɛ akusumii lɛ amli kpɛŋŋ hewɔ lɛ, ja amɛfɔ amɛniji ahe kɛyashi amɛnikutso dani amɛyeɔ nii,
4 ni kɛ́ amɛjɛ jara nɔ amɛba lɛ, ja amɛju amɛhe dani amɛyeɔ nii. Kusumii krokomɛi babaoo hu yɛ ni ato ahã amɛ, ni amɛhiɛ mli kpɛŋŋ, tamɔ kpuji, kukwɛii, kɛ akɔɔble ayawai abaptisimɔ.)
5 No hewɔ lɛ, Farisifoi kɛ woloŋmalɔi nɛɛ bi lɛ akɛ: “Mɛni hewɔ okaselɔi lɛ yeee blematsɛmɛi lɛ akusum lɛ nɔ, shi amɛyeɔ nii kɛ niji ni abule lɛ?”
6 Ekɛɛ amɛ akɛ: “Eja pɛ akɛ Yesaia gba yɛ nyɛ osatofoi nɛɛ ahe, taakɛ aŋma lɛ, akɛ, ‘Mɛi nɛɛ kɛ amɛnaabu woɔ mi, shi amɛtsuii etsi amɛhe kɛje mihe kɛtee shɔŋŋ.
7 Yakatswaa amɛyaa nɔ amɛjáa mi lɛ, ejaakɛ amɛtsɔɔ tsɔɔmɔi ni ji gbɔmɛi akitãi.’
8 Nyɛshiɔ Nyɔŋmɔ kitã lɛ, ni nyɛhiɛɔ gbɔmɛi akusum mli kpɛŋŋ.”
9 Etee nɔ ekɛɛ amɛ akɛ: “Nyɛjɛɔ ŋaa mli nyɛkuɔ nyɛhiɛ nyɛfɔ̃ɔ Nyɔŋmɔ kitã lɛ nɔ bɔ ni afee ni nyɛya nɔ nyɛhiɛ nyɛkusum lɛ mli.
10 Akɛ nɔkwɛmɔnɔ lɛ, Mose kɛɛ akɛ, ‘Wo otsɛ kɛ onyɛ,’ ni ‘Mɔ ni wieɔ wiemɔi fɔji eshiɔ* etsɛ aloo enyɛ lɛ, agbe lɛ.’
11 Shi nyɛ lɛ, nyɛkɛɔ akɛ, ‘Kɛ́ mɔ ko kɛɛ etsɛ aloo enyɛ akɛ: “Nɔ fɛɛ nɔ ni miyɔɔ ni kulɛ obaaná he sɛɛ lɛ ji korban (ni tsɔɔ akɛ, nɔkeenɔ ni ajɔɔ nɔ ahã Nyɔŋmɔ)” lɛ,’
12 nyɛhãaa efee nɔ kome po ehã etsɛ aloo enyɛ dɔŋŋ.
13 No hewɔ lɛ, nyɛkɛ nyɛkusum ni nyɛtsɔɔ mɛi lɛ guɔ Nyɔŋmɔ wiemɔ lɛ. Ni nibii babaoo ni tamɔ nakai sɔŋŋ nyɛfeɔ.”
14 Ni etsɛ asafoku lɛ kɛba eŋɔɔ ekoŋŋ, ni ekɛɛ amɛ akɛ: “Nyɛ fɛɛ nyɛboa mi toi ni nyɛnua shishi.
15 Nɔ ko nɔ ko bɛ ni jɛɔ gbɔmɔ kponɔgbɛ boteɔ emli ni baanyɛ abule lɛ; shi nibii ni jɛɔ gbɔmɔ mli jeɔ kpo lɛ ji nibii ni buleɔ lɛ.”
16 ——
17 Agbɛnɛ, be ni eshi asafoku lɛ ni ebote shĩa ko mli lɛ, ekaselɔi lɛ bɔi lɛ nɔkwɛmɔnɔ* lɛ he sanebimɔ.
18 No hewɔ lɛ, ekɛɛ amɛ akɛ: “Ani nyɛ hu nyɛnuuu nii ashishi tamɔ amɛ? Ani nyɛleee akɛ nɔ ko nɔ ko bɛ ni jɛɔ kponɔgbɛ boteɔ gbɔmɔ mli ni baanyɛ abule lɛ,
19 akɛni jeee etsui mli eboteɔ, shi moŋ eyaa emusuŋ ni eyajeɔ kpo yɛ tiafi mli lɛ hewɔ?” Ewie enɛ kɛtsɔɔ akɛ niyenii fɛɛ he tse.
20 Kɛfata he lɛ, ekɛɛ akɛ: “Nɔ ni jɛɔ gbɔmɔ mli jeɔ kpo lɛ ji nɔ ni buleɔ lɛ.
21 Ejaakɛ mligbɛ, ni ji gbɔmɛi atsuii amli nibii nɛɛ jɛɔ: susumɔi fɔji, bɔlɛnamɔ jeŋba sha,* jui, gbɔmɔgbei,
22 gbalafitemɔi,* amimyelii, efɔŋfeemɔi, lakamɔi, efɔŋ ni akɛ kuɛŋtimɔ feɔ,* hiŋmɛi ni klɔɔ mɔ nɔ, musubɔɔ, henɔwomɔ, kɛ kwashiaiasaneyeli.
23 Nibii fɔji nɛɛ fɛɛ lɛ, mligbɛ amɛjɛɔ ni amɛbuleɔ gbɔmɔ.”
24 Ete shi yɛ jɛmɛ ni etee Tiro kɛ Sidon kpokpaa lɛ nɔ. Eyabote shĩa ko mli yɛ jɛmɛ, ni esumɔɔɔ ni mɔ ko ale, shi enyɛɛɛ ehe etee.
25 Amrɔ lɛ, yoo ko ni ebiyoo fioo yɔɔ mumɔ ni he tseee lɛ nu ehe, ni eba ebaho egbee enaji anaa.
26 Yoo lɛ, Hela yoo ni, ni ejɛ* Foinike ni yɔɔ Siria lɛ; ni etee nɔ ebi lɛ ni efã daimonio lɛ kɛjɛ ebiyoo lɛ mli.
27 Shi ekɛɛ yoo lɛ akɛ: “Hã bii lɛ atɔrɔ klɛŋklɛŋ, ejaakɛ ejaaa akɛ aŋɔɔ bii lɛ aboloo lɛ ashɛrɛɔ ashwieɔ gbei abii ahiɛ.”
28 Shi yoo lɛ here nɔ ekɛɛ lɛ akɛ: “Hɛɛ, onukpa, ni kɛ̃lɛ gbei abii ni yɔɔ okpɔlɔ lɛ shishi lɛ po yeɔ bii bibii lɛ aniyenii fufuji lɛ.”
29 Kɛkɛ ni ekɛɛ yoo lɛ akɛ: “Nɔ ni owie nɛɛ hewɔ lɛ, yaa; daimonio lɛ eje obiyoo lɛ mli.”
30 No hewɔ lɛ, eyi mli etee ewe lɛ, ni eyana gbekɛ bibioo lɛ kã saa nɔ, ni daimonio lɛ etee.
31 Be ni Yesu ku esɛɛ kɛjɛ Tiro kpokpaa lɛ nɔ lɛ, eyatsɔ Sidon ni efo mli kɛyatsɔ Dekapoli kpokpaa lɛ* nɔ kɛtee Galilea Ŋshɔ lɛ naa.
32 Biɛ ni akɛ nuu toimulɔ ko ni nyɛɛɛ awie jogbaŋŋ ba eŋɔɔ yɛ, ni amɛkpa lɛ fai koni ekɛ enine aŋmɛ enɔ.
33 Ni ekɛ lɛ shi asafoku lɛ teŋ kɛtee afã. Kɛkɛ ni ekɛ ewaobii wo nuu lɛ toii amli, ni etsɛ̃ lajɔ̃, ni eta nuu lɛ lilɛi he.
34 Ni ekwɛ ŋwɛi ni emu waa ni ekɛɛ lɛ akɛ: “Hefata,” eshishi ji, “Gbelemɔ.”
35 Kɛkɛ ni etoii lɛ gbele, ni nɔ ni hãaa enyɛ ewie jogbaŋŋ lɛ tee, ni ebɔi wiemɔ jogbaŋŋ.
36 Kɛkɛ ni efã amɛ akɛ amɛkakɛɛ mɔ ko mɔ ko, shi babaoo ni efãa amɛ lɛ, babaoo ni amɛjajeɔ ji no.
37 Anɔkwa, amɛhe jɔ̃ amɛhe kɛteke nɔ, ni amɛkɛɛ: “Efee nii fɛɛ jogbaŋŋ. Ehãa toimulɔi po nuɔ nii, ni mumuii hu wieɔ.”
Shishigbɛ Niŋmaa
^ Ni tsɔɔ akɛ, atsuuko he yɛ kusum naa.
^ Aloo “Mɔ ni sopaa.”
^ Aloo “abɛbua.”
^ Hela wiemɔkuli ni ji por·neiʹa lɛ piifeemɔ. Kwɛmɔ Wiemɔi Titrii Amligbalamɔ lɛ.
^ Aloo “jeŋba gbonyo ni efeee mɔ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.
^ Aloo “afɔ lɛ yɛ.”
^ Aloo “Maji Nyɔŋma Kpokpaa lɛ.”
