Mateo 1:1-25
1 Wolo ni wieɔ Yesu Kristo,* David bi, Abraham bi lɛ he saji:*
2 Abraham fɔ Isak;
Isak fɔ Yakob;
Yakob fɔ Yuda kɛ enyɛmimɛi lɛ;
3 Yuda kɛ Tamar fɔ Perez kɛ Zera;
Perez fɔ Hezron;
Hezron fɔ Ram;
4 Ram fɔ Aminadab;
Aminadab fɔ Nahashon;
Nahashon fɔ Salmon;
5 Salmon kɛ Rahab fɔ Boaz;
Boaz kɛ Rut fɔ Obed;
Obed fɔ Yishai;
6 Yishai fɔ Maŋtsɛ David.
David kɛ Uria ŋa lɛ fɔ Solomon;
7 Solomon fɔ Rehabeam;
Rehabeam fɔ Abia;
Abia fɔ Asa;
8 Asa fɔ Yehoshafat;
Yehoshafat fɔ Yehoram;
Yehoram fɔ Uzia;
9 Uzia fɔ Yotam;
Yotam fɔ Ahaz;
Ahaz fɔ Hezekia;
10 Hezekia fɔ Manase;
Manase fɔ Amon;
Amon fɔ Yosia;
11 Yosia fɔ Yekonia kɛ enyɛmimɛi lɛ yɛ Yudafoi lɛ anomŋɔɔ kɛmiiya Babilon lɛ beiaŋ.
12 Be ni amɛyɔɔ nomŋɔɔ mli yɛ Babilon lɛ, Yekonia fɔ Shealtiel;
Shealtiel fɔ Zerubabel;
13 Zerubabel fɔ Abiud;
Abiud fɔ Eliakim;
Eliakim fɔ Azor;
14 Azor fɔ Zadok;
Zadok fɔ Akim;
Akim fɔ Eliud;
15 Eliud fɔ Eleazar;
Eleazar fɔ Matan;
Matan fɔ Yakob;
16 Yakob fɔ Yosef ni ji Maria ni fɔ Yesu ni atsɛɔ lɛ Kristo lɛ wu lɛ.
17 Belɛ, yinɔi lɛ fɛɛ kɛjɛ Abraham nɔ kɛbashi David nɔ lɛ feɔ yinɔi nyɔŋma kɛ ejwɛ; kɛjɛ David nɔ kɛbashi Yudafoi lɛ anomŋɔɔ kɛmiiya Babilon lɛ nɔ lɛ, yinɔi nyɔŋma kɛ ejwɛ; kɛjɛ nomŋɔɔ kɛmiiya Babilon lɛ nɔ kɛbashi Kristo lɛ nɔ lɛ, yinɔi nyɔŋma kɛ ejwɛ.
18 Shi bɔ ni Yesu Kristo fɔmɔ lɛ ba lɛ nɛ. Be ni Yosef etsɛ Yesu nyɛ Maria he baa ni amɛnáko amɛhi shi lɛ, eba lɛ akɛ* mumɔ krɔŋkrɔŋ* lɛ ehã ená musu.
19 Shi, akɛni ewu Yosef lɛ jalɔ ji lɛ ni esumɔɔɔ akɛ eshwieɔ eŋa lɛ hiɛ shi hewɔ lɛ, eto eyiŋ akɛ ebaashwie eŋa lɛ* yɛ teemɔŋ.
20 Shi be ni ejwɛŋ nii nɛɛ ahe egbe naa lɛ, naa! Yehowa* bɔfo* jie ehe kpo yɛ lamɔ mli etsɔɔ lɛ, ni ekɛɛ lɛ akɛ: “Yosef, David bi, kaashe gbeyei akɛ oooŋɔ oŋa Maria kɛya shĩa, ejaakɛ mumɔ krɔŋkrɔŋ lɛ ni hã ená musu lɛ.
21 Ebaafɔ binuu, ni obaawo lɛ gbɛ́i akɛ Yesu,* ejaakɛ lɛ ebaahere mɛi ni ji enɔ lɛ kɛjɛ amɛhe eshai lɛ amli.”
22 Enɛɛmɛi fɛɛ ba koni nɔ ni Yehowa* tsɔ egbalɔ lɛ nɔ ewie lɛ aba mli akɛ:
23 “Naa! Oblayoo fro lɛ baaná musu ni ebaafɔ binuu, ni amɛbaawo lɛ gbɛ́i akɛ Imanuel,” ni eshishi ji, “Nyɔŋmɔ kɛ Wɔ Yɛ.”
24 Kɛkɛ ni Yosef te shi kɛjɛ wɔ lɛ mli ni efee bɔ ni Yehowa* bɔfo* lɛ kɛɛ lɛ lɛ, ni eŋɔ eŋa lɛ kɛtee shĩa.
25 Shi ekɛ lɛ náaa bɔlɛ kɛyashi efɔ binuu, ni Yosef wo lɛ gbɛ́i akɛ Yesu.
Shishigbɛ Niŋmaa
^ Aloo “Mesia lɛ; Mɔ ni Afɔ Lɛ Mu lɛ.”
^ Aloo “wekutɔkpaa he.”
^ Sht. ŋm., “ana akɛ.”
^ Aloo “hewalɛ ní miitsu nii.”
^ Yɛ Yudafoi akusum naa lɛ, kɛ́ nuu ko etsɛ yoo he baa ni eetao ekɛ lɛ afo mli lɛ, abiɔ ni eshwie yoo lɛ yɛ mla naa loo amɛtse gbãla lɛ yɛ mla naa.
^ Biɛ ji he klɛŋklɛŋ ní Nyɔŋmɔ gbɛ́i Yehowa lɛ je kpo yɛ, yɛ Kristofoi A-Hela Ŋmalɛi lɛ amli, yɛ shishitsɔɔmɔ nɛɛ mli. Gbɛ́i Yehowa lɛ jeɔ kpo shii 237 yɛ Kristofoi A-Hela Ŋmalɛi lɛ amli. Kwɛmɔ Wiemɔi Titrii Amligbalamɔ lɛ.
^ Aloo “ŋwɛibɔfo.”
^ Hebri mli lɛ, Yeshua, loo Yoshua, ni eshishi ji “Yehowa Ji Yiwalaheremɔ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “ŋwɛibɔfo.”
