Mateo 10:1-42
10 No hewɔ lɛ, etsɛ ekaselɔi nyɔŋma kɛ enyɔ lɛ ni ehã amɛ hegbɛ yɛ mumɔi ni he tseee anɔ, koni amɛfãmɔ amɛ, ní amɛtsa helai srɔtoi fɛɛ kɛ gbɔmɔtsoŋ gbɔjɔmɔi srɔtoi fɛɛ.
2 Bɔfoi nyɔŋma kɛ enyɔ lɛ agbɛ́ii nɛ: Klɛŋklɛŋ lɛ, Simon, mɔ ni atsɛɔ lɛ Petro lɛ, kɛ enyɛmi Andrea; Yakobo kɛ enyɛmi Yohane, ni ji Zebedeo bii lɛ;
3 Filipo kɛ Bartolomeo;* Toma kɛ Mateo,* toohelɔ lɛ; Yakobo, Alfeo binuu lɛ; Tadeo;*
4 Simon, hiɛdɔlɔ lɛ; kɛ Yuda Iskariot, mɔ ni sɛɛ mli lɛ ejie lɛ ehã lɛ.
5 Nɛkɛ mɛi nyɔŋma kɛ enyɔ nɛɛ Yesu tsu, ni ekɛ gbɛtsɔɔmɔi nɛɛ hã amɛ akɛ: “Nyɛkagbaa kɛyaa jeŋmaji lɛ agbɛ lɛ nɔ, ni nyɛkabotea Samariabii amaŋ ko mli;
6 shi moŋ, nyɛkãa he nyɛyaa Israel we gwantɛŋi ni elaaje lɛ aŋɔɔ.
7 Be ni nyɛyaa lɛ, nyɛshiɛa akɛ: ‘Ŋwɛi Maŋtsɛyeli lɛ ebɛŋkɛ nyɛ.’
8 Nyɛtsaa helatsɛmɛi, nyɛtea gbohii ashi, nyɛhãa kpitiyelɔi ahe atsea, nyɛfãmɔa daimonioi. Yaka nyɛná, yaka nyɛŋɔhãa.
9 Nyɛkaŋɔa shika tsuru loo jwiɛtɛi loo akɔɔble nyɛwoa nyɛhɛfiinii ni akɛ shika woɔ mli lɛ amli,
10 loo niyenii kotoku kɛhã gbɛfãa lɛ, loo atadei enyɔ,* loo tokota, loo dɛhiɛmɔ tso, ejaakɛ nitsulɔ lɛ, eniyenii sa lɛ.
11 “Maŋ fɛɛ maŋ loo akrowa fɛɛ akrowa mli ni nyɛbaabote lɛ, nyɛtaoa mɔ ni sa yɛ jɛmɛ, ni nyɛhia jɛmɛ kɛyashi nyɛbaashi.
12 Kɛ́ nyɛbote shĩa lɛ, nyɛŋaa shĩabii lɛ.
13 Kɛ́ shĩa lɛ sa lɛ, nyɛhãa toiŋjɔlɛ ni nyɛtaoɔ akɛ ená lɛ abaa enɔ; shi kɛ́ esaaa lɛ, nyɛhãa nyɛtoiŋjɔlɛ lɛ akpalea kɛbaa nyɛŋɔɔ.
14 He fɛɛ he ni mɔ ko hereee nyɛ, loo ebooo nyɛwiemɔi lɛ atoi yɛ lɛ, kɛ́ nyɛmiishi nakai shĩa lɛ loo nakai maŋ lɛ mli lɛ, nyɛkpokpoa nyɛnaji ahe mulu lɛ nyɛshwiea.*
15 Lɛɛlɛŋ, miikɛɛ nyɛ akɛ, Kojomɔ Gbi lɛ nɔ lɛ, ebaafee mlɛo ehã Sodom kɛ Gomora shikpɔŋ lɛ fe nakai maŋ lɛ.
16 “Naa! miitsu nyɛ akɛ gwantɛŋi yɛ klaji ateŋ; no hewɔ lɛ, nyɛhiɛ atɛ̃a tamɔ onufui, ni kɛ̃lɛ nyɛfea mɛi ni he bɛ sane ko tamɔ okpoi.
17 Nyɛhiɛ ahia nyɛhe nɔ yɛ gbɔmɛi ahewɔ, ejaakɛ amɛbaaŋɔ nyɛ amɛhã kojolɔi, ni amɛkɛ kpelebii baayi nyɛ yɛ amɛkpeehei lɛ.
18 Ni akɛ nyɛ baaya amralofoi kɛ maŋtsɛmɛi ahiɛ yɛ mihewɔ, koni akɛye amɛ kɛ jeŋmaji lɛ odase.
19 Shi kɛ́ amɛŋɔ nyɛ amɛhã lɛ, nyɛkafea yeyeeye yɛ bɔ ni aloo nɔ ni nyɛbaawie lɛ he, ejaakɛ abaaŋɔ nɔ ni nyɛbaawie lɛ ahã nyɛ yɛ nakai ŋmɛlɛtswaa lɛ nɔ nɔŋŋ;
20 ejaakɛ jeee nyɛ kɛkɛ nyɛwieɔ lɛ, shi moŋ nyɛ-Tsɛ lɛ mumɔ lɛ ni tsɔɔ nyɛnɔ ewieɔ lɛ.
21 Kɛfata he lɛ, nyɛmi nuu baaŋɔ nyɛmi nuu ehã gbele, ni tsɛ baaŋɔ ebi ehã, ni bii baate shi awo fɔlɔi ni amɛbaahã agbe amɛ.
22 Ni mɛi fɛɛ baanyɛ nyɛ yɛ migbɛ́i lɛ hewɔ, shi mɔ ni efi shi kɛyawula shi* lɛ, abaahere eyiwala.
23 Kɛ́ amɛwa nyɛ yi yɛ maŋ kome mli lɛ, nyɛjoa foi kɛyaa ekroko mli; ejaakɛ lɛɛlɛŋ, miikɛɛ nyɛ akɛ, nyɛgbeŋ Israel maji lɛ fɛɛ naa kɛyashi gbɔmɔ Bi lɛ baaba.
24 “Kaselɔ efeee etsɔɔlɔ, asaŋ nyɔŋ efeee enuŋtsɔ.
25 Efa hã kaselɔ lɛ akɛ ebaatamɔ etsɔɔlɔ, kɛ nyɔŋ lɛ hu akɛ ebaatamɔ enuŋtsɔ. Kɛ́ mɛi etsɛ shĩatsɛ lɛ Beelzebul* lɛ, enyiɛ nɔŋŋ amɛtsɛŋ eshĩabii lɛ nakai?
26 No hewɔ lɛ, nyɛkashea amɛ gbeyei, ejaakɛ nɔ ko nɔ ko bɛ ni abu nɔ ni agbeleŋ naa, ni teemɔŋ sane ko bɛ ni aleŋ.
27 Nɔ ni mikɛɔ nyɛ yɛ duŋ mli lɛ, nyɛwiea yɛ la hiɛ, ni nɔ ni awoɔ nyɛtoiŋ akɛɔ nyɛ lɛ, nyɛshiɛa yɛ tsũi ayiteŋ.
28 Ni nyɛkashea mɛi ni gbeɔ gbɔmɔtso lɛ shi amɛnyɛŋ susuma* lɛ amɛgbe lɛ gbeyei; moŋ lɛ, nyɛshea mɔ ni baanyɛ akpãtã susuma lɛ kɛ gbɔmɔtso lɛ fɛɛ hiɛ yɛ Gehena* lɛ gbeyei.
29 Ani afilimatai enyɔ lɛ, jeee kapɛlɛ ni shɛɛɛ nɔ ko* ahɔ̃ɔ aheɔ? Kɛ̃lɛ amɛteŋ ekome folo po egbeŋ shikpɔŋ ni nyɛ-Tsɛ lɛ leee.
30 Shi nyɛyiteŋtsɔi po lɛ akane fɛɛ.
31 No hewɔ lɛ, nyɛkashea gbeyei; nyɛjara wa fe afilimatai babaoo.
32 “Belɛ, mɔ fɛɛ mɔ ni tsĩɔ mitã yɛ mɛi ahiɛ lɛ, mi hu matsĩ etã yɛ mi-Tsɛ ni yɔɔ ŋwɛi lɛ hiɛ.
33 Shi mɔ fɛɛ mɔ ni kwaa mi yɛ mɛi ahiɛ lɛ, mi hu makwa lɛ yɛ mi-Tsɛ ni yɔɔ ŋwɛi lɛ hiɛ.
34 Nyɛkasusua akɛ miba ni mabahã toiŋjɔlɛ aba shikpɔŋ lɛ nɔ; jeee toiŋjɔlɛ hãmɔ miba, shi klante moŋ.
35 Ejaakɛ miba koni mikɛ mligbalamɔ aba, nuu kɛ etsɛ teŋ, kɛ biyoo kɛ enyɛ teŋ, kɛ ŋa kɛ eshaayoo teŋ.
36 Anɔkwa, mɔ diɛŋtsɛ shĩabii baatsɔmɔ ehenyɛlɔi.
37 Mɔ fɛɛ mɔ ni dɔɔ tsɛ loo nyɛ he fe mi lɛ esaaa mi; ni mɔ fɛɛ mɔ ni dɔɔ binuu loo biyoo he fe mi lɛ esaaa mi.
38 Ni mɔ fɛɛ mɔ ni sumɔɔɔ akɛ ewóɔ epiŋmɔ tso* ní enyiɛ misɛɛ lɛ, esaaa mi.
39 Mɔ fɛɛ mɔ ni baa esusuma* yi lɛ, ebaaŋmɛɛ lɛ, ni mɔ fɛɛ mɔ ni esusuma* ŋmɛɔ lɛ yɛ mihewɔ lɛ, enine baashɛ nɔ.
40 “Mɔ fɛɛ mɔ ni hereɔ nyɛ lɛ, ehereɔ mi hu, ni mɔ fɛɛ mɔ ni hereɔ mi lɛ, ehereɔ mɔ ni tsu mi lɛ hu.
41 Mɔ fɛɛ mɔ ni hereɔ gbalɔ yɛ gbalɔ ni eji lɛ hewɔ lɛ, ebaaná gbalɔ juromɔnɔ, ni mɔ fɛɛ mɔ ni hereɔ jalɔ yɛ jalɔ ni eji lɛ hewɔ lɛ, ebaaná jalɔ juromɔnɔ.
42 Ni mɔ fɛɛ mɔ ni hãa mɛi bibii nɛɛ ateŋ mɔ kome nu ni mli ejɔ kpulu kome pɛ koni enu yɛ kaselɔ ni eji lɛ hewɔ lɛ, lɛɛlɛŋ miikɛɛ nyɛ akɛ, ejuromɔnɔ eŋmɛŋ lɛ kɔkɔɔkɔ.”
Shishigbɛ Niŋmaa
^ Atsɛɔ lɛ “Yuda, Yakobo binuu lɛ” hu. Kwɛmɔ Luk 6:16; Yoh 14:22; Bɔf 1:13.
^ Aloo “atade kroko kɛfata nɔ ni nyɛwo lɛ he.”
^ Kɛ́ mɔ ko kpokpo enaji ahe mulu eshwie lɛ, no tsɔɔ akɛ mɔ ko he sɔ̃ kãaa enɔ dɔŋŋ.
^ Aloo “mɔ ni fiɔ shi kɛyawulaa shi.”
^ Eji gbɛ́i ni akɛtsɛɔ Satan, daimonioi lɛ alumɔ loo amɛnɔyelɔ lɛ.
^ Aloo “wala,” ni tsɔɔ akɛ, hiɛnɔkamɔ ní mɔ yɔɔ akɛ ebaaná wala.
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “asarion kome,” ni eji gbi kome nyɔmɔwoo mlijaa nyɔŋma kɛ ekpaa mli ekome.
^ Kwɛmɔ Wiemɔi Titrii Amligbalamɔ lɛ.
^ Aloo “ewala.”
^ Aloo “ewala.”
