Mateo 11:1-30
11 Be ni Yesu kɛ gbɛtsɔɔmɔi hã ekaselɔi nyɔŋma kɛ enyɔ lɛ egbe naa lɛ, eje jɛmɛ etee koni eyatsɔɔ nii ni eshiɛ yɛ amɛmaji lɛ amli.
2 Shi Yohane lɛ, akɛni enu Kristo lɛ nitsumɔi lɛ ahe yɛ tsuŋwoohe lɛ hewɔ lɛ, etsu ekaselɔi lɛ
3 koni amɛyabi lɛ akɛ: “Ani bo ji Mɔ ni Baa lɛ, aloo wɔkpa mɔ kroko gbɛ?”
4 Yesu hã amɛ hetoo akɛ: “Nyɛyaa ni nyɛyagbaa Yohane nɔ ni nyɛnuɔ kɛ nɔ ni nyɛnaa nɛɛ akɛ:
5 Shwilafoi miina nii amrɔ nɛɛ, ni akpakei miinyiɛ, ni aahã kpitiyelɔi ahe miitse ni toimulɔi miinu nii, ni aatee gbohii ashi, ni aajaje sane kpakpa lɛ aatsɔɔ ohiafoi.
6 Mɔ ni hãaa mihe sane ko atɔ̃tɔ enane lɛ yɛ miishɛɛ.”
7 Be ni mɛnɛɛmɛi nyiɛ gbɛ kɛyaa lɛ, Yesu bɔi asafoku lɛ kɛɛmɔ yɛ Yohane he akɛ: “Mɛni nyɛtee ŋa lɛ nɔ* koni nyɛyakwɛ? Gãlã ni kɔɔyɔɔ hosoɔ?
8 Belɛ, mɛni mɔ nyɛtee kwɛmɔ? Nuu ni esaa ehe kɛ atadei bɔdɔbɔdɔi?* Naa! mɛi ni woɔ atadei bɔdɔbɔdɔi lɛ, maŋtsɛmɛiawei amɛyɔɔ.
9 Belɛ, mɛni hewɔ kwraa nyɛje kpo? Koni nyɛyakwɛ gbalɔ? Hɛɛ, miikɛɛ nyɛ akɛ nakai ni, ni efe gbalɔ tete.
10 Mɔ nɛ ji mɔ ni aŋma yɛ ehe akɛ: ‘Naa! miitsu mibɔfo lɛ kɛmiitsɔ ohiɛ, mɔ ni baasaa ogbɛ lɛ eto bo lɛ!’
11 Lɛɛlɛŋ, miikɛɛ nyɛ akɛ, mɛi ni yei fɔ amɛ lɛ ateŋ mɔ ko eteko shi ni fe Yohane Baptisilɔ lɛ, shi mɔ ni baa shi yɛ ŋwɛi Maŋtsɛyeli lɛ mli lɛ fe lɛ.
12 Kɛjɛ Yohane Baptisilɔ lɛ gbii lɛ anɔ kɛbashi amrɔ nɛɛ, ŋwɛi Maŋtsɛyeli lɛ ji oti ni mɛi miaa amɛhiɛ koni amɛshɛ he, ni mɛi ni yaa nɔ amɛmiaa amɛhiɛ lɛ anine shɛɔ nɔ.
13 Ejaakɛ Gbalɔi lɛ kɛ Mla lɛ* fɛɛ gba kɛbashi Yohane nɔ;
14 ni kɛji nyɛmiisumɔ akɛ nyɛkpɛlɛ nɔ lɛ, lɛ ji ‘Elia, mɔ ni baaba lɛ.’
15 Mɔ ni yɔɔ toi lɛ, hã ebo toi.
16 “Namɔ he mikɛ yinɔ nɛɛ baato? Etamɔ gbekɛbii bibii ni tara jaji anɔ, ni bolɔɔ amɛtsɛtsɛɔ gbekɛbii krokomɛi
17 akɛ: ‘Wɔkpã bɛlɛ wɔhã nyɛ, shi nyɛjooo; wɔwo yara, shi nyɛgbalaaa nyɛhe mai kɛtsɔɔɔ akɛ nyɛmiiye awerɛho.’
18 Nakai nɔŋŋ Yohane ba, eyeee nii ni enuuu nɔ ko, ni kɛ̃lɛ mɛi kɛɔ akɛ, ‘Eyɛ daimonio.’
19 Gbɔmɔ Bi lɛ ba, ni eyeɔ nii ni enuɔ nɔ ko, fɛɛ sɛɛ lɛ mɛi kɛɔ akɛ, ‘Naa! Nuu fufeelɔ kɛ weinnulɔ, toohelɔi kɛ eshafeelɔi anaanyo.’ Fɛɛ mli lɛ, abuɔ hiɛshikamɔ jalɔ* yɛ enitsumɔi anaa.”*
20 Kɛkɛ ni ebɔi maji ni etsu ehewalɛ nitsumɔi lɛ ateŋ babaoo yɛ lɛ ahiɛ wiemɔ, ejaakɛ amɛtsakeee amɛtsui:
21 “Kpoo hã bo, Korazin! Kpoo hã bo, Betsaida! ejaakɛ eji atsu hewalɛ nitsumɔi ni atsu yɛ nyɛmli lɛ yɛ Tiro kɛ Sidon kulɛ, amɛtsake amɛtsui yɛ kpekpe kɛ lamulu mli jeeŋmɔ.
22 Shi miikɛɛ nyɛ akɛ, Kojomɔ Gbi lɛ nɔ lɛ, ebaafee mlɛo ehã Tiro kɛ Sidon fe nyɛ.
23 Ni bo, Kapernaum, ani aaawó onɔ kɛya ŋwɛi? Gbonyo Bu* lɛ mli tɔ̃ɔ obaakpeleke shi kɛaatee; ejaakɛ eji atsu hewalɛ nitsumɔi ni atsu yɛ omli lɛ yɛ Sodom kulɛ, eyɛ kɛbashi ŋmɛnɛ gbi nɛɛ.
24 Shi miikɛɛ nyɛ akɛ, Kojomɔ Gbi lɛ nɔ lɛ, ebaafee mlɛo ehã Sodom shikpɔŋ lɛ fe bo.”
25 Nakai be lɛ mli lɛ, Yesu here nɔ ekɛɛ: “Miijie oyi yɛ faŋŋ, Ataa, ŋwɛi kɛ shikpɔŋ Nuŋtsɔ, ejaakɛ oŋɔ nibii nɛɛ otee hiɛshikalɔi kɛ nilelɔi, ni ojie amɛ kpo otsɔɔ gbekɛbii bibii.
26 Hɛɛ, Ataa, ejaakɛ enɛ ji gbɛ ni okpɛlɛ nɔ.
27 Mi-Tsɛ eŋɔ nii fɛɛ ewo midɛŋ, ni mɔ ko mɔ ko leee Bi lɛ kɛmɔɔɔ shi, akɛ ja Tsɛ lɛ; asaŋ mɔ ko mɔ ko leee Tsɛ lɛ kɛmɔɔɔ shi, akɛ ja Bi lɛ, kɛ mɔ fɛɛ mɔ ni Bi lɛ sumɔɔ akɛ ejie lɛ shi etsɔɔ lɛ lɛ.
28 Nyɛbaa miŋɔɔ, nyɛ mɛi fɛɛ ni eetɔ nyɛ, ní nyɛtere jatsui ni tsiitsii, ni mahã nyɛhe ajɔ nyɛ.
29 Nyɛwóa mikɔɔŋtso lɛ nyɛfɔ̃a nyɛnɔ, ní nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ.*
30 Ejaakɛ mikɔɔŋtso lɛ teremɔ waaa, ni mijatsu lɛ etsiii.”
Shishigbɛ Niŋmaa
^ Aloo “atadei kpakpai?”
^ Wiemɔ ni ji “Gbalɔi lɛ kɛ Mla lɛ” damɔ shi kɛhã Hebri Ŋmalɛi lɛ fɛɛ.
^ Aloo “bem.”
^ Aloo “yɛ yibii ní ewoɔ lɛ anaa.”
^ Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Aloo “ni nyɛsusumai ahe baajɔ amɛ.”
