Mateo 18:1-35
18 Nakai ŋmɛlɛtswaa lɛ nɔ nɔŋŋ lɛ, kaselɔi lɛ ba Yesu ŋɔɔ amɛbakɛɛ akɛ: “Belɛ namɔ ji agbo fe fɛɛ yɛ ŋwɛi Maŋtsɛyeli lɛ mli?”
2 No hewɔ lɛ, etsɛ gbekɛ bibioo ko kɛba eŋɔɔ, ni ekɛ lɛ damɔ amɛteŋ
3 ni ekɛɛ akɛ: “Lɛɛlɛŋ, miikɛɛ nyɛ akɛ: Kɛ́ nyɛtsakeee* ní nyɛtsɔmɔ tamɔ gbekɛbii bibii lɛ, nyɛboteŋ ŋwɛi Maŋtsɛyeli lɛ mli kɔkɔɔkɔ.
4 Belɛ, mɔ fɛɛ mɔ ni baaba ehe shi tamɔ gbekɛ bibioo nɛɛ, lɛ ji agbo fe fɛɛ yɛ ŋwɛi Maŋtsɛyeli lɛ mli;
5 ni mɔ fɛɛ mɔ ni hereɔ gbekɛ bibioo tamɔ nɛkɛ yɛ migbɛ́i mli lɛ, hereɔ mi hu.
6 Shi mɔ fɛɛ mɔ ni tɔ̃tɔɔ bibii nɛɛ ni náa hemɔkɛyeli yɛ mimli lɛ ateŋ mɔ kome nane lɛ, ehi hã lɛ akɛ akɛ wiɛtɛ ni teji gbalaa baaŋmɔ ekuɛ ni aŋɔ lɛ awo ŋshɔ teŋ.
7 “Kpoo hã je lɛ yɛ nanetɔ̃tɔmɔnii lɛ ahewɔ! Anɔkwa, bɔ fɛɛ bɔ ni fee lɛ, nanetɔ̃tɔmɔnii lɛ baaba, shi kpoo hã mɔ ni nanetɔ̃tɔmɔ lɛ tsɔɔ enɔ kɛbaa lɛ!
8 Belɛ, kɛ́ onine loo onane tɔ̃tɔɔ onane lɛ, foo yɛ ohe oshɛ ofɔ̃. Ehi hã bo akɛ obaabote wala mli akɛ kpajelɔ loo akpake fe nɔ ni oyɛ niji enyɔ loo naji enyɔ ni abaashɛ bo afɔ̃ naanɔ la* lɛ mli.
9 Agbɛnɛ hu, kɛ́ ohiŋmɛi tɔ̃tɔɔ onane lɛ, fãa oshɛ ofɔ̃. Ehi hã bo akɛ okɛ hiŋmɛi kome baabote wala mli fe nɔ ni oyɛ hiŋmɛii enyɔ ni abaashɛ bo afɔ̃ Gehena la* lɛ mli.
10 Nyɛkwɛa jogbaŋŋ koni nyɛkagbe bibii nɛɛ ateŋ mɔ kome he guɔ, ejaakɛ miikɛɛ nyɛ akɛ amɛbɔfoi ni yɔɔ ŋwɛi lɛ kwɛɔ mi-Tsɛ ni yɔɔ ŋwɛi lɛ hiɛ daa.
11 ——
12 “Te nyɛsusuɔ tɛŋŋ? Kɛ́ mɔ ko yɛ gwantɛŋi oha ni amɛteŋ ekome du gbɛ lɛ, ani eshiŋ nyɔŋmai nɛɛhu kɛ nɛɛhu lɛ yɛ gɔji lɛ anɔ ni eya eyatao nɔ ni edu gbɛ lɛ?
13 Ni kɛ́ ena lɛ lɛ, lɛɛlɛŋ, miikɛɛ nyɛ akɛ, emii shɛɔ ehe yɛ no he fe nyɔŋmai nɛɛhu kɛ nɛɛhu ni eduko gbɛ lɛ.
14 Nakai nɔŋŋ mi-Tsɛ* ni yɔɔ ŋwɛi lɛ sumɔɔɔ akɛ bibii nɛɛ ateŋ ekome po hiɛ kpãtãa.
15 “Shi kɛ́ onyɛmi fee esha ko lɛ, yaa ni oyatsɔɔ lɛ etɔmɔ lɛ,* okɛ lɛ yi enyɔ kɛkɛ. Kɛ́ ebo bo toi lɛ, no lɛ onine eshɛ onyɛmi lɛ nɔ.*
16 Shi kɛ́ ebooo toi lɛ, ŋɔɔ mɔ kome loo mɛi enyɔ ofata ohe koni yɛ odasefoi enyɔ loo etɛ awiemɔ* naa lɛ, sane fɛɛ sane ama shi.
17 Shi kɛ́ ebooo amɛ toi lɛ, kɛɛmɔ asafo lɛ. Kɛ́ ebooo asafo lɛ hu toi lɛ, buu lɛ tamɔ jeŋmajiaŋbii lɛ ateŋ mɔ ko, kɛ toohelɔ.
18 “Lɛɛlɛŋ, miikɛɛ nyɛ akɛ, nɔ fɛɛ nɔ ni nyɛbaafi yɛ shikpɔŋ lɛ nɔ lɛ, baafee nɔ ni afi yɛ ŋwɛi momo, ni nɔ fɛɛ nɔ ni nyɛbaafɛne yɛ shikpɔŋ lɛ nɔ lɛ, baafee nɔ ni afɛne yɛ ŋwɛi momo.
19 Shi kome ekoŋŋ lɛ, lɛɛlɛŋ, miikɛɛ nyɛ akɛ, kɛ́ nyɛteŋ mɛi enyɔ kpã gbee yɛ shikpɔŋ lɛ nɔ yɛ nɔ ko ni he hiaa ni esa akɛ amɛbi he lɛ, mi-Tsɛ ni yɔɔ ŋwɛi lɛ baahã aba mli ahã amɛ.
20 Ejaakɛ he ni mɛi enyɔ loo mɛi etɛ ebua amɛhe naa yɛ, yɛ migbɛ́i mli lɛ, miyɛ amɛteŋ yɛ jɛmɛ.”
21 Kɛkɛ ni Petro ba ebakɛɛ lɛ akɛ: “Nuŋtsɔ, shii enyiɛ esa akɛ minyɛmi atɔ̃ minɔ ni miŋɔfa lɛ? Kɛyashi shii kpawo lo?”
22 Yesu kɛɛ lɛ akɛ: “Miikɛɛ bo akɛ, jeee kɛyashi shii kpawo, shi moŋ kɛyashi shii nyɔŋmai kpawo kɛ kpawo.*
23 “No hewɔ ni ŋwɛi Maŋtsɛyeli lɛ tamɔ maŋtsɛ ko ní tao akɛ ekɛ enyɔji abu akɔntaa lɛ.
24 Be ni ekɛ amɛ bɔi akɔntaabuu lɛ, akɛ nuu ko ni hiɛ lɛ nyɔmɔ talɛntai akpei nyɔŋma* ba eŋɔɔ.
25 Shi akɛni ebɛ nɔ ko ni ekɛaawo nyɔmɔ lɛ hewɔ lɛ, enuŋtsɔ lɛ fã akɛ ahɔ̃ɔ lɛ kɛ eŋa kɛ ebii kɛ nii fɛɛ ni eyɔɔ ni akɛwo nyɔmɔ lɛ.
26 No hewɔ lɛ, nyɔŋ lɛ ho egbee shi ni ekpa lɛ fai ekɛɛ, ‘Too otsui shi ohã mi, ni mawo bo nyɔmɔ lɛ fɛɛ.’
27 Nakai nyɔŋ lɛ nuŋtsɔ lɛ musuŋ tsɔ lɛ yɛ enɛ hewɔ, ni eŋmɛɛ ehe ni ekɛ enyɔmɔ lɛ ke lɛ.
28 Shi nakai nyɔŋ lɛ je kpo ni eyana enanemɛi nyɔji lɛ ateŋ mɔ kome ni hiɛ lɛ nyɔmɔ denarioi oha, ni emɔ emli, ni ebɔi esɛ̃ miamɔ ekɛɛ, ‘Wo mi nyɔmɔ ni ohiɛ mi lɛ fɛɛ.’
29 No hewɔ lɛ, enaanyo nyɔŋ lɛ ho egbee shi ni ebɔi lɛ faikpamɔ ekɛɛ, ‘Too otsui shi ohã mi, ni mawo bo nyɔmɔ lɛ.’
30 Shi lɛ lɛ ekpɛlɛɛɛ, moŋ lɛ, ehã awo lɛ tsuŋ kɛyashi be ni ebaawo lɛ nyɔmɔ lɛ.
31 Be ni enanemɛi nyɔji lɛ na nɔ ni tee nɔ lɛ, egba amɛnaa waa, ni amɛtee amɛyabɔ amɛnuŋtsɔ lɛ nibii ni etee nɔ lɛ fɛɛ.
32 Kɛkɛ ni enuŋtsɔ lɛ hã ayatsɛ lɛ kɛba ni ekɛɛ lɛ akɛ: ‘Nyɔŋ fɔŋ, be ni okpa mi fai lɛ, miŋɔ onyɔmɔ lɛ fɛɛ mike bo.
33 Ani esaaa akɛ kulɛ bo hu onaa onaanyo nyɔŋ lɛ mɔbɔ taakɛ mina bo mɔbɔ lɛ?’
34 Kɛkɛ ni enuŋtsɔ lɛ mli fu, ni eŋɔ lɛ ehã tsuŋwoohe nɔkwɛlɔi lɛ, kɛyashi be ni ebaawo nyɔmɔ lɛ fɛɛ.
35 Mi-Tsɛ ni yɔɔ ŋwɛi lɛ hu kɛ nyɛ baaye yɛ nakai gbɛ nɔ nɔŋŋ, kɛ́ nyɛteŋ mɔ fɛɛ mɔ kɛ enyɛmi tɔmɔ efaaa lɛ kɛjɛɛɛ etsui mli.”
Shishigbɛ Niŋmaa
^ Aloo “nyɛkpaleee.”
^ Enɛ tsɔɔ naanɔ hiɛkpatamɔ.
^ Kwɛmɔ Wiemɔi Titrii Amligbalamɔ lɛ.
^ Aloo eeenyɛ efee akɛ, “nyɛ-Tsɛ.”
^ Sht. ŋm., “ni oyakune lɛ.”
^ Aloo “ohã onyɛmi lɛ ekɔ gbɛ kpakpa ekoŋŋ.”
^ Sht. ŋm., “adaaŋ.”
^ Aloo “shii nyɔŋmai kpawo toi kpawo.”
^ Jwiɛtɛi shika talɛntai 10,000 lɛ naa shiɔ denarioi 60,000,000.
