Mateo 27:1-66
27 Be ni je tsɛre lɛ, osɔfoi tsiifoi lɛ kɛ maŋ lɛŋ onukpai lɛ fɛɛ yato ajina yɛ Yesu hewɔ koni amɛgbe lɛ.
2 Be ni amɛfimɔ lɛ lɛ, amɛkpala lɛ kɛtee ni amɛkɛ lɛ yahã Pilato, ni ji amralo lɛ.
3 Agbɛnɛ, be ni Yuda, mɔ ni jie Yesu ehã lɛ na akɛ abu Yesu fɔ lɛ, etsui bu lɛ fɔ ni ekɛ jwiɛtɛi kukuji nyɔŋmai etɛ lɛ ku sɛɛ eyahã osɔfoi tsiifoi lɛ kɛ onukpai lɛ,
4 ni ekɛɛ akɛ: “Mifee esha akɛ mijie lá ni efeko efɔŋ ko mihã.” Amɛkɛɛ akɛ: “Mɛni no kɔɔ yɛ wɔhe? Bo diɛŋtsɛ kwɛmɔ nɔ!”*
5 No hewɔ lɛ, eshɛrɛ jwiɛtɛi kukuji lɛ eshwie sɔlemɔwe lɛ, ni eshi etee. Kɛkɛ ni etee eyasɛŋ ehe.
6 Shi osɔfoi tsiifoi lɛ yaloo jwiɛtɛi kukuji lɛ ni amɛkɛɛ: “Mla eŋmɛɛɛ gbɛ akɛ akɛwoɔ fotro krɔŋkrɔŋ lɛ mli, ejaakɛ lá shika ni.”
7 Be ni amɛtee ajina amɛgbe naa lɛ, amɛkɛyahé gbɛshɔ̃lɔ shikpɔŋ, koni afu gbɔi yɛ jɛmɛ.
8 No hewɔ lɛ, kɛbashi ŋmɛnɛ lɛ, atsɛɔ nakai shikpɔŋ lɛ akɛ Lá Shikpɔŋ.
9 Kɛkɛ ni nɔ ni atsɔ gbalɔ Yeremia nɔ awie lɛ ba mli akɛ: “Ni amɛloo jwiɛtɛi kukuji nyɔŋmai etɛ lɛ, ni ji jara ni afo afɔ̃ gbɔmɔ lɛ nɔ lɛ, mɔ ni Israelbii lɛ ateŋ mɛi komɛi fo jara amɛfɔ̃ enɔ lɛ,
10 ni amɛŋɔhã kɛhã gbɛshɔ̃lɔ shikpɔŋ, taakɛ Yehowa* fã mi lɛ.”
11 Agbɛnɛ, Yesu damɔ amralo lɛ hiɛ, ni amralo lɛ bi lɛ akɛ: “Ani bo ji Yudafoi lɛ a-Maŋtsɛ lɛ?” Yesu here nɔ ekɛɛ: “Bo diɛŋtsɛ okɛɛ.”
12 Shi be ni osɔfoi tsiifoi lɛ kɛ onukpai lɛ kɛ sane fɔ̃ɔ enɔ lɛ, ejieee naa.
13 Kɛkɛ ni Pilato kɛɛ lɛ akɛ: “Ani onuuu saji babaoo ni amɛkɛyeɔ odase amɛshiɔ bo lɛ?”
14 Shi ehãaa lɛ hetoo, dabi, ewieee sane kome po, ni no hã amralo lɛ naa kpɛ ehe naakpa.
15 Agbɛnɛ, eji amralo lɛ kusum akɛ gbi jurɔ fɛɛ gbi jurɔ nɔ lɛ, eŋmɛɛ gboklɛfoi lɛ ateŋ mɔ fɛɛ mɔ ni asafoku lɛ sumɔɔ lɛ he ehã amɛ.
16 Nakai be lɛ mli nɔŋŋ lɛ, amɛyɛ gboklɛfonyo kpanaku ko ni atsɛɔ lɛ Baraba.
17 No hewɔ lɛ, be ni amɛbua amɛhe naa lɛ, Pilato kɛɛ amɛ akɛ: “Namɔ nyɛsumɔɔ akɛ miŋmɛɛ ehe mihã nyɛ, Baraba aloo Yesu, mɔ ni akɛɛ atsɛɔ lɛ Kristo lɛ?”
18 Ejaakɛ Pilato le akɛ, enɔ ni amɛklɔɔ lɛ hewɔ amɛŋɔ lɛ amɛhã lɛ.
19 Shi be ni eta kojomɔ sɛi lɛ nɔ lɛ, eŋa tsu ni abakɛɛ lɛ akɛ: “Okɛ ohe akawo jalɔ nɛɛ sane ko mli, ejaakɛ ŋmɛnɛ lɛ, mina nɔ waa yɛ lamɔ mli yɛ ehewɔ.”
20 Shi osɔfoi tsiifoi lɛ kɛ onukpai lɛ wo asafoku lɛ yiŋ koni amɛbi ni akɛ Baraba ahã amɛ, shi Yesu lɛ, agbe lɛ.
21 Amralo lɛ bi amɛ ekoŋŋ akɛ: “Mɛi enyɔ nɛɛ ateŋ namɔ nyɛsumɔɔ akɛ miŋmɛɛ ehe mihã nyɛ?” Amɛkɛɛ akɛ: “Baraba.”
22 Pilato kɛɛ amɛ akɛ: “Belɛ, mɛni mifee Yesu, mɔ ni akɛɛ atsɛɔ lɛ Kristo lɛ mɔ?” Amɛ fɛɛ amɛkɛɛ akɛ: “Gbee lɛ!”*
23 Ekɛɛ akɛ: “Mɛni hewɔ? Mɛɛ efɔŋ efee?” Kɛ̃lɛ, amɛtee nɔ amɛbolɔ fe tsutsu lɛ amɛkɛɛ: “Gbee lɛ!”
24 Be ni Pilato na akɛ nɔ kpakpa ko jɛɛɛ mli kɛbaaa, shi moŋ, maŋ lɛŋ miihe afee hirihiri lɛ, ewó nu, ni efɔ edɛ̃ yɛ asafoku lɛ hiɛ ekɛɛ akɛ: “Miyeee nuu nɛɛ lá yi sɔ̃. Nyɛ diɛŋtsɛ nyɛkwɛa nɔ.”
25 Ni mɛi lɛ fɛɛ hã hetoo akɛ: “Elá aba wɔ kɛ wɔbii anɔ.”
26 Kɛkɛ ni eŋmɛɛ Baraba he ehã amɛ, shi ehã agwao Yesu, ni eŋɔ lɛ ehã koni ayagbe lɛ yɛ tso jaŋŋ nɔ.
27 Kɛkɛ ni amralo lɛ asraafoi lɛ ŋɔ Yesu kɛtee amralo lɛ we lɛ ni amɛbua asraafoi akuu muu lɛ fɛɛ naa kɛbɔle lɛ.
28 Ni amɛjie ehe atadei lɛ, ni amɛbu lɛ hehaanɔ ni tsuɔ waa,
29 ni amɛlo ŋmeii akekere ni amɛkɛbu eyitso, ni amɛkɛ gãlã hã lɛ ehiɛ yɛ eninejurɔ. Ni amɛkula shi yɛ ehiɛ amɛye ehe fɛo amɛkɛɛ: “Wɔmiiŋa bo,* Yudafoi lɛ a-Maŋtsɛ!”
30 Ni amɛfɛ̃ lajɔ̃ amɛshwie ehe ni amɛhe gãlã lɛ yɛ edɛŋ ni amɛbɔi eyiteŋ tswiamɔ.
31 Agbɛnɛ, be ni amɛye ehe fɛo amɛgbe naa lɛ, amɛjie hehaanɔ lɛ yɛ ehe, ni amɛkɛ etadei anɔhaanɔi lɛ wo lɛ, ni amɛkpala lɛ kɛtee koni amɛyakala lɛ amɛkpɛtɛ tso jaŋŋ lɛ he.
32 Be ni amɛje kpo amɛyaa lɛ, amɛna Kirenenyo ko ni atsɛɔ lɛ Simon. Ni amɛnyɛ nuu nɛɛ nɔ akɛ etere epiŋmɔ tso* lɛ.
33 Ni be ni amɛshɛ he ko ni atsɛɔ jɛmɛ Golgota, ni eshishi ji, Yitsoŋoŋohe lɛ,
34 amɛhã lɛ wein ni akɛ nɔ ko ni joɔ* efutu mli akɛ enu; shi be ni esa enaa lɛ, ekpoo akɛ eeenu.
35 Be ni amɛkala lɛ kɛkpɛtɛ tso jaŋŋ lɛ he amɛgbe naa lɛ, amɛfɔ̃ oshiki kɛjara etadei anɔhaanɔi lɛ,
36 ni amɛho amɛtara shi yɛ jɛmɛ, ni amɛbu ehe.
37 Agbɛnɛ hu, amɛŋma sane ni akɛfɔ̃ enɔ lɛ amɛkpɛtɛ eyiteŋgbɛ akɛ: “Yesu, Yudafoi lɛ a-Maŋtsɛ lɛ nɛ.”
38 Kɛkɛ ni asɛŋ ojoyelɔi enyɔ yɛ tsei jaŋŋi anɔ yɛ emasɛi, mɔ kome yɛ eninejurɔ nɔ ni mɔ kome hu yɛ ebɛku nɔ.
39 Ni mɛi ni hoɔ lɛ wie wiemɔi fɔji amɛshi lɛ, ni amɛhoso amɛyitsei
40 amɛkɛɛ: “Bo ni kulɛ obaakumɔ sɔlemɔwe lɛ ni okɛ gbii etɛ ama lɛ, heremɔ bo diɛŋtsɛ oyiwala! Kɛ́ Nyɔŋmɔ bi ji bo lɛ, jee piŋmɔ tso* lɛ nɔ okpeleke shi koo!”
41 Nakai nɔŋŋ osɔfoi tsiifoi lɛ kɛ woloŋmalɔi lɛ kɛ onukpai lɛ bɔi ehe fɛoyeli, ni amɛkɛɛ:
42 “Ehere mɛi krokomɛi ayiwala; shi lɛ diɛŋtsɛ lɛ, enyɛɛɛ eyiwala ehere! Lɛ ji Israel Maŋtsɛ; hã ekpeleke shi kɛjɛ piŋmɔ tso* lɛ nɔ, ni wɔbaahe lɛ wɔye.
43 Eŋɔ ehiɛ efɔ̃ Nyɔŋmɔ nɔ; hã E-jie lɛ kɛji E-yɛ ehe tsui, ejaakɛ ekɛɛ akɛ, ‘Nyɔŋmɔ Bi ji mi.’”
44 Nakai nɔŋŋ ojoyelɔi ni asɛŋ amɛ yɛ tsei jaŋŋi anɔ yɛ emasɛi lɛ po bɔ lɛ ahora.
45 Kɛjɛ ŋmɛlɛtswaa ni ji ekpaa* lɛ nɔ kɛyaa lɛ, duŋ wo yɛ shikpɔŋ lɛ nɔ fɛɛ kɛyashi ŋmɛlɛtswaa ni ji nɛɛhu* lɛ nɔ.
46 Aaafee ŋmɛlɛtswaa ni ji nɛɛhu lɛ nɔ lɛ, Yesu bo kɛ gbee ni wa ekɛɛ: “Eli, Eli, lama sabaktani?” eshishi ji, “Mi-Nyɔŋmɔ, mi-Nyɔŋmɔ, mɛni hewɔ okwa mi?”
47 Be ni mɛi ni damɔ jɛmɛ lɛ nu enɛ lɛ, amɛteŋ mɛi komɛi bɔi kɛɛmɔ akɛ: “Nuu nɛɛ miitsɛ Elia.”
48 Ni amrɔ lɛ, amɛteŋ mɔ kome jo foi eyaŋɔ kotsa ni ekɛtsɔ wein ni joɔ mli, ni ekɛma gãlã naa, ni ekɛhã lɛ akɛ enu.
49 Shi mɛi ni eshwɛ lɛ kɛɛ akɛ: “Shi lɛ! Hã wɔkwɛ akɛ Elia baaba ebahere eyiwala lo.”
50 Shi kome ekoŋŋ lɛ, Yesu bo kɛ gbee ni wa, ni eŋɔ emumɔ ehã.*
51 Ni naa! sɔlemɔtsu lɛŋ muhɔɔ* lɛ mli gba enyɔ, kɛjɛ ŋwɛi kɛbayi shi, ni shikpɔŋ lɛ hoso, ni tɛsai lɛ amli gbala.
52 Ni gbohii abui* lɛ anaa gbelegbelei, ni mɛi krɔŋkrɔŋi ni ewɔ yɛ gbele mli lɛ agbɔmɔtsei lɛ babaoo jejee kpo
53 ni mɛi babaoo na amɛ. (Be ni atee lɛ shi sɛɛ lɛ, mɛi ni tee gbohii abui lɛ ahe lɛ ba maŋ krɔŋkrɔŋ lɛ mli.)*
54 Shi be ni asraafoiatsɛ lɛ kɛ mɛi ni fata ehe kɛbuɔ Yesu he lɛ na shikpɔŋhosomɔ lɛ, kɛ nibii ni yaa nɔ lɛ, amɛshe gbeyei waa, ni amɛkɛɛ: “Lɛɛlɛŋ, Nyɔŋmɔ Bi nɛ.”
55 Ni yei babaoo ni nyiɛ Yesu sɛɛ kɛjɛ Galilea koni amɛsɔmɔ lɛ lɛ damɔ shɔŋŋ amɛmiikwɛ;
56 amɛteŋ mɛi komɛi ji Maria Magdalena, kɛ Maria ni ji Yakobo kɛ Yose nyɛ lɛ, kɛ Zebedeo bihii lɛ anyɛ lɛ.
57 Agbɛnɛ, be ni shɛ gbɛkɛnaashi lɛ, nuu niiatsɛ ko ni jɛ Arimatia ni atsɛɔ lɛ Yosef, ni lɛ hu ebatsɔ Yesu kaselɔ lɛ, ba.
58 Nuu nɛɛ tee Pilato ŋɔɔ ni eyabi koni aŋɔ Yesu gbonyo lɛ ahã lɛ. Kɛkɛ ni Pilato fã koni aŋɔhã lɛ.
59 Yosef ŋɔ gbonyo lɛ, ni eŋɔ klala kpakpa ni he tse ebala he,
60 ni ekɛ gbonyo lɛ yaŋmɛ egbonyo bu* hee, ni ekpɛ́ yɛ tɛsaa mli lɛ mli. Ni be ni ekoklo tɛ agbo ko kɛtsĩ gbonyo bu* lɛ naa lɛ, eshi etee.
61 Shi Maria Magdalena kɛ Maria kroko lɛ tee nɔ amɛhi jɛmɛ, ni amɛtara gbonyo bu lɛ hiɛ.
62 Enɔ jetsɛremɔ, ni ji Hesaamɔkɛtoo Gbi lɛ sɛɛ lɛ, osɔfoi tsiifoi lɛ kɛ Farisifoi lɛ yabua amɛhe naa yɛ Pilato hiɛ,
63 ni amɛkɛɛ: “Onukpa, wɔkaiɔ akɛ be ni nakai shishiulɔ lɛ yɔɔ wala mli lɛ, ekɛɛ akɛ, ‘Gbii etɛ sɛɛ lɛ, abaatee mi shi.’
64 No hewɔ lɛ, fã koni ayabu gbonyo bu lɛ he kɛyashi gbi ni ji etɛ lɛ nɔ, koni ekaselɔi lɛ akaba amɛbaju lɛ ni amɛkɛɛ mɛi akɛ, ‘Atee lɛ shi kɛjɛ gbohii ateŋ!’ Ni naagbee shishiumɔ nɛɛ bafee efɔŋ fe klɛŋklɛŋ nɔ lɛ.”
65 Pilato kɛɛ amɛ akɛ: “Naa, bulɔi nɛ. Nyɛyaa nyɛyabua he jogbaŋŋ bɔ ni nyɛbaanyɛ.”
66 No hewɔ lɛ, amɛtee amɛyasɔo tɛ lɛ kɛkpɛtɛ gbonyo bu lɛ naa kpɛŋŋ, ni amɛhã bulɔi bu he.
Shishigbɛ Niŋmaa
^ Aloo “Bo osane ni!”
^ Kwɛmɔ Wiemɔi Titrii Amligbalamɔ lɛ.
^ Aloo “Gbee lɛ yɛ tso jaŋŋ lɛ nɔ!”
^ Aloo “Yijiemɔ ahã bo.”
^ Kwɛmɔ Wiemɔi Titrii Amligbalamɔ lɛ.
^ Nɔ ko tseretsere ni joɔ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Ni tsɔɔ akɛ, aaafee shwane ŋmɛlɛ 12.
^ Ni tsɔɔ akɛ, aaafee shwane ŋmɛji 3.
^ Aloo “ni egbo.”
^ Muhɔɔ ji nɔ ni ŋmɛnɛ lɛ atsɛɔ lɛ pateeshɛŋ, ni ji mama loo nɔ ko ni akɛhaa samfɛlɛ loo shinaa naa, loo akɛjaa tsũ mli lɛ.
^ Aloo “gbohii akaimɔ bui.”
^ Eeenyɛ efee akɛ, koni amɛbabɔ nɔ ni amɛna lɛ he amaniɛ.
^ Aloo “egbonyo kaimɔ bu.”
^ Aloo “gbonyo kaimɔ bu.”
