Mateo 3:1-17
3 No gbii lɛ amli lɛ, Yohane Baptisilɔ lɛ ba ebashiɛ yɛ Yudea ŋa lɛ nɔ*
2 ekɛɛ akɛ: “Nyɛtsakea nyɛtsui, ejaakɛ ŋwɛi Maŋtsɛyeli lɛ ebɛŋkɛ nyɛ.”
3 Anɔkwa, mɔ nɛ ji mɔ ni atsɔ gbalɔ Yesaia nɔ awie ehe akɛ: “Mɔ ko gbee miibo yɛ ŋa lɛ nɔ* akɛ: ‘Nyɛsaa Yehowa* gbɛ lɛ! Nyɛfea etempɔŋi lɛ trɔmɔɔ’” lɛ.
4 No mli lɛ, Yohane wo atade ní akɛ yoma hetsɔi lo, ni kooloo hewolo hɛfiinɔ fi ehɛ. Eniyenii ji baalabii kɛ ŋa mli wo.
5 Ni mɛi ni yɔɔ Yerusalem kɛ Yudea fɛɛ kɛ Yordan niiaŋ fɛɛ yaa eŋɔɔ,
6 ni ebaptisiɔ amɛ* yɛ Yordan Faa lɛ mli, be ni amɛjajeɔ amɛhe eshai lɛ kpetekplee lɛ.
7 Be ni ehiŋmɛi gba Farisifoi kɛ Sadukifoi babaoo anɔ akɛ amɛmiiba ebaptisimɔ lɛ he lɛ, ekɛɛ amɛ akɛ: “Shikpãi ashwiei, namɔ bɔ nyɛ kɔkɔ akɛ nyɛjo mlifu ni baa lɛ naa foi?
8 Belɛ nyɛwoa yibii ni sa tsuitsakemɔ mɔ.
9 Nyɛkasusua yɛ nyɛmli akɛ, ‘Wɔtsɛ ji Abraham.’ Ejaakɛ miikɛɛ nyɛ akɛ, Nyɔŋmɔ baanyɛ atee bii ashi kɛjɛ tɛi nɛɛ amli ehã Abraham.
10 Lema lɛ kã tsei lɛ ashishifã lɛ nɔ momo. Belɛ, tso fɛɛ tso ni wooo yibii kpakpa lɛ, abaatoo afɔ̃ shi ni ashɛ afɔ̃ la lɛ mli.
11 Mi lɛ, nu mikɛbaptisiɔ nyɛ yɛ nyɛtsuitsakemɔ lɛ hewɔ, shi mɔ ni baa yɛ misɛɛ lɛ he wa fe mi, etokotai tete lɛ, misaaa mɔ ni jieɔ. Nakai mɔ lɛ kɛ mumɔ krɔŋkrɔŋ baabaptisi nyɛ, ni ekɛ la hu baabaptisi nyɛ.
12 Ehiɛ eniiamlishaanɔ* lɛ yɛ edɛŋ, ni ebaabɛɛ eŋmaagbeemɔhe lɛ fitsofitso, ni ebaabua eŋmaa lɛ naa ewo nitoohe lɛ, shi tutuu lɛ ekɛ la ni anyɛŋ agbe baashã.”
13 Kɛkɛ ni Yesu jɛ Galilea eba Yohane ŋɔɔ yɛ Yordan naa koni ebaptisi lɛ.
14 Shi Yohane bɔ mɔdɛŋ akɛ etsĩ lɛ gbɛ, ekɛɛ akɛ: “Mi moŋ ní ehia akɛ obaptisiɔ mi lɛ, ni bo obaa miŋɔɔ nɛɛ?”
15 Yesu hã lɛ hetoo akɛ: “Be nɛɛ mli lɛ, kpɛlɛmɔ nɔ, ejaakɛ enɛ ji gbɛ ni sa ni wɔbaatsɔ nɔ wɔgbe jalɛ fɛɛ naa.” Kɛkɛ ni efɔ̃ɔ enaatsĩi.
16 Be ni abaptisi Yesu agbe naa lɛ, ejɛ nu lɛ mli amrɔ eje kpo; ni naa! ŋwɛi naa gbele, ni ena Nyɔŋmɔ mumɔ lɛ miikpeleke shi tamɔ okpo ni eeba enɔ.
17 Agbɛnɛ hu, naa! gbee ko jɛ ŋwɛi kɛɛ: “Mɔ nɛ ji mi-Bi ni misumɔɔ lɛ lɛ, mɔ ni mikpɛlɛ enɔ lɛ.”
Shishigbɛ Niŋmaa
^ Bei pii lɛ, wiemɔ ni ji “ŋa nɔ” lɛ kɔɔ he ko ni mɛi bɛ jɛmɛ loo mɛi bɛ jɛmɛ tsɔ, ní ahuko jɛmɛ lɛ he. Ebaanyɛ ekɔ hei ni tsei kɛ nu bɛ jɛmɛ tsɔ lɛ hu ahe.
^ Kwɛmɔ Wiemɔi Titrii Amligbalamɔ lɛ.
^ Aloo “ekɛ amɛ woɔ nu mli; emuɔ amɛ mele.”
^ Tso sofi ni akɛshaa ŋmaa mli.
