Romabii 2:1-29
2 No hewɔ lɛ, Oo gbɔmɔ, ekɔɔɔ he eko mɔ ni oji, kɛ́ okojo lɛ, obɛ naajiemɔ ko; ejaakɛ kɛ́ okojo mɔ kroko lɛ, obuɔ bo diɛŋtsɛ ohe fɔ, ejaakɛ bo ni okojoɔ mɛi lɛ, nakai nibii lɛ nɔŋŋ ofeɔ.
2 Agbɛnɛ, wɔle akɛ Nyɔŋmɔ kojoɔ mɛi ni feɔ nibii nɛɛ, ni ekojomɔ lɛ kɛ anɔkwale kpãa gbee.
3 Shi, Oo gbɔmɔ, be mli ni okojoɔ mɛi ni feɔ nibii nɛɛ ni kɛ̃lɛ ofeɔ nibii nɛɛ nɔŋŋ lɛ, ani osusuɔ akɛ bo lɛ, obaajo Nyɔŋmɔ kojomɔ lɛ naa foi?
4 Aloo gbe ogbeɔ emlihilɛ babaoo kɛ etsui mli ní emɔɔ waa* kɛ etsuishitoo lɛ he guɔ akɛni oleee akɛ Nyɔŋmɔ miibɔ mɔdɛŋ ni enyiɛ ohiɛ kɛya tsuitsakemɔ mli yɛ emlihilɛ lɛ naa lɛ hewɔ?
5 Shi okɛ okuɛŋtimɔ kɛ otsui ni otsakeee lɛ miibua mlifu naa oohã bo diɛŋtsɛ ohe kɛmiito mlifu kɛ Nyɔŋmɔ jalɛ kojomɔ kpojiemɔ gbi lɛ.
6 Ni ebaawo mɔ fɛɛ mɔ nyɔmɔ bɔ ni sa enitsumɔi lɛ:
7 mɛi ni fiɔ shi yɛ nitsumɔ kpakpa mli kɛtaoɔ anunyam kɛ woo kɛ nii ni fiteee lɛ, ebaahã amɛ naanɔ wala;
8 shi mɛi ni sumɔɔ mansɔtsɔɔ ní amɛbooo anɔkwale lɛ toi shi amɛboɔ nii ni ejaaa toi lɛ, amɛnɔ ji mlifu kɛ mlila.
9 Amanehulu kɛ hejaramɔ baaba gbɔmɔ fɛɛ gbɔmɔ* ni feɔ nibii ni yeɔ mɔ awui lɛ nɔ, Yudafonyo klɛŋklɛŋ, kɛ agbɛnɛ hu, Helanyo;
10 shi anunyam kɛ woo kɛ toiŋjɔlɛ baaba mɔ fɛɛ mɔ ni tsuɔ nitsumɔi kpakpai lɛ nɔ, Yudafonyo klɛŋklɛŋ, kɛ agbɛnɛ hu Helanyo.
11 Ejaakɛ Nyɔŋmɔ lɛ, ekwɛɛɛ hiɛiaŋ.
12 Ejaakɛ mɛi fɛɛ ni bɛ mla ni amɛfee esha lɛ, amɛhiɛ baakpãtã akɛ mɛi ni bɛ mla; shi mɛi fɛɛ ni yɔɔ mla shishi ní amɛfee esha lɛ, mla nɔŋŋ akɛbaakojo amɛ.
13 Ejaakɛ jeee mla nulɔi lɛ ji jalɔi yɛ Nyɔŋmɔ hiɛ, shi mɛi ni kɛ mla tsuɔ nii lɛ, abaabu amɛ jalɔi.
14 Ejaakɛ kɛ́ jeŋmajiaŋbii ni bɛ mla lɛ jɛɔ amɛfɔmɔ su mli amɛtsuɔ mla lɛ naa nii lɛ, mɛi nɛɛ, eyɛ mli akɛ amɛbɛ mla moŋ, shi amɛji mla kɛhã amɛ diɛŋtsɛ amɛhe.
15 Amɛ diɛŋtsɛ amɛtsɔɔ akɛ aŋma mla lɛ nitsumɔ lɛ yɛ amɛtsuiiaŋ, ni yɛ nakai be lɛ mli nɔŋŋ lɛ, amɛhenilee yeɔ amɛ odase, ni amɛ diɛŋtsɛ amɛsusumɔi buɔ amɛ fɔ, loo ebuɔ amɛ bem.
16 Enɛ baaba mli yɛ gbi ni Nyɔŋmɔ baatsɔ Kristo Yesu nɔ ekojo gbɔmɛi ateemɔŋ nii lɛ nɔ, yɛ sane kpakpa ni mijajeɔ lɛ naa.
17 Agbɛnɛ, kɛ́ atsɛɔ bo Yudafonyo, ni okɛ ohe fɔ̃ɔ mla nɔ ni oshwãa ofɔ̃ɔ Nyɔŋmɔ nɔ,
18 ni ole esuɔmɔnaa nii, ni okpɛlɛɔ nibii ni hi jogbaŋŋ lɛ anɔ ejaakɛ atsɔɔ* bo nii kɛjɛ Mla lɛ mli,
19 ni oná nɔmimaa akɛ oji shwilafoi agbɛtsɔɔlɔ, la kɛhã mɛi ni yɔɔ duŋ mli,
20 kwashiai atsɔselɔ, gbekɛbii bibii atsɔɔlɔ, ni oyɛ nilee kɛ anɔkwale ni yɔɔ Mla lɛ mli lɛ he mfoniri lɛ—
21 shi bo mɔ ni otsɔɔ mɔ kroko nii lɛ, ani otsɔɔɔ bo diɛŋtsɛ ohe nii? Bo mɔ ni oshiɛɔ akɛ, “Kaaju” lɛ, ani ojuɔ?
22 Bo mɔ ni okɛɔ akɛ, “Kaafite gbãla” lɛ, ani ofiteɔ gbãla?* Bo mɔ ni ohiɔ amagai lɛ, ani ojuɔ sɔlemɔwei anii?
23 Bo mɔ ni okɛ mla shiɔ otsitsi lɛ, ani otɔ̃ɔ Mla lɛ kɛgbeɔ Nyɔŋmɔ he guɔ?
24 Ejaakɛ “nyɛhewɔ lɛ, abɔɔ Nyɔŋmɔ gbɛ́i lɛ he musu yɛ jeŋmaji lɛ ateŋ,” taakɛ aŋma lɛ.
25 Anɔkwa, kɛ́ oyeɔ mla nɔ lɛ, kulɛ ketiafoo he yɛ sɛɛnamɔ; shi kɛ́ oji mlatɔlɔ lɛ, oketiafoo lɛ ebatsɔ foo.*
26 No hewɔ lɛ, kɛ́ foolɔ ko hiɔ shi yɛ Mla lɛ mli jalɛ taomɔ nii lɛ anaa lɛ, ani abuŋ efoo lɛ akɛ ketiafoo?
27 Ni heloonaa foolɔ ni yeɔ Mla lɛ nɔ lɛ kojoɔ bo mɔ ni oyɔɔ mla ni aŋma lɛ, ní afo bo ketia hu, ni kɛ̃lɛ otɔ̃ɔ mla lɛ.
28 Ejaakɛ jeee mɔ ni ji Yudafonyo yɛ kponɔgbɛ lɛ ji Yudafonyo lɛɛlɛŋ, ni asaŋ jeee ketia ni afo yɛ heloo lɛ nɔ yɛ kponɔgbɛ lɛ ji ketiafoo lɛɛlɛŋ.
29 Shi mɔ ni ji Yudafonyo yɛ mligbɛ ji Yudafonyo lɛɛlɛŋ, ni eketiafoo lɛ ji tsui mli nɔ ni atsɔ mumɔ lɛ nɔ afo shi jeee mla ko ni aŋma nɔ. Nakai mɔ lɛ yijiemɔ lɛ, Nyɔŋmɔ ŋɔɔ ejɛɔ, shi jeee gbɔmɛi aŋɔɔ.
Shishigbɛ Niŋmaa
^ Aloo “tsui ní enáa.”
^ Aloo “gbɔmɔ fɛɛ gbɔmɔ susuma.”
^ Aloo “akɛ naabu etsɔɔ.”
^ Aloo “ebatsɔ ketia ni afoko.”
