Yakobo 1:1-27
1 Yakobo, Nyɔŋmɔ kɛ Nuŋtsɔ Yesu Kristo nyɔŋ, kɛyahã wekui nyɔŋma kɛ enyɔ ní egbɛ eshwã lɛ:
Miiŋa nyɛ!
2 Minyɛmimɛi, kɛ́ nyɛkɛ jaramɔ shihilɛi* srɔtoi kpe lɛ, nyɛbua lɛ miishɛɛ sɔŋŋ,
3 ejaakɛ nyɛle akɛ nyɛhemɔkɛyeli ní aka akwɛ yɛ nɛkɛ gbɛ nɔ lɛ kɛ shifimɔ baa.
4 Shi nyɛhãa shifimɔ lɛ agbea enitsumɔ naa, koni nyɛye emuu ni nyɛhi kɛwula shi yɛ gbɛ fɛɛ gbɛ nɔ, ní nɔ ko nɔ ko ehiaaa nyɛ.
5 No hewɔ lɛ, kɛ́ hiɛshikamɔ ehia nyɛteŋ mɔ ko lɛ, eya nɔ ebi Nyɔŋmɔ, ejaakɛ eŋɔhãa mɛi fɛɛ faa, ni ewieee mɔ hiɛ,* ni abaahã lɛ.
6 Shi eya nɔ ebi yɛ hemɔkɛyeli mli, ni eyiŋ akafee lɛ kɔshikɔshi kwraa, ejaakɛ mɔ ni yiŋ feɔ lɛ kɔshikɔshi lɛ, etamɔ ŋshɔke ní kɔɔyɔɔ tswaa kɛyaa kɛbaa.
7 Anɔkwa, nakai gbɔmɔ lɛ, ekakpa gbɛ akɛ ebaaná nɔ ko kɛjɛ Yehowa* dɛŋ;
8 eji jwɛŋmɔi enyɔnyɔɔnyɔtsɛ, ni efiii shi yɛ egbɛi fɛɛ mli.
9 Shi nyɛmi ni baa shi yɛ shihilɛ mli lɛ, emii ashɛ ehe* yɛ enɔ ní awó lɛ hewɔ,
10 ni niiatsɛ lɛ hu, yɛ shi ni aba lɛ lɛ hewɔ, ejaakɛ ebaaho eya tamɔ jwɛiiaŋ fɔfɔi.
11 Ejaakɛ bɔ ni hulu teɔ shi ní etsoɔ waa ní eŋalaa kwɛ̃ɛ nɔ, ní kwɛ̃ɛ nɔ lɛ fɔfɔi lɛ kpalaa shwieɔ shi, ní efɛo lɛ fiteɔ lɛ, nakai nɔŋŋ niiatsɛ lɛ hu hiɛ baakpãtã yɛ nibii ni etiuɔ sɛɛ lɛ amli.
12 Gbɔmɔ ni yaa nɔ efiɔ shi yɛ jaramɔ shihilɛ mli lɛ yɛ miishɛɛ, ejaakɛ kɛ́ akpɛlɛ enɔ lɛ, ebaaná wala akekere lɛ, nɔ ni Yehowa* wo shi akɛ ekɛbaahã mɛi ni yaa nɔ amɛsumɔɔ Lɛ lɛ.
13 Kɛ́ mɔ ko kɛ jaramɔ shihilɛ ko miikpe lɛ, ekakɛɛ akɛ: “Nyɔŋmɔ miika mi.” Ejaakɛ anyɛŋ akɛ nibii fɔji aka Nyɔŋmɔ, ni asaŋ lɛ diɛŋtsɛ hu ekaaa mɔ ko.
14 Shi mɔ fɛɛ mɔ lɛ, nɔ ni kaa lɛ ji nɔ ni lɛ diɛŋtsɛ eshweɔ ní gbalaa lɛ ní lakaa lɛ lɛ.*
15 No sɛɛ lɛ, nɔ ni ashweɔ lɛ, kɛ́ eŋɔ hɔ lɛ, efɔɔ esha; esha lɛ hu, kɛ́ afee agbe naa lɛ, efɔɔ gbele.
16 Minyɛmimɛi ni misumɔɔ, nyɛkahãa alakaa nyɛ.
17 Nikeenii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ ŋwɛi lai a-Tsɛ lɛ ŋɔɔ, mɔ ni tsakeee tamɔ hɔɔŋ ni tsiɔ ehe lɛ.*
18 Etsɔ anɔkwale lɛ wiemɔ lɛ nɔ efɔ wɔ yɛ lɛ diɛŋtsɛ esuɔmɔ naa, koni wɔtsɔmɔ ebɔɔ nii lɛ ateŋ klɛŋklɛŋ yibii komɛi.
19 Minyɛmimɛi ni misumɔɔ, nyɛnáa nyɛlea enɛ: Esa akɛ mɔ fɛɛ mɔ he afee oya kɛ sane toiboo, ekaye ehe oyai kɛwie, emli akafu oya,
20 ejaakɛ gbɔmɔ mlifu tsuuu Nyɔŋmɔ jalɛ nii.*
21 No hewɔ lɛ, nyɛjiea muji fɛɛ kɛ nɔ gbonyo fɛɛ nɔ gbonyo* yɛ nyɛhe nyɛshɛrɛa nyɛshwiea, ní nyɛkɛ mlijɔlɛ akpɛlɛ wiemɔ lɛ ní baanyɛ ahere nyɛyiwala* ní atɛoɔ yɛ nyɛmli lɛ nɔ.
22 Shi nyɛtsɔmɔa mɛi ni kɛ wiemɔ lɛ tsuɔ nii, ni jeee enulɔi kɛkɛ, ní nyɛkɛ amale susumɔi miilaka nyɛ diɛŋtsɛ nyɛhe.
23 Ejaakɛ kɛ́ mɔ ko ji wiemɔ lɛ nulɔ kɛkɛ, ni ejeee mɔ ni kɛtsuɔ nii lɛ, nɛkɛ gbɔmɔ nɛɛ tamɔ mɔ ko ni miikwɛ lɛ diɛŋtsɛ ehiɛ* yɛ ashwishwɛ mli.
24 Ejaakɛ ekwɛɔ ehe, ni eyaa, ni amrɔ nɔŋŋ lɛ ehiɛ kpaa nɔ gbɔmɔ ní eji lɛ nɔ.
25 Shi mɔ ni maa eyi shi ekwɛɔ heyeli mla ni eye emuu lɛ mli, ní ekãa he efeɔ lɛ, ebatsɔɔ mɔ ni tsuɔ nitsumɔ lɛ, shi jeee mɔ ni nuɔ ni ehiɛ kpaa nɔ; ni ebaaná miishɛɛ yɛ nɔ ni etsuɔ lɛ mli.
26 Kɛ́ gbɔmɔ ko susuɔ akɛ eji Nyɔŋmɔ jálɔ, shi ekudɔɔɔ elilɛi jogbaŋŋ* lɛ, eelaka lɛ diɛŋtsɛ etsui, ni ejamɔ lɛ, yaka ni.
27 Jamɔ ni he tse ní abuleko yɛ wɔ-Nyɔŋmɔ kɛ wɔ-Tsɛ lɛ hiɛ ji enɛ: akɛ mɔ akwɛ awusãi kɛ yei okulafoi yɛ amɛmanehulu lɛ mli, ní ekwɛ ehe nɔ jogbaŋŋ ní je lɛ akawo ehe muji.
Shishigbɛ Niŋmaa
^ Aloo “kai.”
^ Aloo “etaooo tɔmɔ yɛ mɔ he.”
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “eshwã.”
^ Kwɛmɔ Wiemɔi Titrii Amligbalamɔ lɛ.
^ Aloo “ní dũɔ lɛ tamɔ bɔ ni akɛ tsɔnenaa loo lakaa kooloo ko ní adũɔ lɛ lɛ.”
^ Aloo “mɔ mli ni hɔɔŋ lɛ he tsɔmɔmɔ ko bɛ lɛ.”
^ Aloo “kɛ nii ni ja yɛ Nyɔŋmɔ hiɛ baaa.”
^ Aloo eeenyɛ efee akɛ, “nibii gbohii ní afeɔ kɛtekeɔ nɔ lɛ.”
^ Aloo “nyɛsusumai ayiwala.”
^ Aloo “ehiɛ su.”
^ Aloo “ewooo elilɛi manyoflɛ.”
