Yakobo 5:1-20
5 Agbɛnɛ, nyɛboa toi, nyɛ niiatsɛmɛi, nyɛfoa ni nyɛwoa yara yɛ hejaramɔi ni miiba nyɛnɔ lɛ hewɔ.
2 Nyɛnii babaoo lɛ ekpɔtɔ, ni nyɛtadei lɛ hu, omlɛ̃gɛ̃i eye.
3 Nyɛshika tsuru kɛ nyɛjwiɛtɛi lɛ edɔ ŋkanale aahu efite, ni amɛhe ŋkanale lɛ baaye odase ashi nyɛ, ni amɛbaaye nyɛheloo lɛ. Nibii ni nyɛbua naa nyɛto lɛ baatsɔmɔ tamɔ la yɛ naagbee gbii lɛ amli.
4 Naa! Nitsulɔi ni kpa nyɛŋmɔji lɛ amli nii lɛ anyɔmɔwoo ni nyɛkɛhãaa amɛ lɛ miibolɔ, ni bolɔmɔi ni nikpalɔi lɛ bolɔɔ ní aye abua amɛ lɛ eyabote Yehowa,* taiatsɛ lɛ, toiiaŋ.
5 Nyɛhi shi ogbɔjɔ ni nyɛŋmɛɛ nyɛhe nyɛhã heloo lɛ akɔnɔi lɛ yɛ shikpɔŋ lɛ nɔ. Nyɛhã nyɛtsuii eshwishwii yɛ gbee gbi lɛ nɔ.
6 Nyɛbu jalɔ lɛ fɔ; ni nyɛgbe lɛ. Ani etsĩii nyɛnaa?
7 Belɛ nyɛmimɛi, nyɛtoa nyɛtsui shi kɛyashia Nuŋtsɔ lɛ baa be lɛ.* Naa! Okwaafonyo yaa nɔ emɛɔ shikpɔŋ nɔ yibii ni jara wa lɛ, ni etoɔ etsui shi yɛ he kɛyashi be ni mra mli nugbɔ lɛ kɛ sɛɛkpee nugbɔ* lɛ baabɔi nɛmɔ.
8 Nyɛ hu nyɛtoa nyɛtsui shi; nyɛhãa nyɛtsuii afia shi shiŋŋ, ejaakɛ Nuŋtsɔ lɛ baa be lɛ* ebɛŋkɛ.
9 Nyɛmimɛi, nyɛkagbigbilia nyɛmli* nyɛwowoa nyɛhe, koni akakojo nyɛ. Naa! Kojolɔ lɛ damɔ shinai lɛ anaa.
10 Nyɛmimɛi, nyɛŋɔa gbalɔi ni wie yɛ Yehowa* gbɛ́i mli lɛ akɛ amanehulu ni anaa kɛ tsui shi ni atoɔ lɛ he nɔkwɛmɔnɔ.
11 Naa! Wɔbuɔ mɛi ni fiɔ shi lɛ akɛ amɛyɛ miishɛɛ.* Nyɛnu Hiob shifimɔ lɛ he, ni nyɛna bɔ ni Yehowa* hã enaagbee fee lɛ, akɛ Yehowa* dɔɔ mɔ he waa,* ni enaa mɔbɔ hu.
12 Nɔ ni fe fɛɛ lɛ, minyɛmimɛi, nyɛkpaa kitã ni nyɛkãa lɛ, nɔ ni akɛ ŋwɛi kãa jio, akɛ shikpɔŋ kãa jio, loo kitã kroko jio. Shi nyɛhãa nyɛwiemɔ “Hɛɛ” afea hɛɛ, ni “Dabi” afea dabi, koni nyɛkagbee kojomɔ mli.
13 Ani nyɛteŋ mɔ ko kɛ shihilɛ ni mli wa miikpe? Eya nɔ esɔle. Ani mɔ ko ená tsuijurɔ? Elá yijiemɔ lalai.
14 Ani nyɛteŋ mɔ ko he miiye?* Etsɛ asafoŋ onukpai lɛ kɛba eŋɔɔ, ní amɛsɔle amɛhã lɛ, amɛkpa lɛ mu yɛ Yehowa* gbɛ́i mli.
15 Ni hemɔkɛyeli sɔlemɔ lɛ baahã helatsɛ lɛ* aná hewalɛ, ni Yehowa* baawó enɔ. Agbɛnɛ hu, kɛ́ efee eshai lɛ, akɛbaafa lɛ.
16 No hewɔ lɛ, nyɛjajea nyɛhe eshai faŋŋ nyɛtsɔɔtsɔa nyɛhe, ní nyɛsɔlea nyɛhãhãa nyɛhe, koni atsa nyɛ. Jalɔ fai ní ekɛ hiɛdɔɔ kpaa lɛ yɛ hewalɛ waa.*
17 Elia ji gbɔmɔ ni yɔɔ henumɔi tamɔ wɔ nɔŋŋ, ni kɛ̃lɛ be ni esɔle kɛ hiɛdɔɔ koni nugbɔ akanɛ lɛ, nugbɔ enɛɛɛ yɛ shikpɔŋ lɛ nɔ afii etɛ kɛ nyɔji ekpaa.
18 Ni no sɛɛ lɛ, esaa esɔle, ni nugbɔ jɛ ŋwɛi shwie shi ni shikpɔŋ lɛ ba nii.
19 Minyɛmimɛi, kɛ́ mɔ ko hã nyɛteŋ mɔ ko du gbɛ kɛje anɔkwale lɛ he, ni mɔ kroko kpale lɛ kɛba lɛ,
20 nyɛnáa nyɛlea akɛ mɔ fɛɛ mɔ ni kpaleɔ eshafeelɔ ko kɛjeɔ egbɛ gbonyo ni ekɔ lɛ nɔ kɛbaa lɛ, ebaahere eshafeelɔ lɛ* yiwala kɛjɛ gbele mli, ni ebaaha eshai pii anɔ.
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Aloo “be ni Nuŋtsɔ lɛ eba lɛ.”
^ Mra mli nugbɔ lɛ jeɔ shishi aaafee October teŋgbɛ. Sɛɛkpee nugbɔ lɛ jeɔ shishi aaafee April teŋgbɛ.
^ Aloo “be ni Nuŋtsɔ lɛ eba lɛ.”
^ Aloo “nyɛkadɔmɔa ŋtsɔi; nyɛkatɔkea.” Sht. ŋm., “nyɛkaboa hũu.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “musuŋ tsɔɔ lɛ waa.”
^ Kwɛmɔ Wiemɔi Titrii Amligbalamɔ lɛ.
^ Aloo “mɛi ni ajɔɔ amɛ.”
^ Ekã shi faŋŋ akɛ, enɛ kɔɔ mumɔŋ hela he.
^ Kwɛmɔ Wiemɔi Titrii Amligbalamɔ lɛ.
^ Aloo eeenyɛ efee akɛ, “mɔ ni etɔ lɛ lɛ.”
^ Kwɛmɔ Wiemɔi Titrii Amligbalamɔ lɛ.
^ Sht. ŋm., “yɛ hewalɛ waa kɛ́ eetsu nii.”
^ Aloo “eshafeelɔ lɛ susuma.”
